Fil. 3:1-16; Rom. 2:25-29; Juan 9:1-39; Efe. 1:4,10; 1 Kor. 9:24-27
“Pa mi por konos’E i e poder di Su resurekshon, i e komunion di Su sufrimentunan, siendo konforme ku Su morto, si, di kualke manera, mi por alkansá e resurekshon for di morto” (Filipensenan 3:10-11, NKJV).
Tin algu tokante nos ku ta keda sospechoso tokante salbashon pa medio di fe so, aparte di e obranan di lei. Es desir, pa algun motibu, nos tur tin e tendensia di dependé riba nos obranan, komo si fuera nan por añadí na nos salbashon. Na un manera mas bien impreshonante, Pablo ta atendé ku e punto akí den un polémika vigoroso kontra esnan ku ta insistí ku sirkunsishon ta nesesario pa salbashon.
Pa evitá e posibilidat ku algun hende kisas por konsiderá nan obranan, manera sirkunsishon, komo kontribushon na nan salbashon, Pablo ta pone bon kla ku hustisia ta bini di Kristu komo un don ku ta bini pa medio di fe, no pa medio di lei. Aunke sirkunsishon kisas no ta un problema awendia, e prinsipio ku e ta trata kuné sigur ta.
E Reforme Protestant mes a kuminsá riba e asuntu akí mes: e ròl di fe i obra den e eksperensia di un siguidó di Kristu. Na final, Kristu ta tur kos pa nos, “e outor i kumplidó di nos fe” (Hebr. 12:2). Si nos prioridatnan ta na e lugá korekto, nos lo biba ku e siguransa di e amor di Dios i ta disfrutá di e promesa, asta awor, di salbashon, tur miéntras nos no ta pone “konfiansa den e karni” (Fil. 3:3).
Lesa Filipensenan 3:1-3. Ki nota positivo i negativo Pablo ta laga zona aki, i kon nan ta relashoná? Kon e ta deskribí kreyentenan?
Pablo ta kuminsá riba un nota masha positivo i kasi ta zona manera e ta terminando su karta. Pero e no ta kla. E ta bolbe na un di e temanan prinsipal di e epístola akí: regosihá den Señor. I e lo duna un kantidat di motibu pa esei aki. Mas importante ainda, nos mester tin konfiansa den Kristu, no den nos mes: “Nos ... ta regosihá den Kristu Hesus, i no tin konfiansa den e karni” (Fil. 3:3). Ken meimei di nos, di un manera òf otro, a siña na e manera difísil tokante no pone konfiansa den e karni?
E spièrtamentu fuerte “Warda boso” (tres biaha) no ta ser hañá niun otro kaminda den Skritura. Aparentemente, e filipensenan tabata sa masha bon na ki menasa Pablo tabata referí. Mas bien ku tres problema separá, e spièrtamentu ta parse di ta referí na un grupo di maestro falsu deskribí na tres diferente manera.
Hendenan malbado òf no-religioso den Israel tin biaha tabata ser referí na dje komo "kachó" (Fil. 3:2; kompará Salmo 22:16; Isa. 56:10; Mat. 7:6; 2 Pe. 2:21-22). Maestronan falsu tambe por ser deskribí apropiadamente komo “obreronan malbado.” Referiendo na nan komo “e mutilashon” (Fil. 3:2, NKJV) òf “esnan ku ta mutilá e karni” (ESV) ta mustra ku, manera na Galasia i otro lokalidatnan, nan tabata trata na imponé sirkunsishon riba kreyentenan pagano, kontrali na e sentensia di e Konsilio Apostóliko (lesa Echonan 15).
Ta interesante pa bisa ku ta parse ku un solushon pa desafionan spiritual, inkluyendo e plamamentu di siñansanan falsu, ta pa “regosihá den Señor” (Fil. 3:1; kompará ku Fil. 4:4).
Kualke kos ku nos ta regosihá di dje ta trese goso pa nos (manera na papiamentu, e dos palabranan griego pa e ideanan akí ta relashoná). Dios ke pa nos ta gososo, i Su Palabra ta un tipo di manual di instrukshon pa berdadero felisidat i goso duradero. Esakinan ta inkluí risibí e mizerikòrdia di Dios (Salmo 31:7); pone nos konfiansa den djE (Salmo 5:11); risibí e bendishonnan di salbashon (Salmo 9:14); adoptá e lei di Dios komo nos manera di biba (Salmo 119:14), inkluyendo e Sabat (Isa. 58:13-14); kere Su Palabra (Salmo 119:162); i lanta yunan piadoso (Prov. 23:24-25).
Bida por ta masha difísil pa nos tur, sin importá kon bon kosnan kisas por ta bai na e momentunan akí. Pero asta si nan no ta bai bon awor, ki kosnan bo por i mester regosihá p’e? Kiko ta strobabo di hasié?
Ta un eksperensia komun pa konversonan kristian pensa riba nan bida den términonan di promé ku nan a aseptá Hesus i despues, meskos ku Pablo ta hasi den Filipensenan 3. Sinembargo, ku òf sin rason, tin biaha nos ta papia di esnan ku no ta kristian komo “bon hende,” i, a lo ménos segun e normanan di mundu, hopi enbèrdat ta. Kontrali na esei, kompará ku e normanan di Dios, niun hende ta, ni sikiera kristiannan.
Den Filipensenan 3:4–6, Pablo ta mustra riba hopi kos den su bida di kua un tempu e tabata orguyoso. Kiko nan ta? Kon lo bo a deskribí e “bon kosnan” den bo mes bida (pasado i presente)?
Pablo ta hasi un kontraste implísito entre hudiunan kreyente ku ta plamando doktrina falsu i kreyentenan insirkunsidá ku ta dependé kompletamente riba Kristu pa nan salbashon i no ta pone konfiansa den simpel obranan humano manera sirkumsishon (lesa Hebr. 6:1, Hebr. 9:14; kompará Rom. 2:25–29). Aunke Pablo su bida di pasado i prosedensia lo tabata bastante impreshonante pa su kompañeronan hudiu, ningun di e kosnan akí a kontribuí na su salbashon. De echo, en realidat nan a strob’é pasobra nan a sieg’é pa un tempu pa su nesesidat di Kristu.
Pablo no tabata djis sirkunsidá, e tabata un “di ocho dia,” loke ta nifiká ku e, un israelita di nasementu i ta pertenesé na e pueblo di pakto, a ser sirkunsidá riba e di ocho dia. Ademas, e tabata di e tribu di Benjamin, kende su teritorio tabata inkluí algun di e statnan di mas importante di Israel. Pablo no solamente tabata sa hebreo sino, komo un studiante di Gamaliel e Ansiano (Echonan 22:3, Echonan 26:4-5) i un fariseo, e lo tabata saturá den konosementu di e lei i kon e tabata, a lo ménos segun tradishon, ser apliká.
Pablo tabata asina zeloso pa e lei ku el a persiguí e iglesia pa motibu di su supuesto menasa pa e manera di biba hudiu, ku e tabata kere ku e lei a preskribí. Interesantemente, aunke “sin kulpa” den términonan di e “hustisia” ei, originá di hende, Pablo a realisá ku e lei tabata en realidat muchu mas profundo i mas eksigente ku e por a imaginá, i ku sin Kristu e tabata para su dilanti kondená.
Kompará Romanonan 7:7-12 ku Mateo 5:21-22,27,28. Ki punto krusial tantu Hesus komo Pablo ta plantia tokante e lei, i dikon “fe den Kristu” (Fil. 3:9, NKJV), mas bien ku e lei, ta e úniko fuente di hustisia? Wak e di e manera akí: Kon bon bo ta warda e lei, a lo ménos na e manera ku Hesus a bisa ku nos mester ward’é?
Manera e estudio di ayera a señalá, e kosnan ku anteriormente tabata hasi Pablo orguyoso tabata en realidat opstákulonan pa fe pasobra nan a sieg’é pa su nesesidat di Kristu. Pablo ta usa e lenguahe di komersio, ganashi i pèrdida, pa deskribí su kontabilidat spiritual promé ku fe. Aunke nos no gusta pensa muchu riba dje, kada ser humano tin un “kontabilidat spiritual.” Anteriormente, Pablo su kontabilidat tabata ser midí pa medio di e balornan hudiu di e tempu ei mas bien ku e balornan bíbliko manera Hesus a siña.
Despues di su kombershon, su kontabilidat spiritual tabata mustra masha diferente pasobra su eskala di balornan a kambia dramátikamente, for di e “valuta” di hudaismo pa e “valuta di shelu.”
“Esun ku a baha for di shelu por papia di shelu, i presentá korektamente e kosnan ku ta forma e valuta di shelu, riba kua el a stèmpel su imágen i superskripshon. E konosé e peliger den kua esnan ta poné ku el a bini pa lanta for di degradashon, i pa halsa na un lugá banda di dje mes riba su trono. E ta indiká nan peliger di otorgá afekto riba ophetonan inútil i peligroso. E ta trata na hala e mente for di loke ta terenal na esun selestial, pa nos no pèrdè tempu, talento i oportunidat, riba kosnan ku ta puru banidat."—Ellen G. White, den The Advent Review and Sabbath Herald, 1 di yüli 1890.
Den e mundu di hudaismo di promé siglo, Pablo tabata un strea ku tabata subi rápidamente te ora ku, dor di bira siegu na e bista di e Hesus glorifiká riba e kaminda di Damasko (Echonan 9), su bista spiritual a ser koregí, i el a mira klaramente.
Juan 9 ta konta e storia di un otro hòmber ku tabata siegu i despues a mira Hesus klaramente. Hesus a bisa ku El a bini na mundu pa “esnan ku no ta mira por mira, i pa esnan ku ta mira por ser hasí siegu” (Juan 9:39, NKJV). Kon e prinsipio akí kisas por ser apliká na bo mes bida?
Pablo su punto prinsipal no mester ser pasá por alto. Tabatin un interkambio maravioso ku el a eksperensiá riba e kaminda di Damasko, interkambiando su bida bieu, basá riba lei, pa e presensia di Kristu Mes, "pa mi por gana Kristu i ser hañá den djE" (Fil. 3:8-9, NKJV).
Pa ser hañá “den djE,” esta, den Kristu, ta un ekspreshon interesante. Lesa Efesionan 1:4, 2 Korintionan 5:21, Kolosensenan 2:9 i Galationan 2:20. Basá riba e pasashinan akí, kiko bo ta kere ku Pablo ke men ku e idea akí?
E referensia di Pablo di ta den Kristu a ser diskutí ampliamente. No ta un sorpresa ku kisas e mihó splikashon di dje ta bini di Pablo mes: “Pa den e dispensashon di e plenitut di e tempunan E lo por reuní huntu tur kos den Kristu, tantu loke ta den shelu komo loke ta riba tera, den djE” (Efe. 1:10, NKJV). Esei tabata e propósito di Dios for di komienso. I Pablo ta splika kla kon esei ta sosodé: “Boso ta den Kristu Hesus, kende a bira pa nos sabiduria di Dios, i hustisia, santifikashon i redenshon” (1 Kor. 1:30, NKJV).
Ser “den Kristu” ta inkluí tur loke e plan di salbashon ta enserá, for di e salida di nos inteligensia spiritual (sabiduria), te na hustifikashon pa medio di fe (hustisia), te na preparashon pa shelu (santifikashon), i finalmente na glorifikashon na e Segundo Atvènt (redenshon). Salbashon ta e obra di Kristu di komienso te final, pa nos i den nos. Pues, dor di gana Kristu, nos tin tur loke nos mester.
Lesa Filipensenan 3:9. Kua dos kos Pablo ta kompará, i dikon ta importante pa semper kòrda e kontraste akí?
Manera Pablo a bin realisá, tin bo “propio hustisia” no ta hustisia real pasobra e lei no por duna bida (lesa Gal. 3:21-22); solamente Kristu por, pa medio di fe. I no djis kualke fe. Despues di tur kos, e diabelnan ta kere i ta tembla (Santiago 2:19). E úniko fe salbador ta “e fe di Kristu.” Solamente Su fe a obedesé kompletamente i por obedesé. (E palabra griego pa fe, pistis, tambe ta nifiká fieldat.) Asina, si nos ta den Kristu i E ta biba den nos (Gal. 2:20), e ora ei nos ta biba pa medio di Su fe atraves di nos fe den djE.
Lesa Filipensenan 3:10-16. Kua ta algun di e puntonan prinsipal ku Pablo ta trese dilanti den e pasashi akí?
Siguramente no tin nada mas importante ku konosé Kristu, loke ta garantisá na final ku E lo konosé nos i rekonosé nos dilanti di e Tata (lesa Mat. 7:21-23; Mat. 10:32-33). Kon nos por konos’E? Pa medio di Su Palabra Skirbí, lesando esaki i bibando esaki. Nos no por konos’E kara kara manera e disipelnan a hasi. Pero interesantemente, apesar di e konosementu ei, ainda nan a faya di komprondé Su palabranan, suprayando nos nesesidat di Spiritu Santu pa guia nos (lesa Juan 16:13). Mas nos konos’E, mas serka nos ta yega serka djE, pasobra nos ta eksperensiá “e poder di Su resurekshon” (Fil. 3:10), ku ta lanta nos na “nobedat di bida” (Rom. 6:4, NKJV).
Un otro manera ku nos ta yega mas serka di Hesus ta pa medio di “e komunion di Su sufrimentunan” (Fil. 3:10, NKJV). Kada prueba enfrentá, kada eksperensia doloroso soportá, ta yuda nos konosé i apresiá mas loke Hesus a pasa aden pa nos, i tambe komprondé E i Su boluntat mas klaramente.
Un di tres manera ku nos ta yega mas serka ta dor di kontinuá padilanti “direkshon di e meta” (Fil. 3:14, NKJV). Kiko e meta ei ta? E ta tradusí un palabra ku ta ser usá solamente aki den Tèstamènt Nobo (skopos). E ta referí na e liña final di un kareda i e premio ku ta ser otorgá na e vensedó. Pablo ta yam’é “e premio di e yamada selestial di Dios den Kristu Hesus” (Fil. 3:14, NKJV). Meskos ku Kristu, pa medio di Su morto i resurekshon, a subi na shelu, Dios ta invitá nos pa risibí e mesun rekompensa selestial, bida eterno.
Opviamente, nos no a logra esei ainda. Nos lo no ser perfekshoná den e sentido mas kompletu te ora nos "kurpa humilde" ser transformá "pa e por ser konformá na Su kurpa glorioso" (Fil. 3:21, NKJV). Pero dor di konos’E i invitá Su presensia den nos bida tur dia, nos ta kontinuá direkshon di e meta di ta meskos ku Hesus den tur manera posibel awor. Esaki ta e “un kos” ku Pablo a enfoká riba dje tambe. Meskos ku kore un kareda (lesa 1 Kor. 9:24-27), nos no ta paga atenshon unda nos tabata òf ken ta sigui nos. Nos úniko enfoke ta riba e kosnan ku ta nos dilanti, e premio selestial ei ku ta warda nos. E imágen aki ta bibu: un koredó su enfoke kompletu riba e meta, esforsando kada múskulo i inklinando padilanti pa yega e liña final.
Dikon, den bo kaminata ku Señor, ta asina importante pa no keda wak patras, a lo ménos bèk na bo piká- i frakasonan, sino en kambio wak dilanti na loke bo a ser primintí awor akí den Kristu?
"Esun ku ke konstruí un karakter fuerte, simétriko, esun ku ke ta un kristian bon balansá, mester duna tur i hasi tur kos pa Kristu; pasobra e Redentor lo no aseptá servisio dividí. Diariamente e mester siña e nifikashon di sumishon propio. E mester studia e palabra di Dios, siñando su nifikashon i obedesiendo su preseptonan. Asina e por alkansá e norma di ekselensia kristian. Dia pa dia Dios ta traha kuné, perfekshonando e karakter ku mester para den tempu di prueba final. I dia pa dia e kreyente ta trahando dilanti di hende i angelnan un eksperimento sublime, mustrando kiko e evangelio por hasi pa sernan humano kaí."--Ellen G. White, The Acts of the Apostles, p. 483.
“Esnan ku ta warda e binida di e Brùidehòm mester bisa e pueblo: ‘Ata boso Dios.’ E último rayonan di lus mizerikòrdioso, e último mensahe di mizerikòrdia ku mester ser duná na mundu, ta un revelashon di Su karakter di amor. E yunan di Dios mester manifestá Su gloria. Den nan propio bida i karakter nan mester revelá loke e grasia di Dios a hasi pa nan.
“E lus di e Solo di Hustisia mester bria den bon obranan, den palabranan di bèrdat i echonan di santidat.”--Ellen G. White, Christ’s Object Lessons, p. 415, 416.