Lès 6

E Lei di e Rei

Despues ku Dario, rei di e medonan i persianan, a konkistá Babilonia, el a ehekutá tur funshonario di gobièrnu babilóniko, ku eksepshon di un. E hòmber afortuná ei tabata Daniel, un sirbidó di e Dios berdadero. Setenta aña promé, el a ser hibá for di Judá pa Babilonia komo prezu i poné pa sirbi den e palasio komo konsehero pa e reinan babilóniko. Daniel a bira konosí den henter e reino pasobra e tabatin “un spiritu ekselente.” Daniel 5:12, 6:3.

No solamente Rei Dario a spar Daniel, sino el “a pensa di pon’é riba henter e reino.” Daniel 6:3. Ora e ofisialnan di Medo-Persia a haña sa ku e rei tabata bai promové un prezu hebreo bieu pa goberná riba nan, nan tabata yalurs i indigná. Pues nan a plania pa sedusí Dario pa firma un lei ku, pa e siguiente 30 dianan, kualke hende ku pidi na kualke dios òf hende ku eksepshon di rei, lo ser tirá den e kueba di leon (Daniel 6:7). Aparentemente e hòmbernan akí tabata sa ku Daniel tabata infleksibel den su bida di orashon i firmemente komprometé na obedesé e lei di su Dios, ku ta prohibí adorashon di kualke otro dios (Eksodo 20:3).

Nèt manera nan a ferwagt, e funshonarionan a gara Daniel ta hasi orashon na Dios for di su bentana habrí. Ora Rei Dario a deskubrí ku el a ser engañá i ku su amigu bieu tabata rumbo pa e kueba di leon, el a purba tur ángulo posibel pa libra Daniel for di e lei bobo ku el a firma. Pero e lei no por a ser kambiá. Daniel a bai na e kueba di leon, i Dios a rekompensá su fieldat dor di manda un angel pa sera boka di e leonnan (Daniel 6:22).

Profesia ta bisa nos ku den e último dianan, e pueblo di Dios lo tin ku tuma un desishon similar relashoná ku kua rei i kua lei nan lo obedesé.