Unidat Atraves di Humildat

Lesa pa e Estudio di e Siman Akí:

Versíkulo di Memoria:

“Kumpli ku mi goso dor di ta di mesun pensamentu, tin e mesun amor, ta di un akuerdo, di un mente” (Filipensenan 2:2, NKJV).

Unidat ta forsa. Pero sa kiko ta bèrdat no ta meskos ku hasié. Nos tur ta faya tin biaha, apesar di nos mihó esfuersonan pa unidat. Pero esei no ta meskos ku deliberadamente mina unidat. No ta nada straño, antó, ku segun ku Pablo ta sigui skirbi e filipensenan, e ke pa nan ta “di un akuerdo, di un mente.”

Pablo ta basa e nesesidat di unidat riba e siñansa i ehèmpel di Hesus. E ta un tema ku nos ta haña den henter Tèstamènt Nobo i spesialmente den e epístolanan. E orígen di desunion den universo a surgi for di e orguyo i set pa posishon i poder di un solo angel den shelu, un sentimentu ku a plama rápidamente, asta denter di un ambiente perfekto (lesa Isa. 14:12–14). Despues el a sigurá su mes den Eden atraves di un malkontentu similar ku e reglanan ku Dios a pone na lugá i e deseo pa subi na un esfera mas haltu ku esun ku Dios a diseñá (Gén. 3:1-6).

E siman akí nos lo wak e base bíbliko pa unidat den iglesia, enfokando spesialmente riba e kondesendensia asombroso di Hesus, e lèsnan ku nos por haña dor di kontempl’E, i kon nos por krese pa ta mas manera E.

Desunion na Filipos

Lesa Filipensenan 2:1–3. Ki faktornan ta parse di a hiba na desunion denter di iglesia? Kiko Pablo ta sugerí komo remedi?

Mester tabata un desepshon tremendo pa Pablo pa mira e iglesia, ku el a establesé i stima asina tantu, yená ku rivalidat i konsumí ku pleitu. E ta usa lenguahe masha fuerte pa deskribí e problemanan. “Ambishon egoista” ta tradusí un palabra (griego, eritheia) usá anteriormente den Filipensenan 1:17 (ESV) pa referí na Pablo su rivalnan interesá den nan mes na Roma ku tabata determiná riba promové nan mes mas bien ku avansá e kousa di Kristu.

“Ambishon egoista” ta entre e obranan di karni (Gal. 5:20, NKJV), i manera Santiago ta indiká, “kaminda envidia i egoismo ta eksistí, tin konfushon i tur kos malu” (Santiago 3:16, NKJV). E palabra griego pa “vanidat” ta ser usá solamente aki den Tèstamènt Nobo, ma ta aparesé den literatura èkstrabíbliko den e sentido di arogansia, orguyo bashí, i tin un sentido hinchá di bo mes. Pablo ta usa un palabra estrechamente relashoná ora e ta amonestá e galationan: “Laga nos no bira orguyoso, provokando otro, envidiando otro” (Gal. 5:26, NKJV).

E Fuente di Unidat

Pensa mas riba e énfasis di Pablo riba unidat den Filipensenan 2:2, bisando esensialmente e mesun kos na kuater diferente manera. Tuma nota tambe di su enfoke riba e mente, pensamentu- i sintimentunan. Miéntras ku e lidernan religioso tabatin e tendensia di enfatisá komportashon eksterior, Hesus a enfoká riba nos pensamentu- i sintimentunan. Por ehèmpel, e hóben riku a pretendé di a kumpli semper ku lei. Sinembargo, dor di bis’é pa bende tur loke e tabatin, duna na e pobernan i siguiE, Hesus a tèst su apego na kosnan mundano. Tambe El a bisa ku ta loke ta bini di kurason (òf mente) ta kontaminá un persona: “Pasobra for di kurason ta sali pensamentunan malu, asesinato, adulterio, fornikashon, ladronisia, testimonio falsu, blasfemia” (Mat. 15:19, NKJV), i “for di e abundansia di kurason e boka ta papia” (Mat. 15:14, NKJV).

Lesa Filipensenan 2:3,4. Ki pasonan práktiko Pablo ta urgi pa por tin unidat den e iglesia?

E palabranan di Pablo ta proveé un imágen di humildat: humildat di mente, balorá otronan mihó ku nos mes, wak pa e interesnan di otronan i no solamente di nos mes. Mas fásil bisá ku hasí, korekto? Pero esakinan ta prinsipionan importante pa tene den mente den tur nos interakshonnan. Hopi biaha den kombersashon tin e tendensia di konsentrá riba nos kontesta riba loke sea ku ta ser bisá, mas bien ku enfoká riba skucha pa asina komprondé kiko e otro persona ta bisando i purba mira e asuntu for di nan punto di bista. Hopi biaha pleitu ta surgi for di simpel mal komprondementu ku por a ser evitá simplemente dor di skucha aktivo. Nos no por ta di akuerdo, pero skucha i trata na komprondé e punto di bista di e otro persona ta e promé paso pa fomentá komunikashon i konfiansa saludabel.

Pablo ta papia di e unidat “[produsí pa] e Spiritu” (Efe. 4:3, AMPC), ku ta krea “e pas ku ta uni nos” (Efe. 4:3, EXB). Si tin pleitu den iglesia, Spiritu Santu por kalma e awanan i trese nos den unidat, kreando harmonia. Den e mesun kapítulo, Pablo ta papia di “e unidat di fe i di e konosementu di e Yu di Dios” (Efe. 4:13, NKJV). Nan dos ta relashoná. Tin e mesun fe, e mesun komprondementu di Skritura ku ta surgi for di konosé Kristu i Su siñansanan, ta vital pa unidat prevalesé meimei di nos.

Implante di Mente òf Sirugia di Mente?

Un kantidat kresiente di kompania rònt mundu ta trahando riba teknologia ku ta kombiná e poder di prosesamentu di kòmpiuter ku e serebro humano. Ku otro palabra, dor di konektá mentenan na kòmpiuternan, sientífikonan ta spera di impaktá nos pensamentunan atraves di e kòmpiuternan. Aunke uso di implante ku e serebro humano por primintí resultadonan positivo, ku ta inkluí yuda manehá epilepsia, depreshon i malesa di Parkinson, usonan mas siniestro no ta difísil pa imaginá. Kontrol di mente no por ta masha leu.

Den algun forma, e ta aki kaba. Nos mente ta meskos ku un kòmpiuter, solamente muchu mas superior. E fluho di informashon konstante, na kua nos ta ser eksponé diariamente, “ta programá” nos mente, ta kondishoná nos pensamentunan i ta guia nos akshonnan. Ora nos sumergí nos mes den medionan di komunikashon, e manera mundano ku hende ta pensa ta stèmpel su impreshon riba nos mente, i nos ta kuminsá pensa di e mesun manera. Ta komo si fuera e mente di otro hende a ser implantá òf fushoná den esun di nos.

Nos mester ta, meskos ku Hesus, “ku e mente fihá riba e Spiritu” (Rom. 8:6). “Ningun hende sa e kosnan di Dios eksepto e Spiritu di Dios,” ku Pablo ta pone den kontraste ku “e spiritu di mundu” (1 Kor. 2:11,12, NKJV). Ken ta nos maestro? I kiko nos ta siñando?

Lesa Filipensenan 2:5. Kiko bo ta kere ta nifiká tin e “mente” di Kristu?

Finalmente, nos por kambia nos mente, pero nos no por kambia nos kurason; ta Dios so por. Spiritu Santu mester realisá operashon di kurason riba nos, usando e “spada di e Spiritu” (Efe. 6:17), e Palabra “bibu i poderoso” di Dios, “perforando asta te na e divishon di alma i spiritu, i di skarnirnan i tuti, i ta un disernidó di e pensamentunan i intenshonnan di kurason” (Hebr. 4:1, NKJV). Solamente pa medio di Spiritu Santu nos por konosé nos mes realmente pasobra, pa naturalesa, nos mes kurason ta gaña nos (Jer. 17:9). E palabra hebreo pa “engañoso” (‘aqov) ta referí na suela di baranka ku ta pone nos trompeká; pa ekstenshon, e ta nifiká pensamentunan ku ta birá, trosé i kruel. Nos mester ser transformá dor di “renobashon” di nos mente pa nos por “proba kiko ta e bon i aseptabel i perfekto boluntat di Dios” (Rom. 12:2, NKJV).

E Mente di Kristu

Muhammad Ali a yega di bisa: “Mi ta esun di mas grandi.” Na ougùstùs 1963, seis luna promé ku el a gana e kampionato mundial di bòkseo di peso pisá, el a asta lansa un álbum di disko titulá “I Am the Greatest. [Mi ta esun di mas grandi.]” Ali, sin duda, tabata un gran atleta, ma e no tabata un ehèmpel pa sigui si un hende ke e mente di Kristu.

Kontrali na esei, Hesus tabata perfektamente sin piká. Aunke El a ser tentá “den tur kos meskos ku nos” (Hebr. 4:15), nunka El a peka, ni sikiera pa medio di un pensamentu. No opstante, Hebreonan 5:8 ta indiká: “aunke E tabata un Yu, tòg El a siña obediensia pa medio di e kosnan ku El a sufri” (NKJV). Hesus su sumishon na boluntat di e Tata semper tabata perfekto. Nunka tabatin un momentu ku El a nenga di someté, aunke sin duda hopi biaha e no tabata fásil.

Lesa Filipensenan 2:5–8, ku algun hende ta konsiderá e tekstonan di mas poderoso i bunita den Skritura. Kiko Pablo ta bisando nos aki? Kiko ta e implikashonnan di e palabranan akí? Mas importante ainda, kon nos ta apliká den nos propio bida e prinsipio ekspresá aki?

Hesus, kende ta igual ku Dios, kende ta Dios, no solamente a tuma riba Su mes karni humano sino a bira un “sirbidó” (doulou, un sirbidó, un katibu) i despues a ofresé Su mes komo un sakrifisio pa nos pikánan! Na un otro kaminda, Pablo ta bisa ku El a bira “un maldishon pa nos” (Gal. 3:13). Dios, nos Kreador, a muri na krus pa asina ta nos Redentor tambe, i esei a rekerí di djE pa bira un maldishon pa nos.

Kon nos ta kuminsá komprondé loke esaki ta bisando? Mas ainda, kon nos ta hasi loke e tekstonan ta bisa nos pa hasi, i esei ta pa nos tin e mesun tipo di boluntat pa humiliá nos mes i pa sakrifiká nos mes pa e bienestar di otronan?

Na un otro lugá, Hesus a bisa: “Ma esun ku ta di mas grandi meimei di boso lo ta boso sirbidó. I ken ku halsa su mes lo ser humiliá, i esun ku humiliá su mes lo ser halsá” (Mat. 23:11,12, NKJV). Esaki, den hopi manera, ta reflehá loke Pablo tabata bisa nos den Filipensenan 2:5–8 pa hasi tambe.

Den términonan gráfiko mas poderosamente, Pablo tabata bisando aki loke el a bisa anteriormente tokante no hasi nada “atraves di ambishon egoista òf presunshon” (Fil. 2:3, NKJV).

E Misterio di Santidat

Un versíkulo popular den Beibel ta 1 Korintionan 8:2: “Si kualke hende ta kere ku e sa algu, e no sa nada ainda manera e lo mester sa” (NKJV). No tin un tema tokante kua nos sa tur kos. Semper nos por siña algu mas tokante kualke kos. Kuantu mas bèrdat ta esun di realidatnan eterno konektá ku e Divinidat i e Enkarnashon? Frekuentemente Pablo ta referí na e kondesendensia asombroso di Kristu ora El a bira un ser humano. E ta un tema ku asta eternidat lo ta inadekuá pa agotá.

Lesa Romanonan 8:3, Hebreonan 2:14–18, i Hebreonan 4:15. Kiko a karakterisá Hesus su kondesendensia i Su tumamentu di naturalesa humano?

Kon tabata posibel pa e Yu eterno di Dios, pa medio di e operashon di Spiritu Santu (lesa Lukas 1:35), bira un ser divino-humano den barika di Maria? Ta asombroso kon loke ta infinito i eterno por a bira diripiente un ser humano finito suheto na morto. Esei ta e kurason di loke Pablo ta yama “e misterio di santidat” (1 Tim. 3:16).

“Tur e amor paternal ku a baha di generashon pa generashon dor di e kanal di kurason humano, tur e fuentenan di ternura ku a habri den alma di hende, ta djis manera un riu chikitu pa e oséano sin límite ora e ser kompará ku e amor infinito i inagotabel di Dios. Lenga no por pronunsi’é; pèn no por ilustr’é. Bo por meditá riba dje tur dia di bo bida; bo por skrudiñá e Skrituranan diligentemente pa asina komprond’é; bo por invoká tur poder i kapasidat ku Dios a dunabo, den e esfuerso pa komprondé e amor i kompashon di e Tata selestial; i tòg tin un infinito mas ayá. Bo por studia e amor ei pa siglonan; tòg nunka bo por komprondé kompletamente e largura i e hanchura, e profundidat i e haltura, di e amor di Dios kende a duna Su Yu pa muri pa mundu. Eternidat mes nunka por revelá esaki kompletamente. Sinembargo, segun ku nos ta studia Beibel i meditá riba e bida di Kristu i e plan di redenshon, e gran temanan akí lo habri pa nos komprondementu mas i mas.”—Ellen G. White, Testimonies for the Church, tomo 5, p. 740.

“Ora nos ta risibí un entrenamentu, manera Moises a hasi den e skol di Kristu, kiko nos lo siña? Pa bira pechu haltu? Pa nos tin un opinion haltu di nos mes? No, enbèrdat. Mas nos siña den e skol akí, mas nos lo avansá den mansedumbre i humildat di mente. Nos no mester sinti ku nos a siña tur kos ku ta bale la pena pa sa. Nos mester hasi e mihó uso di e talentonan ku Dios a duna nos, pa ora nos ser kambiá di mortalidat pa inmortalidat, nos no laga atras e loke nos a logra, sino por hib’é ku nos na e otro banda. Atraves di e edatnan sin fin di eternidat, Kristu i Su obra di redenshon lo ta e tema di nos estudio.”—Ellen G. White, Manuskrito 36, 1885.

Preguntanan pa Diskushon: