Lès 18

Bentananan di Shelu

Nunka Jacob a sintié asina bashí i so, i tur esei tabata pasobra e tabata astuto i kudisioso. Promé Jacob a soborná Esau, su ruman hòmber oochi mayó, pa bende su primogenitura. Despues, ku yudansa di su mama, el a gaña su tata siegu, Isaac, pa dun’é e bendishon paternal ku legítimamente tabata pertenesé na Esau.

Awor Jacob tabata hui for di kas, parsialmente pa skapa di e menasanan asesino di su ruman hòmber ofendí. El a baha su kabes i a yora ora el a pensa riba kon tur su plannan ambisioso a frakasá. Su so den desierto, ku solamente un piedra pa kusinchi i un palu pa protekshon, Jacob a purba sosegá. E tabata puntra su mes si e lo a yega di bolbe mira su mayornan i si Dios lo a pordon’é. Agotá, Jacob a pega soño. Pronto el a haña su mes bañá den e resplandor briante di un soño bibu. El a mira un lus resplandesiente ta kore for di e shelunan habrí, ku un trapi bunita ku ta span for di e gloria ariba te na tera abou. Tabatin inkontabel angelnan briante ta biaha bai ariba i bin abou for di e trapi akí.

E ora ei Jacob a tende Señor papia for di shelu i a primintí di bendishon’é den su biahe. Tambe Señor a konfirmá ku Jacob e mesun pakto ku El a sera ku Abraham i Isaac.

Ora el a lanta, Jacob a kai na rudia i a hasi un promesa di bandoná su kamindanan kudisioso. El a primintí: “Di tur loke Bo dunami, sigur lo mi dunaBo e désimo parti.” Génesis 28:22.

Dios a aseptá e promesa akí i a habri e bentananan di shelu pa asina ku, ora Jacob a regresá kas 20 aña despues, el a bira un hòmber masha próspero i generoso.