Lès 23

Un Bòter di Zeta
i e Spiritu di Mas Poderoso
na mundu

Eliseo por a mira ku e biuda hóben tabata desesperá. El a tira su mes na pia di e profeta bieu i a yora: “E kreditor ta biniendo pa tuma mi dos yu hòmbernan pa ta su katibunan!” E kasá di e muhé a muri inesperadamente i a lag’é ku un debe enorme. Den tempu bíbliko, un kreditor tabatin derecho di tuma propiedat i asta tuma yunan komo pago si un famia no por a paga e resibunan (Job 24:9).

“Kiko bo tin den kas?” Eliseo a puntra e mama distraí.

“Mi no tin nada den kas sino un bòter di zeta,” el a kontestá. Tiki tiki el a entregá tur e mobilario i ophetonan di balor den su kas na e kreditor kruel te ora ku no a keda nada otro sino su dos yu hòmbernan i e bòter chikitu di zeta akí. Zeta di oleifi tabata ser konsiderá un kos esensial di mas básiko. E tabata ser usá pa iluminá, keinta, kushiná, i kura.

Eliseo a bisa e biuda i su yu hòmbernan pa bai i fia mas tantu butishi bashí posibel serka nan bisiñanan. Nan mester trese nan kas, sera porta, i despues basha e zeta for di su bòter chikitu den e butishinan bashí. Nan a hasi manera Eliseo a instruí, i un milager maravioso a sosodé. E zeta den e bòter chikitu a sigui basha afó te ora ku tur e butishinan den e kas a ser yená!

“Kiko nos mester hasi awor?” e mama hóben a puntra e profeta.

“Bende e zeta, paga bo debe, i despues abo i bo yu hòmbernan por biba di e sobrá,” el a bisa. E muhé akí i su yu hòmbernan a bandoná e presensia di Eliseo regosihando i liber pa motibu di e milager di e zeta.

Señor ke librabo for di un kreditor sin mizerikòrdia yamá Satanas. E milager akí lo sosodé ora E yena bo kopa te ora e basha over ku Su zeta spesial!