Herederonan di Promesa,
Prezunan di Speransa

Lesa pa e Estudio di e Siman Akí:

Versíkulo di Memoria:

“Bolbe na boso fòrti, o prezunan di speransa; awe Mi ta deklará ku lo Mi restourá dòbel na boso” (Zakarias 9:12, ESV).

Josué 13-21 ta kontené listanan largu di markadónan di frontera geográfiko ku ta delineá porshonnan di tereno asigná na e tribunan di Israel. Pa e lektor moderno, e listanan akí kisas por parse irrelevante, pero nan ta basá riba un komprondementu teológiko di e Tera Primintí ku ta signifikante pa nos awe. Pa medio di e listanan konkreto akí, Dios ker a siña e israelitanan ku e tera no tabata un soño. El a ser primintí na nan na un manera masha tangibel i midibel. Pero nan mester a hasi e promesa ei un realidat dor di aktua riba dje.

Es desir, sí, Dios tabata bai duna nan tera komo herensia; e tabata bai ta un regalo, hasí den kumplimentu di loke El a primintí nan tatanan. “Mira, Mi a pone e tera boso dilanti; drenta i poseé e tera ku SEÑOR a hura na boso tatanan, na Abraham, Isaac i Jacob, pa duna nan i nan desendientenan despues di nan” (Deut. 1:8, NKJV). Pero sí, nan tambe tabatin nan parti pa hunga.

E siman akí nos lo wak algun konsepto teológiko relashoná ku e Tera Primintí i nan implikashonnan spiritual pa esnan ku ta reklamá tur e promesanan hañá den Hesus.

Eden i Canaan

Lesa Génesis 2:15 i Génesis 3:17-24. Kiko tabata e konsekuensianan di e Kaida, pa loke ta trata e espasio di biba di e promé pareha humano?

Na Kreashon, Dios a pone Adam ku Eva den un ambiente perfekto ku tabata personifiká abundansia i bunitesa. E promé pareha humano tabata topa nan Kreador den e ambiente di un dushi espasio di biba ku por a proveé pa tur nan nesesidatnan físiko. Ademas di e palabra papiá di Dios, e Hòfi di Eden tabata sirbi komo un sentro di siñansa kaminda Adam i Eva a haña un bista signifikante den e karakter di Dios i e bida ku E tabatin intenshon pa nan. P’esei, ora nan a kibra e relashon di konfiansa ku nan Kreador, nan relashon ku e Hòfi di Eden tambe a kambia, i, komo un señal di e relashon kibrá, nan mester a bandoná e hòfi. Nan a pèrdè e teritorio ku Dios a duna nan. Asina, e Hòfi di Eden a bira e símbolo di bida abundante, i nos lo redeskubrí su motibunan den e tema di e Tera Primintí.

Kon e patriarkanan a persibí e promesa di e tera? (Lesa Gen. 13:14-15; Gen. 26:3-24; Gen. 28:13.) Kiko bo ta kere ku e ta nifiká pa nos, komo Atventistanan, pa biba komo herederonan di e promesanan (Hebr. 6:11-15)?

Ora Abraham a drenta e tera ku Dios a mustr’é, pa medio di fe e tera ei a bira e Tera di Promesa pa e i su desendientenan. El a keda e Tera di Promesa pa 400 aña. E patriarkanan no tabata realmente doño di e tera; e no tabata di nan di tal manera ku nan por a dun’é na nan yunan komo herensia. Mas bien, e tabata pertenesé na Dios, meskos ku e Hòfi di Eden a pertenesé na djE. Komo ku Adam i Eva no a hasi nada ku a duna nan derecho riba e Hòfi di Eden, Israel tampoko no a kontribuí nada pa meresé e tera. E Tera Primintí tabata un regalo di Dios basá riba Su inisiativa. Israel no tabatin derecho ni pretenshon inherente pa ta doño di e tera (Deut. 9:4-6); tabata solamente pa e grasia di Dios ku nan por a poseé esaki.

E patriarkanan tabata herederonan di e promesanan te ora nan a ser kumplí. Nos, komo siguidónan di Kristu, a heredá promesanan mihó ainda (Hebr. 8:6) ku lo ser kumplí si nos bira “imitadónan di esnan ku, pa medio di fe i pasenshi, ta heredá e promesanan” (Hebr. 6:12, RSV).

E Tera komo Regalo

Lesa Eksodo 3:8; Levítiko 20:22; Levítiko 25:23; Numbernan 13:27; Deuteronomio 4:1-25, 26; Deuteronomio 6:3; i Salmo 24:1. Kiko tabata e relashon spesial entre Dios, Israel i e Tera Primintí?

Na un nivel hopi básiko, tera ta ofresé identidat físiko na un nashon. Dor di aloká e nashon, e ta determiná tambe e okupashon i estilo di bida di e nashon. Katibunan tabata sin rais i no tabata pertenesé ningun kaminda; un otro hende tabata disfrutá di e resultadonan di nan trabou. Tin tereno tabata nifiká libertat. E identidat di e pueblo skohí tabata fuertemente konektá na nan bibamentu den e tera.

Tabatin un relashon spesial entre Dios, Israel i e tera. Israel a risibí e tera for di Dios komo un regalo, no komo un derecho enagenabel. E pueblo skohí por a bira doño di e tera tanten ku nan tabata den un relashon di pakto ku Yahweh i tabata respetá e preseptonan di e pakto. Ku otro palabra, nan no por tabatin e tera i su bendishonnan sin e bendishon di Dios.

Na mes momentu, ta bèrdat ku e tera a proveé un lèns pa medio di kua Israel por a komprondé Dios mihó. Biba den e tera lo a kòrda nan semper riba un Dios fiel, ku ta kumpli ku promesa i ta digno di konfiansa. Ni e tera ni Israel lo no a eksistí sin e inisiativa di Dios, kende tabata e Fuente i fundeshi di nan eksistensia. Miéntras ku e israelitanan tabata na Egipto, Riu Nilo i e sistema di irigashon, huntu ku trabou duru, a proveé e kultivonan ku nan tabatin mester pa biba. Canaan tabata diferente. Nan tabata dependé di áwaseru pa abundansia di nan kosechanan, i ta solamente Dios por a kontrolá e wer. Pues, e tera tabata rekordá Israel di nan dependensia konstante riba Dios.

Asta si Israel a risibí e tera komo un regalo di Yahweh, den sentido final, Dios Mes a keda e doño. Komo e berdadero doño di henter tera (Salmo 24:1), Yahweh tin e derecho di asigná e tera na Israel òf di kita esaki. Si Dios ta doño di e tera, e israelitanan i, pa ekstenshon, tur hende ta strañero i peregrino, òf, den terminologia moderno, nos tur ta Dios su invitadonan di plaso largu riba Su tera.

E Desafio di e Tera

Lesa Josué 13:1-7. Aunke e tera di Canaan tabata un regalo di Dios, kiko tabata algun di e desafionan ku a bini ku poseshon di dje?

Mirando e echo ku pa siglonan e israelitanan tabata biba komo katibu, nan abilidatnan militar tabata inadekuá pa konkistá e tera. Ni sikiera nan doñonan katibu, e egipsionan, ku nan ehérsitonan ábil i bon ekipá, por a okup’e permanentemente. E egipsionan nunka a konkistá Canaan kompletamente debí na e invensibilidat di e statnan rondoná ku muraya. Awor un nashon di eks-katibu ta ser bisá pa konkistá un tera ku nan eks-doñonan no por a someté. Si nan yega di poseé e tera, lo ta pa medio di e grasia di Dios so, no atraves di nan mes esfuerso.

Josué 13 te ku 21 ta trata ku divishon di e tera pa e vários tribunan di Israel. E asignashon akí ta bisa Israel no solamente kiko a ser asigná na nan sino tambe kiko ainda mester ser okupá denter di e teritorio ei. E israelitanan por biba sigur den e tera ku Dios a duna nan komo herensia. Nan ta e hürdónan legítimo i ku derecho di reklamá e tera bou di propiedat di Dios. Tòg e inisiativa di Dios mester ta kompañá pa un kontesta humano. E promé mitar di e buki ta mustra kon Dios a duna e tera dor di desapropiá e kananeonan; e di dos mitar ta informá kon Israel a tuma e tera dor di establesé esaki.

E komplehidat akí di e konkista ta ilustrá e dinámika di nos salbashon. Similar na Israel, nos no por hasi nada pa gana nos salbashon (Efe. 2:8-9). E ta un regalo, meskos ku e tera tabata e regalo di Dios na e israelitanan basá riba nan relashon di pakto kunE. Sigur e no tabata basá riba nan méritonan (lesa Deut. 9:5).

Sinembargo, pa e israelitanan disfrutá di e regalo di Dios, nan mester a asumí tur e responsabilidatnan ku a bini ku biba den e tera, meskos ku nos mester pasa dor di e proseso di nos santifikashon den obediensia amoroso na e rekerimentunan di ta siudadanonan di e reino di Dios. Aunke no ta e mesun kos, e paralelo entre e echo ku nan a risibí e tera pa grasia i nos ta risibí salbashon pa grasia ta sufisiente serka. Nos a ser duná un regalo maravioso, pero e ta algu ku nos por pèrdè si nos no ta kuidadoso.

E Hubileo

E tera tabata asina sentral pa e eksistensia di Israel komo e pueblo di Dios ku e no por a ser repartí komo un totalidat. E mester a ser dividí pa tribu, klan i famia (Num. 34:13-18) pa asina evitá ku e ta bira poseshon di algun élite distinguí.

Lesa Levítiko 25:1-5, 8-13. Kiko tabata propósito di e aña Sabátiko i di e Aña di Hubileo?

Kontrali na Egipto, kaminda siudadanonan regularmente tabata pèrdè nan tera i tabata bira sirbidónan di Fárao, e propósito di Dios pa e israelitanan tabata ku nunka nan lo no a keda indefinitivamente privá di nan derechonan. Niun hende, pafó di e klan i famia na ken el a ser asigná originalmente, por a bira doño di e tera . De echo, di akuerdo ku e plan di Dios, e tereno nunka por a ser bendí literalmente; e por a ser di hür solamente segun su balor establesé pa e kantidat di añanan ku a sobra te na e siguiente Hubileo. P’esei, e parientenan di un persona ku tabata obligá di “bende” e tera di su antepasadonan tabatin e deber di redimié asta promé ku e Hubileo (Lev. 25:25).

E asignashon di e tera ta bira un bentana den kurason di Dios. Komo nos Tata selestial, E ke pa Su yunan ta generoso ku esnan ku ta ménos afortuná i pèrmití nan teranan alimentá nan kada di shete aña. E aña Sabátiko tabata apliká e prinsipio di e mandamentu di Sabat riba un eskala mas grandi. Banda di balorá i enkurashá trabou duru, propiedat di e tera ta eksigí rèspèt i bondat tambe na esnan ku ta enfrentá desafionan finansiero. Legislashon di propiedat di tera tabata proveé kada israelita e oportunidat pa ser librá di sirkunstansianan opresivo heredá òf indusí pa nan mes i pa haña un komienso nobo den bida.

En esensia, esaki ta e propósito prinsipal di e evangelio: pa eliminá e distinshon entre riku i pober, dunadó di trabou i empleado, privilegiá i ménos privilegiá, poniendo nos tur igual dor di rekonosé nos nesesidat kompletu di e grasia di Dios. Desafortunadamente, Israel a neglishá pa warda e norma establesé dor di Dios i, despues di siglonan, e spièrtamentunan di ekspropiashon a ser kumpli (2 Krón. 36:20-21).

E Tera Restourá

Lesa Jeremias 24:6; Jeremias 31:16; Ezekiel 11:17; Ezekiel 28:25; i Ezekiel 37:14-25. Kiko tabata e promesa di Dios tokante e regreso di Israel na e Tera Primintí i kon el a kumpli?

Durante e eksilio babilóniko, e israelitanan a eksperensiá no solamente e realidat tristu di ta sin rais sino tambe e promesa ku nan relashon ku Dios, aunke hasí konkreto atraves di e promesa di e tera, no tabata kondishoná i limitá na, poseé e tera. Ora e israelitanan a konfesá nan pikánan, a arepentí i a buska Señor ku henter nan kurason, Dios a kumpli ku Su promesa atrobe, i a trese nan bèk na nan tera komo un señal di nan restourashon. Es desir, E tabata nan Dios ainda, asta miéntras nan no tabata den e tera.

Sinembargo, meskos ku e promesa ku Israel lo a poseé e tera pa semper tabata kondishonal (Deut. 28:63-64; Jos. 23:13-15; 1 Reinan 9:7; 2 Reinan 17:23; Jer. 12:10-12), asina tambe tabata e promesa pa restablesé i hasi Israel prosperá den e tera despues di e eksilio. Na mes momentu, profetanan di Tèstamènt Bieu a mustra na un restourashon ku un futuro rei Davídiko lo a trese (Isa. 9:6-7; Zak. 9:9-16). E promesa akí a ser kumplí den e bida, morto i resurekshon di Hesu-Kristu, den ken tur e promesanan na Israel antiguo lo tabatin nan kumplimentu.

Den Tèstamènt Nobo, e Tera Primintí no ta ser menshoná direktamente, pero nos ta ser bisá ku e promesanan di Dios a ser kumplí den i atraves di Hesu-Kristu (2 Kor. 1:20, Rom. 15:8). Pues, den e lus di Kristu, e tera ta ser reinterpretá, i e ta bira e símbolo di e bendishonnan spiritual ku Dios ta plania pa duna Su pueblo fiel aki i awor (Efe. 2:6) i den e futuro.

E kumplimentu final di e promesa divino di sosiegu, abundansia i bienestar den e tera lo tuma lugá riba e tera nobo, librá di piká i su konsekuensianan. Den e sentido ei, komo kristiannan, nos speransa ta basá riba e promesa di Kristu ku E lo regresá i, despues di un periodo di 1.000 aña den shelu, establesé Su reino eterno riba e tera hasí nobo. Esaki lo ta e kumplimentu final di tur e promesanan tokante e tera.

Lesa Ellen G. White, “The Controversy Ended,” p. 672-678 den The Great Controversy.

“Nos lo ser salbá eternamente ora nos drenta dor di e portanan den e stat. E ora ei nos por regosihá ku nos ta salbá, eternamente salbá. Pero te e ora ei nos mester pone atenshon na e mandato di e apòstel, i ‘tin temor, pa, miéntras ku ta keda un promesa ainda pa drenta den Su sosiegu, no parse ku un di nos a keda sin alkansá esaki’ [Hebreonan: 4:1]. Teniendo un konosementu di Canaan, kantando e kantikanan di Canaan, regosihá den e espektativa di drenta Canaan, no a trese e yunan di Israel den e kunukunan di wendrùif i palunan di oleifi di e tera primintí. Nan por a hasié di nan den bèrdat solamente dor di okupashon, dor di kumpli ku e kondishonnan, dor di ehersé fe bibu den Dios, dor di apropiá su promesanan na nan mes.”—Ellen G. White, The Youth’s Instructor, 17 di febrüari 1898.

“Den Beibel e herensia di esnan salbá ta ser yamá ‘un pais.’ Hebreonan 11:14-16. Einan e Wardadó selestial ta hiba Su tou na fuentenan di awa bibu. E palu di bida ta duna su fruta tur luna, i e blachinan di e palu ta pa sirbishi di e nashonnan. Tin riunan ku ta kore semper, kla manera kristal, i banda di nan palunan ku ta zuai ta tira nan sombra riba e kamindanan prepará pa e reskatánan di Señor. Einan e sabananan ekstenso ta transformá nan mes den serunan di bunitesa, i e serunan di Dios ta elevá nan tòpnan haltu. Riba e sabananan pasífiko ei, banda di e riunan bibu ei, e pueblo di Dios, peregrino i vagabundo asina tantu tempu, lo haña un hogar.”—Ellen G. White, The Great Controversy, p. 675.

Preguntanan pa Diskushon: