Lès 10

Statnan di Shinishi

Abraham tabata sa ku su subrino tabata kometé un fayo grandi ora Lòt a skohe pa muda su famia pa Sodoma. E statnan di e parti abou di e vaye di Jordan tabata bunita i luhoso, pero nan tabata tambe hopi korupto. “E hòmbernan di Sodoma tabata sumamente malbado i pekadornan dilanti di Señor.” Génesis 13:13. Finalmente, Dios a disidí di destruí e statnan pekaminoso akí pa motibu di nan abominashonnan, pero promé El a manda dos angel pa bai Sodoma pa reskatá Lòt i su famia.

Promé ku nan a drenta Sodoma, e angelnan akí a tuma e apariensia di dos hòmber biahero. Lòt a mira e dos strañeronan bunita ora nan a drenta e portanan pa promé biaha, i sabiendo ku e kayanan di e stat malbado ei tabata leu di ta sigur anochi, el a urgi nan pa tuma refugio den su kas. Pero hòmbernan malbado tabata vigilá, i e anochi ei nan a reuní dilanti di e porta di Lòt i a insistí pa e saka su invitadonan pa asina nan por abuzá di nan. Enbano Lòt a purba rasoná ku e multitut perverso ku a reuní na su porta. Nan opseshon demoniako a intensifiká so, i pronto e multitut a kuminsá menasá Lòt tambe! Na e punto akí, e angelnan no por a skonde nan berdadero identidat mas. Nan a hala Lòt paden di e kas pa siguridat i a dal e multitut rabiá na porta ku sieguedat.

E siguiente mainta trempan, e angelnan a bisa Lòt i su famia: “Skapa pa boso bida! No wak boso tras. ... Skapa bai na e serunan, pa boso no ser destruí.” Génesis 19:17, NKJV.* "E ora ei SEÑOR a yobe riba Sodoma i riba Gomora suafel i kandela di Señor for di shelu." Génesis 19:24. Solamente Lòt i su dos yu muhénan soltero a keda ispar, pasobra su kasá a wak bèk na Sodoma ku anhelo i a kombertí den un pilá di salu. E Palabra di Dios ta bisa nos ku den e último dianan, kondishonnan di mundu lo parse esun di Sodoma, i asina tambe e kastigu lo ta!

Bai Lès 10