Pablo ta kontinuá e tema di rekonsiliashon, ku a ser resaltá asina bibu den Kolosensenan 1:20 (wak Lès 8, djaweps). Einan el a deskribí su alkanse kósmiko, miéntras ku loke ta sigui ta bira personal i individual. Pa medio di Su morto na krus, Hesus a logra rekonsiliashon pa tur hende i tur kos, spesialmente sernan humano, ku tabata alehá for di e bida di Dios pa medio di piká, pero awor por ser rekonsiliá kunE pa medio di fe.
E proseso di rekonsiliashon individual ta ser desempaketá den e pasashi di e siman akí. Manera ku e esfera kósmiko, e ta sosodé pa medio di e morto di Kristu. Riba nivel individual, e krus, leu di ta un símbolo pasivo, ta bira un realidat aktivo, ku e amor di Dios ku ta transformá hende segun ku nan ta tende e evangelio i ta risibí Kristu Mes, e speransa di gloria.
Pablo ta papia tambe tokante “e misterio ku tabata skondí for di siglonan i for di generashonnan” (Kol. 1:26, NKJV). Kiko e misterio akí ta, i kiko tur e ta enserá, pa e individuo i pa e universo? Kon e “misterio” akí ta relashoná ku e evangelio ku Pablo a proklamá asina fervientemente?
Lesa Kolosensenan 1:21,22. Kiko Pablo ke men ku su referensia na alehamentu i ser enemigu? I kiko ta e resultado final sperá di e morto di Kristu (lesa tambe Efe. 5:27)?
Pablo semper a pinta un kuadro skur di humanidat, a lo ménos humanidat aparte di e hustisia di Kristu. I ken awe, kasi dos mil aña despues, lo por argumentá ku e sintimentu ei? Un hende a yega di bisa ku e úniko doktrina kristian ku no mester ser aseptá pa fe ta e pekaminosidat di humanidat.
Sinembargo, desde entrada di piká, Dios a tuma e inisiativa pa rekonsiliá nos, pa malu ku nos ta, ku E mes. Es desir, for di kuminsamentu, Dios a traha pa resolvé e problema di piká, asta si e solushon por a ser hañá solamente den Su mes morto na krus.
Den Eden, El a yama Adam, Su obra maestra di kreashon, “Unda bo ta?” (Gen. 3:9, NKJV). I awe, E ta sigui buska Su un karné pèrdí, nos. E ta buska nos un pa un. E tin un plan perfekto pa alkansá nos, aplikando e promesa embrionario di e evangelio di Génesis 3:15, poniendo enemistat entre nos i Satanas.
Tin biaha e evangelio ta ser hasí asina kompliká i teóriko ku e tin tiki nifikashon práktiko pa bida di siglo bintiun. Pero e ta realmente basta simpel i direkto. E evangelio tin tres parti:
Di promé, pasobra nos ta inkapas pa salba nos mes, Hesus a bini i a muri pa nos pikánan. (Lesa Rom. 5:6-8.)
Di dos, dor di aseptá Su morto komo di nos pa medio di fe, arepentimentu, i boutismo, nos ta ser hustifiká i hasí liber di e kondena di piká. (Lesa Rom. 5:9-11; Rom. 6:6,7.)
Di tres, e bida ku nos ta biba awor ta resultado di ta uní ku Kristu, eksperensiá Su poder di krea di nobo, i ku E ta biba Su bida den nos. (Lesa 2 Kor. 5:17-21, Gal. 2:20).
Esakinan no nesesariamente ta pasonan òf susesonan separá. Nan por pasa tur pareu, asina ku nos ta kla pa aseptá Hesus den nos bida. I nan por ser renobá tur dia segun ku nos ta entregá nos mes na djE tur mainta. Sin importá kon kada un di nos a eksperensiá e obra salbador di Kristu den nos bida, e fundeshi ta keda semper riba e morto di Hesus. Na esei nos mester regresá semper.
Lesa Kolosensenan 1:23 (NKJV). Kiko bo ta kere ku Pablo ke men dor di keda “fundá i firme” den e fe? (Lesa tambe Kol. 2:5 i Efe. 3:17.)
Tin kuater diferente tipo di deklarashon “si” na griego, kada un ku diferente matis. Esun ku Kolosensenan 1:23 ta kuminsá kuné ta asumí ku e kondishon ta bèrdat. Es desir, Pablo ta enkurashá e Kolosensenan ku e pensamentu ku nan lo, enbèrdat, sigui den e fe. Manera Pablo ta indiká pronto, ya el a mira evidensia di nan fe i firmesa (Kol. 2:5). No opstante, nan speransa ainda ta kondishoná riba e echo ku nan ta persistí riba e kaminda di fe ku nan a drenta.
E idea akí di persistí ta e nifikashon di e palabra griego tradusí "sigui" (Kol. 1:23 , NKJV) . E ta ser usá di e eskribanan i fariseonan ku a sigui eksigí di Hesus un kontesta tokante kiko mester a hasi ku e muhé ku a ser gará den adulterio (Juan 8:7); tambe di Pedro ku a sigui bati na porta despues ku Rhoda a rekonosé su bos pero a lag’é na yabi i a kore drenta paden pa bisa e otronan (Echonan 12:16). E ta ser usá tambe pa Pablo, kende ta enkurashá Timoteo pa keda fiel na e instrukshonnan doktrinal i práktiko ku el a duna (1 Tim. 4:16). Su nifikashon aki ta similar, eksepto ku e ta ser apliká na kreyentenan generalmente.
Manera nos lo mira den e lès di otro siman, Pablo ta preokupá ku e kolosensenan por kore tras di kamindanan di salbashon basá riba hende en bes di tene duru na e speransa ofresé pa e evangelio (lesa, por ehèmpel, Kol. 2:8,20-22). E palabra “fundá” ta referí na e echo di a pone un fundeshi sólido di fe i amor basá riba e Palabra di Dios (lesa Mat. 7:25, Efe. 2:20, Efe. 3:17).
Relashoná ku e idea akí tin e palabra griego tradusí “firme,” referiendo na un struktura inmovibel i, pa ekstenshon, na un kristian ku no por ser “mové for di e speransa di e evangelio” (Kol. 1:23). E mesun palabra ta ser usá den 1 Korintionan 15:58: "sea firme, inmovibel, semper abundante den e obra di Señor, sabiendo ku boso trabou no ta en bano den Señor" (NKJV).
Kontrali na e kreensia komun di “un biaha salbá, semper salbá,” Pablo ta bisando algu kompletamente diferente.
Lesa Kolosensenan 1:24-25. Kiko Pablo ta bisa tokante su sufrimentu pa motibu di Kristu?
Aunke Pablo a skirbi Kolosensenan miéntras e tabata bou di aresto domisiliario na Roma, kisas su sufrimentu di mas grandi a bini di no por a traha intensivamente di un lugá pa otro i kas pa kas, manera el a hasi anteriormente (Echonan 20:20). E aflikshonnan (òf tribulashonnan) akí, ku Kristu a atvertí di antemano di dje (Mat. 24:9, Juan 16:33), "no ta digno pa ser kompará ku e gloria ku lo ser revelá den nos" (Rom. 8:18). Esaki ta e kuadro mas grandi. Manera Pablo a skirbi na e kristiannan na Filipos, asina awor na e kolosensenan e ta regosihá den su sufrimentunan, ku ta pa nan benefisio (Kol. 1:24).
Pablo por ta den prizòn, pero “e palabra di Dios no ta mará” (2 Tim. 2:9). Miéntras Pablo tabata den e limitashon akí, Filipensenan, Efesionan i Filemon tambe a ser skirbí. Despues di su liberashon, Dios a inspir’é pa skirbi e konsehonan importante ku nos ta haña den 1 Timoteo i Tito. Despues, durante su último enkarselashon den un prizòn romano, el a skirbi 2 Timoteo. Den kòrtiku, e último añanan akí a proveé Pablo e oportunidat pa skirbi un porshon signifikante di Tèstamènt Nobo, ku probablemente a inkluí Hebreonan.
E plan eterno di Dios a premirá tur esaki i mas. E palabra griego ku Pablo ta usa den Kolosensenan 1:25, generalmente tradusí komo “mayordomia,” ta oikonomia. Usá den un sentido limitá (manera, por ehèmpel, den 1 Tim. 1:4), e ta referí na “Dios su manera di ordená kosnan.”--Luke Timothy Johnson, The First and Second Letters to Timothy (New York: Doubleday, 2001), p. 164. Esei lo a inkluí Pablo su apostolado. Ma den un sentido mas amplio, e ta inkluí tur e provishonnan ku Dios a hasi den e plan di salbashon. E ministerio di Pablo, e otro apòstelnan, i asta e profetanan di Tèstamènt Bieu (Efe. 2:20, Efe. 3:5), inkluyendo Moises, tabata diseñá “pa kumpli ku e palabra di Dios” (Kol. 1:25), tur en konekshon ku e plan divino akí.
Aunke nos lo wak e tópiko akí mas djaserka den e estudio di mañan, ta útil na e punto akí pa nota ku Pablo a rekonosé su ministerio komo djis un parti chikitu di un plan divino muchu mas grandi i di plaso largu ku a kuminsá ser implementá “for di e fundashon di mundu” (Mat. 13:35, Efe. 1:4) .
Lesa Kolosensenan 1:26-27. Pablo ta papia dos biaha tokante “e misterio.” Ki misterio?
Na un otro lugá, Pablo ta referí na “e misterio di Dios,” ku ta e propósito eterno di Dios “ordená promé ku e siglonan pa nos gloria” (1 Kor. 2:7, NKJV) i revelá a traves di e plan di salbashon. Pedro ta papia di e bèrdat akí komo algu ku e profetanan a antisipá i ku “angelnan ta deseá di wak aden” (1 Pe. 1:10-12). El a ser pensá “promé ku e fundashon di mundu” (1 Pe. 1:20) i “a ser tené sekreto desde ku mundu a kuminsá” (Rom. 16:25). Sinembargo, pa medio e bida, morto i resurekshon di Kristu, e misterio aki a ser revelá (2 Kor. 3:14).
Kon e siguiente referensianan na e misterio di Dios ta iluminá vários aspekto di e plan di salbashon?
Finalmente, “tur kos” den shelu i riba tera lo ser tresé huntu den unidat kompletu den Kristu. Esaki tabata e enfoke di e orashon di Kristu den Juan 17. Kon eksaktamente esaki lo a sosodé tabata un misterio ku awor a ser revelá pa medio di e evangelio.
Dikon Dios lo a stima nos asina tantu ku E lo a duna Hesus, e tesoro ku no tin preis di shelu, pa nos salbashon, lo ta nos estudio den henter eternidat. Pero nos sa esaki: Kristu “a muri pa tur, pa esnan ku ta biba no biba mas pa nan mes, ma pa Esun ku a muri pa nan i a resusitá atrobe” (2 Kor. 5:15, NKJV). Komo resultado, tur ku ta kere den Kristu, tantu hudiu komo pagano, ta kompartí igualmente den e promesanan di Dios pa medio di e evangelio i a ser tresé huntu den un kurpa, e iglesia.
“Kristu den boso” (Kol. 1:27) ta referí na Kristu Su bibá den e kurason pa medio di fe (Efe. 3:17; kompará Gal. 2:20). E union spiritual akí ku Kristu ta kapasitá kreyentenan asta awor pa “sinta huntu den lugánan selestial” (Efe. 2:6) i purba “e podernan di e mundu ku ta bin” (Hebr. 6:5). Atraves di e presensia di Kristu den nos bida, ya E ta kuminsá uni nos ku shelu. Ta e evangelio ku ta obra den kurason di kreyentenan "a kualifiká nos pa ta partísipe di e herensia di e santunan den e lus" (Kol. 1:12 , NKJV).
Lesa Kolosensenan 1:28-29. Kiko ta Pablo su enfoke? Dikon bo ta kere ku “tur hende” (ESV) ta ser ripití tres biaha?
E enfoke di e predikashon di Pablo tabata Kristu i E krusifiká (1 Kor. 1:23). Segun Efesionan 5:27, e propósito di e sakrifisio di Kristu ta “pa E por present’é [e iglesia] na Su mes komo un iglesia glorioso, ku no tin mancha ni ploi ni nada asina, ma pa e ta santu i sin mancha” (NKJV).
Pues, e meta di e predikashon di e evangelio di Pablo ta pa “presentá tur hende madurá den Kristu” (Kol. 1:28, ESV). E ta hasi esaki dor di siña i spièrta, siñando e vários puntonan di doktrina i práktika kristian (2 Tes. 2:15, 1 Tim. 4:11, 1 Tim. 5:7, Tito 1:9) i spièrtamentu di e konsekuensianan pa rechasá e evangelio i di e peligernan di maestronan falsu (Echonan 20:29-31 Rom. 16:17) .
Ta asin’akí nos ta krese pa ta kristiannan madurá, dor di aseptá e siñansanan i pone atenshon na e spièrtamentunan di Skritura. Madures ta un konsepto importante. E mayornan di un bebi resien nasí ta selebrá kada logro: promé palabranan, siña kana, i siña lesa. Kua mayor lo no spanta si nan yu, despues di vários aña, ainda no por a kana òf papia? Kresementu i desaroyo ta normal i sperá. Mesun kos ta konta pa e bida kristian.
E palabra griego tradusí “madurá” (teleios) ta nifiká perfekto i sin defekto. Atraves di e proseso di kresementu kristian, nos ta bira profundamente konsiente di e profundidat di e lei di Dios i ku su rekerimentunan ta “ekstremadamente amplio” (Salmo 119:96, NKJV). Nos ta komprondé ku e ta ekstendé te na “e pensamentunan i intenshonnan di kurason” (Hebr. 4:12).
Pero nos mester ta kuidadoso, ku ta motibu dikon Pablo a usa e palabra “spièrtamentu” den Kolosensenan 1:28. E kaminda ku "ta parse korekto . . . ta e kaminda di morto" (Prov. 14:12, NKJV). Disernimentu spiritual ta bin di un konosementu guiá pa e Spiritu di e Palabra di Dios.
Siñansanan falsu generalmente tin algun bèrdat pero sea ta añadí òf ta kita algu for di loke Beibel ta bisa (lesa Isa. 8:20). E último ta logra hopi biaha, si no ta dor di duda direktamente den loke Dios ta bisa, e ora ei a lo ménos dor di kuestioná si e ta realmente posibel òf si e ta aplikabel na nos tempu. Nos mester ta sabí manera kolebra ma inosente manera palomba ora ta trata di diserní bèrdat doktrinal for di eror.
"Nos no tin hustisia di nos mes ku kua nos por kumpli ku e demandanan di e lei di Dios. Pero Kristu a traha un kaminda di eskape pa nos. . . . Si bo entregá bo mes na djE, i asept'E komo bo Salbador, e ora ei, pekaminoso manera bo bida por tabata, pa Su motibu bo ta ser konsiderá hustu. E karakter di Kristu ta para na lugá di bo karakter, i bo ta ser aseptá dilanti di Dios komo si fuera bo no a peka."
"Mas ku esaki, Kristu ta kambia e kurason. E ta permanesé den bo kurason pa medio di fe. Bo mester mantené e konekshon akí ku Kristu pa medio di fe i e sumishon kontinuo di bo boluntat na djE; i tanten ku bo hasi esaki, E lo obra den bo pa ke i pa hasi segun Su bon boluntat...
“Asina ta ku nos no tin nada den nos mes di kua nos por gaba. Nos no tin base pa eksaltashon propio. Nos úniko base di speransa ta den e hustisia di Kristu imputá na nos, i den esun obrá pa Su Spiritu ku ta obra den i pa medio di nos.”--Ellen G. White, Steps to Christ, p. 62, 63.
“E lus duná na mi tabata hopi fòrsá ku hopi hende lo a sali for di nos, dunando atenshon na spiritunan seduktivo i doktrinanan di diabel. Señor ta deseá ku kada alma ku ta pretendé di ta kere e bèrdat tin un konosementu inteligente di kiko ta bèrdat.”--Ellen G. White, Evangelism, p. 363.