Tur aña di nobo nos ta rekordá e sufrimentu, morto i resurekshon di Kristu. Pa e seri akí no ta importante si ta e fecha korekto sino mas bien pa nos para ketu na e evento.
Nos ta selebrá e Siman di Pashon for di Djadumingu di Rama te na e djadumingu ku nos konosé komo Pasku di Resurekshon.
Promé ku nos para ketu na e susesonan di e siman, ta importante pa nos klarifiká un punto ku semper a trese konfushon.
Den nos sistema di kalènder e dia ta kuminsá 12or di anochi. Pa e puebel di Israel di antaño e dia tabata kuminsá ora solo drenta. Fuera di esei, solamente Sabat tabatin nòmber.
Ora nos studia, nos ta ripará ku e promé dia di siman tabata kuminsá djasabra atardi i tabata dura te ku djadumingu ora solo drenta atrobe.
Ku esaki den mente laga nos kuminsá nos biahe atraves di e Siman di Pashon akí.
“1 Hesus anto, seis dia promé ku Pasku, a bin Betania kaminda Lázaro tabata, kende Hesus a
lanta
for
di e mortonan.
2 Aya nan a prepará un sena p'E; i Marta tabata sirbi; i Lázaro tabata un di esnan ku tabata
sintá
na mesa huntu kunE.
3 Anto Maria a kohe un liber di perfume di nardo puru di hopi balor, i a hunta pia di Hesus
i a
seka
Su pianan ku su kabei. I e kas a yena ku e fragansia di e perfume.” (Juan 12:1-3)
Juan ta e úniko outor ku ta menshoná e detaye akí: seis dia promé ku Pasku (v. 1). Esaki ta hiba nos na e djasabra promé ku Pasku. Ademas ta bisa ku a prepará un sena (v. 2), kuminda di anochi. Ke men ku Sabat a pasa i e promé dia a kuminsá.
Riba e promé dia di siman, pues, Maria, ruman di Lázaro, ta ungi Hesus, sin sa di e gran difikultat ku tabata sper’É e siman ku ta nan dilanti. Versíkulo 7 ta bisa: “Anto Hesus a bisa: 'Lag'é; el a warda esaki pa e dia di Mi deramentu.' ”
Otro punto importante ta ku e aña ku Hesus a ser sakrifiká, e sabat di siman tabata kai huntu ku un sabat spesial. Esei tabata hasié un dia sumamente importante.
Dios tin maneranan straño di obra.
Ta importante realisá ku e susesonan di e siman akí ta kumplimentu eksakto di profesianan di Tèstamènt Bieu.
Durante 4000 aña e pueblo di Israel tabata sakrifiká lamchi, mirando padilanti na e gran sakrifisio ku Hesus lo a hasi e siman akí. Nan tabata mira pa fe padilanti na e Lamchi berdadero, esta Hesus.
Den e siguiente kolòm nos ta repasá den korto loke Hesus a hasi durante e siman akí. Kada dia lo bai den detaye di e susesonan di e dia ei.
