Lès 14

E Marka di Cain

E promé dos yu hòmber di Adam i Eva tabata diferensiá enormemente den nan personalidatnan i komportashon. Cain tabata anhelá pa traha den kunuku i konstruí, miéntras ku Abel tabata gusta kana rònt den e serunan i kunuku ku su tounan di karné.

Despues ku piká a drenta e mundu nobo akí pa motibu di e desobedensia di Adam i Eva, Dios a establesé un sistema di sakrifisio i a splika ku sin dramamentu di sanger no tin pordon pa piká (Hebreonan 9:22). El a bisa nan ku e sakrifisionan akí tabata mustra padilanti na e tempu ku Hesus lo a bira hende i muri komo e Lamchi di Dios pa e pikánan di mundu. Fielmente Abel a trese un lamchi yòn komo sakrifisio pa su pikánan, pero Cain a pensa ku no tabata nesesario pa obedesé e mandamentu di Dios asina presis. El a konsiderá e sistema di sakrifisio komo sushi i a rasoná ku tanten ku el a trese un ofrenda i a adorá Dios, e detayenan lo no a importá. Asina el a trese un ofrenda di su mes obranan, algun produkto di kunuku. Cain a wak ku rabia yalurs ora kandela a baha for di shelu i a konsumí e sakrifisio di Abel pero a laga su mes ofrenda sin mishi kuné. Amorosamente Señor a urgi Cain pa humiliá su mes i obedesé, pero di forma tèrko Cain a persistí den su rebelion. Abel tambe a purba rasoná suavemente ku su ruman mayó, pero Cain a bira furioso. Pa momento ku el a rekobrá su sano huisio, Abel su kurpa sangrá tabata drumi ketu na su pia. Dios a pronunsiá un maldishon riba Cain, i ora Cain a keha tokante su sentensia, Señor a pone un marka riba dje pa futuro generashonnan no tuma vengansa pa e promé homisidio akí.

E buki di Revelashon ta bisa nos ku, den e último dianan, lo tin un bataya atrobe entre kristiannan tokante kon i ki ora adorá. Pronto tur hende lo ser identifiká sea pa medio di e seyo di Dios òf e marka di e bestia.