Lès 20

Dies Biaha Mas Sabí

Ora Rei Nabukodonosor a sitia e stat di Jerusalèm, míles di hudiu a ser hibá prezu pa Babilonia. E rei a instruí su sirbidó, Ashpenaz, pa selektá hóbennan talentoso for di entre e prezunan hudiu ku lo a bini e palasio pa tres aña pa siña e idioma i sabiduria di Babilonia pa asina nan por a sirbi rei.

Daniel, Hananiah, Misael i Azariah a kapta atenshon di Ashpenaz i a ser hibá na palasio di rei. Pero tabatin un problema. E menú di karni riku i biña apuntá pa e hóbennan tabata kontené hopi artíkulo prohibí pa e Palabra di Dios.

Sin ker a parse malagradesido, Daniel a puntra si e i su tres amigunan por a haña un dieta vegetariano pa kome i awa pa bebe. Na promé instante e sirbidó di rei a resistí nan petishon. “Bo no por keda salú dor di kome asina!” el a sklama. “Lo bo bira malu, i despues e rei lo kòrta mi kabes.” Pero Daniel a persistí suavemente, sugeriendo un periodo di prueba di 10 dia, despues di kua nan salú visibel por a ser kompará ku e hóbennan ku a kome for di e kafetaria real.

E plan akí a ser akordá, i pa 10 dia e kuater hóbennan hebreo a bebe awa i a kome un dieta vegetariano simpel. Na final di e periodo di prueba, Daniel i su tres amigunan “tabata parse mas bunita i mas gordo den karni ku tur e muchanan ku a kome e porshon di e karni di rei.” Daniel 1:15.

Tres aña despues, e kuater hóbennan akí a ser poné na prueba dor di Rei Nabukodonosor, i a ser deklará ku nan tabata 10 biaha mas brait ku tur e hòmbernan sabí na Babilonia. Beibel ta bisa nos ku Daniel a biba masoménos 100 aña. Kiko a yuda duna Daniel i su amigunan asina profundo sabiduria, salú i bida largu?