Bida i Morto

Lesa pa e Estudio di e Siman Akí:

Versíkulo di Memoria:

“Pasobra pa mi, biba ta Kristu, i muri ta ganashi” (Filipensenan 1:21, NKJV).

Morto, hopi bes nos ta ser bisá, ta djis parti di bida. Esei ta un mentira. Morto ta lo kontrario di bida, e enemigu di bida. Morto no tabata mas konstruí den bida ku ruina tabata konstruí den un outo. Pablo ta bisa enfátikamente ku Kristu a muri “asina ku pa medio di morto E por a destruí esun ku tabatin poder riba morto, esta, diabel, i por a libra esnan ku pa miedu di morto tabata sometí na sklabitut henter nan bida” (Hebr. 2:14, 15).

Aunke e tabata kla pa muri pa Kristu, Pablo tabata sigur di su destino riba plaso largu. E kos di mas importante p’e entretantu tabata, pa medio di su mes bida òf morto, pa honra Kristu i pa prediká e evangelio na mas tantu hende posibel. Kisas esei ta un di e motibunan ku nos tin asina tantu epístola ku ta karga su nòmber. Mediante su eskritonan, e por a alkansá hopi hende i lugá, inkluyendo lugánan ku e mes nunka a bishitá.

Bida ta kòrtiku, i ta vital pa hasi e impakto di mas grandi posibel pa e reino di Dios denter di e periodo di e añanan ku Dios ta otorgá nos. Un parti konsiderabel di e impakto ei tin di haber ku nos ta enkurashá “unidat di fe.” Manera nos lo mira kuminsando e siman akí, e tema akí tabata un motibu importante pa Pablo su skirbimentu na e filipensenan.

“Kristu Lo Ser Glorifiká”

Lesa Filipensenan 1:19,20. Kiko ta parse di ta e ekspektativa di Pablo pa loke ta trata e resultado di su huisio? Kiko e ta konsiderá ainda mas importante ku ser apsolvé?

Aunke Pablo no tabata un kriminal, esaki no tabata e promé biaha ku el a ser enkarselá, i persekushon no tabata straño p’e. Na e korintionan, el a detayá su sufrimentunan te na e momentu ei: “Den prizòn mas frekuentemente, den morto hopi bes. For di e hudiunan sinku biaha mi a risibí kuarenta sutá ménos un. Tres biaha mi a ser batí ku bara; un biaha mi a ser piedrá; tres biaha mi a noufragá; un anochi i un dia mi tabata den profundidat; di biahe hopi biaha, den peliger di awa, den peliger di ladronnan, den peliger di mi mes paisanonan, den peliger di e paganonan, den peliger den stat, den peliger den desierto, den peliger riba laman, den peligernan meimei di rumannan falsu; den kansansio i trabou duru, den insomnio hopi bes, den hamber i set, den yunamentu hopi biaha, den friu i sunú” (2 Kor. 11:23–27, NKJV).

Pero pa nos no pensa ku e sufrimentunan akí tabata di mas destaká den su mente, Pablo ta agregá mesora: “ademas di e otro kosnan, loke ta bin riba mi diariamente: mi preokupashon profundo pa tur e iglesianan” (2 Kor. 11:28, NKJV).

Lesa 1 Korintionan 4:14–16; 1 Tesalonisensenan 2:10,11; Galationan 4:19; i Filemon 10. Ki relashon Pablo tin ku e iglesianan ku el a establesé i e hendenan ku el a gana pa Kristu?

Meskos ku Hesus, kende no a spar nada pa salba nos, Pablo tabata dispuesto pa “gasta i ser gastá” na fabor di su kompañeronan kreyente (2 Kor. 12:15, NKJV). Pero, paradoksalmente, mas e akshonnan di un hende ta parse esnan di Hesus, ménos nan ta ser stimá òf apresiá pa algun. “Tur ku ke biba piadoso den Kristu Hesus lo sufri persekushon” (2 Tim. 3:12). Pero kristiannan fiel ta keda kisas e manera di mas poderoso pa glorifiká Dios i pa revelá e bèrdat di e evangelio (kompará ku Fil. 1:7). “Pablo su pasenshi i alegria durante su enkarselashon largu i inhustu, su kurashi i fe, tabata un sermon kontinuo.”—Ellen G. White, The Acts of the Apostles, p. 464.

Wak kon bo ta biba i kon bo ta trata hende, spesialmente hende ku no ta trata bo bon. Ki tipo di testimonio pa Hesus bo ta presentá?

Muri Ta Ganashi

Den kaso ku bo no a nota, nos tur, komo kreyente spesialmente, ta envolví den e gran konflikto, ku ta ras tur rònt di nos i, enbèrdat, den nos tambe. Nos tur, di un manera òf otro, ta eksperensiá e realidat di e lucha kósmiko akí, i nos lo hasié te dia ku nos muri, ki ora òf kon esei sosodé.

Lesa 2 Korintionan 10:3–6. Kiko ta e base di e guera spiritual ku nos ta hiba, i kiko ta nos armanan?

E armanan spiritual di mas mortal ta ideanan, bon i malu. Satanas ta usa krítika, traishon, bèrgwensa, miedu, preshon di grupo, i un kantidat di hèrmènt similar ku kristiannan nunka mester usa. Nos mester, en kambio, usa amor, mizerikòrdia, pas, suavedat, pasenshi, bondat i dominio propio. Nos arma di mas poderoso, usá huisiosamente, ta “e Palabra di Dios” ehersé pa e Spiritu (Efe. 6:17, AMP), pasobra ta Dios so por laga un persona komprondé e bèrdat klaramente. Nos ta djis e instrumento ku Dios ta usa pa kumpli ku Su propósitonan.

Lesa Filipensenan 1:21,22. Kon nos ta komprondé e punto di Pablo, spesialmente den konteksto di e gran konflikto?

Komo ku e bataya ta spiritual, nos ta den un guera di idea- i balornan. Sinembargo, Kristu a gana e viktoria na krus pa nos, i tanten ku nos keda konektá kunE, nunka nos por ser derotá, asta si nos ser matá. Pablo a someté su bida na loke sea a pasa kuné aki na tera, maske kon inhustu, pasobra el a konfia su bida i su futuro na un korte mas haltu.

Komo kristian, nos no mester bringa asina tantu pa nos derechonan sino pa loke ta korekto. No ta “poder ta hasi korekto,” sino “drechi ta hasi poder.” Sumishon na e boluntat di Dios ta onorabel; de echo, e ta e úniko manera pa ta viktorioso den e guera den kua nos ta haña nos mes. Hesus, naturalmente, ta e ehèmpel pa ekselensia di sumishon na e boluntat di Dios, manera Pablo lo trese dilanti den Filipensenan 2.

Ser Sigur di bo mes

Lesa Filipensenan 1:23,24. Kiko Pablo ke men ora e bisa ku “bai i ta ku Kristu” ta “muchu mas mihó”?

E pasashi akí a ser mal komprondé grandemente atraves di siglonan. Den e pasashi di e siman akí pa estudio, Pablo a trata ku e kontraste entre biba i muri. E kristian ta biba pa Kristu i por asta muri p’E. Den e sentido ei e ta “ganashi” pasobra nos testimonio ta muchu mas poderoso i persuasivo (Fil. 1:21). Sin duda un hende ta kere ora e ta dispuesto pa muri pa e kreensia ei.

Pero nos mester rekonosé tambe ku e mortonan ta realmente morto. Nan “no sa nada.” Nan ta sosegá den graf te na e resurekshon (lesa Ekl. 9:5; Juan 5:28,29). Ta p’esei Hesus a bisa di Lázaro, ku a muri: “Nos amigu Lázaro ta drumí; ma Mi ta bai pa Mi lant’é for di soño” (Juan 11:11).

Si, ora hende muri, nan ta bai shelu mesora, imaginá bo kon esei lo tabata pa Lázaro. Despues di kuater dia ku Lázaro dibertiendo den Paraiso, un angel ta bin ku e “mal” notisia: “Despensa, Lázaro, ma Hesus ta yamabo bèk na tera. Bo no por keda aki.”

Ora nos sigui eror te na su konklushon lógiko, nos ta mira kon eróneo e ta. Morto ta meskos ku un soño sin soñonan for di kua Hesus lo spièrta Su fiel siguidónan na e Segundo Atvènt; e ora ei, huntu ku e santunan bibu, nan lo ser tumá i hibá shelu pa ta huntu ku Hesus pa semper (lesa 1 Tes. 4:16,17).

Pablo su “salida” for di e bida presente pa ta huntu ku Kristu ta nifiká ta kunE den sufrimentu i morto (2 Tim. 4:6) pa asina “alkansá e resurekshon for di e mortonan” (Fil. 3:11, NKJV). Tambe, sin duda e tabata konsiente ku e lo a sera su wowonan den morto i ku e siguiente kos ku e lo a sa, den un fregá di wowo, lo tabata mira Hesus, kende lo a hib’é, ku henter e pueblo di Dios, na e lugá ku Hesus a prepará pa tur ku ta stim’E (Juan 14:3, 1 Kor. 2:9).

Aunke e tabata dispuesto pa muri pa Kristu, Pablo tabata sa ku lo tabata mihó pa e filipensenan si e lo “a keda den karni” (Fil. 1:24, NKJV). Interesantemente, pa e kristian, si ta mihó pa biba pa Kristu òf muri p’E no ta nesesariamente fásil pa kontestá. Pablo tabata “den un eskoho fèrfelu entre nan dos” (Fil. 1:23, NKJV), entre keda na bida òf sosegá den graf.

Para Firme den Unidat

E último orashon di Hesus pa Su disipelnan tabata dominá pa un tema klave: unidat. Hesus a wak mas ayá di e krus pa reunion ku Su Tata i reunion ku nos: “Tata, Mi ta deseá pa esnan ku Bo a duna Mi tambe por ta huntu ku Mi kaminda Mi ta, pa nan por mira Mi gloria ku Bo a duna Mi” (Juan 17:24, NKJV). Hesus a hasi orashon pa e Tata warda Su yunan asina “pa nan por ta ún, meskos ku Nos ta” (Juan 17:11, NKJV). Tambe el a asentuá e konsekuensianan teribel di desunion, e ta bira un motibu pa hopi hende no kere. Dos biaha den e orashon kòrtiku akí, Hesus ta enfatisá ku nos unidat kunE i e Tata ta “pa mundu por kere” i “pa mundu por sa ku Abo a mandaMi” (Juan 17:21,23, NKJV).

Lesa Filipensenan 1:27 i kompará Juan 17:17–19. Kiko tantu Hesus komo Pablo ta bisa ta indispensabel pa unidat den iglesia?

E palabra griego den Filipensenan 1:27 tradusí “laga boso kondukta ta digno” ta politeuomai, ku ta nifiká “biba komo un siudadano”, no di ningun reino terenal sino komo un siudadano di e reino selestial. E Sermon riba Seru ta pinta un bunita kuadro di loke ta nifiká pa ta yunan di e Tata selestial i miembronan di Su reino: pober den spiritu, mansu, ku hamber i set pa hustisia, mizerikòrdioso, puru di kurason, hasidónan di pas, bira e otro banda di kara, stimando bo enemigunan, bendishoná esnan ku maldishoná nos, hasiendo bon na esnan ku ta odia nos. En breve, “pa hasi hustisia, i pa stima mizerikòrdia, i pa kana humildemente ku bo Dios” (Mikeas 6:8).

Ta difísil pa ta molestiá òf rabiá ku un hende asina, òf nò? Tin biaha nos ta resentí hende ku ta parse di ta muchu bon. Nos por asta ta tentá pa rebahá nan òf buska un punto débil pa proba ku nan no ta mes bon ku nan ta parse, tur esei pa nos sinti nos mes mihó. En kambio, dikon no wak kuantu mas amoroso nos por ta, kon generoso, kon mizerikòrdioso, kon humilde?

Ellen G. White a papia di esnan ku “ta stima mundu i su ganashi mihó ku nan ta stima Dios òf e bèrdat.”— Testimonies for the Church, tomo 5, p. 277.

Asina tantu biaha desunion den iglesia ta resultá finalmente di orguyo. “Segun ku orguyo i ambishon mundano a ser tesorá, e spiritu di Kristu a bai, i emulashon, disenshon i pleitu a drenta pa distraí i debilitá e iglesia.”— Testimonies for the Church, tomo 5, p. 240, 241.

Ki krusial ta pa kada un di nos siña e humildat i mansedumbre ku Hesus tabatin komo ehèmpel pa nos! Ki un iglesia diferente nos lo tabatin, no ta bèrdat?

Uní i Sin Miedu

Lesa Filipensenan 1:27–30. Kon nos unidat i “lucha huntu pa fe di e evangelio” ta relashoná ku balentia?

E strategia di Satanas ta pa dividí i konkistá. Desunion ta mortal. Hesus a bisa: “Si un kas ta dividí kontra su mes, e kas ei no por para” (Marko 3:25, NKJV). E ta un prinsipio simpel ku Satanas ta deleitá pa nos lubidá. Nos union ta yuda kapasitá nos pa kumpli ku nos ròl profétiko komo e remanente di profesia di Beibel (Rev. 12:17), proklamando e “evangelio eterno” na “tur nashon, i tribu, i lenga, i pueblo” (Rev. 14:6). Pasobra unidat ta krusial pa kumpli ku nos mishon pa plama e mensahe duná di Dios akí, i e orashon di Hesus den Juan 17 ta destaká “e bèrdat” di e Palabra di Dios komo un di e klavenan di mas importante pa unidat (Juan 17:17,19), nos mensahe no por ser separá for di nos mishon òf nos unidat. Tur tres ta para òf ta kai huntu. Si un di e tres klavenan akí ta falta, nos no por logra. Sinembargo, si nos tin tur tres na lugá, no tin nada pa teme. Nos no mester ta “spantá di ningun manera” pa oposishon (Fil. 1:28, NKJV). Satanas ta un enemigu derotá. Asta si nos mester ser matá pa motibu di nos fe, nada por hasi nos daño si nos “bira siguidónan di loke ta bon” (1 Pe. 3:13, NKJV). Diabel ta impotente pa para e avanse di e bèrdat di Dios.

Lesa e siguiente pasashinan di Beibel i resumí brevemente nan tema komun: Mateo 10:38, Echonan 14:22, Romanonan 8:17, 2 Timoteo 3:12.

Bida mes den e mundu kaí akí ta difísil, asta pa e “mihó” di nos. Jòb tabata un hòmber hustu; asta Beibel ta bisa ku e “tabata perfekto i rekto, i un ku tabata teme Dios i tabata evitá maldat” (Job 1:1, NKJV). I tòg, di un dia pa otro, kalamidat a asotá e i su famia. Ken no a siña, sea pa medio di eksperensia personal òf dor di mira kiko a pasa ku otronan, ku bida aki ta ser bibá, ta parse, riba un presipisio, i bo no sa nunka ki ora lo bo bai over di e rant? Sufrimentu, te na sierto grado, ta e suerte di nos tur. Na final, sinembargo, ta mihó sufri pa motibu di Kristu ku pa kualke otro kos.

“For di e rèki, e staka, e prizòn, for di hòl- i kuebanan di tera, e gritu di triunfo di e mártir ta zona den su orea. E [Pablo] ta tende e testimonio di almanan firme, ku, aunke desprovisto, aflihí, tormentá, tòg ta duna testimonio sin miedu i solèm pa e fe, deklarando: ‘Mi sa den ken mi a kere.’ Esakinan, entregando nan bida pa fe, ta deklará na mundu ku Esun den ken nan a konfia ta kapas pa salba te den ekstremo.”—Ellen G. White, The Acts of the Apostles, p. 512.

“Nunka tabatin un diversidat asina grandi di fe den kristianismo manera te awe. Si e donnan [di apòstel, profeta, evangelista, pastor i maestro (Efe. 4:11–13)] tabata nesesario pa preservá e unidat di e iglesia tempran, kuantu mas pa restourá unidat awor! I ku e ta e propósito di Dios pa restourá e unidat di e iglesia den e último dianan, ta abundantemente evidente for di e profesianan. Nos tin e siguransa ku e vigilantenan lo wak ku bon wowo, ora Señor trese Sion di nobo. Tambe, ku den e tempu di fin e sabínan lo komprondé. Ora esaki ta kumplí lo tin unidat di fe ku tur ku Dios ta konsiderá sabí; pasobra esnan ku en realidat ta komprondé bon, nesesariamente mester komprondé meskos. . . . For di konsiderashonnan manera esakinan, ta evidente ku e estado perfekto di e iglesia pronostiká aki ta den futuro ainda; konsekuentemente e donnan akí ainda no a kumpli ku nan propósito.”—R. F. Cottrell, “Introduction,” den Ellen G. White, Early Writings, p. 140.

Preguntanan pa Diskushon: