Kon lo bo deskribí bo relashon ku Dios awe? E ta vibrante i fuerte? Bo ta pasa tempu invertiendo den e relashon akí, skrudiñando Su Palabra inspirá, i papiando kunE komo un Amigu? Si ta asina, kuantu tempu bo ta pasa hasiendo esei? Ademas, bo ta sinti deseo di kompartí ku otronan tokante bo relashon ku Dios pasobra e ta e relashon di mas maravioso den bo bida? Of, en kambio, bo relashon ku Dios a mengua ku tempu? E t’ei, sí, i bo ta mèldu de bes en kuando, pero pa ta honesto, e no ta dje fuerte ei mas. Of, kisas, bo ta un kaminda meimei, loke Beibel ta yama “lou” (Rev. 3:16).
Bo a yega di puntra bo mes si angelnan ta puntra nan mes dikon nos no ta biba den adorashon di nos Salbador i Redentor, ku kurasonnan ku hamber i mentenan ansioso pa yega mas serka di Dios tur dia? Pero, di bèrdat, un relashon ku Dios ta kambia tur kos, tantu aki komo den eternidat.
E siman akí, laga nos konsiderá e estado aktual di nos relashon ku Dios i kiko e konseho di Beibel ta pa nos. En bèrdat, nos no por move di unda nos ta pa un lugá mihó te ora nos hasi un verifikashon di realidat honesto di nos mes i skucha e solushon ku Hesus ta deskribí.
Bo a yega di puntra bo mes kiko Hesus lo por a bisa si E mester a deskribí bo relashon kunE awor akí? Kisas E lo bisa ku e ta fuerte, òf ku e tabata mas fuerte den pasado. Bo a yega di puntra bo mes kiko Hesus por a bisa kisas si E mester a deskribí Su pueblo den e último dianan akí? Den Revelashon 3:14-22, Hesus realmente ta deskribí esaki.
E ta kuminsá dor di deklará ku E ta e “Testigu Fiel i Berdadero, e Prinsipio di e kreashon di Dios” (Rev. 3:14, NKJV). Un testigu fiel i berdadero no ta gaña, sino ta papia di forma kla i honesto.
Lesa Revelashon 3:14-17, kaminda Hesus ta deskribí e kondishon spiritual di Su pueblo awe. Kon bon e tekstonan akí ta deskribí abo personalmente?
Hesus ta bisa nos, individuonan kristian ku ta biba den e último dianan, ku E konosé nos. Nos ta ni kayente ni friu, pasobra, for di nos punto di bista, nos no tin mester di nada. Dia- i simannan ta pasa, i nos ta pasa un tiki tempu ku Dios aki i aya, i nos ta kere ku esei ta sufisiente. Pero e no ta. En bes di esei, realmente nos tin mester di djE muchu mas desesperadamente ku nos ta realisá. Si solamente nos por a stima i biba pa Hesus di henter nos kurason òf apsolutamente nada. Esei lo tabata mihó, for di e perspektiva di Dios, ku ta lou. Hesus ta bisa ku E lo skupi nos for di Su boka pasobra nos ta smak mes malu ku nos ta. Pero E no a hasi esaki ainda, i E ta pidi nos pa hasi algun eskoho oudas awor akí.
Kiko ta Su konseho na nos den Revelashon 3:18-19?
Den tempunan antiguo, “kumpra” algu a nifiká troka òf interkambiá biennan. Aki, generosamente Hesus ta ofresé un interkambio: nos apatia pa Su oro, pa Su bistinan blanku, i pa Su ungwento pa wowo. E ke hasi nos riku den Su bista; E ke kubri nos ku Su mantel di hustisia perfekto; i E ke habri nos wowonan pa mira e bèrdat di kon un relashon permanente kunE lo kambia apsolutamente tur kos. E ta ofresé nos tur loke nos tin mester, spesialmente pasobra loke nos tin mester, nos no por proveé pa nos mes. E so por, i lo hasié, pero solamente si nos ta dispuesto.
“Tur ku Mi ta stima, Mi ta reprendé i kastigá,” Hesus ta bisa nos den Revelashon 3:19. “P’esei sea zeloso i arepentí” (NKJV). Ningun di nos, ni pa un momentu, ku rason, por a bisa ku Hesus no ta preokupá pa nos òf pa nos futuro. Kuantu mas fásil lo tabata pa Hesus entregá riba humanidat i no biaha e kaminda doloroso ku El a skohe riba e tera akí. Ta hustamente pasobra E ta stima nos asina profundamente E ta reprendé nos den nos estado aktual. E ke un relashon muchu mas fuerte i profundo ku nos. E no ta satisfecho ku nos aktitutnan ku ta kambia, nos aserkamentu di “Lo mi bin serka djE ora mi tin mester di djE”.
Na lugá di esei, Hesus ta reprendé nos pa nos mes bon. E ta bisa nos pa arepentí. Pero nos no por arepentí a ménos ku nos realisá ku tin algu robes. Tòg El a bisa nos eksaktamente kiko ta pasando ku nos: nos ta kere ku nos ta riku, pero en realidat nos ta “deplorabel, miserabel, pober, siegu i sunú” (Rev. 3:17, NKJV).
Lesa Revelashon 3:20. Kiko nos ta ser primintí aki? Pero kiko nos tin ku hasi pa risibí e promesa ei?
Esaki ta un kuadro di palabra asina bunita i ekstraordinario. E Dios di universo ke sinta kome ku bo, ku mi. E ta deseá kompromiso mutuo i kombersashon riba bon kuminda. E ke un relashon estrecho i duradero, i Hesus ta invitá nos pa nos tin esaki kunE.
Hesus ta para ku pasenshi ta warda i ta bati na porta di bo kurason. Kisas bo a yega di mira potrètnan di esaki den bukinan di mucha: un Salbador haltu i yen di grasia, ta bati suavemente. E no ta drenta i fòrsabo pa papia kunE. E no ta imponé riba bo tempu òf bo bida okupá. Tempu ta kòrtiku, pues, si bo tend’E, habri e porta. E lo t’ei pa drenta den bo bida.
E metáfora akí ta ilustrá e tipo di relashon ku Hesus ke tin ku kada un di nos. Pero un dia, ora bo topa Hesus kara kara, ora bo tira bo korona na Su pia den adorashon i alabansa huntu ku míles riba diesmil di otronan den adorashon na e Kreador (Rev. 4:9–11, Rev. 5:11–14), ora bo pensa bèk riba bo pruebanan terenal i mira ku nan ta bira vago di insignifikansia, bo ta kere ku na e momentu ei lo bo lamentá e tempu ku bo a pasa ku Hesus riba tera?
Despues di a deskribí nos kondishon apátiko, Hesus ta bisa nos ku esaki ta algu ku nos mester vense. “Esun ku vense, lo Mi permití pa sinta huntu ku Mi riba Mi trono, manera Ami tambe a vense i a sinta huntu ku Mi Tata riba Su trono” (Rev. 3:21, NKJV). Pa algun di nos, e por ta e bataya di mas grandi ku nos lo yega di enfrentá: simplemente realisando nos kondishon débil i outosufisiente; aseptando e reprendementu di Hesus; arepentí; i risibí E mantel di hustisia di Hesus riba nos.
Loke ta asina asombroso ta ku Hesus ta komprondé nos kondishon apátiko i lou i ta identifiká ku nos (no ku Hesus hamas tabata lou). E ta bisa: “Na esun ku vense ... manera Ami tambe a vense” (Rev. 3:21, NKJV). Pasobra El a muri pa salba nos, Hesus a vense piká i su kastigu. E ta komprondé e batayanan di piká ku nos ta enfrentá i ta primintí di yuda nos.
Hopi hende den Beibel a respondé riba e invitashon di Dios pa ta den un relashon di pakto kunE. Esaki ta e narativo òf tema general di henter Beibel. Ora nos wak algun di e hendenan akí, nos por mira ku Dios a interaktuá di forma diferente ku nan na diferente momentu.
Kiko e relatonan akí ta siña nos tokante kon Dios ta interaktuá ku hende den vários situashon?
Sea ku Dios a kana ku Su yunan físikamente, òf sea ku El a djis papia ku nan, e bèrdat ta ku semper E tabata deseá di ta serka di humanidat. No ta importá kon bo relashon ku Dios ta awe, Dios ke ta serka di bo. Nos por lesa tokante e idea akí den Jeremias 31:3-4: “SEÑOR a aparesé na mi for di hopi tempu pasá, bisando: ‘Sí, Mi a stimabo ku un amor eterno, p’esei, ku mizerikòrdia Mi a halabo. Atrobe lo Mi trahabo, i lo bo ser trahá di nobo' ” (NKJV).
Sea bo dia ta kuminsando òf ta kabando awor akí, Dios ta buskando bo i ta wardando, i E ke halabo mas serka di djE. E ke konstruí, òf rekonstruí, bo relashon kunE. Si e no ta pasando, e kulpa ta di bo parti, no di djE.
E disipelnan a sigui Hesus i baha e trapi for di e kamber ariba bai den e kaya abou. Segun ku nan tabata kana huntu pa Getsémani, riba loke tabata un di e anochinan mas signifikante den historia di tera, probablemente nan no a realisá kon konmovedor algun di e último palabranan di Hesus na nan den e Kamber Ariba tabata realmente.
Kiko Hesus a bisa den Juan 15:1-11? Kiko esaki ta nifiká pa nos?
E palabranan akí, papia dor di Hesus Mes, ta deskribí kon un relashon estrecho ku Dios ta. Tuma nota di e palabra ku ta ser ripití, no solamente dos biaha sino 10 biaha: keda. Keda den Hesus ta nifiká biba den konekshon kunE.
Segun ku E ta enfrentá e Krus, no solamente Hesus ta enfatisá e gran importansia di e permanensia akí den djE, sino E ta deklará di forma kla i simpel e aspekto práktiko di kon e ta mustra den nos bida.
Kua ta: Hesus ta e mata di wendrùif, nos ta e ramanan. Komo resultado di nos permanensia kunE (ta konektá na djE), fruta lo krese na nos ramanan. Nos mes no por pone fruta spiritual krese. Tin biaha nos por parse manera nos ta permanesé, pero e evidensia lo ta den nos falta di fruta, i finalmente nos ramanan lo seka. Si nos ta marchitá, e Kunukero lo kòrta e ramanan kita finalmente. Sin importá si nos ta duna fruta òf nò, nos ramanan lo ser isnui.
Na mes momento, nos tur ta enfrentá retonan i momentunan doloroso. Si nos keda den djE, e momentunan akí lo produsí mas fruta riba plaso largu. Dunamentu di fruta ta konfirmá ken nos ta (disipelnan). Nos ta duna fruta pa trese gloria na djE (no nos mes). Keda den Hesus ta nifiká warda Su mandamentunan, ku ta un refleho di Su karakter bunita di amor apnegá. Keda den Hesus ta trese gran goso. Keda den Hesus ta nifiká hasi loke E ta pidi di nos, komo un kontesta na djE. “Pasobra esaki ta e amor di Dios, ku nos ta warda Su mandamentunan, i Su mandamentunan no ta pisá” (1 Juan 5:3, NKJV).
Si bo pensa riba dje, keda den Hesus ta un di e antídotonan pa nos kondishon laodisense (Rev. 3:20, Juan 15:4). E ta e gran sekreto di un bida kumplí i signifikante riba tera i den eternidat; tòg, di un manera òf otro, nos ta lubidá e konseho di Hesus asina fásil.
Finalmente, Hesus ta bisa kada un di nos: “Manera e Tata a stima Mi, Ami tambe a stima boso; keda den Mi amor” (Juan 15:9, NKJV). E amor di Hesus ta e kuèrdè di mas iresistibel ku ta hala nos na djE, i ora nos konosé e amor akí, nos lo ta profundamente konmoví pa respondé ku amor na Dios i na otronan.
Keda den Kristu tin biaha por sinti manera un di e kosnan di mas difísil pa hasi. Nos por sa ku e ta loke nos mester, pero e hansha di bida ta hala nos bai den su koriente, i tur kos ta sinti muchu difísil. Sigui Dios por parse manera e karga di mas grandi di tur tempu, spesialmente pa esnan ku ta ser molestiá pa un hende ku ta purba pone nan sigui Hesus. E tipo di religion akí por sinti manera un trabou penoso pasobra ta trata di akshonnan eksterno mas bien ku loke tin den e kurason. Nada por ta mas leu for di loke Dios ta deseá, ku ta un relashon ku su fundeshi ta amor mutuo, no djis reglanan; un relashon skohí (den kua El a skohebo promé) basá riba amor i eskoho liber.
Tin biaha nos por ta parsialmente konektá ku e Mata di wendrùif pero no realmente ta kedando ku kada fibra di nos ser. Nos por ta bai iglesia, hasi orashon i hasi loke nos sa ku ta korekto, pero paden nos ta sinti nos mes pashimá. E bèrdat ta esaki: Nos no por pone nos mes keda den Hesus mas ku un rama por hasi su mes konektá na un mata di wendrùif. Dios a stima nos promé; El a hasi e promé moveshon. Nos kontesta semper ta un reakshon riba loke Dios a hasi promé pa nos.
Si bo, miéntrastantu, wak kon un mata di wendrùif ta sobrebibí durante wenter, lo bo siña un echo fasinante: e brotenan riba e ramanan ta bira deshidratá i isolá for di e sistema di kresementu te na lènte. Ora e tera keinta, e raisnan ta apsorbé awa, i baba ta kore bai ariba atraves di e tronkon di e mata di wendrùif, bai den e brotenan i despues kresementu ta kuminsá. Sin e baba ku ta kore dor di e mata di wendrùif, lo no tin kresementu.
E baba den un mata di wendrùif ta meskos ku e obra di Spiritu Santu den nos bida. Nos por ta meskos ku un rama morto, pero ora nos skohe pa pasa tempu ku Dios, Spiritu Santu ta drenta den nos meskos ku e baba for di e raisnan i ta trese nos na bida pa asina nos kuminsá krese. Di mes manera ku nos mester hasi un eskoho konsiente pa ke keda den Hesus, nos mester pidi tambe pa Spiritu Santu (e baba) kore den nos bida.
Lesa Lukas 11:13 huntu ku Jeremias 31:3, 1 Juan 4:19 i Romanonan 8:9-11. Kiko ta e mensahe esensial aki pa nos?
Promé ku nos a nase, Dios a stima nos; E tabatin un plan pa konosé nos i pa nos konos’E. E ta buska nos, meskos ku un bon Wardadó, i ta invitá nos pa keda den djE tur dia. Nos mester djis skohe pa respondé na djE, i despues pa interkambiá nos mizeria i nos kondishon laodisense pa Su bon donnan (lesa Rev. 3:18-19).
Meskos ku e kresementu slow di e ramanan di un mata di wendrùif, nos relashon ku Dios por krese slow, òf e lo por bini den ráfaganan komo resultado di áwaseru ku ta masha nesesario. Sin importá e ritmo riba kua nos ta krese i e abundansia di fruta ku ta ser produsí den nos bida, nos mester di “baba” diario, òf Spiritu Santu, pa sigurá ku nos ta keda konektá ku Hesus. “Keda den Kristu ta nifiká un resepshon konstante di Su Spiritu, un bida di entrega sin reserva na Su sirbishi. E kanal di komunikashon mester ta habrí kontinuamente entre hende i su Dios. Manera e rama di mata di wendrùif konstantemente ta saka e baba for di e mata di wendrùif bibu, asina nos mester pega na Hesus, i risibí di djE, pa medio di fe, e forsa i perfekshon di Su propio karakter.”—Ellen G. White, The Desire of Ages, p. 676. “Kon e palu yòn seku deskonektá por bira un ku e mata di wendrùif mayor? Kon e ta ser hasí un partisipante di e bida i nutrishon di e mata di wendrùif bibu? Solamente dor di ser di ènter den e mata di wendrùif, dor di ser tresé den e relashon di mas estrecho posibel. Fibra pa fibra, vena pa vena, e taki ta tene duru na e mata di wendrùif ku ta duna bida te ora ku e bida di e mata di wendrùif bira un ku e rama, i e rama ta produsí fruta meskos ku esun di e mata di wendrùif.”—Ellen G. White, manuscript 67, 1897.