Lès 9

E Muhé Montadó di Endor

Rei Saul tabata desesperá i tabata tembla di miedu. Henter e ehérsito filisteo a reuní pa ataká e trupanan mas chikitu i débil di Israel. Saul a keha: “Si Samuel tabata aki, e lo a bisami kiko hasi.” Pero e gran profeta di Israel a muri algun aña promé.

E monarka di edat avansá a purba desesperadamente pa haña algun konseho òf guia di otro profetanan òf saserdotenan, pero Señor no ker a papia kuné. Komo hóben, Saul tabata serka di Dios. Pero despues di a subi trono, el a bira kruel i a rebeldiá kontra e Palabra di Dios. Un biaha el a asta laga asesiná henter un pueblo di saserdote. Rei Saul a nenga persistentemente di skucha Señor, i awor den su angustia, Dios no ker a kontest’é.

“E ora ei Saul a bisa su sirbidónan: "Buska pa mi un muhé ku ta montadó, pa mi por bai serka djé, i konsultá kuné.” 1 Samuel 28:7. Dios a manda Su pueblo klaramente pa nunka konsultá un montadó òf spiritista (Levítiko 19:31, 20:27), pero awor Saul tabatin tiki konsiderashon pa e instrukshon implísito di Dios.

Ora el a haña un muhé na Endor ku a pretendé di ta konsultá ku e mortonan, e rei a disfrasá su mes i a bai bishit’é. El a bisa e spiritista: “Trese Samuel pa mi.” E montadó a pasa dor di su hechisonan i enkantonan te ora ku un aparishon, ku ta pretendé di ta e profeta Samuel, a paresé i a duna e rei un mensahe totalmente sin speransa. El a pronostiká ku Saul i su tres yu hòmbernan lo a muri den bataya e siguiente dia.

E siguiente dia e yu hòmbernan di Saul a ser matá dor di e filisteonan, i despues e rei heridá i deskurashá a kai riba su spada i a kita su mes bida (1 Samuel 31:2-4). Ken a papia ku Saul pa medio di e hasidó di brua, un profeta di Dios resusitá, òf un diabel disfrasá?