Lès 15

Un Modelo Selestial

Nunka promé Señor a manifestá señalnan i maravianan asina poderoso manera ora El a libra e yunan di Israel for di sklabitut na Egipto. Plaga tras di plaga a kai riba e reino di Fárao te ora ku el a ser fòrsá pa laga su katibunan liber. Despues Señor a parti Laman Kòrá i a hiba e nashon hóben na libertat, miéntras El a hoga nan enemigunan ku tabata persiguí nan.

Despues di a drenta den desierto, Dios a sorprendé hopi di Su pueblo dor di guia nan sùit den e direkshon kontrali di e Tera Primintí. Señor tabata sa ku promé ku nan lo tabata prepará pa risibí nan herensia, nan mester a ser organisá i siñá pa konfi’E. Segun ku nan tabata biaha pa Seru Sinai, Dios a supli tur nan nesesidat. Ora nan a haña hamber, Dios a alimentá nan ku pan for di shelu. Ora nan a haña set, Señor a trese awa ku ta kai for di un baranka. Ora diripiente nan a ser ataká for di patras dor di un enemigu, nan a ser doná un viktoria milagroso.

Finalmente, e israelitanan a kamper na pia di e seru santu. Einan Dios a hasi algu ku E no a hasi promé ni for di e dia ei. El a papia, den oido di henter un nashon, Su pakto, e Dies Mandamentunan. Despues ku Señor a papia Su lei oudiblemente, El a yama Moises pa subi Seru Sinai pa risibí un transkripshon skirbí den piedra. Pero Dios a dun’é algu mas tambe. Miéntras e tabata riba e seru ku Señor pa 40 dia i 40 anochi, Moises a risibí instrukshonnan detayá pa konstruí un tèmpel bunita i portabel pa Dios. E lo tabata un modelo chikitu di Su lugá di biba real den shelu. E struktura úniko akí mester a sirbi komo un lès ophetivo tridimenshonal pa henter mundu di e plan di Dios pa salba nos for di piká.