Lès 24

Riba e Multitut

Pedro tabata stima Hesus, pero tambe e tabata stima e aprobashon di e multitut. Durante e último sena, ora Hesus a atvertí e apòstelnan ku nan tur lo a bandon’E, Pedro a bula lanta para i a hura sin duda ku asta si tur otronan lo ser ofendí, e lo no a bandon’E nunka. Hesus a kontestá: “Awe nochi, promé ku gai kanta, lo bo nenga mi tres biaha.” Versíkulo 34.

Pedro tabata ke men bon, pero e no a rekonosé e orguyo den su mes kurason. Mas lat e anochi ei, ora e multitut a bini pa arestá Hesus i tur hende tabata wak, Pedro a saka un spada pa defendé Su Maestro. Pero djis algun ora despues, na Su huisio, komo ku Pedro tabata ser chèrchá dor di e enemigunan di Hesus, el a nenga tres biaha ku e tabata sikiera konos’E. Kada bes Pedro tabata bira mas oudas, te ora ku finalmente el a neng’E ku huramentu i maldishon (Versíkulo 74).

E ora ei e gai a kanta. Na e mes momentu ei, Hesus tabata den e sala di huisio, siendo batí dor di e guardianan. Pedro a mira Hesus bira i wak e ku amor i kompashon, i esei a kibra su kurason. “I Pedro a kòrda e palabra di Señor, kon El a bis’é: ‘Promé ku gai kanta, lo bo nengaMi tres biaha.’ I Pedro a sali bai pafó i a yora amargamente.” Lukas 22:61,62.

For di e dia ei padilanti, Pedro tabata un hende diferente. E no tabata biba mas pa agradá e multitut, sino tabata determiná pa agradá solamente Dios. Despues di su kombershon, ora el a ser hibá dilanti di e konsilio hudiu i a ser menasá ku batimentu si e sigui prediká tokante Hesus, Pedro a kontestá sin miedu: “Nos mester obedesé Dios mas bien ku hende.” Echonan 5:29. Pedro a proba pa semper su lealtat i amor pa Hesus ora el a skohe pa ser krusifiká kabes abou dor di e emperador romano Nero mas bien ku nenga su Señor atrobe.