Fil. 2:12–30; Rom. 3:23,24; Rom. 5:8; 2 Tim. 4:6; 1 Kor. 4:17; 2 Tim. 4:21,13; Lukas 7:2.
“Hasi tur kos sin keha i diskutí, pa boso por bira sin kulpa i inosente, yunan di Dios sin kulpa meimei di un generashon kruel i pervèrso, entre ken boso ta bria manera lusnan den mundu” (Filipensenan 2:14,15, NKJV).
Dios a bisa e hebreonan pa obedesé pasobra e obediensia ei “ta boso sabiduria i boso komprondementu den bista di e pueblonan ku lo tende tur e statutonan akí, i bisa: ‘Siguramente e gran nashon akí ta un pueblo sabí i komprensivo’ ” (Deut. 4:6, NKJV).
Siglonan despues Hesus a bisa: “Ami ta e lus di mundu: Esun ku siguiMi lo no kana den skuridat, ma tin e lus di bida” (Juan 8:12, NKJV). El a bisa tambe: “Boso ta e lus di mundu. Un stat ku ta situá riba un seru no por ser skondí” (Mat. 5:14, NKJV). Kon nos por ta e lus ei? Solamente atraves di un konekshon estrecho ku Hesus, “e lus berdadero ku ta duna lus na tur hende” (Juan 1:9, NIV). Manera Filipensenan 2 ta bisa, Dios “a hals’E altamente i a dun’E e nòmber ku ta riba tur nòmber, ku pa e nòmber di Hesus tur rudia mester bùig . . . i ku tur lenga mester konfesá ku Hesu-Kristu ta Señor” (Fil. 2:9–11, NKJV).
E lus i poder di shelu ta disponibel pa nos tur ku a someté nos bida na Hesus. Pero muchu biaha sea nos ta spera ku Dios ta hasi tur kos òf nos mes ideanan i plannan ta stroba nos. Ta p’esei e palabranan di Pablo na e filipensenan ta asina relevante awe.
Despues di a kaba di presentá Hesus komo e ehèmpel perfekto di humildat i obediensia na e boluntat di Dios, awor Pablo ta bira na e filipensenan mes. E ta afirmá nan obediensia na Señor despues ku nan a risibí e mensahe di e evangelio (lesa Echonan 16:13–15,32,33) i ta urgi nan pa sigui den e obediensia ei.
Despues di a presentá e ehèmpel di bida di Kristu i e Krus komo e kaminda di salbashon, Pablo awor ta enfoká mas direktamente riba kon tur esaki ta funshoná den práktika.
Lesa Filipensenan 2:12,13. Kiko Pablo ke men ora e bisa: “Traha riba boso mes salbashon”? Kon lo bo deskribí e relashon entre fe i obranan?
Den e dos versíkulonan aki, Pablo no ta presentá un evangelio diferente for di loke e ta delineá den Romanonan i den su otro epístolanan. Nos por ta sigur ku su mensahe aki ta kuadra ku e evangelio di hustifikashon pa medio di fe, ku el a prediká tambe na Filipos i otro lugánan. Pero ta importante tambe pa konsiderá tur loke Beibel ta bisa riba un sierto tópiko, spesialmente riba e tópiko di salbashon, ku por ser asina mal komprondé.
Lesa Romanonan 3:23,24; Romanonan 5:8; i Efesionan 2:8–10. Kiko e pasashinan akí ta siña tokante salbashon?
Sin duda, salbashon ta obra di Dios, i nos mes no por tuma apsolutamente ningun krédito p’e. Asta fe mes ta un don, enkurashá pa medio di e obra di Spiritu Santu. Nos mes obranan no por salba nos; sinembargo, atraves di e nasementu di nobo, Dios ta krea nos di nobo spiritualmente, kapasitando nos pa hasi bon obranan. E Spiritu di Dios ta obra den nos, empoderando nos boluntat pa skohe e loke ta korekto, pa resistí tentashon, i pa hasi eskohonan korekto.
Pues, nos ta traha riba loke Dios ta obra den nos, “ku temor i temblamentu” (Fil. 2:12). Esei ta nifiká ku nos mester tin miedu di e huisio di Dios riba nos esfuersonan hopi biaha débil pa obedesé? Naturalmente ku nò. E frase akí ta referí na sinti e presensia di Dios (lesa Salmo 2:11) i nos nesesidat pa obedes’E.
Den Filipensenan 2:14 Pablo ta urgi e filipensenan pa “hasi tur kos sin keha i pleita” (NKJV). E retonan pa union di iglesia ta asina serio ku e no por ser mantené sin esfuerso signifikante di nos parti. Unidat denter di iglesia ta un supprodukto di nos union ku Kristu i obediensia na Su Palabra. I e ta vital pa nos testimonio, manera Pablo ta sigui señalá, yamando nos pa “bria manera lusnan den mundu” (Fil. 2:15).
Riba un anochi sin luna, leu for di e brio di stat i lusnan di kaya, mas strea ta visibel, i nan ta parse di ta bria muchu mas kla. Ta e kontraste ta hasi e diferensia. Mas pretu e shelu ta, mas kla e streanan ta destaká. Ta meskos ku nos testiminio. Mas grandi e skuridat moral rònt di nos ta, mas fuerte e kontraste ta entre e bida di e berdadero siguidónan di Dios i esun di hendenan mundano. Ki importante ta, antó, pa no laga e lusnan artifisial di ideanan, preshonnan i práktikanan mundano pone nos testimonio disparsé den trasfondo òf disparsé kompletamente.
Lesa Filipensenan 2:15,16. Kon Pablo ta deskribí kiko nos, komo yunan di Dios, mester ta i hasi?
“Intachabel” ta nifiká “sin fayo, sin reproche.” E ta ser usá spesialmente di Job i su karakter intachabel (lesa Job 1:1,8, NKJV; Job 2:3, NKJV; lesa tambe Job 11:4; Job 33:9). E palabra griego tradusí “inofensivo” ta nifiká literalmente “no mesklá, puru.” Hesus, en bista di e atakenan visioso ku Su testigunan probablemente lo enfrentá, ta enkurashá nos pa ta “inosente manera palomba” (Mat. 10:16). Di forma similar, Pablo ta urgi nos pa ta “simpel tokante maldat” (Rom. 16:19, NKJV). Nos kanalnan di media moderno no ta konosí pa kontenido puru, edifikante i inspirativo. Den tempunan manera esakinan, David su práktika ta un gran regla pa nos awe: “Lo mi no pone nada malu dilanti di mi wowo” (Salmo 101:3).
Nunka nos mester tin miedu di ta diferente; nos fe mester distinguí nos mas i mas. E meta ta pa “bria manera lusnan den mundu” (Fil. 2:15). E úniko manera pa hasi esei ta pa rechasá konformidat ku e mundu akí (Rom. 12:2) dor di “tene duru na e palabra di bida” (Fil. 2:16, NKJV). Nos eskohonan ta determiná si nos a biba ku “e dia di Kristu” na bista òf a “kore enbano” (Fil. 2:16, NKJV; kompará 1 Kor. 9:24–27).
Lesa Filipensenan 2:17; 2 Timoteo 4:6; Romanonan 12:1,2; i 1 Korintionan 11:1. Kiko Pablo ta bisando den e pasashinan akí?
Pablo ya a ekspresá un punto di bista sorprendentemente ambivalente pa ku si e ta biba òf muri den sirbishi na Kristu (Fil. 1:20–23). Awor e ta sugerí e posibilidat masha real di “ser dramá komo un ofrenda di bibida” (Fil. 2:17, NKJV). E imágen akí ta basá riba e práktika antiguo di ofrendanan di bibida, ku tabata envolví bashamentu di un líkido (manera zeta, biña òf awa) komo un ofrenda na Dios (lesa, por ehèmpel, Gén. 35:14, Eks. 29:40, 2 Sam. 23:15–17). E aparente “desperdisio” di un líkido balioso den un akto di deboshon por rekordá nos di Maria su akto di ungi Hesus su kabes i pianan ku e “zeta di nardo masha karu” (Marko 14:3–9, NKJV; Juan 12:3, NKJV). Miéntras ku e no tabata un ofrenda di bibida riba su mes, e tabata representá klaramente un sakrifisio enorme ku apropiadamente a ilustrá e sakrifisio infinito di Kristu pa nos salbashon.
Si Pablo mester a ser ehekutá pa su trabou di plama e evangelio, e lo a regosihá pasobra su bida tabata ser “dramá” komo un ofrenda na Dios. Pa motibu ku ofrendanan di bibida den e Beibel Hebreo generalmente no ta para nan so sino ta kompañá un sakrifisio (lesa Num. 15:1–10, Num. 28:1–15), Pablo lo a konsiderá e dunamentu di su bida komo e komplemento apropiá pa e “sakrifisio i sirbishi” di kreyentenan na Filipos, kendenan, pa medio di fe, a skohe pa dediká nan bida na Dios komo un “sakrifisio bibu” (Rom. 12:1).
E promé kristiannan, inkluso esnan na Filipos (Fil. 1:27–29), tabata aktivo den kompartí nan fe. Nan a bai plama e evangelio di kas pa kas (Echonan 5:42). Nan a habri nan kas pa estudio di e Skrituranan (Echonan 12:12; 1 Kor. 16:19; Kol. 4:15; Filemon 1,2), i tabata kapas pa duna motibunan for di e Skrituranan pa loke nan tabata kere (Echonan 17:11, Echonan 18:26, 1 Pe. 3:15). Nos pioneronan atventista a hasi e mesun kos. Mas bien ku dependé riba pastornan pa plama e mensahe na nan bisiñanan, nan a kompartí nan fe, a duna estudionan di Beibel i a prepará hende pa asina nan por ta kla pa boutismo ora e pastor a regresá.
Den kòrtiku, ku gran sakrifisio personal pa nan mes, esta, komo un “sakrifisio bibu,” nan a traha pa plama e evangelio. Nos lo mester hasi ménos?
Timoteo su ròl komo ko-remitente di e epístola akí ya a ser menshoná (Fil. 1:1). Awor Pablo ta kuminsá detayá kon balioso Timoteo ta komo un di su koleganan di trabou. E ta ser deskribí komo un evangelista (2 Tim. 4:5) ku Pablo a manda Masedonia (1 Tes. 3:2; kompará Echonan 18:5, Echonan 19:22) i, na vários okashon, pa Korinto (1 Kor. 4:17, 1 Kor. 16:10). Anteriormente el a traha ku Pablo i Silas na Korinto (1 Tes. 1:1, 2 Tes. 1:1) i despues na Efeso (1 Tim. 1:2, 3; kompará Echonan 19:22). Pablo ta deskribí Timoteo komo un hende “di mesun pensamentu” (Fil. 2:20, NKJV). E palabra griego (lit. “igual den alma”) ta sugerí ku e tabata meskos ku Pablo den hopi forma, inkluyendo su kompromiso ku Kristu, su esfuersonan energétiko pa plama e evangelio, i su preokupashon pa e filipensenan spesífikamente.
Dikon bo ta kere ku Pablo ta papia di forma asina positivo i asina largu tokante Timoteo aki (lesa Fil. 2:19–23)? Kiko mas Pablo ta bisa di dje (lesa 1 Kor. 4:17, 2 Tim. 1:5)?
Un otro kualidat di Timoteo, menshoná pa Pablo, ta su “karakter probá” (Fil. 2:22, NKJV). E palabra griego ta deskribí un persona ku a ser profundamente di tèst pa medio di pruebanan (Rom. 5:4) i ken su karakter i servisio a proba di ta genuino (2 Kor. 2:9, 2 Kor. 9:13). Pablo sa ku esaki ta bèrdat di Timoteo pasobra el a mira esaki demostrá atraves di e hopi okashonnan ku nan a traha banda di otro ora nan tabata plama e evangelio.
Ta e eksperensianan difísil di bida ta pone nos kurashi na prueba i ta demostrá ken nos ta di paden. Ellen G. White ta pon’e asina: “Bida ta disiplinario... Lo tin provokashonnan pa tèst e temperamento; i ta dor di kumpli ku esakinan den un spiritu korekto e grasianan kristian ta ser desaroyá. Si leshonnan i insultonan ser soportá dósilmente, si palabranan insultante ser respondé ku kontestanan suave, i aktonan opresivo ku bondat, esaki ta evidensia ku e Spiritu di Kristu ta biba den e kurason.”— Ellen G. White, Testimonies for the Church, tomo 5, p. 344. E ta sigui bisa ku si “e difikultatnan i molèsternan ku nos ta ser yamá pa soportá” ta “ser bon soportá, nan ta desaroyá lo kristian den e karakter i ta distinguí e kristian for di e mundano.”— Testimonies for the Church, tomo 5, p. 344.
Lesa Filipensenan 2:25–30. Kon Pablo ta deskribí Epaphroditus? Ki aktitut- i akshonnan spesífiko di e obrero kristian akí ta revelá su karakter?
Epaphroditus ta ser menshoná solamente den e karta akí, pero nos ta siña basta kos tokante dje for di e poko menshonnan kòrtiku ku ta aparesé. Huzgando for di su nòmber (ku ta referí na e kulto di Afrodita), el a kombertí for di un trasfondo pagano. Yam’é un “kompañero di trabou” ta sugerí ku e tabata aktivo den ministerio, kisas trahando huntu ku Pablo na Filipos. Ser un “kompañero sòldá” (kompará Fil. 1:27) probablemente ta referí na konflikto ku Epaphroditus a enfrentá ora e tabata plama e evangelio, dispuesto asta pa riska su bida (Fil. 2:30).
Komo e “mensahero” (griego: apostolos) nombrá dor di e iglesia na Filipos, Epaphroditus ta ser mandá pa ministrá na Pablo den prizòn i pa atendé kualke otro nesesidat ku e por tin (Fil. 2:25). E tabata esun ku e filipensenan a konfia ku nan regalonan finansiero pa Pablo (Fil. 4:18). E ofrendanan akí tabata krítikamente importante pasobra kualke kuminda, paña, kama òf otro nesesidatnan ku e prezunan romano kisas por tabatin mester lo mester a ser kumprá riba nan mes gastu òf tresé pa nan dor di famia i amigunan (kompará Echonan 24:23). Serka di final di su di dos enkarselashon na Roma, Pablo a pidi Timoteo pa “hasi bo máksimo esfuerso pa bini promé ku wenter” i “trese e mantel” ku a keda na Troas (2 Tim. 4:21,13, NKJV). Aparentemente Pablo lo tabatin mester di e yas di lana diki akí den su sèl di piedra friu. Tabata tambe Epaphroditus ku a ser enkargá ku hiba e epístola akí bèk na Filipos (lesa Ellen G. White, The Acts of the Apostles, p. 479).
Kisas pa motibu di e problemanan na Filipos (wak Lès 4), Pablo “a konsiderá nesesario” pa manda Epaphroditus bèk mas lihé ku a antisipá, i asina ta urgi e filipensenan pa “yam’é bon biní den Señor ku gran goso” (Fil. 2:29, NIV). Pablo ke tin sigur ku nan no ta preokupá ku su mes situashon den prizòn. Tambe e ta enfatisá ku Epaphroditus ta e tipo di persona ku kristiannan mester tene den estima haltu, no pa motibu di nan rikesa òf státus sosial sino pa motibu di nan spiritu di sakrifisio ora na ta sigui e ehèmpel di Hesus (Fil. 2:6–11, 9,30; kompará Lukas 22:25–27). E palabra griego pa estima òf honor ta aparesé solamente algun biaha den Tèstamènt Nobo: pa e sirbidó di e senturion ku tabata “altamente balorá” (Lukas 7:2, NRSV), pa esnan ku ta ser mustrá honor dor di nan kolokashon na un fiesta (Lukas 14:8), i di Hesus komo e piedra di skina “presioso” (1 Pedro 6:4,6). Pa Epaphroditus ser inkluí den e grupo ei, e mester tabata, en bèrdat, un hòmber fiel.
“Esun ku ta para mas serka di Kristu lo ta esun ku riba tera a bebe mas profundamente di e spiritu di Su amor apnegá, amor ku ‘no ta gaba su mes, no ta arogante, . . . no ta buska su mes interes, no ta ser provoká fásilmente, no ta pensa maldat’ (1 Korintionan 13: 4,5), amor ku ta move e disipel, manera el a move nos Señor, pa duna tur, pa biba i traha i sakrifiká, asta te na morto, pa salbashon di humanidat. E spiritu akí a ser hasí manifesto den bida di Pablo. El a bisa: ‘Pa mi, biba ta Kristu;’ pasobra su bida a revelá Kristu na hende; ‘i muri ta ganashi,’ ganashi pa Kristu; morto mes lo a ser hasí manifesto e poder di Su grasia, i reuní almanan serka djE. ‘Kristu lo ser glorifiká den mi kurpa,’ el a bisa, ‘sea ta pa medio di bida of pa medio di morto.’ Filipensenan 1:21,20.”—Ellen G. White, The Desire of Ages, p. 549.
“E tempu no ta muchu leu ku e prueba lo bini pa kada alma. E marka di e bestia lo ser urgí riba nos. Esnan ku, paso pa paso, a entregá na demandanan mundano i a konformá ku kustumbernan mundano, lo no hañ’e un asuntu difísil pa entregá na e podernan ku ta, mas bien ku someté nan mes na bofon, insulto, menasá di enkarselashon, i morto....
“Ora multitutnan di rumannan falsu ta ser distinguí for di esnan berdadero, e ora ei esnan skondí lo ser revelá na bista, i ku hosananan nan ta bai marcha bou e bandera di Kristu. Esnan ku tabata tímido i deskonfiabel den nan mes lo deklará nan mes abiertamente pa Kristu i Su bèrdat. Esnan di mas débil i dudoso den e iglesia lo ta manera David: dispuesto pa hasi i riska. Mas profundo e anochi ta pa e pueblo di Dios, mas briante e streanan ta. Satanas lo molestiá e fielnan severamente; pero, den nòmber di Hesus, nan lo sali mas ku vensedor.”—Ellen G. White, Testimonies for the Church, tomo 5, p. 81,82.