Tin un komprondementu kla di e karakter di Dios ta fundamental pa bo tin un relashon fuerte kunE. Ta p’esei, e siman akí, nos lo wak kuidadosamente kiko Beibel ta bisa tokante e karakter di Dios, teniendo den mente ku “ta e skuridat di mal komprondementu di Dios ku ta envolví mundu. Hende ta pèrdiendo nan konosementu di Su karakter. El a ser mal komprondé i mal interpretá. Na e tempu akí un mensahe di Dios mester ser proklamá, un mensahe iluminante den su influensia i salbador den su poder. Su karakter mester ser hasí konosí. Den e skuridat di mundu e lus di Su gloria mester ser tirá, e lus di Su bondat, mizerikòrdia, i bèrdat ... E último mensahe di mizerikòrdia ku mester ser duná na mundu, ta un revelashon di Su karakter di amor.”—Ellen G. White, Christ’s Object Lessons, p. 415.
Ta parse imposibel pa deskribí Dios adekuadamente, i pues, lo mas ku nos por hasi ta mustra riba loke Beibel ta bisa tokante djE. Aunke nunka nos lo sa, spesialmente awor, tur loke tin pa sa tokante e karakter maravioso di Dios, laga nos hasi orashon pa, segun ku nos ta siña mas tokante djE, nos komprondementu i amor p’E lo profundisá, di manera ku, finalmente, nos lo ke krese yega mas serka di djE pa asina reflehá Su amor i karakter na otronan.
Beibel ta duna e imágen di mas berdadero, di mas kla i di mas konsistente di Dios. Henter Beibel ta trata na kita e velo invisibel entre nos mundu visibel i loke ta invisibel; pa mustra nos di unda nos a bin i unda nos ta bai; i, finalmente, pa mustra nos ken ta den kontrol i kon E ta.
For di Génesis te Revelashon, nos ta lesa tokante e úniko Dios berdadero, kende ta hasi Su mes konosí na nos pa medio di Beibel i atraves di Hesu-Kristu, Dios enkarná. Nos por lesa tokante e omnipotensia di Dios (Job 1:12), Su omnisiensia, Su naturalesa omnisapiente (Isa. 46:9-10), Su hustisia (Isa. 30:18), Su mizerikòrdia (Deut. 7:9), Su bondat amoroso i pasenshi ku nos (Rom. 2:4), Su sabiduria (1 Kor. 2:7), Su grasia (2 Kor. 12:9), Su pordon (Mat. 6:14), Su boluntat pa nos bida (Jer. 29:11), Su poder pa derotá morto (Juan 11:25), Su monarkia (Salmo 47:8), Su naturalesa eterno (Deut. 33:27), i hopi otro karakterístika ku ta duna nos motibunan abundante pa stima i tin un relashon permanente kuné. Mas nos sa tokante Dios i kon E ta, mas nos lo stim’E i ta deseá un relashon estrecho i duradero kunE.
Tabata Lucifer ku a duda promé den e karakter di Dios. Su dudanan tokante ken Dios ta a hiba finalmente na e bataya di mas grandi den historia di nos universo. Desde e tempu ei, “ta Satanas su estudio konstante pa tene mente di hende okupá ku e kosnan ei ku lo stroba nan di optené e konosementu di Dios.”— Ellen G. White, Testimonies for the Church, tomo 5, p. 740. Satanas no tin kunes ki tipo di imágen di Dios nos tin (panteismo, deismo, politeismo, etc.), basta e no ta unu korekto.
Lesa Génesis 3:1-5. Kiko tabata e meta di Satanas den su kombersashon ku Eva? Ki mentiranan el a bisa Eva tokante e karakter di Dios?
Finalmente, e mensahe di Satanas na Eva tabata esaki: Dios tin sekretonan pa bo. Dios no ke loke ta mihó pa bo. Bo no por konfi’E. Ellen White ta amplia riba esaki ora e ta bisa: “For di e apertura di e gran konflikto tabata propósito di Satanas pa mal representá e karakter di Dios i pa aktivá rebelion kontra Su lei.”—Patriarchs and Prophets, p. 338.
Santidat no ta un palabra ku mayoria hende ta usa hopi biaha den nan lenguahe di tur dia, kisas pasobra tin asina tiki kos santu rònt di nos i tokante nos. Sabat ta un dia santu den tempu, i Dios ta, naturalmente, santu. Aparte di Dios, nos bida diario, pa gran parti, ta falta santidat.
Si bo hasi un estudio den e atributonan ku mas tantu biaha ta asosiá ku e karakter di Dios, lo bo deskubrí ku santidat ta na sènter di ken Dios ta. Pero kiko esei ta nifiká?
Kon e siguiente pasashinan ta deskribí Dios: Levítiko 20:26, 1 Samuel 2:2, Isaias 57:15, i Ezekiel 38:23?
Ora Beibel ta deskribí Dios komo e personifikashon di santidat, e ta nifiká ku E ta kompletamente bashí di i kompletamente separá for di maldat i piká. Dios ta 100 porshento bon, di kuminsamentu te final. Den e sentido akí, e santidat di Dios ta sentral na tur Su otro atributonan.
Por ehèmpel, e amor di Dios ta un amor puru i santu, un amor ku ta kompletamente liber di tur egoismo i motibunan egoista. Su omnisiensia (E sa tur kos) ta omnisiensia santu, loke ta nifiká ku e ta liber di intenshonnan malu. Lo bo a konfia un Dios omnisiente si E no tabata santu? Naturalmente ku nò! En kambio, nos lo tabatin miedu di djE, i ku rason.
Dios su omnipotensia (siendo todopoderoso) ta omnipotensia santu. Imaginá bo un Dios ku ta omnipotente pero no santu. E por tabata un tirano poderoso i malbado. Solamente e santidat di Dios ta permití i ta kapasitá nos pa stim’E di bèrdat, pasobra E ta bon, di kuminsamentu te fin. Esaki ta e motibu pakiko santidat ta kisas e karakterístika di mas importante pa komprondé tokante e karakter di Dios. Tòg, kisas, e ta un di esnan mas mal komprondé tambe.
Pensa riba personahenan bíbliko manera Moises, Isaías, Ezekiel, Daniel i Juan, ku a bini den e presensia di Dios. Kiko tabata nan promé reakshon? Nan a kita nan sapatu, a skonde nan kara, òf a kai abou manera kos ku nan tabata morto. Komo sernan humano, nos ta pekaminoso i asina impio, ku nos no por soportá di para den presensia di Dios. Di forma similar, ora Ellen G. White a bai den vishon, hopi bia el a grita: “Gloria, gloria, gloria” pasobra e tabata e úniko palabra ku tabata parse di ta kapta mayoria di loke e tabata mira. I, naturalmente, e kuater kriaturanan bibu no ta sosegá di dia ni anochi sin bisa: “Santu, santu, santu, Señor Dios Todopoderoso, kende tabata i ta i ta bini!” (Rev. 4:8, NKJV).
Amor ta kisas e palabra di mas komun usá dor di kristiannan pa deskribí e karakter di Dios. Esaki por ta pa motibu di e deklarashon di identidat tokante Dios den 1 Juan 4:8, ku ta bisa: “Dios ta amor.” Juan no a bisa: “Dios ta amoroso,” sino mas bien: “Dios ta amor.” Amor ta Su karakter, e esensia mes di ken E ta.
Pa hopi hende, nan imágen di Dios ta surgi for di nan definishon humano di amor, ku semper ta distorshoná i imperfekto. En kambio, nos definishon mes di amor mester ser formá pa via di ken Dios ta i loke E ta revelá tokante Su mes den Su Palabra inspirá.
Kiko 1 Juan 4:7-19 ta splika nos tokante amor?
E amor di Dios ta perfekto, liber i profundamente relashonal, manera ta ser revelá den e invitashon ripití pa “keda” den djE den 1 Juan, pasobra “nos a konosé i a kere e amor ku Dios tin pa nos. Dios ta amor, i esun ku ta keda den amor ta keda den Dios, i Dios den djE” (1 Juan 4:16, NKJV). Dios ta amor, i El a krea nos den Su imágen (Gen. 1:27) pa stima i pa deseá amor. Na hebreo, un palabra prinsipal pa amor ta hesed. Esaki ta deskribí e amor di pakto di Dios pa humanidat, loke ta enserá karakterístikanan di lealtat, protekshon, firmesa i ternura.
Finalmente, e ekspreshon di mas grandi di e amor di Dios ta ser revelá atraves di e regalo di Su Yu na e tera akí (Juan 3:16) kende a muri pa pekadónan (Rom. 5:8). Dios por a retené esaki for di humanidat, sinembargo, pa motibu di Su amor magnánimo, radikal, supremamente altruista, Dios a manda Hesus na tera pa asina nos lo por a skohe libremente pa respondé na Su amor, revelá den Su morto sustitutivo na nos fabor. No solamente Hesus a pone un brùg riba e separashon ku piká a trese entre nos i Dios (Isa. 59:1-2), El a biba pa mustra nos e karakter perfekto di amor di Dios (Juan 14:9, Hebr. 1:3) i pa hala tur hende serka djE mes (Juan 12:32).
Probablemente bo sa di memoria e promé palabranan den Beibel: “Na prinsipio Dios.” Na hebreo, e palabra pa Dios aki ta Elohim. Aunke e palabra akí por ser usá ora ta papia tokante “diosnan” falsu, ora e ta referí na e úniko Dios berdadero, e ta deskribí un Kreadó todopoderoso i omnipotente en konekshon ku henter e kreashon; e Dios trasendente ku ta mas ayá di nos komprondementu pero den kontrol di tur kos. E ta asina poderoso ku ora E papia, algu ta ser kreá djis for di Su bos.
Pero den e siguiente kapítulo, Génesis 2, ta aparesé un nòmber diferente pa Dios: Yahweh. E nòmber akí ta konektá na Elohim (Yahweh Elohim), e mesun Dios todopoderoso i omnipotente; pero e nòmber Yahweh ta e nòmber mas personal di e úniko Dios berdadero, hopi bia usá pa enfatisá ku Dios ta e Dios di pakto, den relashon amoroso ku Su pueblo kreá.
Kompará e deskripshonnan di Dios den Génesis 1:1 i Génesis 2:7. Kiko bo ta ripará?
Aki, den Génesis 2:7, nos por imaginá Dios ta hinka rudia pa forma e promé ser humano for di tera ku Su mes mannan. “I SEÑOR Dios a forma hende for di stòf di tera, i a supla rosea di bida den su nanishi, i hende a bira un ser bibu.” Esaki ta un Dios ku ta yega serka, asina serka ku E ta supla rosea di bida den nanishi di Adam. E nòmber akí, Yahweh, ta presentá un kuadro mas íntimo di Dios, pero Moises ta usa tur dos nòmber den e promé dos kapítulonan di Beibel pa deskribí e dos karakterístikanan akí di Dios na nos.
Ki asombroso! Nos ta mira aki e trasendensia di Dios na nos komo Elohim, i Su inmanensia, Su serkania na nos, komo Yahweh. Ki bon pa nos pensa riba tur dos aspekto akí di e karakter di Dios: Su kontrol general di tur kos i Su serkania na nos. Manera Pablo a bisa e ateniensenan riba Areópago: “E no ta leu for di kada un di nos, pasobra den djE nos ta biba, move i tin nos ser” (Echonan 17:27-28, NKJV).
Ta importante pa nos sigui buska un imágen kla i balansá di Dios basá riba loke Beibel ta bisa nos tokante e karakter di Dios, pa asina nos krese den un relashon kunE. Ta p’esei ta importante pa lesa tur parti di Beibel mas bien ku enfoká riba un parti so. Di bèrdat, mas nos siña tokante e karakter di Dios, mas nos lo siña stim’E.
Si bo tabata tratando na kompartí ku un no-kristian un deskripshon for di Beibel tokante e karakter di Dios, unda lo bo a bai?
E mihó kontesta, naturalmente, lo ta Hesus. Beibel ta bisa ku Hesus no solamente ta reflehá Dios sino ta revelá Dios. Tin hopi pasashi di Beibel ku ta splika esaki, pero esun ku ta hasi esei mas simpel ta Juan 14:9. Aki, Hesus ta bisa: “Esun ku a mira Mi a mira e Tata” (NKJV). Pa por sa mas tokante kon Dios ta, nos mester wak Hesus: Su palabranan, Su akshonnan, Su manera, i Su gran amor pa humanidat den Su morto i resurekshon.
E amor i kuido di e Tata ta ser ekspresá di forma mas kla den Su Yu, Hesus. E bunitesa di Beibel ta ku Dios a duna nos kuater perspektiva riku riba e bida di Hesus, pa nos por tin un imágen kompletu di ken E ta. Den Mateo (skirbí dor di un hudiu, pa hudiunan), nos ta mira Hesus komo e Mesias tan sperá, kende a kumpli ku loke a ser primintí. Den Marko, nos ta mira Hesus bibando un bida aktivo di servisio i sakrifisio. Semper E tabata pensa riba otronan i semper tabata responsivo na e boluntat di Su Tata. Den Lukas, nos por lesa tokante kon Hesus tabata sinti, ku Su humanidat i kompashon, i nos por lesa e relato akí pa nos tin siguransa ku loke nos ta lesa ta bèrdat (Lukas 1:3-4). Den Juan, nos ta mira e Yu di Dios enkarná i ta ser invitá pa kere ku Hesus ta ken E ta bisa ku E ta, pa asina nos bida spiritual por ser rebibá. Aunke tur kuater Evangelio ta eksplorá e mesun tereno, “nan no ta representá kosnan den presis e mesun estilo. Kada eskritor tin un eksperensia di su mes, i e diversidat akí ta amplia i ta profundisá e konosementu ku ta ser tresé pa supli e nesesidatnan di mentenan variá.”—Ellen G. White, Manuscript 105, 1900. Kua Evangelio bo a lesa mas resientemente?
Den Mateo 1:23, un nòmber spesífiko ta ser duná na Hesus. Dikon esaki ta asina signifikante pa komprondé e karakter di Dios? Lesa Mateo 28:20, i enfoká riba e último parti di e versíkulo. Kompará e dos versíkulonan akí. Kiko bo ta ripará?
Nos a toka solamente e superfisie di e tópiko enorme akí, e karakter di Dios. Dios ta mas grandi i mas inkreibel ku nos por komprondé, i nos lo ta siñando tokante djE pa semper te den eternidat.
Dios ta yama Su pueblo pa representá Su karakter pero, pa hasi esaki, nos mester konos’E pa nos mes. E mihó manera pa mirE klaramente, apesar di nos wowonan humano pekaminoso ku muchu biaha ta malkomprondé Su kamindanan santu i perfekto, ta dor di skrudiñá Su Palabra, Beibel. “Tur e amor paternal ku a baha di generashon pa generashon atraves di e kanal di kurason humano, tur e fuentenan di ternura ku a habri den e almanan di hende, ta solamente manera un rempel chikitu kompará ku e oséano sin límite ora e ser kompará ku e amor infinito i inagotabel di Dios. Lenga no por pronunsi’e; pèn no por deskribié. Bo por meditá riba dje tur dia di bo bida; bo por skrudiñá e Skrituranan diligentemente pa asina bo por komprond’é; bo por konvoká tur poder i kapasidat ku Dios a dunabo, den esfuerso pa komprondé e amor i kompashon di e Tata selestial; i tòg tin un infinito mas ayá. Bo por studia e amor ei pa siglonan; tòg nunka bo por komprondé kompletamente e largura i e hanchura, e profundidat i e haltura, di e amor di Dios den duna Su Yu pa muri pa mundu. Eternidat mes nunka por revel’é kompletamente. Sinembargo, segun ku nos ta studia Beibel i meditá riba e bida di Kristu i e plan di redenshon, e gran temanan akí lo habri pa nos komprondementu mas i mas.”—Ellen G. White, Testimonies for the Church, tomo 5, p. 740.