Gigantenan di Fe:
Josué i Caleb

Lesa pa e Estudio di e Siman Akí:

Versíkulo di Memoria:

“Kòrda riba boso lidernan, esnan ku a papia ku boso e palabra di Dios. Konsiderá e resultado di nan manera di biba, i imitá nan fe” (Hebreonan 13:7, ESV).

Tur mayor sa ku nan yunan ta siña dor di ehèmpel, no ta bèrdat? Kuantu mayor a preokupá di mira nan yunan sigui nan mal karakterístikanan en bes di esnan bon di nan? Loke sea nos edat ta, nos ta haña mas fásil pa hasi malu ku hasi bon. E ta djis parti di loke ta nifiká pa ta sernan kaí. “Pasobra loke mi ke hasi, esei mi no ta praktiká; ma loke mi ta odia, esei mi ta hasi” (Rom. 7:15, NKJV). Ken no por relashoná ku esei?

For di nasementu, hende ta ser formá dor di e poder di ehèmpel. Nos ta siña hasi e kosnan di mas básiko den bida, manera kana, papia i ekspresá nos emoshonnan, dor di imitá esnan mas serka di nos. Komo adulto, nos mester di modelonan ainda, i, asta si nan no ta perfekto, nos por atmirá i imitá e rasgonan spiritual ei ku a hasi nan gigantenan di fe.

E siman akí nos lo tira un bista mas profundo riba e ehèmpelnan personal di dos gigante di fe den e buki di Josué: Caleb i Josué. Kiko ta loke a pone nan destaká den nan generashon i hunga un ròl klave den bida di e pueblo di Dios durante un di e periodonan di mas krusial di historia di Israel?

Fieldat

Lesa Numbernan 13:6-30-32 i Josué 14:6-14. Ken Caleb tabata? Kiko tabata su lugá meimei di e pueblo di Israel?

E nòmber di Caleb ta bini di e palabra hebreo keleb, “kachó,” ku ta aparesé den Tèstamènt Bieu semper den un konteksto negativo. Sinembargo, keleb ta ser usá den kartanan i himnonan èkstra-bíbliko pa ekspresá un sirbidó su kurashi, tenasidat i fieldat na su doño. Den e sentido akí, Caleb tabata fiel na su nòmber, demostrando durante henter su bida lealtat inkebrantabel na su Señor.

Kiko ta bisa tokante Caleb ku e tabata dispuesto pa bisa su opinion aunke e mayoria di e spionnan tabatin un opinion kompletamente diferente, i e pueblo di Israel a menas’é ku morto? Lesa Num. 14:6-10, 21-25; Num. 26:65; Num. 32:12.

Konsiderá e lidernan israelita importante akí, kontemporáneonan di Josué i Caleb: Shammua, Shaphat, Igal, Palti, Gaddiel, Gaddi, Ammiel, Sethur, Nahbi i Geuel. E nòmbernan akí ta zona konosí?

Probablemente nò.

Dikon? Pasobra nan ta nòmber di e otro dies spionnan ku Moises a manda pa eksplorá e tera di Canaan. Nan ta ser lubidá pasobra nan nòmber no tabata digno di ser rekordá. E informe ku nan a trese a pinta e Tera Primintí komo imposibel pa konkistá. Nan a mira nan mes manera dalakochi kompará ku e gigantenan ku tabata biba den algun área di e tera, i nan kurason a dirti di miedu na e murayanan “intokabel” di e statnan fortifiká na Canaan.

Caleb, un di e dos spionnan ku a trese un informe positivo, ta tuma inisiativa i ta presentá un otro posibilidat: e aktitut di fe. E tabata dispuesto pa defendé loke e tabata sa ku tabata korekto, apesar di e oposishon, asta den bista di morto potensial: “I henter e kongregashon a bisa pa piedra nan ku piedra” (Num. 14:10, NKJV).

Kiko bo ta hasi ora mayoria hende rònt di bo ta parse di tin un opinion diferente, unu ku ta bai kontrali na bo konvikshonnan di mas profundo?

Duna Mi e Pais di Seru Akí

Lesa Josué 14:6-14, Numbernan 14:24, Numbernan 32:12, Deuteronomio 1:36, i Lukas 6:45. Kon lo bo a deskribí e aktitut di Caleb i Josué? Kiko ta nifiká pa sigui Señor kompletamente?

Caleb nunka a lubidá e promesa ku Señor a dun'é pa medio di Moises: ku e lo a drenta e tera kaminda su pianan a trapa (Num. 14:24). Kuarenta aña despues, e ta referí na su mes informe riba e tera komo un palabra “manera e tabata den mi kurason” (Jos. 14:7, NKJV). Su informe tabata basá riba su konvikshon ku, ku Dios su guia i yudansa, Israel lo por a konkistá e tera.

Kontrali na e informe di e otro dies spionnan, ku a inspirá miedu meimei di e israelitanan, Caleb a manifestá un konfiansa i kompromiso di henter su kurason na e promesa di Señor. E frase hebreo, ku literalmente ta nifiká “mi tabata kompletamente tras di SEÑOR” (Jos. 14:8), ta probablemente un forma kòrtiku di un modismo mas largu: “Mi kurason tabata sigui SEÑOR kompletamente,” òf “Mi a yena mi kurason pa kana tras di SEÑOR.” Kontrali na otronan ku a kana tras di diosnan strañero i ku no a sigui Señor kompletamente, Caleb su kurason tabata kompletamente dediká na Señor.

E mesun ekspreshon ta ser ripití dos biaha despues, enfatisando e fieldat di Caleb (Jos. 14:9-14). Su propio karakterisashon ta den armonia ku loke Señor Mes a yama un “spiritu diferente” (Num. 14:24, NKJV) ku a distinguí Caleb for di e otro dies spionnan. Asta na e edat di 85 aña, el a sigui ta un ehèmpel di loke Señor por logra pa medio di hende ku nan kurason ta kompletamente dediká na djE i na Su kousa.

Caleb a komprondé ku e teritorio ku kada tribu finalmente lo a poseé tabata direktamente proporshonal na e grado na kua nan a tribi di reklamá e promesanan di Señor i kuantu tera nan tabata dispuesto pa kana riba dje pa medio di fe. E promesanan di Dios no ta kumpli dimes, den sentido ku nan ta kumpli irespekto nos boluntat. Mas bien, nan ta rekerí fe kompañá pa akshon determiná. E término hebreo ’ulay, “kisas” (Jos. 14:12), por ekspresá miedu i duda, pero generalmente e ta indiká speransa i e antisipashon ku algu positivo lo tuma lugá (Gen. 16:2; Num. 22:6-11; Num. 23:3).

E Poder di Ehèmpel

Lesa Josué 15:16-19, Huesnan 1:13, i Huesnan 3:7-11. Kiko e storia akí ta bisabo tokante e poder di ehèmpel? Kon e aktitut di Caleb ta ser reprodusí den e generashon mas hóben?

Den e pasashi akí, Caleb ta ofresé su yu muhé, Achsah, den matrimonio na esun ku konkistá Debir. Othniel a kapturá e stat i a gana man di Achsah. E storia akí ta importante pasobra, un biaha mas, e ta revelá Caleb su kurashi, fe i disponibilidat pa afrontá retonan.

Tambe e ta mustra ku e siguiente generashon di israelitanan a sigui e ehèmpel di e gigantenan di fe akí, Caleb i Josué. Segun ku e generashon mas bieu ta sera nan ministerio, tin un generashon nobo kla pa enfrentá e retonan i sigui kumpli ku e plan di Dios pa Israel.

Na un manera ku no ta diferente for di e petishon di Caleb na Josué, “Duna mi e tera montañoso akí,” Achsah, enkurashá dor di su kasá, ta desplegá e mesun fe i resolushon ku su tata a demostrá. Pa medio di su determinashon i kurashi, Achsah ta sigui e liña di e ehèmpel di Caleb di kumplimentu di e promesa pa poseé e tera.

En bèrdat, e tera ta un regalo di Yahweh pa Israel, pero Israel mester apropiá esaki dor di reklamá e promesanan di Señor ku fe i kurashi. E determinashon di Achsah ta prefigurá e perseveransia di e muhénan ei den e Evangelionan ku no a laga nan mes ser rechasá dor di e multitut òf e disipelnan i lo no a entregá te ora nan a risibí e bendishon di Hesus pa nan mes i nan famianan.

Lesa Lukas 18:1-5. Ki lès tin aki pa nos?

Pasa e antorcha di fe pa e siguiente generashon ta krusial pa kumplimentu di e mishon ku Dios a konfia na nos. Pensa riba e desafionan di pasa fe pa e siguiente generashon, di un banda, i riba e oportunidatnan pa hóbennan asumí mas responsabilidat den e obra di Dios, di otro banda. Kiko nos por hasi pa fasilitá i entrená hóbennan pa asumí liderazgo divino? Kon krusial nos ehèmpel ta den e proseso akí?

Héroe Humilde

E listanan largu di nòmbernan di lugá, ku a konstituí puntonan di referensia riba e fronteranan di e teritorionan asigná na e tribunan di Israel, ta marká pa e rapòrt di alokashon di tera na e dos héroenan, Caleb i Josué, di e promé eksplorashon. Caleb a risibí su herensia promé, miéntras ku Josué a risibí di dje último. Te na e punto akí, Josué a aloká e tera na e tribunan di Israel; awor ta momentu pa e pueblo di Israel duna Josué su herensia.

Lesa Josué 19:49-51. Kiko ta e implikashonnan di e echo ku e gran lider di Israel ku a repartí e tera ta risibí su herensia último?

E stat ku Josué ta risibí ta Timnath-serah, un nòmber komponé di dos palabra. E promé, Timnath, ta derivá di un verbo (manah) ku su nifikashon ta konta òf asigná, i e ta nifiká porshon òf teritorio. E di dos palabra por ta derivá for di un verbo hebreo (seracḥ), i e ta nifiká ekseso òf sobrá (kompará ku Eks. 26:12). E nòmber di e stat di Josué por ser tradusí komo e porshon ku a sobra òf e teritorio ku a sobra.

E nòmber di e stat ku Josué a skohe for di loke a sobra ta duna testimonio di e karakter noble di e di dos lider di Israel. Promé ku tur kos, el a warda te ora tur e hendenan a risibí nan porshon. Despues, Josué no a skohe un di e teritorionan densamente poblá di e tera òf e statnan di mas impreshonante komo su herensia, sino un stat modesto, òf kisas e ruinanan di dje, pa asina rekonstruí esaki ku trabou arduo (kompará ku Jos. 19:50).

Ademas, Timnath-serah tabata situá serka di Shiloh, den besindario di e santuario, loke ta mustra unda e prioridatnan di Josué tabata i unda su kurason tabata mará. Siguramente, despues ku e nashon resien nasí di Israel a ser hibá den e Tera Primintí, i, ku yudansa di Dios, a sigurá e herensia di kada tribu i famia, e lo no a oponé na e demanda di Josué pa un herensia mas impreshonante. Tòg, Josué tabata satisfecho pa biba un bida simpel ku un enfoke riba loke ta di mas importante, enkarnando asina e orashon ekspresá mas despues pa David: “Un kos mi a deseá di SEÑOR, esei lo mi buska: Pa mi por biba den e kas di SEÑOR tur e dianan di mi bida, pa kontemplá e bunitesa di SEÑOR, i pa meditá den Su tèmpel” (Salmo 27:24, NKJV).

Kambiá dor di Kontemplashon

Kontemplá e ehèmpel di bida di gran héroenan di fe ta esensial pa nos kresementu spiritual. Na mes momentu, nos ehèmpel final ta Hesu-Kristu, Su bida i siñansanan. Kon enfoká riba e bida di Hesus ta kambia nos? Lesa Hebr. 12:1-2; 2 Kor. 3:18.

Marco Iacoboni, un neurosientífiko na Universidat di California, Los Angeles, a investigá e funshon di neuronanan spil. E sirkuitonan di sèl chikitu akí ta ser aktivá tantu ora nos ta realisá un sierto akshon, manera hari òf brasa un hende, i ora nos ta opservá un otro hende ta realisá e mesun akshon. E aktividat di e neuronanan akí ta redusí e distinshon entre mira i hasi.

Ellen G. White ta papia tokante e importansia di kontemplá e karakter di Hesus: “Mirando na Hesus nos ta optené bista mas briante i mas distinto di Dios, i dor di kontemplá nos ta bira kambiá. Bondat, amor pa nos próhimo, ta bira nos instinto natural. Nos ta desaroyá un karakter ku ta lo kontrario di e karakter divino. Kresiendo den Su semehansa, nos ta amplia nos kapasidat di konosé Dios. Mas i mas nos ta drenta den komunion ku e mundu selestial, i nos tin poder kresiente kontinuamente pa risibí e rikesanan di e konosementu i sabiduria di eternidat.”—Ellen G. White, Christ’s Object Lessons, p. 355.

Lesa Romanonan 12:1-2. Kua dos proseso ta funshoná pa propósitonan konfliktivo den nos bida? Kon nos por ta sigur ku nos ta duna espasio na esun korekto?

Den e kapítulo resúmen di su Karta na e Romanonan, apòstel Pablo ta papia tokante dos forsa antagonista ku ta trata na forma nos bida. Di un banda, e mundu rònt di nos, ku su vários influensianan, ta purba fòrsa nos diariamente den su mes malchi, efektuando un konformashon den nos ku ta traha di pafó bai paden.

Pa kontrarestá e impakto akí, Spiritu Santu ta kapas pa transformá nos di paden bai pafó na un manera similar na e manera ku un larva ta transformá su mes den un bunita barbulètè. Ma pa e proseso ei tuma lugá, nos mester konsagrá nos mes na Dios i pidiE pa sigui ku e bon trabou ku El a kuminsá den nos (Fil. 1:6). Na final, nos tin ku hasi e eskoho konsiente, momentu pa momentu, pa kana den e Spiritu.

“Caleb su fe awor tabata nèt loke e tabata ora su testimonio a kontradesí e mal informe di e spionnan. El a kere e promesa di Dios ku E lo a pone Su pueblo den poseshon di Canaan, i den esaki el a sigui Señor kompletamente. El a soportá huntu ku su pueblo e peregrinashon largu den desierto, kompartíendo asina e desepshonnan i karga di e kulpa di esnan kulpabel; tòg e no a keha di esaki, sino a eksaltá e mizerikòrdia di Dios ku a konserv’é den desierto ora su rumannan a ser eliminá. Meimei di tur e difikultatnan, peligernan i plaganan di e peregrinashonnan den desierto, i durante e añanan di guera desde ku el a drenta Canaan, Señor a konserv’é; i awor, na mas ku ochenta aña, su vigor no a disminuí. E no a pidi pa su mes un tera ya konkistá, sino e lugá ku, riba tur otro, e spionnan a pensa ku ta imposibel pa someté. Pa medio di yudansa di Dios e lo a kita su baluarte for di e gigantenan mes kende nan poder a stroba e fe di Israel. No tabata deseo pa honor òf engrandesementu a move Caleb pa hasi su petishon. E guerero bieu balente tabata deseá di duna e pueblo un ehèmpel ku lo a honra Dios, i animá e tribunan pa someté kompletamente e tera ku nan tatanan a konsiderá inkonkistabel.”—Ellen G. White, Patriarchs and Prophets, p. 512, 513.

“Tabata Caleb su fe den Dios ku a dun’é kurashi, a ten’é for di miedu di hende, i a kapasit’é pa para ku kurashi i infleksiblemente na defensa di loke ta korekto. Atraves di dependensia riba e mesun poder, e poderoso General di e ehérsitonan di shelu, kada sòldá berdadero di e krus por risibí forsa i kurashi pa vense e opstákulonan ku ta parse insuperabel.”—Ellen G. White, The Advent Review and Sabbath Herald, 30 di mei 1912.

Preguntanan pa Diskushon: