Lès 21

Bos den Desierto

Hesus a bisa: “Entre esnan ku a nase di muhé no a lanta niun mas grandi ku Juan Boutista.” Mateo 11:11. Kiko nos sa tokante e hòmber solitario akí ku Hesus a yama esun di mas grandi di e profetanan?

Ora Juan a kuminsá prediká den desierto di Judea, hende tabata bini for di mianan rònt pa skucha e mensahero poderoso, sin miedu i humilde akí. Den enorme kontraste ku e lidernan religioso di e tempu ei, su bida tabata marká ku santidat i simplisidat. Miéntras ku e saserdotenan tabata bisti paña luhoso, Juan tabata bisti un paña modesto di lana di kamel ku un faha di kueru. Miéntras nan tabata fiesta, Juan tabata yuna òf tabata kome bonchi di carob i stropi di abea di mondi. El a nenga di bebe kualke biña òf bibida stèrki, pa e por a ser yená ku e Spiritu di Dios (Lukas 1:15). En bes di snoanan dòrná, Juan a skohe e riunan i vayenan di baranka komo su katedral pa prediká. Pronto hende tabata puntra: “E hòmber akí por ta Elias?”

Juan a bisti sí manera e profeta di Tèstamènt Bieu, pero e no tabata Elías reenkarná. E angel Gabriel a splika na mayornan di Juan promé ku su nasementu ku e lo a bai “den e spiritu i poder di Elias ... pa forma un pueblo prepará pa Señor.” Lukas 1:17.

E klave pa e ministerio di Juan tabata ku e lo tabatin e mesun poder di Spiritu Santu ku Elias tabatin pa kousa un rebibamentu meimei di e pueblo di Dios. Su trabou spesial tabata pa prediká arepentimentu pa piká i prepará hende pa e promé binida di Hesus.

Beibel ta bisa ku lo tin henter un ehérsito di Eliasnan i Juan Boutistanan den e último dianan pa hasi un trabou similar den prepará mundu pa Hesus su segundo binida. “Mira, lo Mi manda serka boso Elias e profeta promé ku binida di e dia grandi i spantoso di Señor.” Malakias 4:5. (Lesa tambe Joël 2:28-31.)