Sea bo a lanta un Atventista di e di Shete Dia òf bo ta nobo den e fe; sea bo a lesa hopi òf poko Guia di Estudio di Beibel di Sabat Skol di Adulto; i, finalmente, no ta importá unda bo ta haña bo mes spiritualmente awe, e tópiko di kon krese den un relashon signifikante ku Dios ta krusial.
E tópiko akí ta afektá tur otro. Bo imágen di Dios por a bira kontaminá òf skur; si ta asina, hasi orashon pa mas klaridat segun ku bo ta studia. Bo por ta puntrando bo mes kon refreská bo bida deboshonal (orashon i estudio di Beibel), òf bo por ta pensando riba otro áreanan ku ta impaktá bo relashon ku Dios, manera e ròl di orguyo i humildat, fe i konosementu, piká i e lei di Dios, arepentimentu i pordon, kon superá baluartenan i kontratempu, i kon enkurashá otronan den nan kaminata ku Dios.
Bo relashon ku Dios ta bo relashon di mas importante. No tarda pa konstruí esaki, pa fortifik’é, pa hasié mes fuerte ku por. Awor, no un momento den futuro, ta e momentu pa traha riba e relashon akí, ku lo impaktá tur otro kos: bo matrimonio (si ta aplikabel), bo kriansa di yu (si ta aplikabel), bo amistatnan, bo desishonnan finansiero, bo tempu liber, bo aspirashonnan, i, naturalmente, bo futuro eterno.
Pa motibu ku e tópiko akí, esun di e deseo di Dios pa ta den un relashon ku humanidat, ta abarká henter Beibel, tin hopi diferente ángulo, storia i pasashi di Beibel ku por a ser skohé pa siña e tópiko importante akí. Mirando e naturalesa di e Guia di Estudio di Beibel pa Adulto, nos por sigui solamente un kantidat limitá.
Kon ku bo relashon ku Dios ta awe, e lèsnan akí ta skirbí ku bo den mente. Finalmente, e deseo ta ku e 13 lèsnan kòrtiku i enfoká akí lo bolbe spièrta bo amor i kompromiso ku Hesu-Kristu segun ku bo ta busk’E di nobo e kuartal akí.
Pa motibu ku e naturalesa di e tópiko akí ta tokante relashonnan, e Guia di Estudio di Beibel di Sabat Skol di Adulto akí ta skirbí un tiki diferente for di esnan anterior. E lèsnan ta skirbí den un estilo mas personal pasobra nan ta tokante un Dios personal ku ke konosébo personalmente.
Ellen G. White ta bisa ku “un bida konsistente den Kristu ta un gran milager.”—The Desire of Ages, p. 407. Beibel ta usa e metáfora di un kareda pa deskribí e biahe di bida ku Dios. Nos rekompensa ta un korona imperesibel (1 Kor. 9:24,25) i bida eterno huntu ku nos Dios. Nos kareda spiritual ta un maratòn, no un sprint. Por tin biahanan ku nos ta stòp di kore òf asta kai plat riba nos kara. E ta sosodé, i ora e sosodé, nos ta djis lanta i sigui move. Nos mester keda riba e rumbo, apesar di pruebanan i difikultatnan ku inevitablemente ta bini (Hebr. 12:4–11). I nos no ta kore e kareda akí nos so; otro koredónan ku ta stima Hesus i Su Palabra ta kore huntu ku nos. Mas importante ainda, Hesus a primintí di duna nos e Yudadó. “I lo mi pidi e Tata, i E lo duna boso un otro Yudadó, pa E por keda ku boso pa semper, e Spiritu di bèrdat, kende mundu no por risibí, pasobra e no ta mir’E ni konos’E; ma boso konos’E, pasobra E ta biba serka boso i lo ta den boso” (Juan 14:16,17, NKJV).
Nos no ta kore e kareda di bida nos so, e Yudadó no ta solamente huntu ku nos sino ta biba den nos pa asina fortalesé i sostené nos segun ku nos ta kore i segun ku nos ta fiha nos bista riba “Hesus, e pionero i perfekshonadó di nos fe” (Hebr. 12:2, NET).
Miéntras mi ta skirbi, mi ta hasi orashon pa Spiritu Santu move riba nos individualmente i komo un iglesia mundial pa hala nos mas serka di Dios ku nunka promé. Pasobra siguramente no por tin nada mas importante ku tin un relashon fuerte ku Dios.
Pues, laga nos studia huntu, pa siña, pa stima, i pa keda den djE.