Lès 11

Un Riu di Bida

Naaman tabata un komandante balente, riku i famoso pa e ehérsitonan di Siria ku a haña lepra, e malesa di mas temí di tempu bíbliko. Lepra tabata nifiká isolashon for di sernan kerí i un morto mizerabel i slo. Un mucha muhé katibu hebreo ku tabata traha na kas di Naaman a bisa ku si su doño solamente lo a bai serka profeta Eliseo na Israel, e lo a kura Naaman di su lepra.

Dispuesto pa gara kualke hilu di speransa, Naaman a hasi e biahe largu pa Israel. Huntu kuné tabatin un grupo chikitu di wardaespalda personal i un reskate di rei pa paga pa e milager di sanashon akí. Ora Naaman finalmente a para dilanti di e kas humilde di e profeta, Eliseo no ker a sali. En kambio, el a manda su sirbidó ku e instrukshonnan simpel akí: “Bai i baña shete biaha den Jordan, i bo kueru lo restourá na bo, i lo bo ta limpi.” 2 Reinan 5:10.

E mandato di e profeta pa baña tabata impliká ku Naaman tabata sushi! Ser bisá pa baña shete biaha i den un riu yen di lodo, no ménos, tabata demasiado pa e orguyoso general sirio. Den un atake di rabia, Naaman a bira su kabai i a kuminsá kore bai kas. Pero pa e por a yega Damasko, Naaman mester a kore kantu di Riu Jordan. Segun ku e tabata pasa, e sirbidónan di Naaman a urgié pa purba e konseho di e profeta. Asina el a para su kabai, a slep baha, i a pone un banda e armadura ku tabata tapa e evidensia spantoso di su lepra. Pokopoko Naaman a baha bai den e awanan di riu Jordan. Seis biaha el a bai bou di awa sin resultado, pero ora el a bin ariba e di shete biaha, e lepra a bai! Su kueru tabata mes puru i saludabel ku esun di un bebi.

Meskos ku Naaman a eksperensiá restourashon, abo tambe por haña un eksperensia di nasementu nobo ku ta sana!