Lès 19

E Baile di e Yu Muhé

Rei Herodes su kasá, Herodias, tabata odia Juan Boutista. E profeta ku tabata biba den desierto a riska yam’é un adúltera pasobra el a bandoná su kasá Felipe pa kasa ku su ruman hòmber malbado pero mas riku. Awor e reina malbado a determiná pa usa su influensia riba Herodes pa tuma vengansa riba Juan. Promé, el a persuadié pa laga sera Juan den prizòn. Despues el a pidi pa ehekutá Juan, pero Herodes a nenga. E tabata sa ku Juan tabata un berdadero profeta i tabatin miedu di reakshon polítiko negativo di e pueblo.

Finalmente, Herodias a desaroyá un plan infalibel. El a tene un fiesta pa kumpleaño di Herodes i a invitá tur su amigunan i e noblenan di su reino, despues el a regla pa su bunita yu muhé Salomé baila den un estilo seduktor i koutivante. Herodias a spera ku despues ku Herodes a bebe algun glas di biña, e lo a puntra Salomé ki rekompensa e tabata ke pa su baile enkantador.

Su plan sinistro a funshoná. Despues di e baile di Salomé, Herodes a hasi un huramentu yen di pompa: “Kiko ku bo pidimi, lo mi dunabo, asta mitar di mi reino.” Marko 6:23. Miéntras e invitadonan burachi tabata aploudí e generosidat di e rei, e mucha a para kla ku su kontesta. E ora ei el a shòk tur hende dor di pidi kabes di Juan Boutista riba un skalchi! Herodes a keda asombrá pa e petishon horibel, pero tur su amigunan spantá tabata wardando riba su kontesta. Ku miedu ku e lo a parse débil si e nenga, e rei orguyoso a duna e òrdu ku mal gana. E mesun dia ei e poderoso profeta Juan su kabes a ser kitá afó, su so den prizòn.

Esaki no tabata e promé biaha ku un tim di mama i yu muhé a usa gobièrnu pa persiguí e pueblo di Dios.