Motibunan pa Gradisimentu i Orashon

Lesa pa e Estudio di e Siman Akí:

Versíkulo di Memoria:

“Tin konfiansa den e kos akí mes, ku Esun ku a kuminsá un bon obra den boso lo komplet’é te na e dia di Hesu-Kristu” (Filipensenan 1:6, NKJV).

Pablo ta kuminsá su epístolanan bastante intenshonalmente ku palabranan di saludo i gradisimentu. “Grasia na boso i pas di Dios nos Tata i Señor Hesu-Kristu. Nos ta duna danki na e Dios i Tata di nos Señor Hesu-Kristu” (Kol. 1:2,3, NKJV).

Nos, meskos ku Pablo, tin hopi pa ta gradesido p’e. Nos a eksperensiá e grasia di Dios na maneranan profundo, maneranan ku ni angelnan por komprondé. Meskos ta konta pa Dios su regalo di pas, ku ta brasa harmonia ku Dios i e speransa ku ta kore for di e amor di Dios.

Riba un nivel humano, nos por duna i mustra apresio na otronan i spera ku hende ta apresiá e kosnan ku nos ta hasi pa nan. Mayornan ta hasi orashon pa nan yunan stima Dios i apresiá un dia, si no ta awor, e berdadero sakrifisionan ku nan a hasi pa duna nan e mihó kriansa ku nan tabata por. Pero, komo sernan humano, nos ta kometé hopi eror, i nos ta siña di nan (òf a lo ménos nos mester).

E siman akí nos lo konsiderá Pablo su palabranan di apertura di gradisimentu i orashon den Filipensenan i Kolosensenan, ku por enrikesé i fortalesé nos mes bida di orashon.

Kompañerismo den e Evangelio

Lesa Filipensenan 1:3–8. Kiko Pablo ta gradesido p’e? Ki siguransa e ta duna e filipensenan, i dikon esei ta importante?

Pablo a establesé e iglesia na Filipos; asina, nos por mira e kalor di kompañerismo kristian ta penetrá su karta. Aunke separá pa sientos di mia, Pablo, enkadená i enkarselá, ta karga e iglesia i su miembronan riba su kurason; e ta anhelá pa nan “ku e kariño di Hesu-Kristu” (Fil. 1:8, NKJV); e ta duna danki na Dios pa nan. Pablo su orashon di gradisimentu ta asta duna un bista di e interseshon di Hesus pa nos den shelu.

Riba e pechero di e sumo saserdote tabatin 12 piedra ku tabata representá e 12 tribunan di Israel. E pueblo mester tabata “riba su kurason” segun ku e tabata intersedé pa nan (Eks. 28:29, ESV). Na un manera ainda mas grandi, komo nos Sumo Saserdote den e santuario selestial, Hesus ta karga e nòmbernan di Su pueblo huntu kunE dilanti di e Tata.

Ta interesante pa bisa ku e formulashon di Filipensenan 1:3 ta ambiguo, i ta suprayá e relashon estrecho entre Pablo i e filipensenan. Generalmente ta ser tradusí ku Pablo ta kòrda nan den orashon, ma e por referí tambe na nan rekuerdo di dje. En todo kaso, e ta enfatisá e mutualidat estrecho ku nan ta kompartí, ku e palabra “kompañerismo” (Griego: koinonia) tambe ta suprayá. Komo ku Pablo tabatin komunion den e sufrimentunan di Kristu (Fil. 3:10), e filipensenan “a komparti” (Griego: sunkoinōneō) den e sufrimentunan di Pablo i a kompartí finansieramente pa sostené e ministerio di Pablo (Fil. 4:14,15). E mutualidat akí, ku tabata “for di e promé dia te awor” (Fil. 1:5), ta hib’é na gradisí Dios pa nan i na hasi orashon pa nan “ku goso” (Fil. 1:4).

Interesantemente, Pablo ta deskribí su ambiente di prizòn basta positivo, komo un ku ta proveé oportunidat pa “defensa i konfirmashon di e evangelio” (Fil. 1:7, NKJV). Su uso di e dos términonan legal akí ta sugerí ku su huisio ta inminente, pero tambe ku Pablo ta envolví aktivamente sòldánan i bishitantenan ku e evangelio. Defendé esaki (griego apologia) kontra atakenan i ta konfirmá ku tur dos su bèrdatnan eterno ta esensial. Pablo ta parse di ta preokupá ménos tokante su mes futuro ku tokante vindikashon di e evangelio mes. Sea ku e ta biba òf muri, Pablo tin konfiansa ku Dios lo terminá e “bon obra” ku El a kuminsá den tur ku ta konfia den djE (Fil. 1:6).

Kon bo ta komprondé e promesa ku Dios lo terminá ku e “bon obra den bo” (Fil. 1:6)? Kiko esei ta nifiká? E obra akí lo yega na terminá promé ku e Segundo Binida?

E Petishonnan di Orashon di Pablo

Algun aña pasá, tabatin un pastor ku a papia tokante orashonnan ku ta drai rònt di ami, ami, ami, i mi nesesidatnan òf deseonan. El a karakterisá nan apropiadamente komo “orashonnan chikitu egoista,” pasobra Dios tin kosnan mas grandi den mente.

Lesa e orashon di Pablo den Filipensenan 1:9–11. Kiko ta su enfoke, i ki petishonnan grandi e ta hasi? Kiko e ta bisabo tokante orashon?

E orashon akí tin solamente kuarentitres palabra na griego, pero e ta enkapsulá tur e preokupashonnan di Pablo, ku e lo amplia den e restu di e epístola: amor, konosementu, disernimentu, ta sinsero, no kousa ofensa, i e hustisia ku nos tin pa medio di Hesu-Kristu. Supyasente na e orashon akí, komo tambe e ekspreshonnan anterior di gradisimentu di Pablo, tin un énfasis riba e iglesia komo un totalidat. E orashon di Pablo ta kompletamente na fabor di otronan, pa henter e iglesia i pa su bienestar. Laga nos wak algun di e elementonan individual di e orashon mas djaserka:

Pa amor abundá mas i mas. Pablo no ta djis hasi orashon pa mas amor sino pa amor guiá den un direkshon spesífiko: “den konosementu i tur disernimentu” (Fil. 1:9, NKJV). E referensia na konosementu no ta na meramente konosementu intelektual sino ta impliká un konosementu di kosnan spiritual ku por ser optené solamente dor di kompañerismo ku Dios i estudio di Su Palabra (lesa Efe. 1:17, Efe. 4:13, 1 Tim. 2:4).

Disernimentu. Esaki ta ser spliká dor di Pablo komo ser kapas pa “aprobá loke ta ekselente” (distinguí esaki for di loke ta moralmente dañino) “i asina ta puru i sin kulpa” (Fil. 1:10, ESV).

Siendo sinsero. E palabra na griego ta nifiká “husgá dor di e lus di solo” i ta referí na un puresa di akshon intachabel: “Tur loke kristiannan hasi mester ta mes transparente ku e lus di solo.”—Ellen G. White, Reflecting Christ, p. 71.

No ta kousa ofensa. Esaki ta nifiká no ser un piedra di trompeká, no bisa òf hasi nada ku lo hasié mas difísil pa un hende kere.

Hustisia pa medio di Kristu. Pablo ta trata esaki ekstensamente den e epístolanan di Romanonan i Galationan i lo amplia riba dje tambe den Filipensenan 3. Nos no tin hustisia di nos mes sino solamente loke nos ta risibí pa medio di Kristu.

Disernimentu Spiritual Apliká

E filipensenan tabata komprendiblemente angustiá ora nan a tende di e enkarselashon di Pablo. Awor su trabou tabata severamente limitá. E no por a biaha. E no por a prediká. E no por a bishitá e snoanan i siña hende tokante Hesus komo e Mesias. E no por a lanta iglesianan mas. E filipensenan a manda Epaphroditus pa averiguá e kondishon di e apòstel, pa anim’é i pa sigurá ku su nesesidatnan físiko tabata ser satisfasé.

Lesa Filipensenan 1:12–18. Kon Pablo a mira su enkarselashon? Ki lèsnan nos por siña for di su aktitut, apesar di e sirkunstansianan ku el a haña su mes aden?

E mensahe ku Pablo a manda bèk kuné lo mester a sorprendé e filipensenan. Pablo a mira su sirkunstansianan ku bista diferente. Su disernimentu spiritual a hib’é na mira su enkarselashon komo un bon kos. E no a stroba su trabou at all sino “en realidat a resultá pa progreso di e evangelio” (Fil. 1:12, NKJV) . Kaminda otronan tabata mira solamente kadena i trali, Pablo tabata mira su guardianan romano komo almanan potensial den e reino di Dios. El a mira tambe ku su enkarselashon a enkurashá otronan grandemente pa ta mas aktivo i mas determiná pa plama e evangelio, pa papia ku kurashi pa Kristu, sin miedu di e konsekuensianan.

E por ta difísil pa imaginá, pero algun realmente a pensa di benefisiá di e enkarselashon di Pablo. Aparentemente, nan a pensa ku su skuridat lo a kondusí na mas atenshon pa nan mes i nan mes predikashon di e evangelio. Ki un ehèmpel poderoso pero tristu di egoismo humano, asta den iglesia. Manera Jeremias a bisa hopi promé ku Pablo: “E kurason ta engañoso riba tur kos, I desesperadamente malbado; Ken por konos’é?” (Jer. 17:9, NKJV).

Afortunadamente, kontrali na esei, algun obrero fiel tambe a bira mas zeloso pa plama e evangelio. Nan tabata stima Pablo asina tantu ku e sufrimentu ku nan a mir’é soportá pa su fe a hiba nan na konfia Kristu mas i a enkurashá nan pa ta mas aktivo ainda pa Señor. El a duna nan energia pa bai kaminda promé nan tabatin miedu di bai; el a hiba nan na papia den situashonnan durante kua promé nan tabata keda ketu; el a kondusí na asta mas hende ku a aseptá Kristu i plama e evangelio di salbashon.

Fruta di Evangelio

E relashon di Pablo ku e kolosensenan tabata diferente for di su relashon ku esnan na Filipos. El a inkluí nan entre esnan ku “no a mira mi kara den karni” (Kol. 2:1). No opstante, Pablo ta sigurá nan, manera el a hasi ku e filipensenan, ku e ta gradisí Dios pa nan i “semper” ta hasiendo orashon pa nan.

Lesa Kolosensenan 1:3–8. Pa kua tres kos Pablo ta gradisí Dios?

Pablo ta trese e tres birtutnan huntu ku e ta menshoná na otro kamindanan: fe, speransa i amor (lesa 1 Kor. 13:13, 1 Tes. 1:3, 1 Tes. 5:8). Nota ku Pablo no ta duna e kolosensenan krédito pa e kosnan akí. E ta gradisí e Tata pa nan, pasobra manera Santiago ta bisa nan ta entre e donnan “bon i perfekto” ku nos ta risibí di djE (Santiago 1:17, NIV). Ora nos mira e amor ku Dios tin pa nos, e ta hiba nos na fe den Kristu (Efe. 2:4–8), i nos ta risibí e speransa di shelu. Pedro ta deskribié komo “un herensia inkoruptibel i sin mancha i ku no ta disparsé, reservá den shelu pa boso” (1 Pe. 1:4, NKJV).

Pablo ta enfatisá tambe ku e evangelio ta konfiabel pasobra e ta basá riba “e palabra di bèrdat.” Esaki ta un ekspreshon ku Pablo ta usa otro kaminda den referensia na e palabra inspirá di Dios (lesa 2 Kor. 6:7, 2 Tim. 2:15). Diferente for di “e palabra di hende,” e ta obra “efektivamente” den esnan ku ta kere (1 Tes. 2:13) i ta kumpli ku e boluntat di Dios (Isa. 55:11). Pues, ora e evangelio ta ser proklamá, e poder di Dios ta ser manifestá pa medio di e obra di Spiritu Santu riba kurason di e oyentenan, i hende ta respondé. E evangelio mes ta produsí e fruta pasobra e ta “e palabra di bida” (Fil. 2:16).

Kisas loke ta di mas asombroso ta e plamamentu di e evangelio den un periodo di tempu asina kòrtiku. Denter di masoménos trinta aña di e morto i resurekshon di Kristu, Pablo por a bisa kaba ku el a plama “den henter mundu” (Kol. 1:6). Un poko despues den e mesun kapítulo, e ta bisa ku e evangelio “a ser prediká na tur kriatura bou di shelu” (Kol. 1:23, NKJV). E sistema di kaminda romano ekstenso a hasi komunikashon i biahe rápido posibel, ku ta e manera kon e epístolanan di Pablo por a ser sirkulá asina ampliamente i rápidamente. Pero ta e poder di Dios obrando pa medio di e palabra ta duna nasementu na bida spiritual den un persona (Santiago 1:18, 1 Pe. 1:23), hasiendo nan un kriatura nobo den Kristu (2 Kor. 5:17).

Poder di Orashon

Lesa Kolosensenan 1:9–12. Ki petishonnan spesífiko bo ta haña den e orashon di Pablo?

Pablo ta hasi orashon “pa boso por ser yená ku e konosementu di Su boluntat.” Pablo ta deskribí konosé e boluntat di Dios komo “sabiduria i komprondementu spiritual” (Kol. 1:9, NKJV). Sabiduria ta bini, promé ku tur kos, dor di konfia Dios kompletamente, ta dispuesto pa hasi Su boluntat (Juan 7:17), i no dependé riba nos mes komprondementu (Prov. 3:5). Pero hopi biaha e pregunta ta surgi: “Kiko ta e boluntat di Dios pa mi den e situashon akí?” Tin kuater fuente prinsipal for di kua nos por siña e boluntat di Dios segun ku nos ta busk’e den orashon:

1. E fuente di sabiduria di mas importante ta Beibel. “Bo palabra ta un lampi pa mi pianan i un lus pa mi kaminda” (Salmo 119:105, NKJV).
2. Dios a duna nos sabiduria spesial pa e último dianan atraves di e Spiritu di Profesia (Rev. 12:17, Rev. 19:10) manera ta ser manifestá atraves di e eskritonan di Ellen White. Beibel ta enkurashá nos pa “kere den Señor bo Dios, i lo bo ta establesí; kere Su profetanan, i lo bo prosperá” (2 Kron. 20:20, NKJV).
3. Dios Su boluntat i guia por ta konosí tambe pa medio di sirkunstansianan providensial, dor di pidiE pa habri òf sera portanan (lesa Kol. 4:3 ).
4. Spiritu Santu ta guia nos unabes ku nos a siña rekonosé Su bos: “Bo oreanan lo tende un palabra bo tras, bisando, ‘Esaki ta e kaminda, kana den dje,’ ki ora ku bo bira na man drechi òf ki ora ku bo bira na man robes” (Isa. 30:21, NKJV).

Pablo ta hasi orashon pa e kolosensenan por “kana digno di Señor” (Kol. 1:10 , NKJV). Naturalmente, niun hende ta inherentemente “digno,” ma Dios ta konta nos digno pa medio di Su grasia i ta yama nos pa biba di akuerdo ku e yamada haltu ei (Efe. 4:1, 1 Tes. 2:12, NKJV). Pablo ta usa e verbo “kana” òf “a kana” tres biaha mas den e karta akí so (Kol. 2:6, Kol. 3:7, Kol. 4:5). E ta nifiká biba i aktua di akuerdo ku e lei di Dios (Eks. 18:20), loke ta posibel solamente pa medio di e obra di Spiritu Santu (Ezek. 36:27).

Pablo ta hasi orashon tambe pa nan (i nos) bida por ta “kompletamente agradabel” pa Señor i despues ta menshoná vários manera pa hasi esei: “Siendo fruktífero den tur bon obra” (Kol. 1:9, 10, NKJV); despues “kresiendo den e konosementu di Dios” (Kol. 1:10, NKJV); i, finalmente, den “duna gradisimentu” (Kol. 1:12, NKJV).

“Hopi hende no por ta kapas di traha plannan definitivo pa futuro. Nan bida ta instabil. Nan no por diserní e resultado di asuntunan, i esaki hopi bes ta yena nan ku ansiedat i intrankilidat. Laga nos kòrda ku bida di e yunan di Dios den e mundu akí ta un bida di peregrino. Nos no tin sabiduria pa plania nos mes bida. No ta na nos pa forma nos futuro. ‘Pa medio di fe Abraham, ora el a ser yamá pa sali bai un lugá ku e mester a risibí komo herensia, a obedesé; i el a sali bai, sin sa unda e tabata bai.’ Hebreonan 11:8.

“Kristu, den Su bida riba tera, no a traha ningun plan pa E mes. El a aseptá e plannan di Dios p’E, i dia pa dia e Tata tabata desplegá Su plannan. Asina nos mester dependé riba Dios, pa nos bida por ta e simpel kumplimentu di Su boluntat. Segun ku nos ta komprometé nos kamindanan na djE, E lo dirigí nos pasonan.

“Demasiado hende, ora nan ta plania pa un futuro briante, ta hasi un frakaso total. Laga Dios plania pa bo. Manera un mucha chikitu, konfia e guia di Esun ku lo ‘warda e pianan di Su santunan.’ 1 Samuel 2:9. Dios nunka ta guia Su yunan di otro manera ku nan lo a skohe pa ser guiá, si nan lo por a mira e fin for di prinsipio i diserní e gloria di e propósito ku nan ta kumpliendo komo ko-obreronan huntu kunE.”—Ellen G. White, The Ministry of Healing, p. 478, 479.

Preguntanan pa Diskushon: