Pensa riba e trabou di mas duru ku bo a yega di hasi. Kiko a hasié difísil? Tabata e ekspektativanan òf e tempu asigná pa e trabou òf tur dos? Tabata bo aktitut pa ku e tarea? Of kisas tabata e hendenan ku bo a traha kuné? Of kisas e tabata djis parse un imposibilidat pa yega na alkansá éksito?
Konsiderá e propósito di e plan di salbashon: uni shelu i tera. Ta zona imposibel? Humanamente papiá, sigur e ta. No opstante, djis promé di a subi na shelu, Hesus a duna e apòstelnan un tarea aparentemente imposibel: “P’esei, bai i hasi tur e nashonnan disipel, batisando nan den nòmber di e Tata i di e Yu i di Spiritu Santu, siñando nan pa warda tur kos ku Mi a ordená boso” (Mat. 28:19, 20, NKJV).
Hesus a manda Pablo serka e paganonan pa kumpli ku e tarea aparentemente imposibel akí: “Pa habri nan wowonan, pa asina nan bira for di skuridat na lus, i for di e poder di Satanas na Dios, pa nan por risibí pordon di piká i un herensia meimei di esnan ku ta santifiká pa medio di fe den Mi” (Echonan 26:18, NJV).
Algun hende kisas por pèrdè ánimo ora nan ser duná trabounan manera esei. Sinembargo, nos no mester pasa por alto e promesanan ku Hesus a duna na tur e dos okashonnan akí. Na e apòstelnan, El a agregá: “I mira, Mi ta ku boso semper, te na fin di mundu” (Mat. 28:20). I na Pablo, Hesus a bisa: “Mi a paresé na bo pa e motibu akí, pa hasi bo un sirbidó i un testigu, tantu di e kosnan ku bo a mira komo di e kosnan ku lo Mi revelá na bo ainda” (Echonan 26:16, NKJV).
Brevemente, Hesus ta duna tareanan humanamente imposibel pa asina nos lo dependé riba djE, mas bien ku riba nos mes, pa kumpli ku nan. Nunka E ta duna nos un trabou sin supli e poder pa hasié. “Ora e boluntat di hende ta koperá ku e boluntat di Dios, e ta bira omnipotente. Loke sea mester ser hasí riba Su mandato, por ser kumplí den Su forsa. Tur Su òrdunan ta abilidatnan.”—Ellen G. White, Christ’s Object Lessons, p. 333.
Asombrosamente, pa e tempu ku Pablo a skirbi na e Kolosensenan, e evangelio a ser “prediká na tur kriatura bou di shelu” (Kol. 1:23, NKJV). Naturalmente, no ta tur a asept’é. Pero si nos wak kuidadosamente e enkargonan ku El a duna e apòstelnan (Mat. 28:18–20) i na apòstel Pablo, Hesus nunka a primintí ku tur lo bira disipel òf tur lo ser kombertí. E evangelio mester ser “prediká den henter mundu komo un testimonio na tur e nashonnan, i e ora ei e fin lo yega” (Mat. 24:14, NKJV, énfasis suministrá). Kon e testigu ei ta? Kon eksaktamente e mester ser realisá?
E kuartal akí nos lo studia e epístolanan di Pablo na e Filipensenan i na e Kolosensenan. Nan tin similaridatnan importante. Riba tur kos, nan ta revelá Kristu, esun Uniko kapas pa uni shelu i tera. E ta e trapi ku Jacob a mira ta ekstendé for di tera pa shelu (Gen. 28:12; kompará Juan 1:51). Komo Yu di hende i Yu di Dios, E ta redimí nos for di piká, i E ta intersedé pa nos.
Ora nos studia e kartanan akí, nos lo mira tur dos e aspektonan akí di Hesus. Nos lo konsiderá algun di e deklarashonnan di mas sublime hañá kualke kaminda tokante e divinidat di Kristu i kon El a entregá tur kos pa salba nos. Nos lo mira Pablo ta bringa for di prizòn ku problemanan den un iglesia ku el a lanta (Filipos) i den un ku e mes nunka ni a bishitá (Kolosas). E konekshonnan ku Pablo a establesé den henter e “iglesia mundial” di e tempu ei a kapasit’é, asta for di un prizòn romano, pa respondé na retonan. E tabata sa ku su tempu tabata kòrtiku, i el a hasi tur loke e tabata por pa hala e iglesia mas serka di shelu i di otro. Hasiendo esei, e ta mustra nos kon e iglesia di Dios awe por uni ku shelu pa kumpli ku e enkargo di último dia di Revelashon 14, ku nos konosé komo “e mensahe di e tres angelnan.”