E Enemigu Interno

Lesa pa e Estudio di e Siman Akí:

Versíkulo di Memoria:

“Ami, SEÑOR, ta skrudiñá kurason i ta tèst e mente, pa duna kada hende segun su kamindanan, segun e fruta di su echonan” (Jeremias 17:10, ESV).

Josué 7 ta e promé kaso kaminda, atraves di un eksperensia trágiko, e pueblo di Israel a siña e konsekuensianan di gran alkanse di e pakto i su nifikashon profundo. Miéntras ku obediensia na e stipulashonnan di e pakto a sigurá viktoria, deskonsiderá e términonan di e pakto a trese derota. E éksito militar di Israel no tabata dependé di nan kantidat, strategia di bataya, òf táktikanan inteligente sino di e presensia di e Guerero Divino huntu ku nan.

Durante e apropiashon di e Tera Primintí, Israel mester a siña e lès difísil ku nan enemigu di mas peligroso no tabata pafó di nan kampamentu sino denter di nan propio filanan. E reto di mas grandi ku tabata para nan dilanti no tabata ni e murayanan fortifiká di e statnan kananeo ni nan teknologia militar avansá, sino e boluntat opstiná di individuonan denter di nan mes kampamentu pa ignorá e instrukshonnan di Señor deliberadamente.

Wardando riba nos herensia selestial (1Pe. 1:4, Kol. 3:24), nos ta enfrentá retonan similar. Miéntras nos ta na frontera di e Tera Primintí, nos fieldat ta ser poné na prueba, i nos por ta viktorioso solamente pa medio di sumishon na Hesu-Kristu.

Inkumplimentu di e Pakto

Lesa Josué 7. Kua tabata e dos kousanan prinsipal di e derota di Israel dor di e habitantenan di Ai?

Ta interesante pa opservá ku e lektor konosé, for di prinsipio, e motibu di e rabia di Yahweh, i tambe e nòmber di e ofensor. Pues, e suspenso di e storia di deskubrí e falta di Achan ta ser proveé dor di e tenshon entre e perspektiva di e lektor i esun di Josué i e israelitanan. Meskos ku hopi otro kapítulo di Tèstamènt Bieu, Josué 7 tin un struktura kiástiko (paralelismo invertí). E segmento sentral i klimátiko denter di dje ta kontestá e pregunta di dikon e israelitanan no por a konkistá Ai riba nan promé intento.

Tabatin dos motibu prinsipal pa e derota di Israel dor di e habitantenan di Ai: e piká Achan i e ekseso di konfiansa di e israelitanan den nan mes forsa. E último a resultá den nan negligensia pa konsultá e boluntat di Señor promé ku e atake kontra Ai i nan balotashon di e forsa di e enemigu.

E pakto entre Yahweh i Israel a envolví e pueblo tantu na nivel individual komo korporativo. Den lus di e pakto, Israel ta ser tratá komo un unidat indivisibel di e nashon skohí di Dios; p’esei, e piká di un, òf asta algun, di su miembronan ta kousa kulpa riba henter e komunidat di pakto. Manera Señor a bisa: “Israel a peka, i tambe nan a transgresá Mi aliansa ku Mi a ordená nan” (Jos. 7:11, NKJV).

Kua ta maneranan ku komunidatnan kompletu por sufri, i a sufri, di e mal aktonan di individuonan denter di e komunidat? Riba ki ehèmpelnan bo por pensa, i kon e komunidat a ser impaktá?

E Piká di Achan

Lesa Josué 7:16-19. Kiko henter e prosedura ta bisa nos tokante tantu Dios komo Achan?

En bes di revelá e identidat di e transgresor, Dios ta establesé un prosedura ku ta revelá tantu Su hustisia komo Su grasia. Despues di a splika e motibu pa e derota di Israel i a yama pa santifikashon di e pueblo (Jos. 7:13), E ta permití un periodo di tempu entre e anunsio di e prosedura i su aplikashon, loke ta duna Achan tempu pa pensa, arepentí i konfesá su piká. Di forma similar, su famia (si nan tabata sa kiko a pasa) tin e oportunidat pa disidí si nan ke ta envolví den e enkubrimentu òf nenga di ta kómplise, manera e yunan di Korah, ku a evitá destrukshon dor di nenga di bai na banda di nan tata (kompará ku Num. 16:23-33, Num. 26:11).

E solushon pa e situashon ta sigui e direkshon kontrali na kon el a drenta i asotá Israel: kulpa korporativo ta ser eliminá i redusí for di Israel na un tribu; di tribu pa famia; di famia pa kas; i di kas pa individuonan. Ademas di revelá e ofensor, e proseso investigativo tambe a limpia e inosente. Esaki tabata un aspekto igualmente importante di e prosedura hurídiko metikuloso, kaminda Dios Mes ta fungi komo testigu di e aktonan invisibel di Achan.

E lektor kasi por sinti e tenshon ora Dios ta sentra riba Achan. Ken no por keda asombrá di e hòmber su tèrkedat di spera ku e por a keda sin ser detektá? Nada ta skondí pa e wowonan penetrante di Señor (Salmo 139:1-16, 2 Kron. 16:9), ku sa kiko ta skondí den kurason di un hende (1Sam. 16:7, Jer. 17:10, Prov. 5:21).

Ta importante pa nota e manera ku Josué ta dirigí su mes na Achan: “Mi yu.” E ekspreshon akí no ta mustra solamente e edat i ròl di liderazgo di Josué, sino tambe ta revelá e spiritu den kua e gran guerero akí a aserká hustisia. Su kurason tabata yen di kompashon pa Achan, aunke el a ser yamá pa ehekutá huisio riba e ofensor. Pa medio di su aktitut, Josué tabata bolbe prefigurá e sensitividat, bondat i amor di Esun ku “nunka tabata grosero, nunka a papia un palabra severo innesesario, nunka a duna doló innesesario na un alma sensibel.... E [Hesus] a denunsiá hipokresia, inkredulidat i inikidat sin miedu, pero tabatin lágrimanan den Su bos ora E tabata pronunsiá Su reprenshonnan skèrpi.”—Ellen G. White, The Desire of Ages, p. 353.

Eskohonan Fatal

Lesa Josué 7:19-21. Kiko Josué ta pidiendo Achan hasi? Kiko ta nifikashon di un petishon asina? Kon nos ta komprondé su konfeshon?

Josué ta pidi Achan pa hasi dos kos: di promé, duna gloria na Dios i honr’E. Di dos, konfesá loke el a hasi sin skonde esaki. Achan mester a duna gloria na Dios dor di atmití loke el a hasi. E término usá aki (todah) por referí na gradisimentu (Salmo 26:7, Isa. 51:3, Jer. 17:26), pero tambe na konfeshon di piká (Esdras 10:11).

Desafortunadamente, e teksto bíbliko no ta duna indikashon ku Achan a mustra kualke señal di berdadero arepentimentu. E tabata spera te na final di keda skondí. Su aktitut desafiante a kalifik’é pa ser konsiderá komo un ofensor arogante, pa ken no tabatin ekspiashon segun e lei di Moises (kompará ku Num. 15:27-31).

E palabranan di Achan den Josué 7:21 ta rekordá e kaida di Adam i Eva. Eva a mira (ra’ah) ku e palu tabata deseabel (kḥamad) i finalmente a kohe (laqakḥ) for di su fruta (Gen. 3:6). Den su konfeshon, Achan ta atmití ku el a mira (ra’ah) den e sakeo un bunita mantel di Sinar, 200 siklo di plata, i un bara di oro. E ora ei el a kudishá (kḥamad) i a kohe (laqakḥ) nan. Meskos ku den kaso di Adam i Eva, e eskoho di Achan ta revelá ku e piká di kudishi ta e piká di inkredulidat. E ta sospechá ku Dios no ke lo mihó pa Su kriaturanan i di ta skonde algun plaser ekskisito for di nan, ku ta pertenesé na e reino di divinidat so.

Ademas di e alushon na e kaida humano primordial, e teksto ta destaká un kontraste fuerte entre e aktitutnan di Rahab (kompará ku Jos. 2:1-13) i esun di Achan. Esun a hiba e spionnan na e dak i a skonde nan pa e sòldánan; e otro a kohe kosnan prohibí i a skonde nan pa Josué. Esun a mustra bondat na e spionnan israelita i a yuda nan sigurá viktoria; e otro a trese problema riba Israel dor di su golosidat i a sigurá derota. Esun a sera un aliansa ku e israelitanan; e otro a kibra e aliansa ku Yahweh. Rahab a salba su mes i su famia, i nan a bira siudadanonan respetá den Israel; Achan a kondená su mes i su famia na morto i a bira un ehèmpel di bèrgwensa.

E Porta di Speransa

Lesa Josué 8:1-29. Kiko e storia akí ta konta nos tokante kon Dios por transformá nos frakasonan di mas abominabel den oportunidatnan?

E strategia di Yahweh ta kombertí e derota inisial di Israel den un bentaha táktiko, transformando asina e Vaye di Achor (palabra hebreo pa “problema”) den un porta di speransa (kompará ku Jos. 2:15). Despues di a haña muchu konfiansa den nan mes dor di nan promé viktoria riba e israelitanan, e siudadanonan di Ai ta ripití nan strategia di ataká e israelitanan ku ta fingi retiro i derota. Unabes ku e habitantenan di Ai a ser sedusí for di nan baluarte, e 30.000 israelitanan, posishoná no muchu leu patras di e stat (Jos. 8:4), lo kapturá e stat bashí dor di send’e na kandela. Josué 8:7 ta splika bon kla ku no ta e strategia ta trese viktoria, sino ta Señor Mes lo duna e viktoria i entregá e stat di Ai na e israelitanan. Asta den un kapítulo den kua e aspektonan militar ta dominá e narativo mas ku den kualke otro kapítulo di e buki, e teksto ta resaltá e bèrdat fundamental ku viktoria ta e regalo di Yahweh.

E momentu desisivo di e bataya ta tuma lugá ora e hòmbernan di Ai ta bandoná e stat i ta kuminsá pèrsiguí e israelitanan. Esaki ta e di dos biaha ku Dios ta papia den henter e kapítulo despues ku El a duna e strategia den Josué 8:2, dunando señal ku E ta supervisá e bataya. Te na e momentu akí, nos no sa resultado di e bataya. For di e punto akí padilanti, ta bira kla ku e ehérsito israelita ta viktorioso.

E arma den man di Josué tabata un zeis, of sabel, mas bien ku un spada of flecha. Den tempu di Josué, kisas e no a ser usá komo un arma real, ma el a bira un símbolo di soberania. I, ademas di duna señal pa atake, e ta ekspresá e soberania di Dios den e derota di Ai. Dor di ekstendé e spada di zeis te ora ku e viktoria kompletu ta ganá, ta mustra ku Josué a asumí kompletamente e ròl di liderazgo ku Moises a ehersé na e krusamentu di Laman Kòrá (Eks. 14:16) i den e guera kontra e amalekitanan (Eks. 17:11-13), kaminda Josué a dirigí e kombate personalmente.

E biaha akí no tin intervenshon visibel, milagroso di Dios, sinembargo, e viktoria riba Ai no ta ser asistí ménos divinamente ku esun riba e egipsionan den e promé generashon òf den e viktoria resien riba Jericho. E klave pa éksito ta den Josué su fe den e palabra di Señor i su obediensia inkebrantabel na dje. E prinsipio mirá den e storia akí ta keda bálido pa e pueblo di Dios awe, unda ku nan ta biba i loke sea ta nan retonan.

Un Testigu di e Poder di Dios

Manera nos a siña (wak lès sinku), Dios a duna e nashonnan pagano un oportunidat pa sa tokante djE i pa bira for di nan mal kamindanan. Nan, sinembargo, a nenga i finalmente tabata enfrentá e huisio di Dios.

Lesa Josué 7:6-9, ku ta trata ku Josué su reakshon inisial riba e kalamidat ku a pasa riba nan. Enfoká spesialmente riba Josué 7:9. Ki prinsipio teológiko importante ta ser hañá den su palabranan?

Na promé instante, Josué ta zona manera e yunan di Israel a hasi meimei di nan difikultatnan despues di a bandoná Egipto, manera: “O, ku nos a muri na man di SEÑOR den tera di Egipto, ora nos tabata sinta banda di e weanan di karni i ora nos tabata kome pan yena nos barika! Pasobra bo a saka nos trese den e desierto akí pa mata henter e asamblea akí ku hamber” (Eks. 16:3, NKJV).

I ata Josué aki: “Ai, Señor DIOS, dikon Bo a trese e pueblo akí na e otro banda di Jordan, pa entregá nos den man di e amoreonan, pa destruí nos? O, ku nos tabata satisfecho i a biba na e otro banda di Jordan!” (Jos. 7:7, NKJV).

Djis despues, sinembargo, e ta mustra su gran preokupashon pa e daño ku e nòmber i reputashon di Dios lo haña dor di e derota aki. “Pasobra e kananeonan i tur e habitantenan di e tera lo tende esaki, i rondoná nos, i kòrta nos nòmber kita for di riba tera. E ora ei, kiko lo Bo hasi pa Bo gran nòmber?” (Jos. 7:9, NKJV).

Esaki ta revelá un tema i prinsipio ku tabata sentral den e propósitonan di Dios ku Israel. Aunke E tabata ke pa e nashonnan pagano rònt di nan mira ki gran kosnan Dios lo a hasi pa Su pueblo ku a obedes’E, nan por a tambe, manera Rahab a hasi, siña tokante e Dios di Israel dor di e poder di e konkistanan di Su pueblo. Na otro banda, si kosnan a bai malu, manera nan a hasi aki, e nashonnan lo a konsiderá e Dios di Israel débil i inefektivo (lesa Num. 14:16, Deut. 9:28), loke por a enkurashá resistensia kananeo.

Ku otro palabra, asta den e konteksto di e hebreonan su tumamentu di e tera, asuntunan i prinsipionan grandi tabata envolví, ku a inkluí trese honor i gloria na Dios, kende tambe tabata e úniko speransa pa e paganonan, komo tambe pa Israel.

Lesa Ellen G. White, “The Fall of Jericho,” p. 493-498, den Patriarchs and Prophets.

“E piká mortal ku a hiba na ruina di Achan tabatin su rais den kudishi, di tur piká un di esnan konsiderá di mas komun i di mas leve.... “Achan a rekonosé su kulpa, ma ora tabata muchu lat pa e konfeshon benefisiá su mes. El a mira e ehérsitonan di Israel regresá for di Ai derotá i desanimá; tòg e no a bini dilanti i konfesá su piká. El a mira Josué i e ansianonan di Israel bùig te na suela den tristesa muchu grandi pa palabranan. Si el a hasi konfeshon e ora ei, e lo a duna algun prueba di berdadero penitensia; pero ainda el a keda ketu. El a skucha e proklamashon ku un krímen grandi a ser kometé, i asta a tende su karakter definitivamente deklará. Pero su lepnan tabata seyá. Despues a bini e investigashon solèm. Kon su alma a keda emoshoná ku teror ora el a mira su tribu señalá, despues su famia i su kas! Pero tòg e no a pronunsiá ningun konfeshon, te ora ku e dede di Dios a ser poné riba dje. E ora ei, ora su piká no por a ser skondí mas, el a atmití e bèrdat. Kuantu biaha konfeshonnan similar ta ser hasí. Tin un diferensia enorme entre atmití echonan despues ku nan a ser probá i konfesá pikánan konosí solamente pa nos mes i pa Dios. Achan lo no a konfesá si e no a spera ku, dor di hasi esei, lo a evitá e konsekuensianan di su krímen. Pero su konfeshon a sirbi solamente pa mustra ku su kastigu tabata hustu. No tabatin repentimentu genuino pa piká, ni kontrishon, ni kambio di propósito, ni repudio di maldat.”—Ellen G. White, Patriarchs and Prophets, p. 496-498.

Preguntanan pa Diskushon: