Lès 8

E Reino Glorioso

Despues ku Salomon a ser establesé komo e rei nobo di Israel, Señor a aparesé na dje den un soño i a bisa: “Pidi loke lo Mi dunabo.” 1 Reinan 3:5. E rei hóben por a pidi plaka, fama, òf bida largu, pero e no a hasié. En kambio, el a pidi sabiduria pa goberná e pueblo di Dios na un manera hustu. Komo kontesta riba e orashon humilde i sinsero ei, Señor a duna Salomon tremendo sabiduria i persepshon ku ta surpasá tur otro hende. Fuera di esei, Dios a bendishon’é tambe ku fama, rikesa, i bida largu.

Durante e reinado di Salomon, Israel tabata goso di pas i prosperidat sin igual. Metalnan presioso tabata asina abundante na Jerusalèm durante su tempu, ku plata tabata ser konsiderá mes komun ku piedra (1 Reinan 10:27). Ademas di e tèmpel magnífiko di marmer i oro ku Sálomon a konstruí pa Dios, el a konstruí tambe un palasio i un patio luhoso, plùs statnan kompletu pa alohá su garoshinan i koredónan di kabai. Hardinnan di flor bunita ku palunan raro tabata dòrna tur stat. Monarka, noble i realesa tabata bini di rònt mundu pa bishitá i trese regalo. Nan tabata anhelá pa tende e sabiduria profundo ku Dios a pone den kurason di Salomon (1 Reinan 10:24).

Entre e hopi bishitantenan real tabatin un reina riku i bunita di e tera leu di Sheba. E ker a mira peronalmente si e informenan tokante e rei di Israel tabata bèrdat. E Reina di Sheba a pone Sálomon na prueba ku hopi pregunta difísil i a keda babuká pa su kontestanan briante. Tur kaminda ku e tabata wak, su sentidonan tabata deslumbrá. Pero asta Israel na su zénit tabata manera nada kompará ku e reino glorioso ku Dios a prepará pa bo!