Bèk na Jerusalèm

E disipelnan di Hesus tabata kompletamente den shòk. Tur nan speransa i soñonan pa e reino nobo di Dios a ser klabá na un krus e djabièrnè anterior. Tambaliante di tristesa i konfushon, Cleopas i su kompañero, pokopoko, a hasi e biahe di shete mia for di Jerusalèm te na nan kas den e stat chikitu di Emaus. Miéntras solo tabata bahando e djadumingu atardi ei i nan tabata kana riba e kaminda yen di buraku, un strañero a yega serka pa biaha huntu ku nan. Poko nan tabata sa ku e kompañero di biahe nobo akí tabata e Señor resusitá Mes. Poniendo tiki atenshon na nan kompañero peregrino, e dos disipelnan abatí a ensayá e susesonan asombroso di e fin di siman, sintiendo nan mes mas desesperá ku kada paso.

Miéntras Hesus tabata skucha silensiosamente, E tabata anhelá desesperadamente pa revelá Su mes na Su amigunan deprimí. Pero deliberadamente Señor a protehá Su berdadero identidat pasobra awor nan mester a, mas ku nunka, komprondé e Skrituranan. Si Kristu a pèrmití e dos siguidónan fiel akí rekonosé ken E tabata, nan lo tabata demasiado eksitá pa skucha e bèrdatnan importante ku E tabatin pa kompartí.

Asta despues di tres aña i mei di skucha Su siñansa i predikashon, ainda nan no a komprondé e naturalesa di Su mishon. El a bisa nan klaramente: “E Yu di hende ta ser entregá den man di hende, i nan lo mat’E i despues ku E ser matá, E lo lanta riba e di tres dia. Pero nan no a komprondé e palabra ei, i tabatin miedu di puntr’E.” Marko 9:31,32. Suavemente Hesus a interumpí nan kombersashon tristu, i pa e siguiente dos oranan El a duna nan e klavenan pa komprondé tur Skritura i profesia.