Lès 16

Purifikando e Tèmpel

Hesus tabata visibelmente tristu ora El a drenta e patio di tèmpel i a kontemplá e agitashon. Na tur banda El a mira kouchinan yená ku animalnan di sakrifisio i a tende bendedónan ta grita i negoshá ku peregrinonan bishitante pa e preis di mas haltu. E kuu di palonba, guièrtamentu di karné, i gritamentu di buey a meskla huntu ku e holónan di un kunuku pa forma un konsierto di káos. E káos akí nunka tabata e plan di Dios. Ora Salomon a konstruí e promé tèmpel na Jerusalèm, tabatin asina tantu rèspèt pa e kas di Dios ku ni sikiera e zonidu di martin por a ser tendé durante su konstrukshon. Tur e piedra- i tablanan a ser kòrtá di antemano otro kaminda, despues a ser tresé na e sitio di tèmpel i a ser montá den silensio (1 Reinan 6:7).

Hesus a haña un man yen di kabuya usá pa dominá e karnénan i a mara nan den un zuip chikitu. E ora ei e Yu di Dios a grita den tononan manera di tròmpèt: “Kita e kosnan akí i no hasi e kas di mi Tata un kas di komersio.” Juan 2:16. “Ta pará skirbí: Mi kas lo ser yamá e kas di orashon, ma boso a hasié un kueba di ladron.” Mateo 21:13. Moviendo di un stènt pa otro, e ora ei El a liberá e bestianan i a bòltu e mesanan di e kambiadónan di plaka.

Sintiendo ku nan tabata den presensia di Omnipotensia, e komersiantenan spantá a hui for di e patio di tèmpel sin wak patras. Hesus tabata ke, mas ku tur kos, pa hende tin un konsepto kla di e amor i puresa di Su Tata selestial. Ta p’esei Su kurason a kibra pa mira e tèmpel santu kombertí den un marshe di pruga.

Hopi aña promé, profeta Daniel a pronostiká di un otro tempu ora e tèmpel lo a ser kontaminá, e bèrdat di Dios lo a ser distorshoná, i Su pueblo oprimí. I un biaha mas, Señor lo a bin pa purifiká Su santuario.