Lès 13

Bùig pa Babilonia

Rei Nabukodonosor a duna e señal, i segun ku e músika di mil instrumènt a kuminsá hincha, e kortina a kai, eksponiendo un imágen di oro deslumbrante di 90 pia ku tabata bria den e lus di solo. Despues, segun òrdu di Rei, tur e ofisialnan ku a reuní riba e sabana di Dura a kai abou na suela den adorashon deboto. Tur a bùig, ku eksepshon di tres hóben hebreo, ku tabata sirbidó di un Rei mas grandi.

Nabukodonosor tabata bria di orguyo i satisfakshon te ora a ser reportá ku Shadrach, Meshach i Abednego a nenga di bùig i adorá su imágen. Asombrá ku kualke hende lo a riska desobedesé, Nabukodonosor a asumí ku e konseheronan hóben akí mester a komprondé su dekreto malu. P’esei el a ofresé nan un chèns mas pa bùig, pero nan a nenga! Awor e ekspreshon di e rei a kambia bira rabia. El a ordená su sòldánan pa keinta e fòrnu den serkania shete biaha mas kayente ku normal. Segun ku kombustibel tabata ser montoná riba e kandela, e tres hòmbernan tabata ser mará firmemente ku kabuya. E kalor ku a resultá tabata asina intenso ku el a mata e sòldánan ku a tira nan den e fièrnu kayente.

Segun ku e rei tabata wak den e fòrnu ku tabata ronka, diripiente su boka a habri. Ku un stèm temblando el a puntra: “Nos no a tira tres hòmber mará den e kandela?” Su konseheronan tabata di akuerdo ku nan a hasié. E ora ei e rei a bisa: “Mi ta mira kuater hòmber lòs, ta kana meimei di e kandela, i nan no tin ningun daño i e forma di e di kuater ta manera e Yu di Dios.” Daniel 3:25.

Dios a libra e hóbennan balente ei den e fòrnu di kandela pasobra nan a para pa Su bèrdat. Den e último dianan, e pueblo di Dios lo tin ku enfrentá un prueba similar.