Fil. 3:17-4:23; 1 Kor. 15:42-44; Juan 14:27; Salmo 119:165; Job 1:21; 1 Tim. 6:7
“No preokupá pa nada, ma den tur kos pa medio di orashon i súplika, ku gradisimentu, laga boso petishonnan ser hasí konosí na Dios” (Filipensenan 4:6, NKJV).
E lès di e siman akí ta konkluí nos estudio di Filipensenan, i e ta yená ku lèsnan i máksimanan balioso pa bida diario. Ta parse ku hopi di e balornan moral haltu ku a guia e bida di apòstel Pablo ta ser hañá den e último versíkulonan di e epístola. Similar na e siñansanan di Hesus, ku ta enfoká riba e persona interno, loke Pablo ta kompartí ku nos ta sekretonan pa biba un bida kristian gososo.
Asta ora kosnan no bai manera nos lo tabata ke, loke ta sosodé mas frekuente ku nos lo tabata ke, nos no mester ta preokupá òf anshá òf desanimá. En kambio, tin prinsipionan ku lo yuda nos haña fortalesa interno pa enfrentá e retonan ku bida ta trese kuné, i asina nos por eksperensiá un pas establesé i duradero ku solamente Dios por duna. Presente i futuro ta den Su man, i E lo supli tur loke nos mester.
Mas importante ainda, nos no tin nodi di pone nos speransa den sistemanan di gobièrnu terenal, ku regularmente ta desepshoná nos. Komo kristian, nos ta siudadano di e reino selestial di Dios. I ku e siudadania ei ta bini privilegionan, privilegionan maravioso. I responsabilidatnan tambe.
Nos tur, na un òf otro momentu, a topa hende ku nos ta atmirá i ke imitá. Pa muchanan, ta spesialmente importante pa nan tin bon modelonan pa sigui. Idealmente, esaki lo ta nan tata i mama. Segun ku nan ta krese, nan lo haña otro modelonan pa sigui, kisas konektá ku nan karera skohé òf asta den biografianan ku nan a lesa. Nan por siña tambe kon vários personahe bíbliko a dil ku retonan i kompará nan ku nan mes eksperensianan di bida.
Desafortunadamente, den e medionan di komunikashon di awendia, mal ehèmpel ta abundá. Nos ta ser bombardiá ku clickbait, storianan online ku ta detayá e problemanan pika i bida desordená di selebridatnan. E lektornan di Pablo na Filipos, aunke naturalmente no tabata atendé ku internèt, no opstante tabata enfrentá retonan similar.
Echo ta ku e mundu ku Pablo tabata biba aden tabata masha korupto, inmoral i malbado, meskos ku esun di nos ta awe. Semper tabatin, i semper lo tin, a lo ménos te na final, mas ku sufisiente maldat pa tur hende. E pregunta pa nos ta: Kon nos ta reakshoná riba dje?
Lesa Filipensenan 3:17-19. Kon modelonan pa sigui bon i malu ta ser deskribí den e pasashi akí? Ki klave ta ser duná pa distinguí entre nan?
Nos no mester pèrdè e amor di Pablo pa ku esnan ku e no ta di akuerdo kuné; e ta yora riba nan! Nota tambe ku e no ta yama nan su enemigu sino “enemigu di e krus di Kristu” (Fil. 3:18). Pablo a rekonosé ku asuntunan muchu mas grandi tabata den wega, esta, kon e krus ta kibra bareranan i ta pone nos tur riba e mesun nivel, komo pekadornan ku tin mester di un Salbador (lesa Efe. 2:11-14).
Tambe, pa no ser pasá por alto, ta kon Pablo ta urgi e filipensenan pa enfoká riba e bon ehèmpelnan, no riba esnan malu; pa opservá kuidadosamente esnan kende nan manera di biba ta masha paresido na esun di dje. Ta interesante, Pablo ta usa lenguahe similar ora e ta atvertí e romanonan pa “nota esnan ku ta kousa divishon i ofensa, kontrali na e doktrina ku boso a siña, i evitá nan” (Rom. 16:17, NKJV). E gañadónan na Roma ta ser deskribí komo esnan ku “no ta sirbi nos Señor Hesu-Kristu sino nan mes barika” (Rom. 16:18, NKJV).
Lesa Filipensenan 3:20-21. Kon Pablo ta deskribí di forma bibu kon “siudadania” kristian ta?
Kontrali na e enemigunan di e krus, ku “ta pone nan mente riba kosnan terenal” i no tin un dios mas grandi ku nan barika (Fil. 3:19), siudadania kristian ta den shelu, i nos gobernante ta Hesu-Kristu Mes. Pa enfatisá e punto, Pablo ta resaltá e nesesidat pa “e kurpanan humilde akí di nos” (Fil. 3:21, NET), suheto na malesa, deterioro i morto, ser transformá pa ta meskos ku e kurpa di resurekshon glorioso di Kristu.
Kon e siguiente pasashinan ta deskribí e estado glorifiká?
Na final, atraves di Hesus, morto, “e último enemigu,” lo ser destruí (1 Kor. 15:26). I esei ta nos speransa di mas grandi, e promesa final ku nos a ser duná den Hesus, no solamente e fin di morto sino un kurpa kompletamente nobo, asta un “kurpa glorioso” (Fil. 3:21, ESV).
Den un buki tokante kon haña “salbashon” sin Dios, ku a argumentá, mas bien di forma bobo, ku vense miedu di morto ta “salbashon,” outor Luc Ferry sí ta atmití ku kristianismo “ta kapasitá nos no solamente pa pasa over di e miedu di morto, sino tambe pa vense morto mes. I dor di hasi esaki den términonan di identidat individual, mas bien ku anonimidat òf apstrakshon, e ta parse di ta e úniko vershon ku ta ofresé un viktoria berdaderamente definitivo di inmortalidat personal riba nos kondishon komo mortal."—Ferry, A Brief History of Thought (New York: HarperCollins, 2011, edishon di Kindle), p. 90. Un atmishon remarkabel, ku ta bin di un ateo.
Pues, pa Pablo, nos siudadania selestial ta inkluí e promesa di resurekshon i bida eterno den un eksistensia kompletamente nobo ku apénas nos por imaginá awor.
Lesa Filipensenan 4:4-7. Kon nos mester eksperensiá “e pas di Dios”?
Despues di a toka, atrobe, e nesesidat pa unidat (Fil. 4:1-3), Pablo ta pasa pa un otro tema: regosihá den Señor (Fil. 4:4-7).
Kuantu biaha bo tabatin strès pa kosnan ku finalmente a dirti bai sin esfuerso, mes lihé ku nan a aparesé? Pa bon motibu, Hesus a enfatisá repetidamente ku nos no mester preokupá (lesa Mat. 6:25-34, Mat. 10:19), i Pedro ta kòrda nos ku nos por tira tur nos preokupashonnan òf ansiedatnan (ESV) riba Señor, “pasobra E ta pèrkurá pa boso” (1 Pe. 5:7, ESV). De echo, e problemanan kresiente mundialmente mester inspirá nos ku speransa ku e binida di Señor ta serka (kompará Mat. 24:33, Lukas 21:28, Santiago 5:8).
E antídoto pa ansiedat den tur kos, inkluyendo tur situashon, ta pa elevá un orashon di fe (Fil. 4:6-7). Klaramente, nos mester kere i aktua riba nos orashon komo si fuera nos a ser kontestá asta promé ku nos mira su realisashon, pasobra nos mester hasi orashon “ku gradisimentu.” Tambe añadí tin e palabra “súplika” (Griego: deēsis), ku ta señalá tempu ekstremo i urgente (lesa, por ehèmpel, Lukas 1:13, Fil. 1:19, 1 Tim. 5:5, Santiago 5:16). Nos orashonnan ta “petishonnan” ainda, pero nos por sa ku nos petishonnan a ser risibí basta nos pidi “di akuerdo ku Su boluntat” (1 Juan 5:14, NKJV). E ora ei nos por sosegá i tin pas, sabiendo ku tur nos petishonnan ta den man di Dios.
Kon e siguiente pasashinan ta oumentá nos komprondementu di e pas di Dios? Salmo 29:11, Isa. 9:6, Lukas 2:14, Juan 14:27, 1 Kor. 14:33.
E pas di Dios ta algu ku mundu nunka por duna, pasobra e pas di Dios ta bini di e siguransa ku nos tin e don di bida eterno pa medio di Hesus nos Salbador (Rom. 5:1, Rom. 6:23). E pas akí ta impaktá tur aspekto di bida i “ta surpasá tur komprondementu” (Fil. 4:7, NKJV). E no por ser kaptá dor di e mente so, manera e palabra griego nous (mente) usá aki ta indiká.
E pas ku ta surpasá komprondementu tambe lo “warda boso kurason i mente pa medio di Kristu Hesus” (Fil. 4:7, NKJV). Nos bida interno tin mester di protekshon. Interesantemente, Filipensenan 4:7 ta usa un metáfora militar en konekshon ku e pas di Dios. E verbo griego (phroureō) ta ser usá pa deskribí un guarnishon di sòldá ku ta warda un stat kontra invashon (2 Kor. 11:32; kompará Echonan 9:24).
Un otro aspekto masha importante di pas interno ta enserá biba den armonia ku e boluntat di Dios. “Gran pas esnan ku ta stima bo lei tin, i nada lo no ofendé nan” (Salmo 119:165).
Lesa Filipensenan 4:8-9. Ki akshonnan spesífiko ta ser urgí?
Pablo ta introdusí Filipensenan 4:8-9 ku “ademas” (GNV) i un lista di seis birtut, siguí pa un resúmen kòrtiku di nan i enkurashamentu pa imitá e ehèmpel di Pablo. E eksortashon interkultural di klousura akí ta pas bon denter di e ambiente grekoromano di Filipos, ku su énfasis dòbel riba birtut i ehèmpel. Interesantemente, sinembargo, e enfoke ta riba birtutnan bíbliko, loke ta bastante opvio for di Pablo su omishon di e kuater birtutnan griego kardinal (prudensia, hustisia, temperansia i kurashi).
Pablo ta duna dos kualifikashon mas, pa no ta atribuí un nifikashon pagano na kualke di e birtutnan akí: “si kualke kos ta ekselente òf digno di alabansa” (Fil. 4:8, NIV), nos mester pensa riba e birtutnan selestial akí. Despues, pa kita tur duda i potensial mal komprondementu, Pablo ta yama nos pa praktiká loke nos a siña, risibí, tende i mira for di su mes ehèmpel (Fil. 4:9).
Lesa Filipensenan 4:10-13,19. Ki klavenan Pablo ta revelá pa un bida satisfecho i felis?
Ora sirkunstansianan ekstremo dal (hamber, malesa, leshon, pèrdida), un hende ta kuminsá reflekshoná riba e kosnan ku realmente ta konta i keda pensa riba e bendishonnan ku normalmente ta ser tumá komo normal. Ora nos ser “humiliá” (Fil. 4:12, ESV), “den nesesidat” (NIV), òf lagá ku “kasi nada” (NLT) ta ora fe ta lanta pa e okashon.
En kambio, ora nos “ta biba den prosperidat” (NASB), semper e mester ta ku e rekonosementu ku e por disparsé den un instante (lesa Prov. 23:5). Manera tantu Job komo Pablo ta rekordá nos, nos no a trese nada den mundu ora nos a nase, i nos lo no hiba nada na nos graf (Job 1:21, 1 Tim. 6:7).
Nota e siguiente promesanan bíbliko:
I, mas maravioso di tur: “Mi por hasi tur kos pa medio di Kristu ku ta fortalesé mi” (Fil. 4:13, NKJV). Kisas ningun di nos por kapta kompletamente kiko “tur kos” ta enserá. Sigur, manera ku kualke petishon pa yudansa i fortalesa di Dios, nos mester pidi di akuerdo ku Su boluntat. Pero hopi biaha, nos no ta ni pidi pa kosnan ku nos sa ta kuadra ku Su boluntat. Ta p'esei Santiago 4:2 ta bisa: “Boso no tin, pasobra boso no ta pidi” (ESV).
At’akí algun kos ku nos por pidi ku konfiansa pasobra nos sa ku nan ta den harmonia ku e boluntat di Dios:
“Solamente esnan ku ta risibí konstantemente suministronan fresku di grasia, lo tin poder proporshonal na nan nesesidat diario i nan abilidat pa usa e poder ei. En bes di wak padilanti na un tempu den futuro ora, pa medio di un dotashon spesial di poder spiritual, nan lo ser ekipá di manera milagroso pa gana alma, nan ta someté nan mes diariamente na Dios, pa E por hasi nan pòchinan ku ta apto pa Su uso. Diariamente nan ta mehorando e oportunidatnan pa servisio ku ta denter di nan alkanse. Diariamente nan ta testifiká pa e Maestro unda ku nan por ta, sea ta den un esfera humilde di trabou den e hogar, òf den un ramo públiko di utilidat.
"Pa e obrero konsagrá tin un konsuelo maravioso den e konosementu ku asta Kristu, durante Su bida riba mundu, tabata buska Su Tata diariamente pa suministronan fresku di grasia nesesario; i for di e komunion akí ku Dios E tabata sali pa fortalesé i bendishoná otronan...
“Tur obrero ku ta sigui e ehèmpel di Kristu lo ta prepará pa risibí i usa e poder ku Dios a primintí Su iglesia pa hechamentu di e kosecha di tera.”--Ellen G. White, God’s Amazing Grace , p. 117.
"Dios konosé nos nesesidatnan, i a proveé pa nan. Señor tin un tesoreria di suministro pa Su yunan, i por duna nan loke nan tin mester bou di tur sirkunstansia. Anto dikon nos no ta konfi'E? El a hasi promesanan presioso na Su yunan bou di kondishon di obediensia fiel na Su preseptonan. No tin un karga ku E no por kita, ningun skuridat ku E no por kore kuné, ningun debilidat ku E no por kambia pa poder, ningun miedu ku E no por kalma, ningun aspirashon digno ku E no por guia i hustifiká.
“Nos no mester wak nos mes. Mas nos ta keda reflekshoná riba nos mes imperfekshonnan, ménos forsa nos lo tin pa vense nan.”--Ellen G. White, That I May Know Him, p. 224.