Lès 4

E Prens Rebelde

Absalon tabata esun di mas bon tipo, astuto i ambisioso di e yu hòmbernan di David. Beibel ta bisa: “Ma den henter Israel no tabatin niun hende pa ser elogiá asina tantu manera Absalon pa su bunitesa: for di su planta di pia te na e korona di su kabes no tabatin defekto den dje.” 2 Samuel 14:25.

Pero e prens hóben determiná akí tabata ke mas ku djis atmirashon di e pueblo pa su aparensia impreshonante. E tabata ke e poder di e trono di su tata. E tabata ke ta rei di Israel na kualke preis. Promé Absalon a mata su ruman hòmber mayó, Amnon, despues ku Amnon a maltratá su ruman muhé Tamar. Amnon tabata David su yu mayó i den liña pa sigui David komo rei. Despues, despues ku Absalon a logra rekuperá fabor di su tata, el a kuminsá sembra simianan sutil di duda den henter e reino tokante David su liderazgo, huisionan, i leinan te ora el a “hòrta kurason di e hòmbernan di Israel.” 2 Samuel 15:6.

Finalmente, su plan siniestro a brota den un rebelion total segun ku Absalon a trata di asesiná su mes tata i sekuestrá e reino. David i su siguidónan a keda fòrsá di hui for di Jerusalèm. Pero despues di un bataya severo algun dia despues, David tabata sigur atrobe riba su trono, i e bunita prens Absalon a ser matá.

Un storia tristu enbèrdat, pero esaki no tabata e promé pleitu di famia real asina. Den un otro gran reino hopi tempu pasá, susesonan masha similar a hiba na e rebelion di mas trágiko di tur tempu. E reino tabata yama shelu!