Lealtat Supremo:
Adorashon den un Zona di Guera

Lesa pa e Estudio di e Siman Akí:

Versíkulo di Memoria:

“Ma buska promé e reino di Dios i Su hustisia, i tur e kosnan akí lo ser agregá na boso” (Mateo 6:33, ESV).

E siman akí nos ta bai wak algun momentu klave durante presensia di Israel den e Tera Primintí, ora ku Israel a redediká nan mes na Señor, tin biaha enfrente di peliger inminente. Josué a tuma e desishon aparentemente irashonal pa sirkunsidá e israelitanan riba teritorio enemigu (Jos. 5:1-9); pa selebrá Pasku enfrente di peliger inminente (Jos. 5:10-12); pa traha un altar i adorá Señor miéntras e konkista tabata den pleno marcha (Jos. 8:30-35); i pa lanta e tabernakel di Señor ora shete tribu den Israel no a risibí nan herensia ainda (Jos. 18:1-2).

Den nos bida okupá, nos tin tendensia di duna atenshon na e urgensianan ku bida ta tira riba nos. Hopi biaha nos ta neglishá di krea tempu di kalidat pa renobá nos kompromiso ku Dios i pa para ketu i ekspresá nos gratitut pa loke El a hasi i diariamente ta sigui hasi pa nos. Adorashon di mainta i anochi, komo tambe e altar familiar, ta parse di ta asina for di konteksto den nos bida sobrekargá, impulsá pa komodidat i orientá riba logro. Sinembargo, den profundidat di nos kurason, nos tur sa ku e okashonnan ku nos ta pasa huntu ku Dios i nos sernan kerí ta e mihó invershon di nos tempu limitá.

Aliansa Promé

Lesa Josué 5:1-7. Dikon Señor a ordená Josué pa sirkunsidá e di dos generashon di israelitanan na e tempu partikular akí di e konkista?

Despues di e eksplorashon di e pais, e informe alentador di e spionnan, i e krusamentu milagroso di Jordan, nos lo a spera un kompromiso inmediato ku e enemigu. Sinembargo, tin algu mas importante ku e konkista militar: e pakto di Israel ku Dios.

Promé ku e generashon nobo por a partisipá den poseé e tera, nan mester tabata totalmente konsiente di nan relashon spesial ku Doño di e tera. E renobashon di e señal di pakto ta bini komo un reakshon riba e akto mizerikòrdioso i milagroso di Dios di trese Israel sano i salvo atraves di Jordan.

Nos aliansa ku Dios semper mester ta un kontesta di gratitut pa loke El a logra kaba pa nos, nunka un akto di purba optené algun benefisio dor di konformidat legalista na Su rekerimentunan. (E mesun konsepto akí, sin duda, tabata krusial pa e lucha di Pablo ku esnan ku a insistí pa konversonan maskulino pagano ser sirkunsidá, manera ta mira mas kla den su karta na e Galationan.)

Israel tabata na rant di e kampaña militar di mas grandi di su historia, i nos lo a spera ku henter e kampamentu lo tabata okupá ku preparashonnan di guera. E tabata, ma no den e sentido konvenshonal. En bes di prepará e kabainan i mula e spadanan, nan a partisipá den un ritual ku a laga mayoria di e forsa di kombate vulnerabel pa por lo ménos tres dia.

Nan a hasi esaki pa selebrá nan relashon ku nan Dios, kende a libra nan for di Egipto. Dikon? Pasobra nan a rekonosé ku e bataya ta pertenesé na Señor. E ta esun ku ta duna nan viktoria i éksito. Hesus a formulá e mesun prinsipio ku palabranan un poko diferente: “Ma buska promé e reino di Dios i Su hustisia, i tur e kosnan akí lo ser agregá na boso” (Mat. 6:33, NKJV). Mayoria biaha, bida diario ta parse di ta preshoná nos ku e urgensia di asina tantu kos importante, ku nos ta lubidá di duna prioridat na e kos di mas importante den nos bida: e renobashon diario di nos kompromiso ku Kristu.

Pensa riba e biahanan ku bo a neglishá tempu ku Dios pa motibu di asuntunan mas “importante”. Dikon esaki ta asina fásil pa hasi, i kon nos por lucha kontra dje?

Pasku

Dikon ta signifikante ku Josué a skohe pa selebrá Pasku apesar di e tarea urgente i inmenso di tuma poseshon di e Tera Primintí? Lesa Jos. 5:10; Eks. 12:6; Lev. 23:5; Num. 28:16; Deut. 16:4-6.

E di dos aktividat importante ku ta presedé e konkista ta e selebrashon di Pasku. Esaki ta tuma lugá riba e anochi di e di dieskuater dia di luna, den kumplimentu kuidadoso ku e instrukshonnan duná dor di Dios. E nifikashon simbóliko di e selebrashon di Pasku ta risibí énfasis spesial: e susesonan den Josué ta reflehá esnan di e Eksodo. Pasku ta evoká e anochi di e di dies plaga (Eksodo 12), ora e angel di Señor a mata tur e primogénitonan na Egipto i a spar e israelitanan. Esaki ta ser siguí pa e Eksodo for di Egipto, e krusamentu di Laman Kòrá, i e biahe dor di desierto.

Kontrali na esei, e storia di e di dos generashon ta kuminsá den desierto, ta sigui ku e krusamentu di Jordan, ta envolví sirkunsishon i e selebrashon di Pasku, i ta hiba na e momentu krusial ora un otro intervenshon milagroso di Señor ta di spera kontra e enemigu di Israel, e habitantenan di Canaan. Huntu ku tur e aktonan anterior, e selebrashon di Pasku ta marka e komienso di un era nobo den historia di Israel.

Tambe, pa medio di e símbolo di e lamchi di sakrifisio, e Fiesta di Pasku tabata mustra bèk na e redenshon di e israelitanan for di sklabitut egipsio. Pero tambe e tabata mustra padilanti na su kumplimentu antitípiko den e Lamchi di Dios (Juan 1:29-36; 1 Kor. 5:7; 1 Pe. 1:18-19), kende a reskatá nos for di e sklabitut di piká. Na e Sena di Señor, promé ku El a ofresé Su mes komo e Sakrifisio Supremo, Hesus a transformá Pasku den un konmemorativo di Su morto (Mat. 26:26-29, 1 Kor. 11:23-26).

Sinembargo, Pasku i e Sena di Señor ta señalá un realidat ainda mas glorioso: esun di e multitut redimí drentando den e Canaan selestial. Huan e reveladó ta ilustrá e evento antitípiko akí di “krusamentu” komo e 144.000 kanando riba e laman di kristal, e Laman Kòrá antitípiko i riu Jordan, dilanti di e trono di Dios (Rev. 4:6; Rev. 7:9-10) i selebrando e Pasku antitípiko i e Sena di Señor na e sena di matrimonio di e Lamchi (Mat. 26:29, Rev. 19:9).

Altarnan di Renobashon

Kiko tabata e motivashon di Josué pa konstruí un altar pa Señor? Lesa Jos. 8:30-31; kompará ku Deut. 11:26-30, Deut. 27:2-10.

Den tempu di e patriarkanan, altarnan tabata marka e kaminda di nan peregrinashon i a bira representashonnan tangibel di nan demanda riba e tera, ku a ser primintí dor di Dios. Awor, dor di lanta un altar, e israelitanan tabata duna testimonio di kumplimentu di e promesanan duná na nan antepasadonan. Den e kaso akí, e lantamentu di e altar ta e kumplimentu direkto di e instrukshonnan duná dor di Moises (Deut. 11:26-30, Deut. 27:2-10).

Josué 8:30-35 ta hunga un ròl signifikante den forma henter e mensahe teológiko di e buki. Dor di konektá un di e historianan mas horibel i violento (guera) ku algu totalmente diferente, un esena di reafirmashon di pakto (adorashon), Josué ta hiba nos bèk na un di e temanan teológiko di mas importante lansá den e buki na kuminsamentu: Josué tin e mandato di hiba Israel na un bida di obediensia di pakto (Jos. 1:7). Esaki tambe ta e ròl di Josué na final di e buki (Josué 24).

Apesar di e importansia di guera i e konkista, tin algu ainda mas vital: lealtat na e rekerimentunan di e lei di Dios. E konkista ta solamente un paso den e kumplimentu di e plan di Dios pa Israel i restourashon di henter humanidat. Fieldat na e preseptonan di e Torah ta konstituí e asuntu di mas importante den e destino di humanidat. Josué ta skirbi e kopia di e lei riba piedranan grandi, hasí blanku, diferente for di e piedranan di e altar (kompará ku Deut. 27:2-8). Pues, e piedranan, ku probablemente tabata kontené e Dies Mandamentunan, a forma un monumento separá den besindario di e altar, rekordando e israelitanan konstantemente di e privilegionan i debernan impliká den e pakto. Josué ta prefigurá e Jehoshua (Hesus) di Tèstamènt Nobo, kende su mishon tabata, entre otro kosnan, pa hiba humanidat bèk na obediensia na Dios. Pa por a logra e meta akí, E mester a kuminsá un konflikto ku e podernan di maldat. Su meta final tabata pa kumpli ku e rekerimentunan di e pakto na nos fabor: “Pasobra tur e promesanan di Dios den djE ta Sí, i den djE Amèn, pa e gloria di Dios dor di nos” (2 Kor. 1:20, NKJV).

Skirbí riba Piedra

Lesa Josué 8:32-35. Kiko ta nifikashon di e akto deskribí den e versíkulonan akí, i kiko e mester bisa nos awe?

Seru Ebal ta ser menshoná solamente den Deuteronomio (Deut. 11:29; Deut. 27:4-13) i den e buki di Josué (Jos. 8:30-33). Huntu ku Gerizim, e tabata e sitio kaminda e bendishonnan i maldishonnan di e pakto mester a ser resitá. Mas spesífikamente, segun Deuteronomio 11:29 i Deuteronomio 27:4-13, e mester tabata e sitio di e maldishonnan. Aki e israelitanan mester a para na kada banda di e arka den presensia di e saserdotenan (Jos. 8:33). Un grupo tabata para dilanti di Seru Ebal, e otro dilanti di Seru Gerizim. Aki nan a representá simbólikamente e dos posibel maneranan di relashoná ku e pakto. E sakrifisionan ku a ser tresé einan tabata mustra riba Hesus, kende a tuma riba Su mes tur e maldishonnan di e pakto, pa asina tur ku kere den djE por disfrutá di su bendishonnan (Gal. 3:13, 2 Kor. 5:21).

Dikon tabata nesesario pa skirbi un kopia di e pakto riba un monumento, visibel pa tur hende? (Lesa Deut. 4:31; Deut. 6:12; Deut. 8:11-14; 2 Reinan 17:38; Salmo 78:7.)

Nos hendenan tin tendensia di ta lubidá hopi. Nos ta pròp e demandanan di bida diario, ku ta birando mas i mas deskonsertante, den segmentonan di tempu mas i mas kòrtiku. Inevitablemente nos ta lubidá kosnan ku no ta ripití ku e mesun frekuensha òf intensidat. Na kada sirbishi di komunion, nos tin un okashon spesial pa redediká nos mes na Señor i pa renobá nos kompromiso di pakto. Lo ta bon pa persibí e oportunidatnan akí no solamente komo chènsnan pa rekonsagrashon individual sino tambe komo okashonnan di renobashon korporativo di nos lealtat na Dios. Den un sosiedat kada bes mas individualista, nos mester redeskubrí e poder di pertenesé na un komunidat ku ta kompartí e mesun kòsmovishon, e mesun balornan i kreensianan, i e mesun mishon.

Anhelando pa Su Presensia

Lesa Josué 18:1-2. Kua tabata e aktividat pa kua Josué a interumpí e proseso di partimentu di e tera?

Despues di e deskripshon di e teritorionan asigná na e dos tribunan di mas grandi na parti wèst di Jordan i na e mitar tribu di Manasseh, e pasashi akí ta ilustrá un asamblea di e kongregashon na Shiloh, kaminda e tera ta ser repartí na e sobrá shete tribunan mas chikitu.

E establesimentu di e santuario, “Mi Tabernakel,” ta representá e kumplimentu di e promesa di Dios pa biba meimei di Su pueblo (Eks. 25:8; Lev. 26:11-12) i ta revelá e tema sentral di e buki: e presensia di Dios meimei di Israel a hasi posibel e poseshon di e tera i ta bai ta un fuente kontinuo pa Israel i, atraves di nan, na henter tera (Gen. 12:3). E adorashon di Dios ta okupá un lugá sentral i preeminente, asta riba konkista i partimentu di e tera! E presensia di e santuario, i despues e tèmpel, semper mester a yuda e pueblo realisá e presensia di Dios meimei di nan i nan obligashonnan pa sigui e aliansa.

Lesa Hebreonan 6:19-20; Hebreonan 9:11-12; i Hebreonan 10:19-23. Kiko nos komo kristiannan, ku no tin un santuario terenal ku ta enserá e presensia físiko di Dios meimei di nos, por siña for di Josué?

E aparishon di e santuario no mester bini komo un sorpresa diripiente, pasobra e tema di e santuario tabata presente den e narativo di Josué atraves di e arka di pakto. Esaki tabata e piesa di mobilario sentral den e Lugá Santísimo, i el a marka e promé dos sekshonnan di e buki: e krusamentu i e konkista. Awor, dor di pone e lantamentu di e tabernakel den e punto fokal di e distribushon di e tera, Josué ta mustra ku henter e bida di Israel tabata drai rònt di e santuario, e sede terenal di Yahweh.

Ta ainda mas importante pa nos, komo kristiannan ku ta biba den e Dia di Ekspiashon antitípiko, pa enfoká nos bista riba e santuario selestial segun ku nos ta sigui nos lucha ku e gigantenan moderno (òf posmoderno) ku ta desafiá nos fe, speransa, i herensia spiritual. Segun ku nos ta dependé konstantemente riba e obra ku Kristu a realisá riba e Krus i den e santuario selestial, nos por wak padilanti ku fe na e momentu ku Dios lo bolbe biba meimei di Su pueblo, ma e biaha akí e lo ta pa semper. (Kompará ku Rev. 21:3).

Lesa Ellen G. White, “The Blessings and the Curses,” p. 499-503, den Patriarchs and Prophets

“Di akuerdo ku e instrukshonnan duná dor di Moises, un monumento di piedranan grandi a ser lantá riba Seru Ebal. Riba e piedranan akí, prepará anteriormente ku un kapa di semènt, e lei tabata inskribí, no solamente e dies preseptonan pronunsiá for di Sinai i grabá riba e tablanan di piedra, sino e leinan komuniká na Moises, i skirbí dor di dje den un buki. Banda di e monumento akí a konstruí un altar di piedra no labrá, riba kua sakrifisionan tabata ser ofresé na Señor. E echo ku e altar a ser establesé riba Seru Ebal, e seru riba kua e maldishon a ser poné, tabata signifikante, indikando ku, pa motibu di nan transgreshonnan di e lei di Dios, Israel hustamente a lanta Su rabia, i ku nan lo a ser bishitá mesora, pero tabata pa e ekspiashon di Kristu, representá dor di e altar di sakrifisio.”—Ellen G. White, Patriarchs and Prophets, p. 500.

“Pero e sirbishi di Komunion no mester tabata un okashon di tristesa. Esaki no tabata su propósito. Miéntras e disipelnan di Señor ta reuní rònt di Su mesa, nan no mester kòrda i lamentá nan faltanan. Nan no mester keda meditá riba nan eksperensia religioso di pasado, sea ku e eksperensia ei tabata elevador òf depresivo. Nan no mester kòrda e diferensianan entre nan i nan rumannan. E servisio di preparashon a brasa tur esaki. E outosaminashon, e konfeshon di piká, e rekonsiliashon di diferensianan, tur a ser hasí. Awor nan ta bin topa ku Kristu. Nan no mester para den sombra di e krus, sino den su lus salbador. Nan tin ku habri e alma pa e rayonan briante di e Solo di Hustisia.”—Ellen G. White, The Desire of Ages, p. 659.

Preguntanan pa Diskushon: