E Konflikto Tras di Tur Konflikto

Lesa pa e Estudio di e Siman Akí:

Versíkulo di Memoria:

“No tabatin un dia manera esaki, promé ni despues, ku SEÑOR a skucha bos di un hòmber, pasobra SEÑOR a bringa pa Israel” (Josué 10:14, ESV).

Lesando e páginanan di Josué, nos ta ser konfrontá ku e kampañanan militar agresivo realisá riba mandato di Dios, den nòmber di Dios, i ku yudansa di Dios. E idea ku Dios tabata tras di e konkista di Canaan ta penetrá den e buki di Josué, i e ta ser ekspresá den e afirmashonnan di e naradó (Jos. 10:10-11) den Dios su mes palabranan (Jos. 6:2, Jos. 8:1), den e diskursonan di Josué (Jos. 4:23-24; 8:7), dor di Rahab (Jos. 2:10), dor di e spionnan (Jos. 2:24), i dor di e pueblo (Jos. 24:18). Dios ta afirmá di ta e inisiadó di e konfliktonan violento akí.

E realidat akí ta lanta preguntanan inevitabel. Kon nos por komprondé ku e pueblo skohí di Dios a realisá práktikanan asina den tempu di Tèstamènt Bieu? Kon ta posibel pa rekonsiliá e imágen di un Dios “guerero” ku Su karakter di amor (por ehèmpel, Eks. 34:6, Salmo 86:15, Salmo 103:8, Salmo 108:4) sin debilitá e kredibilidat, outoridat, i historisidat di Tèstamènt Bieu?

E siman akí i e siguiente, nos ta bai eksplorá e pregunta difísil di gueranan divinamente ordená den e buki di Josué i otro kaminda.

Komandante di e Ehérsito di Señor

Lesa Josué 5:13-15. Kiko e teksto akí ta bisa tokante e trasfondo di e konkista di Canaan?

Israel a kaba di krusa Jordan i a subi riba tereno di e enemigu. E fòrti di Jericho ta keda nan dilanti, su portanan firmemente será (Jos. 6:1). Na e punto akí, e pueblo ta inkonsiente di ningun strategia di bataya. Loke ta mas preokupante ainda, Israel tin solamente slengu, lansa i flecha pa ataká un stat fortifiká pa resistí un sitio largu. E preguntanan di Josué tokante e identidat di e bishitante straño ta risibí un kontesta mas bien skur: “Nò.” E kontesta di e bishitante ta revelá ku E no ta dispuesto pa drenta den e kategorianan definí pa Josué. Ku otro palabra, e pregunta final no ta si E ta na banda di Josué; mas bien, Josué ta na Su banda?

Kompará Josué 5:14-15 ku 2 Reinan 6:8-17, Nehemías 9:6, i Isaías 37:16. Kiko bo ta siña tokante e identidat di e komandante di e ehérsito di Señor?

Miéntras ku e ekspreshon “komandante di e ehérsito di SEÑOR” ta úniko den Beibel hebreo, e kombinashon di e términonan “komandante” i “ehérsitonan” semper ta referí na un lider militar. E palabra “ehérsito” den Skritura por referí na trupanan militar, na e angelnan, òf na kurpanan selestial.

E Kristu preenkarná ta aparesé na Josué no solamente komo un aliado, ni sikiera komo e berdadero Komandante di e ehérsito di Israel, sino komo e Komandante di e ehérsito invisibel sinembargo real di angelnan envolví den un konflikto muchu mas grandi ku esun di Josué ku e kananeonan. Josué su kontesta ta indiká klaramente su komprondementu di e identidat di e Komandante. E ta igual na Dios, i Josué ta kai abou dilanti di djE komo un señal di rèspèt profundo i adorashon (Jos. 5:14, Gen. 17:3, 2 Sam. 9:6, 2 Kron. 20:18). Josué ta kla pa risibí e strategia di bataya pa un kampaña militar ku ta un parti fundamental di un konflikto muchu mas grandi den kua e Dios di ehérsitonan Mes ta envolví.

Ki konsuelo nos por, i mester, saka, for di sa ku e “Komandante di e ehérsito di SEÑOR” ta obrando den defensa di Su pueblo?

Guera den Shelu

Josué a komprondé ku e bataya tabata parti di un konflikto mas grandi. Kiko nos sa tokante e konflikto den kua Dios Mes tabata envolví? Lesa Rev. 12:7-9, Isa. 14:12-14, Ezek. 28:11-19, i Dan. 10:12-14.

Dios a pobla e universo ku kriaturanan responsabel na ken El a duna boluntat liber, un prerekisito pa nan por stima. Nan por skohe pa aktua di akuerdo ku, òf kontra, e boluntat di Dios. Esun di mas poderoso di angelnan, Lucifer, a rebeldiá kontra Dios, i a hiba hopi angel kuné.

Isaias i Ezekiel ta referí na e konflikto, aunke algun komentarista ta purba restringí e nifikashon di Isaias 14 i Ezekiel 28 na e rei di Babilonia i na un gobernante na Tiro. Sinembargo, tin indikadónan kla den e teksto bíbliko ku ta mustra riba un realidat trasendente. E rei di Babilonia ta ser presentá komo un ser ku tabata den shelu na e trono di Dios (Isa. 14:12-13), i e rei di Tiro ta ser bisá ku el a biba den Eden komo un kerubin protektivo riba e seru santu di Dios (Ezek. 28:12-15). Nada di esaki ta bèrdat tokante e reinan di Babilonia i Tiro.

No por ser bisá tampoko tokante e reinan terenal ku nan tabata sin kulpa i e “renchi di seyo di perfekshon.” Konsekuentemente, e personahenan akí ta mustra mas ayá di e reinonan literal di Babilonia i Tiro.

Isaias ta presentá un “parabel” (hebr. mashal), ku ta transmití un nifikashon mas ayá di e konteksto históriko inmediato. Den e kaso akí, e rei di Babilonia ta bira un paradigma di rebelion, outosufisiensia, i orguyo. Di manera similar, Ezekiel ta hasi un distinshon entre e prens di Tiro (Ezek. 28:2) i e rei di Tiro (Eze. 28:11-12), kaminda e prens, siendo aktivo den e reino terenal, ta bira e símbolo di un rei ku ta aktua den esun selestial.

Di akuerdo ku Daniel 10:12-14, e sernan selestial rebelde akí ta stroba kumplimentu di e propósitonan di Dios riba tera. Ta den lus di e konekshon akí entre shelu i tera nos tin ku komprondé e gueranan di Israel sanshoná divinamente. Nos mester rekonosé nan komo manifestashonnan terenal di e gran konflikto entre Dios i Satanas, i entre bon i malu, tur finalmente ku e propósito di restourá e hustisia i amor di Dios den un mundu kaí.

Señor ta un Guerero

Lesa Eksodo 2:23-25; Eksodo 12:12-13; i Eksodo 15:3-11. Kiko ta nifiká ku Dios ta un guerero?

Durante nan estadia largu na Egipto, e israelitanan a lubidá e Dios berdadero di nan antepasadonan. Manera hopi episodio di nan biahenan atraves di desierto a demostrá, nan konosementu di e Dios di Abraham, Isaac i Jacob a debilitá, i nan a meskla elementonan pagano den nan práktikanan religioso (kompará ku Eks. 32:1-4). Bou di e opreshon di e egipsionan, nan a sklama na Señor (Eks. 2:23-25), i na e momentu korekto, Señor a intervení na nan fabor.

Sinembargo, e konflikto deskribí den e promé 12 kapítulonan di Eksodo tabata mas grandi ku un simpel lucha pa poder entre Moises i e fárao. Di akuerdo ku ideologia di guera antiguo di Oriente Serkano, konfliktonan entre pueblonan finalmente tabata ser konsiderá komo konfliktonan entre e respektivo dios òf diosnan. Eksodo 12:12 ta deklará ku Señor a imponé huisio, no solamente riba e fárao, sino tambe riba e diosnan di Egipto, e demoñonan poderoso ei (Lev. 17:7, Deut. 32:17) ku tabata para tras di e poder opresivo i sistema sosial inhustu di Egipto.

Finalmente, Dios ta den guera ku piká i lo no tolerá e konflikto akí pa semper (Salmo 24:8; Rev. 19:11; Rev. 20:1-4,14). Tur e angelnan kaí, komo tambe e sernan humano ku definitivamente i irekuperablemente a identifiká nan mes ku piká, lo ser destruí. Den lus di esaki, e batayanan kontra e habitantenan di e tera mester ser persibí komo un etapa mas trempan di e konflikto akí, ku lo alkansá su kulminashon riba krus, i su konsumashon na e huisio final, ora e hustisia i karakter di amor di Dios lo ser vindiká.

E konsepto di e destrukshon total di e kananeonan mester ser komprondé a base di e kòsmovishon bíbliko, den kua Dios ta envolví den un konflikto kósmiko ku e eksponentenan di maldat den universo. Loke ta na peliger finalmente ta e reputashon di Dios i Su karakter (Rom. 3:4, Rev. 15:3). Komo ku piká a drenta den eksistensia humano, niun hende por para riba tereno neutral. Un hende mester ta sea na banda di Dios òf na banda di maldat. P’esei, ku e trasfondo akí den mente, e eradikashon di e kananeonan mester ser mirá komo un previsualisashon di e huisio final.

Señor Lo Bringa pa Boso

Segun Eksodo 14:13-14,25, kiko tabata e plan original i ideal di Dios relashoná ku e envolvimentu di e israelitanan den guera?

Den e momentu di krísis ei, ora e pueblo di Israel a ser fòrsá den un impase físiko, “Moises a kontestá e pueblo: ‘No tene miedu. Para firme i boso lo mira e liberashon ku SEÑOR lo trese pa boso awe. E egipsionan ku boso ta mira awe, boso lo no mira nunka mas. SEÑOR lo bringa pa boso; bo mester solamente keda ketu’ ” (Eks. 14:13-14, NIV). Di akuerdo ku e narativo bíbliko, asta e egipsionan mes a komprondé e realidat ei: “Laga nos hui for di e kara di Israel, pasobra SEÑOR ta bringa pa nan kontra e egipsionan” (Eks. 14:25, NKJV).

E intervenshon milagroso di Dios pa e israelitanan indefenso, no entrená den abilidatnan militar, ta bira e patronchi. E Eksodo a konstituí e modelo, e paradigma, pa e intervenshon di Dios na fabor di Israel. Aki no solamente e bataya ta ser bringá dor di Yahweh, sino Israel ta ser rekerí pa no bringa (Eks. 14:14). Dios ta e guerero; e inisiativa ta pertenesé na djE. E ta establesé e strategia, ta definí e medionan, i ta kondusí e kampaña. Si Yahweh no bringa pa Israel, nan no tin niun posibilidat di éksito.

Ellen G. White ta interpretá esaki komo un ekspreshon di e echo ku Dios “no a destiná pa nan gana e tera di promesa pa medio di guera, sino atraves di sumishon i obediensia deskualifiká na su mandatonan.”—Ellen G. White, The Signs of the Times, 2 di sèptèmber 1880. Meskos ku den nan liberashon for di Egipto, Dios lo a bringa nan batayanan pa nan. Tur loke nan mester a hasi tabata para ketu i ta testigu di Su intervenshon poderoso.

Historia ta demostrá ku ki ora ku Israel tabatin sufisiente konfiansa den Dios, nan no tabatin mester di bringa (lesa 2 Reinan 19, 2 Krónikanan 32, Isaias 37).

Den e plan ideal di Dios, Israel nunka mester a bringa pa nan mes. Tabata un konsekuensia di nan inkredulidat, ekspresá despues di e Eksodo, ku Dios a pèrmití nan di tin un parti den e guera kondusí kontra e kananeonan. Di mes manera, nan no tabatin mester di lanta ni un solo spada kontra e egipsionan durante e Eksodo; nunka lo tabata nesesario pa nan bringa pa konkistá Canaan (Deut. 7:17-19).

“Si e yunan di Israel no a murmurá kontra Señor, lo E no a laga nan enemigunan hasi guera ku nan.”—Ellen G. White, The Story of Redemption, p. 134. Kon murmuramentu kisas lo por impaktá nos bida awe?

E Segundo Mihó Opshon

Lesa Eksodo 17:7-13 i Josué 6:15-20. Ki similaridatnan bo ta haña entre e dos narativonan di guera akí? Kon nan ta diferensiá?

E promé biaha ku Israel a bringa despues di e Eksodo ta registrá den Eksodo 17, kaminda e israelitanan a defendé nan mes kontra e amalekitanan. Israel a presensiá e poder todopoderoso di Dios, tantu ora El a afligí e egipsionan komo hiba e israelitanan na libertat. Nos a mira ku e plan inisial di Dios pa Israel no a inkluí bringa kontra otro hende (Eks. 23:28, Eks. 33:2). Pero korto tempu despues di nan liberashon for di Egipto, e israelitanan a kuminsá murmurá na kaminda (Eks. 17:3), asta kuestionando e presensia di Dios meimei di nan. Tabata na e momentu ei ku Amalek a bin bringa kontra Israel. Esaki no tabata pa kasualidat. Dios a pèrmití e amalekitanan ataká Israel pa asina nan lo por a siña konfi’E atrobe.

Sin komprometé Su prinsipionan, Dios ta baha bin na e nivel kaminda Su pueblo ta, kontinuamente yamando nan bèk na e plan ideal: konfiansa kompleto i sin reserva den intervenshon divino. De echo, e lei di guera (Deuteronomio 20) a ser duná solamente despues di e 40 añanan di eksperensia den desierto, loke tambe a ser kousá pa e inkredulidat di Israel. Sirkunstansianan nobo a demandá strategianan nobo, i ta solamente e ora ei Dios a rekerí Israel pa destruí e kananeonan kompletamente (Deut. 20:16-18).

Ademas di e realidat ku guera a bira un nesesidat pa Israel, el a resultá tambe di ta un prueba di nan lealtat na Yahweh. Dios no a entregá riba nan sino a pèrmití nan pa ta testigu di Su poder dor di eksperensiá dependensia total riba djE.

E partisipashon di e israelitanan den e konkista ta evidente for di e konklushon saká dor di Josué na final di e buki. Aki ta ser bisá ku e kananeonan a bringa kontra e israelitanan (Jos. 24:11). Miéntras ku e derumbe di e murayanan di Jériko tabata resultado di un milager divino, e pueblo di Israel mester tabata envolví aktivamente den e bataya i enfrentá e resistensia tèrko di e habitantenan di e stat.

E partisipashon di Israel den konflikto armá a bira un manera pa desaroyá konfiansa inkondishonal den yudansa di Yahweh. Sinembargo, Israel semper tabata ser rekordá (Jos. 7:12-13; Jos. 10:8) ku e resultado di kada bataya finalmente tabata den man di Señor, i e úniko manera ku nan por a influensiá e resultado di un konflikto militar tabata pa medio di nan aktitut di fe, òf inkredulidat, pa ku e promesanan di Señor. E eskoho tabata di nan mes.

Lesa Ellen G. White, “The Fall of Jericho,” p. 487-493, den Patriarchs and Prophets.

Ora rebelion kontra e outoridat di Dios a surgi den universo, sea Dios tabata bai stòp di ta loke E ta esensialmente, inmutabelmente, i eternamente, i duna e liderazgo di henter universo na un di Su kriaturanan rebelde, òf E tabata bai ta e Tata santu, hustu, amoroso i mizerikòrdioso di tur loke ta eksistí. Beibel ta presentá e di dos kuadro i, den e kaso akí, e choke entre e forsanan di maldat i Su poder ta inevitabel.

Ora podernan polítiko òf sosiohistóriko asosiá ku forsanan kósmiko kaótiko i rebelde a manifestá e mesun aktitut desafiante kontra Yahweh, E, komo e Señor Soberano di universo, a intervení. E motibu di Yahweh komo un guerero ta bira un prefigurashon di e viktoria final ei, ku finalmente lo pone un fin na e konflikto kósmiko kontinuo entre bon i malu (Rev. 20:8-10). Ademas, E gueranan divino di Israel no solamente ta reflehá un bista di e konflikto kósmiko manera den un spil sino ta parti integral di e mesun kontroversia, antisipando e huisio di Dios na fin di tempu den e esfera di historia presente.

“Dios a hasié nan privilegio i nan deber pa drenta e tera na e momentu ku E a skohe, pero pa motibu di nan negligensia intenshonal e pèrmit ei a ser retirá. … No tabata Su propósito pa nan a gana e tera pa medio di guera, sino atraves di obediensia estrikto na Su mandatonan.”—Ellen G. White, Patriarchs and Prophets, p. 392.

Preguntanan pa Diskushon: