Ta komunmente urgí pa no ta ku mentalidat asina selestial; di otro manera, nos lo no ta di nada di bon terenal. Miéntras ku ta bèrdat den sierto sentido, tin un konsepto igualmente importante ku Pablo ta destaká den Kolosensenan 3: si nos ta muchu terenal, nos lo no ta di ningun uso selestial pa Señor.
Pablo ta hala nos atenshon na hopi prinsipio práktiko, di bida real, ku ta nase di shelu i ku por ser komprondé solamente dor di esnan ku ta “lantá ku Kristu” (Kol. 3:1).
E konsehonan di Pablo ta prinsipionan masha simpel ku lo engrandesé tur nos relashonnan, i no solamente denter di iglesia.
Hesus a bisa: "Stima boso enemigunan, bendishoná esnan ku ta maldishoná boso, hasi bon na esnan ku ta odia boso . . . pa boso por ta yunan di boso Tata den shelu; pasobra E ta laga Su solo sali riba e malbadonan i riba e bonnan, i ta manda áwaseru riba e hustunan i riba e inhustunan" (Mat. 5:44-45, NKJV).
Ta zona imposibel? E ta, humanamente papiá. Nos mester muri promé ku nos por biba realmente pa Dios. Ta p’esei nos mester tin un mentatidal selestial si nos ta spera di ta di kualke uso terenal pa nos Tata selestial.
E siman akí nos lo mira maneranan den kua biba ku Kristu por hasi un diferensia, awor i eternamente.
Lesa Kolosensenan 3:1-4. Ki kondishon Pablo ta indiká ku ta nesesario pa nos por tin mentalidat selestial? Kiko bo ta kere ku esei ta nifiká?
For di un tòp di seru, ta posibel pa kontemplá un paisahe grandi ku ta tur rònt di bo. For di tempu inmemorabel, esnan ku ta buska un eksperensia mas serkano ku Dios a frekuentá serunan (lesa Salmo 121:1-2). Asta serunan trahá pa hende, yamá ziggurats, paganonan a konstruí pa un propósito similar: pa topa ku e diosnan. Interesantemente, e stat di Ur, ku Abram a ser yamá pa bandoná, tabatin un ziggurat masha grandi visibel for di mianan rònt. Pero kambia un hende su elevashon nunka, riba su mes, lo hala niun hende mas serka di shelu den un sentido spiritual. Esfuerso humano nunka por.
En kambio, solamente pa medio di un milager di grasia, kaminda nos a muri ku Kristu i a ser resusitá kunE (figurativamente representá pa boutismo [Kol. 2:12-13]), ta posibel pa hala mas serka di shelu.
Nota ku for di prinsipio di Kolosensenan 3 e énfasis ripití riba loke ta ariba, esta, loke tin den shelu: “e kosnan ku ta ariba,” “kaminda Kristu ta,” “kosnan ariba,” “ku Kristu den Dios,” “kunE den gloria” (Kol. 3:1-4, NKJV).
Siguramente, tin hopi kos den e bida kristian ku ta desafiá splikashon. Kon un persona realmente por “muri” i “resusitá” ora, pa tur aparensia, e ta e mesun persona i no tabatin un eksperensia di bida i morto asina? Tin hopi kos ku no tin sentido pa e mente natural, ku no ta influensiá pa Spiritu Santu. Pero pa esnan ku tin mentalidat spiritual, pasobra nan a risibí e kurason nobo primintí pa Dios, morto pa piká i ser resusitá ku Kristu ta realidatnan genuino. Manera e himno ta afirmá: “Bo ta puntra mi kon mi sa ku E ta biba? E ta biba denter di mi kurason.”
No opstante, Pablo ta duna e mandatonan akí pasobra tin un nesesidat konstante pa e bida spiritual akí ser renobá (lesa 2 Kor. 4:16). Nos por, enbèrdat, kai i bai pèrdí! I nunka nos ta liber di tentashon den e bida akí.
P’esei, nos mester skohe diariamente pa “buska e kosnan ku ta ariba” (Kol. 3:1). Nos bida eterno ta sigur “skondí ku Kristu den Dios” (Kol. 3:3, NKJV), ma e ekspreshon eksterno di e bida ei lo ta leu di ta skondí.
Nos ta tende hopi lema awe: “Kaba ku guera!” “Kaba ku deforestashon!” “Kaba ku armanan nuklear!” Pero unu ku probablemente nunka nos a tende ta “Kaba ku lo terenal!” Esei simplemente no ta kuadra ku e sensibilidatnan di nos mundu. No ku kualke di e otro lemanan ta robes òf loke nan ta defendé ta robes. Nan ta djis hopi limitá, konsiderando e serkania di eternidat. Nos enfoke mester ta mas haltu, eternamente mas haltu.
Lesa Kolosensenan 3:5-6 (lesa tambe Rom. 6:1-7). Kon nos ta eksperensiá loke ta nifiká pa ta morto na mes i na lo terenal i bibu pa “e kosnan ku ta ariba” (Kol. 3:1)?
Aunke spiritualmente nos a muri ku Kristu, nos “miembronan”, esta, e tentashonnan ku nos kurpa i mente ta presentá nos, mester ser matá.
Pero nos mester realisá dos kos en konekshon ku e mandato akí.
Di promé, den Kolosensenan 3:1, e forma griego ku Pablo ta usa ta asumí ku nos a, de echo, ser resusitá ku Kristu. Di dos, e mandato den Kolosensenan 3:5 ta un konsekuensia di e echo ei (“P’esei”). Nos por mata kosnan terenal (fornikashon, impuresa, pashon, mal deseo, kudishi, etc.) solamente pasobra nos a ser resusitá ku Kristu i tin Su bida spiritual i poder pa saka e kosnan akí for di nos mente i bida.
Ta interesante pa bisa ku e úniko otro okashon na griego di e frase eksakto ku ta aparesé den Kolosensenan 3:6, “e furia di Dios,” ta den Romanonan 1:18. Dios ta “entregá” hende na nan mes mal kamindanan, i asina Su furia tambe ta “bin” (lesa Rev. 6:16-17) “riba esnan ku ta desobediente” (Kol. 3:6, NRSV). Den Romanonan 1:18, Pablo ta referí na “impiedat i inhustisia,” igualando “impuresa” (usando e mesun palabra griego hañá den Kolosensenan 3:5) masha spesífikamente ku hende ku ta komplasé “e deseonan di nan kurason, pa desonrá nan kurpa” (Rom. 1:24, NKJV).
Kon nan ta desonrá nan kurpa? Di promé, pasobra nan ta nenga di rekonosé e Kreador pero tambe pa medio di "pashonnan bergonsoso. Pasobra asta nan muhénan a interkambiá e uso natural pa loke ta kontra naturalesa. Meskos tambe e hòmbernan, lagando e uso natural di e muhé, a kima den nan deseo pa otro, hòmber ku hòmber kometiendo loke ta bergonsoso" (Rom. 1:26-27, NKJV).
Lesa Kolosensenan 3:6-11. Kon Pablo ta sigui ku e kareda di pensamentu akí?
E promé palabranan di Kolosensenan 3:8 ta señalá e kambio dramátiko i desisivo di morto pa bida: “Ma awor.” E palabra “awor” na griego ta enfátiko. Awor, esta, pasobra bo a resusitá ku Kristu i ta buska e kosnan ei ku ta ariba, bo bida presente mester mustra un kontraste marká ku bo bida anterior. Despues di a mata “loke ta terenal den boso” (Kol. 3:5, ESV), “awor boso mester deshasí di tur e kosnan ei: rabia, furia, malisia, kalumnia, i lenguahe abusivo for di boso boka” (Kol. 3:8, NRSV).
Tantu rabia komo furia por deskribí e kontesta hustu di Dios na piká (toká ayera) manera por pa Hesus (Marko 3:5, Rev. 6:16). Al kontrario, nos ta ser urgí pa “sea lihé pa tende, slow pa papia, slow pa rabia, pasobra rabia di hende no ta produsí e hustisia di Dios” (Santiago 1:19-20, NKJV). Malisia ta deseá desgrasia riba otro. Kalumnia ta designá pa difamá. Tambe Pablo ta kondená lenguahe ku ta abusivo i opseno. Finalmente, gaña otro ta prohibí (kompará Lev. 19:11,18), "ya ku boso a kita e hòmber bieu ku su echonan" (Kol. 3:9, NKJV).
Kiko Pablo ke men ku e “hòmber bieu” kontrali na e “hòmber nobo”? Lesa Romanonan 6:6 i Efesionan 4:22-24.
E verbonan ku Pablo ta usa pa e transformashon akí di e bieu pa e nobo ta referí na paña, komo si fuera un hende a kita paña sushi bieu i a ser bistí ku paña blanku nobo (kompará Zak. 3:4). Un distinshon bieu/nobo similar ta ser hasí tokante e paktonan bieu i nobo, ku ta ser karakterisá respektivamente pa e lèter eksterno di e lei i pa e lei inskribí pa e Spiritu den e kurason (2 Kor. 3:4-18).
E metáforanan akí ta deskribí kombershon i su efektonan, ku Pablo ta yama un “kreashon nobo” (2 Kor. 5:17, NKJV). Nos ta ser “renobá den konosementu segun e imágen di djE [Kristu]” (Kol. 3:10, NKJV), kende ta e imágen di e Dios invisibel (Kol. 1:15). Hañando un konosementu di Kristu pa medio di Su Palabra ta transformá nos "den e mesun imágen di gloria pa gloria" (2 Kor. 3:18). Esaki ta pone nos ariba di tur frontera étniko, geográfiko i sosial (Kol. 3:11), pasobra nos ta siudadanonan di un reino mas haltu.
Despues di a deskribí e mal kustumbernan i kualidatnan negativo ku ta ser kitá i poné un banda ora nos ta bini na Kristu, Pablo ta prosedé na loke ta positivo, manera move di skuridat na lus.
Lesa Kolosensenan 3:12-14. Kon kreyentenan ta ser deskribí, i kon bo ta kere ku e ta relashoná ku e kualidatnan ku nan mester “bisti”?
Meskos ku Israel, yamá pa Dios pa ta Su pueblo spesial i reflehá Su karakter, kreyentenan den Hesus ta “esnan skohí di Dios” (Kol. 3:12, NKJV), Su “skohínan” (ESV). No ta tur, sinembargo, ta biba na altura di e yamada akí. Manera Hesus a bisa: “Hopi ta yamá, ma poko ta skohí” (Mat. 22:14; kompará Mat. 24:22,24,31). E referensianan di Pablo na e skohínan tin un nifikashon similar (Rom. 8:33, 2 Tim. 2:10). Tambe, meskos ku Israel, kreyentenan ta “stimá” pa Dios i “santu” (Deut. 7:6-8). E privilegio akí ta karga kuné un responsabilidat importante: pa “proklamá e alabansanan di Esun ku a yama boso for di skuridat den Su lus maravioso” (1 Pe. 2:9, NKJV). I nos ta hasi esei atraves di kon nos ta biba awor.
E ocho kualidatnan menshoná dor di Pablo ta un lista konsiderabel! “Tierno mizerikòrdia, bondat, humildat, mansedumbre, pasenshi; soportá otro, i pordoná otro,” i “riba tur kos . . . amor” (Kol. 3:12-14, NKJV). Esakinan por sali solamente for di un kurason uní ku Kristu, pasobra nan ta deskribí Su karakter i kon El a trata ku nos. Nos mester pordoná otronan “meskos ku Kristu a pordoná boso” (Kol. 3:13). Amor ta “e laso di perfekshon” (Kol. 3:14, NKJV), pasobra ta Su amor pa ku nos ta mara nos na djE i ta pèrmití nos stima otronan berdaderamente (1 Juan 4:11-12).
E kualidatnan akí ta impaktá nos relashonnan na dos manera. Di promé, mustrando amor, mizerikòrdia, bondat i pordon pa ku otronan ta bendishoná nos i otronan. Ta satisfaktorio pa stima i bendishoná otronan. Normalmente hende lo respondé na nos den bondat, i nos ta sigui risibí e mizerikòrdia i pordon di Dios (Mat. 5:7, Mat. 6:14). Di dos, i mas importante ainda, e ta glorifiká Dios i por enkurashá otronan pa kere i sigui Hesus, pasobra e ta mustra e poder di grasia divino. “Ningun otro influensia ku por rondoná e alma humano tin asina un poder manera e influensia di un bida apnegá. E argumento di mas fuerte na fabor di e evangelio ta un kristian amoroso i stimabel.”--Ellen G. White, The Ministry of Healing, p. 470.
Pablo su preokupashon pa pas i harmonia den iglesia ta aparesé klaramente den e último versíkulonan di Kolosensenan 3. Ya nos a wak e pas di Dios den algun detaye (wak Lès 7). Kontrali na e pax Romana, e pax Christi no ta un pas imponé for di pafó sino ta pa “goberná” nos for di paden. Esei por sosodé solamente si Kristu ta den kontrol.
Lesa Kolosensenan 3:16-17. Kiko spesífikamente ta kapasitá Kristu pa ta den kontrol, i ki ròl muzik ta hunga den tur esaki?
E lenguahe ta masha deskriptivo. E ta presentá e palabra di Kristu bibando den nos. Esei ta sosodé ora nos ta lesa Beibel atentamente pa asina skucha i siña for di e sabiduria di Dios. Aparentemente, aunke e teksto griego ta un poko ambiguo, muzik ta hunga un ròl importante den “siña i amonestá otro” (Kol. 3:16).
Pero no djis kualke muzik. Pablo ta usa terminologia masha spesífiko tantu aki komo den Efesionan 5:19: “salmo i himno i kantika spiritual.”
Aunke nos no por ta sigur, ta parse ku un distinshon ta ser hasí aki entre e kolekshon di salmonan eksistente di Tèstamènt Bieu i un kolekshon kresiente di himnonan di Tèstamènt Nobo. “Kantikanan spiritual” por ta un término mas general pa kualke kantika di alabansa relashoná ku e bida spiritual òf e bida di iglesia. E palabranan di e kantikanan ta e medio pa siña e bèrdat i duna instrukshon riba biba e bida nobo di un kristian. Hopi gran himno di e último siglonan tin mensahenan poderosamente edifikante di speransa i siguransa, asina nesesario den un mundu ku asina fásilmente ta hala nos tur abou.
E influensia di muzik ta poderoso. David su tokamentu di arpa tabatin un efekto trankilisante riba Rei Saul (1 Sam. 16:23). Ma ora David a bira su rival, e rabia i renkor di Saul a lanta (1 Sam. 18:10-11). Muzik klásiko trankil a keda demostrá klínikamente di ta redusí ansiedat, ta optimalisá funshon di serebro, ta oumentá relahashon, ta yuda ku doló, i ta oumentá sosialisashon.
Ken entre nos no a mira pa nan mes e influensia poderoso ku muzik, sea bon òf malu, por tin riba nos emoshonnan i pensamentunan? Muzik, e muzik korekto, por ta spiritualmente edifikante.
“Ora e Spiritu di Dios ta kontrolá mente i kurason, e alma kombertí ta kibra den un kantika nobo; pasobra e ta realisá ku den su eksperensia e promesa di Dios a ser kumplí, ku su transgreshon a ser pordoná, su piká kubrí. El a ehersé repentimentu pa ku Dios pa violashon di e lei divino, i fe pa ku Kristu, kende a muri pa hustifikashon di hende. ‘Siendo hustifiká pa medio di fe,’ e tin ‘pas ku Dios pa medio di nos Señor Hesu-Kristu.’ Romanonan 5:1.
“Pero pasobra ta e a haña e eksperensia akí, e kristian no mester, pa e motibu ei, dobla su mannan, satisfecho ku e loke a ser realisá p’é. Esun ku a determiná pa drenta e reino spiritual lo haña ku tur e podernan i pashonnan di naturalesa no regenerá, respaldá pa e forsanan di e reino di skuridat, ta aliniá kontra dje. Kada dia e mester renobá su konsagrashon, kada dia batayá ku maldat. Kustumbernan bieu, tendensianan hereditario na kosnan malu, lo lucha pa e dominio, i kontra esakinan e mester vigilá semper, luchando den e forsa di Kristu pa viktoria ...
"E poder di un bida mas haltu, mas puru, mas noble ta nos gran nesesidat. Mundu tin muchu hopi di nos pensamentu, i e reino di shelu muchu tiki.
"Den su esfuersonan pa alkansá e ideal di Dios p'é, e kristian no mester ta desesperá di nada. Perfekshon moral i spiritual, pa medio di e grasia i poder di Kristu, ta primintí na tur. Hesus ta e fuente di poder, e fuente di bida ... Na nos fabor E ta pone den operashon e agentenan todopoderoso di shelu. Na kada paso nos ta mishi ku Su poder bibu."--Ellen G. White, The Acts of the Apostles, p. 476-478.