E porshon final akí di Kolosensenan ta revelá Pablo su ret mas amplio di koleganan. Echonan ta mustr’é ta forma ekipo promé ku Barnabas, despues ku Silas, i despues ta duna un bista general di su tres biahenan mishonero.
E siman akí nos lo wak e strategia mishonero di Pablo, ku a envolví e uso masha efisiente di tempu i rekursonan pa alkansá e sentronan prinsipal di e Imperio Romano, i tambe entrená obreronan laiko prometedor pa alkansá e statnan i pueblonan ku Pablo lo no a bishitá, manera Kolosas, Laodisea i Hierapolis.
Atraves di bishitanan personal durante su biahenan i, spesialmente komo un prezu, pa medio di su epístolanan, Pablo tabata konektá hende i iglesianan konstantemente. El a rekonosé ku e éksito di e mishon di evangelio tabata dependé di tur hende trahando huntu, kristiannan hudiu i pagano; hòmber i muhé; hende manera Tychichus, Aristarchus, Justus, Epaphras, Lukas, i Nympha. Intrigantemente, nos ta tende tambe di un karta ku el a skirbi Laodisea, ku no a keda konservá pa nos. Pablo ta pak hopi kos den e último versíkulonan akí, inkluyendo un eksortashon personal na un hòmber ku yama Archippus. El a hasi tur loke tabata posibel pa fortalesé e iglesianan miéntras e tabata por ainda.
Nos ta siña hopi for di Pablo tokante plama e evangelio. Su biahenan a kubri un kálkulo di 13.400 mia. Esaki ta asombroso, ya ku mayoria parti tabata na pia i algun di e tempu e tabata den prizòn tambe.
Pablo a pasa tempu konsiderabel den sentronan komersial, manera Korinto i Efeso, for di kua e mensahe, di e manera ei, por a plama despues pa statnan interior. Tambe el a regresá na iglesianan ku el a lanta pa asina fortalesé i enkurashá e kreyentenan nobo einan. Ora e no por a bishitá e iglesianan personalmente, e tabata manda karta. Di e manera akí e kreyentenan tabata sa ku e tabata kòrda riba nan i tabata preokupá pa nan.
Lesa Kolosensenan 4:7-9; kompará Efesionan 6:21. Kon Tychicus ta ser deskribí, i ki motibunan Pablo ta duna pa mand’é ku Onésimus bai Kolosas?
Algun kos ta mihó komuniká oralmente en bes di por eskrito. Lo ta interesante pa sa ki notisia e dos hòmbernan a transmití na e kolosensenan. Huzgando for di e intenshon di Pablo ku e kosnan akí lo “konsolá” (NKJV) i “enkurashá” nan (Kol. 4:7-9, ESV), probablemente e tabata inkluí detayenan tokante e sirkunstansianan di Pablo den prizòn. En todo kaso, un komunikashon asina tabata importante tambe komo un medio pa mantené e lasonan personal ku ta mara kreyentenan huntu.
Tychicus, kende su nòmber ta nifiká “fortuná,” tabata klaramente un emisario di konfiansa. Deskribí komo un “ministro fiel” i “kompañero sirbidó,” e tabata un di dos hòmber di Asia selektá pa Pablo (Echonan 20:4) pa kompañ’é riba su biahe ku e kolekshon pa kreyentenan den nesesidat na Jerusalèm. E tabata tambe huntu ku Pablo durante su di dos enkarselashon na Roma, for di unda el a ser mandá pa Efeso pa fortalesé e obra einan (2 Tim. 4:12). Pablo a pensa tambe di mand’é serka Titus, na Kreta (Tito 3:12). Esun ku tabata kompañ’é tabata Onésimus, kende Pablo a kombertí na Roma (wak Lès 1) i ta ser deskribí komo “fiel.”
Ta parse ku Pablo ker a sa tambe tokante e sirkunstansianan di e kreyentenan na Kolosas. Lo no tabata difísil pa manda palabra bèk p’é dor di un hende, si no ta dor di Tychicus mes. Esaki tabata un otro manera ku Pablo a transmití su amor i preokupashon pa e kreyentenan einan, aunke e no a bishitá e iglesia personalmente, i kon el a fortalesé nan den e fe pa asina nan por a alkansá otronan.
Den un mundu konektá pa internèt, medionan sosial, i inkontabel aparatonan, ta difísil pa imaginá e reto ku Pablo a enfrentá pa yuda iglesianan sinti ku nan tabata parti di algu mas grandi ku nan mes kongregashon lokal.
Lesa Kolosensenan 4:10-11. Ademas di a manda notisia bai bin pa medio di emisarionan (Kol. 4:7-9), di ki otro maneranan Pablo a enkurashá konektividat? En bista di algun di e problemanan ku Pablo a trata den e epístola akí, ki mensahe por ser transmití mediante e saludonan akí?
Ku e saludonan akí Pablo ta krea i ta fomentá konektividat entre kompañeronan kreyente. Nos ta siña aki ku Marko tabata primu di Barnabas. Asina Pablo ta traha kaminda pa e probabel bishita di Marko na Kolosas. Aristarchus ta ser deskribí literalmente komo un “kompañero prizonero di guera”; esta, e tabata enkarselá huntu ku Pablo. Nan tur dos tabata sòldánan ku "e armadura di Dios" (Efe. 6:10-11), bringando pa pone e prezunan di Satanas liber pa sirbishi den e reino di Dios (lesa 2 Tim. 2:1-4). Hesus/Justus (nòmbernan hudiu i romano ku ta zona masha similar na griego, manera Saulo/Pablo) tambe ta ser elogiá na nan komo un kompañero di trabou di konfiansa den e evangelio.
Pablo ta enfatisá ku Aristarchus, Marko i Justus ta kreyentenan hudiu (“di sirkunsishon”). Despues e ta sigui menshoná tres pagano: Epaphras, Lukas i Demas (Kol. 4:12-14). Ta signifikante ku, apesar di algun tenshon den e iglesia entre hudiunan i paganonan, e koleganan akí ta kapas pa traha efektivamente huntu, uní i den harmonia. Dor di bisa “solamente,” sinembargo, ta parse ku Pablo ta impliká un sierto desapunto ku mas kristian hudiu no a para banda di dje den su sufrimentunan. No opstante, ta signifikante ku pa e tempu akí, Juan Marko, ku algun aña promé a bandoná Pablo i Barnabas durante nan promé biahe mishonero (Echonan 13:13), ta resultá no solamente leal sino un “konsuelo” pa Pablo (Echonan 15:36-40).
Menasanan na unidat no ta nada nobo. Den añanan resien, Iglesia Atventista a pasa den kambionan profundo segun ku el a plama globalmente, i forsanan a destruí su unidat. E strès akí riba union por ser sintí na tur nivel di iglesia.
Bukinan a ser skirbí tokante e bida impulsá pa propósito i e iglesia impulsá pa propósito. Miéntras ku “impulsá pa propósito” kisas no ta kompletamente korekto, un “enfoke di propósito” kla ta vital pa logra kualke esfuerso signifikativo. E bida i ministerio di Pablo, komo tambe esun di su koleganan i e otro apòstelnan, ta ehèmpel di e enfoke akí (lesa Fil. 3:13-14). E resultadonan ta papia pa nan mes: e evangelio a plama rápidamente den henter e Imperio Romano i mas ayá (Kol. 1:23). E mesun enfoke ta nesesario awe.
Lesa Kolosensenan 4:12-13. Ki propósito ta ser deskribí, i kon e mester ser lográ?
Manera nos a menshoná den un lès anterior, Epaphras tabata probablemente instrumental den
plamamentu di e evangelio na Kolosas i na e statnan den serkania di Laodisea i Hierapolis
(wak
Lès 1)
. Sin duda, su saludonan i orashonnan pa e iglesianan akí tabata un gran kurashamentu
pa e
kreyentenan einan. E orashonnan di Epaphras tabatin un enfoke kla: ku e kolosensenan lo a
“para
firme, perfekto i kompletamente sigur den henter e boluntat di Dios.” (Kol. 4:12).
Laga nos
konsiderá mas kuidadosamente e komponentenan riku di e orashon akí.
Para. E palabra ta
nifiká
para firme i inmovibel, loke ta posibel solamente dor di ta “fundá i firme” den e fe i sigur
di
e bèrdat di e evangelio (Kol. 1:23, NKJV). Pablo ta usa e mesun palabra vários
biaha
ora
e ta referí na e bataya kontra “e trampanan di diabel” (Efe. 6:11) i resistí e
forsanan di
skuridat pa medio di poder divino dor di bisti “henter e armadura di Dios” (
Efe. 6:10-18;
kompará 2 Tim. 2:19)
.
Perfekto. E palabra ta referí na e perfekshon di karakter ku ta haña
su
ekspreshon final den amor sakrifisial (Mat. 5:44,48) dor di esnan ku nunka lo
pretendé di a
“yega” (Fil. 3:12-15, NIV).
Kompletu. E palabra poderoso akí ta nifiká satisfasé
kompletamente
òf trese algu na su plenitut. E ta ser usá di Abraham siendo “kompletamente konvensí” ku
Dios lo
a hasi loke El a primintí, aunke humanamente imposibel (Rom. 4:21, NKJV), i Pablo
siendo
fortalesé dor di Señor pa asina “e mensahe por ser prediká kompletamente” pa medio di dje
(2
Tim. 4:17, NKJV)
.
Henter e boluntat di Dios. E palabra “henter” ta amplio. Pablo mes a hasi
orashon pa e kolosensenan ser yená ku un konosementu di e boluntat di Dios, “biba dignamente
di
Señor i agrad’é den tur aspekto” (Kol. 1:9-10, NET) pa medio di “Su poder glorioso”
(Kol.
1:11,
NKJV).
Lesa Kolosensenan 4:14-15, 2 Timoteo 4:10-11. Kon Lukas ta ser distinguí for di Demas i dikon?
Apòstel Juan ta bisa nos: "No stima mundu, ni e kosnan ku tin den mundu. Si un hende ta stima mundu, e amor di e Tata no ta den djé" (1 Juan 2:15). Lukas su amor pa Hesus i Su reino a hib’é na para banda di Pablo te na final, loke sea pasa, miéntras ku Demas a stima e mundu akí mas ku e mundu benidero.
Lesa e siguiente pasashinan. Ki konseho ta ser duná pa esnan ku ta spera e Segundo Atvènt?
Hesus i e apòstelnan frekuentemente ta spièrta nos pa “vigilá,” ta vigilante, i ta prepará semper pa e binida di e Maestro pa no ser tumá di sorpresa. Desafortunadamente, manera e disipelnan ku no a paga atenshon na e mandato di Hesus pa “vigilá i hasi orashon” (Marko 14:38, NKJV), hopi lo no hasi e preparashonnan nesesario. Ta redusí tur kos na ken òf kiko tin nos kurason, pasobra nos no por sirbi dos shon.
Den e mensahe na Laodisea, Hesus ta duna nos un resèpt kla. Di promé, arepentí di nos pikánan. Di dos, nos mester habri nos kurason na Hesus i laga E ta den kontrol, loke e ora ei (di tres) ta pèrmití nos optené e “oro” di fe i amor, itèst pa prueba i viktorioso riba tentashon.
Lesa Kolosensenan 4:16-18; kompará Kolosensenan 2:1-3. Pensando riba e mensahe di Hesus na Laodisea (wak e estudio di ayera), ki puntonan similar bo ta haña ku esun di Kolosensenan, ku mester a ser lesá tambe den e iglesia di Laodisea di tempu di Pablo?
Ora nos wak e historia di e pueblo di Dios atraves di siglonan, e mesun problemanan ta tuma lugá bes tras bes. E profetanan a reprendé Israel pasobra nan ker a adorá meskos ku e mundu i a urgi nan pa arepentí promé ku tabata muchu lat. Isaias a asta lamentá: “Kon e stat fiel a bira un prostituta!” (Isa. 1:21, NKJV) i a urgi e pueblo pa bolbe serka Dios pa pordon i limpiesa (Isa. 1:16-20). Tantu Juan Boutista (Mat. 3:2, 8-10) komo Hesus (Mat. 4:17, Mat. 12:33-37) a yama riba e israelitanan pa arepentí i duna fruta ku lo a soportá e prueba di e huisio den e último dianan. E apòstelnan a hiba un mensahe similar (Echonan 2:38; Echonan 3:19; Echonan 17:30; 2 Kor. 7:9-10).
Kompará e siguiente pasashinan: Isa. 60:1-3 ku Rev. 18:1-4, i Isa. 62:1-5 ku Rev. 19:7-8. Ki similaridatnan ta eksistí entre e mensahenan den e dos bukinan?
“E alma ku ta ser entregá na Kristu ta bira Su mes fortalesa, ku E ta tene den un mundu rebelde, i Su intenshon ta ku ningun outoridat lo ta konosí den dje sino di Su mes. Un alma mantené di e manera ei den poseshon dor di e agensianan selestial no ta vulnerabel na e atakenan di Satanas. Pero, a ménos ku nos entregá nos mes na e kontrol di Kristu, nos lo ser dominá pa e malbado. Inevitablemente nos mester ta bou di kontrol di esun òf e otro di e dos podernan grandi ku ta luchando pa e supremasia di mundu. No ta nesesario pa nos skohe deliberadamente e servisio di e reino di skuridat pa por bini bou di su dominio. Nos mester solamente neglishá di konektá nos mes ku e reino di lus. Si nos no koperá ku e agensianan selestial, Satanas lo tuma poseshon di e kurason, i lo hasié su lugá di biba. E úniko defensa kontra maldat ta Kristu den nos kurason pa medio di fe den Su hustisia. A ménos ku nos bira vitalmente konektá ku Dios, nunka nos por resistí e efektonan no santifiká di amor propio, indulgensia propio i tentashon na piká. Nos por bandoná hopi mal kustumber, pa e tempu ku nos por separá di Satanas; ma sin un konekshon vital ku Dios, atraves di sumishon di nos mes na djE momentu pa momentu, nos lo ser vensí. Sin un konosementu personal di Kristu, i un komunion kontinuo, nos ta entregá den man di e enemigu, i finalmente lo hasi loke e ta ordená nos."--Ellen G. White, The Desire of Ages, p. 324.