Lès 22

Probando e Profetanan

Ahab, e rei malbado di Israel, ker a kapturá e stat di Ramot-gilead bèk for di e sirionan. Pero e tabatin mester di yudansa, asina el a pidi e bon Rei Jehoshaphat di Judá pa uni ku su kampaña kontra nan enemigu komun. Jehoshaphat a bisa ku e tabata dispuesto pa uni forsa ku Ahab, pero ku nan mester a buska konseho di Dios promé.

Ahab a bandoná Señor añanan anterior pa adorá e dios pagano Baal, asina el a yama 400 profeta kontratá pa bini dilanti di e dos monarkanan. Ku despliegue dramátiko, e profetanan falsu akí a bisa: “Bai i bringa kontra e sirionan, i boso lo ta viktorioso!” Pero Rei Jehoshaphat a pidi pa tende di un berdadero profeta di Señor. Ahab a bisa ku tabatin un profeta di Yehova ku a sobra kende su nòmber tabata Mikeas, pero el a agregá: “Mi ta odi’é pasobra e no ta profetisá bon di mi, sino malu.” Versíkulo 8.

Riba insistensia di Jehoshaphat, ku mala gana Ahab a manda un sirbidó pa buska Mikeas. E profeta balente a bin i a hasi un pronóstiko masha impopular. El a bisa Ahab ku e lo a muri den e bataya ku Siria. Awor Ahab tabata enfrentá un desishon difísil. E lo mester a kere 400 profeta ku ta bisa kosnan bunita, òf un solo profeta di Señor?

Rei Ahab, ku tabata tèrko, a persuadí Jehoshaphat pa no konsiderá e spièrtamentunan di profeta Mikeas i uni kuné den guera. El a pensa ku e por a surpasá Señor dor di bisti armadura kompleto i evitá e liñanan dilanti di bataya. Pero Ahab a siña muchu lat ku nunka bo por skapa di e Palabra di Dios. Durante e bataya, un flecha ku a dual, ku tabata bula den laira, a dal Ahab den e skarnirnan di su armadura, i el a sangra te na morto den su garoshi.

Hesus a atvertí ku lo tin hopi profeta falsu den e último dianan (Mateo 24:11). Ta p’esei nos mester sa kon distinguí loke ta bèrdat for di loke ta falsu. E por ta un asuntu di bida òf morto!