Orguyo Versus Humildat

Dos hòmber ta bai misa pa hasi orashon. Un ta un ansiano respetá ku ta para dilanti, promé ku misa kuminsá, dilanti di e kongregashon pa asina nan por mir’é. E ta hasi orashon na bos haltu, gradisiendo Dios pa su mes bondat persibí. E otro hòmber, un habitante marginal di sosiedat, ta para na e parti te patras di e misa. Su wowonan no ta masha kla, ku lágrima pa motibu di e peso di su piká riba su skoudernan. Den e skina patras di e misa, e ta kai na rudia, i ta bisa ketu ketu den desesperashon: “Por fabor, Señor, sea mizerikòrdioso ku mi, un pekadó!”

Lesa Lukas 18:9-14. Kiko bo ta pensa di e dos hòmbernan akí? Kiko Hesus a pensa? Ki lès importante tin aki pa nos tur?

Ta masha fásil pa nos halsa nos mes. Tin bia e ta bira segundo naturalesa pa laga otronan sa di nos logronan i kon bon nos ta. Pero e kosnan akí, riba nan mes, no ta hasi diferensia pa nos reputashon den bista di shelu. De echo, e ta realmente kontrali na loke nos por pensa, pasobra “ken ku halsa su mes lo ser humiliá, i esun ku humiliá su mes lo ser halsá” (Lukas 18:14, NKJV). Hesus ta konsehá nos tambe pa tuma e asiento di mas abou i laga e anfitrion halsabo si nan ke (Lukas 14:8-10). E reino kabes abou akí, ku Hesus ta siña, ta lo kontrario di loke nos ta spera. “Kristu por salba solamente esun ku sa ku e mes ta un pekadó.”—Ellen G. White, Christ’s Object Lessons, p. 158.

Dor di realisá promé nos berdadero estado di pekaminosidat i nos nesesidat desesperá di Kristu, nos por bini serka djE sabiendo ku konfiansa ku si “nos konfesá nos pikánan, E ta fiel i hustu pa pordoná nos nos pikánan i pa limpia nos di tur inhustisia” (1 Juan 1:9, NKJV).

Mas serka nos hala serka Kristu, mas nos ta realisá nos pekaminosidat i indignidat. “Na un manera so un berdadero konosementu di nos mes por ser optené. Nos mester kontemplá Kristu. Ta ignoransia di djE ta hasi hende asina elevá den nan mes hustisia.”—Christ’s Object Lessons, p. 159.

Pues, kiko Dios ta pensa di e orguyoso? 1 Pedro 5:5 ta bisa nos ku “Dios ta resistí esnan orguyoso, ma ta duna grasia na esnan humilde.” No por ta mas kla.

E salanan grandi di e palasio egipsio tabata broma di luho, plaser i fasilidat. “Moises tabata sabí den tur e sabiduria di e egipsionan, i tabata poderoso den palabra i echonan” (Echonan 7:22, NKJV). Un bida di poder, rikesa i popularidat tabata na su alkanse, tòg Moises a skohe algu masha diferente. “Komo historiadó, poeta, filósofo, general di ehérsitonan i legislador, e no tin igual. Tòg ku mundu su dilanti, e tabatin e forsa moral pa rechasá e perspektivanan atraktivo di rikesa i grandesa i fama, ‘skohiendo mas bien pa sufri aflikshon ku e pueblo di Dios, ku disfrutá di e plasernan di piká pa un temporada.’ ”—Ellen G. White, Patriarchs and Prophets, p. 246.

Kiko Hebreonan 11:24-26 ta bisa nos tokante dikon Moises a skohe un kaminda diferente i a humiliá su mes?

Moises su humildat mas despues ta remarkabel, konsiderando e hòmber poderoso ku e tabata i di unda el a bini. Sinembargo, pa medio di un akto pekaminoso impulsivo (Eks. 2:12), el a pèrdè su konfiansa propio i sufisiensia propio. Ku serunan komo su murayanan di klas i ku orguyo barí un banda, pa 40 aña Dios a siña Moises loke e mester a sa pa saka un nashon for di sklabitut hiba den e Tera Primintí. E poder i rikesa di loke por tabata un otro bida na Egipto a blikia den nifikashon ora Moises a konsiderá eternidat. Dios a yam’é masha spesífikamente, i Moises a sigui.

Kisas di mas signifikante den lus di e tópiko akí, Numbernan 12:3 ta bisa nos: “Awor e hòmber Moises tabata masha humilde, mas ku tur hende ku tabata riba kara di tera” (NKJV). Moises, un di e gran patriarkanan di Beibel, ta konosí pa su humildat, su mansedumbre. Konsiderá kon diferente su bida i liderazgo lo tabata si orguyo lo a drenta den kada un di e susesonan grandi akí den su bida: e mata na kandela, e plaganan na Egipto, krusamentu di Laman Kòrá, mana ku a kai for di shelu, papia direktamente ku Dios, risibí e Dies Mandamentunan, i tende e palabranan di Dios despues ku Moises a dal e baranka.

Imaginá bo ta un disipel di Hesus. Bo ta biaha kunE, kome kunE, drumi serka di djE, i siña di djE segun ku E ta transformá inkontabel bida, inkluyendo esun di bo. Hende ta aglomerá su tras, i bo ta realisá kon spesial ta ku El a skohe abo pa ta un di e 12 mas serka di djE. E ora ei bo ta kuminsá puntra bo mes: Ken realmente ta esun di mas grandi di tur e disipelnan?

Den Lukas 22:24-27, lesa Hesus su kontesta riba e disputa di e disipelnan tokante kiko ta nifiká grandesa. Kua solo deklarashon ta kapta kurason di e mensahe di Hesus aki?

Hende lo a pensa ku, despues di tur e tempu akí di ta serka di Hesus, e tipo di debate akí lo tabata e último kos den nan mente. Pero esei no ta loke a pasa.

En bes di ku e hòmbernan akí ta satisfecho ku nan yamada, orguyo a lanta den nan kurason te kaminda kada un a pensa ku e tabata mihó ku e otronan. Ta fásil pa pèrmití pensamentunan asina dominá nos mente. Pero nos ta ser bisá ku “no tin nada asina ofensivo pa Dios òf asina peligroso pa e alma humano manera orguyo i outosufisiensia. Di tur piká e ta esun di mas sin speransa, esun di mas inkurabel.”—Christ’s Object Lessons, p. 154.

Esaki ta masha serio pa nos. Nos orguyo ta ofendé Dios mas ku kualke otro kos, i e ta un rasgo di karakter ku ta difísil pa superá pasobra hopi bes nos no ta mir’é pa loke e ta. Den nos estado di sufisiensia propio, nos ta skohe pa no evaluá nos mes, pasobra siguramente orguyo ta rei. Nos mester para ketu, diagnostiká nos mes, i pidi pa Dios habri nos wowonan pa nos berdadero estado, pasobra orguyo por ta e faktor number un ku ta stroba nos di tin un relashon estrecho ku Dios awe.

Lesa Lukas 22:27 atrobe. Kiko ta e mensahe klave pa tur e siguidónan di Kristu aki?

Den kontraste fuerte ku e deseo di e disipelnan pa ta superior i nan kerensia ku nan tabata mihó ku e siguiente, nos ta mira Hesus, e ehèmpel supremo di humildat. Hesus, kende a bisa: “Sinembargo, Mi ta meimei di boso manera Esun ku ta sirbi” (Lukas 22:27, NKJV). Hesus, kende tur dia tabata duna na esnan den nesesidat rònt di djE pasobra E tabata yená ku kompashon i tabata mira e multitutnan manera karnénan sin wardadó. E tabata sa ku humanidat tabatin mester di djE mas ku kualke otro kos den bida, aunke poko tabata realisá e bèrdat simpel akí. Hesus, kende a entregá shelu pa muri pa e rasa humano, ku e speransa ku nan lo komprondé Su akto di grasia i respondé na Su invitashon pa nan tin un relashon kunE.

Lesa Filipensenan 2:3-8. Kiko esaki ta bisa nos tokante kon nos mester biba den lus di e Krus?

Hesus a hasi tur kos. El a karga tur kos. Ora nos para ketu sufisiente pa mir’E, berdaderamente i puramente, nos no por hasi otro sino realisá nos impuresa, nos sushedat, i nos nesesidat desesperá di djE den nos bida awe.

Ora nos wak na djE, tur otro kos (spesialmente nos mes i nos propio grandesa persibí) ta blikia den kompleto insignifikansia. Ken Hesus ta, kiko El a hasi, i kuantu E ta stima Su kreashon, ta bira sentral. E ami siguramente lo disparsé ora nos wak E. Hesus. Ki un nòmber bunita i poderoso. E ta e personifikashon di humildat. Ora nos kurasonnan habrí siña tokante djE, ora nos komprondé kiko El a hasi pa nos, i ora nos pèrmití Su palabranan di bida filtra drenta den nos mente, nos ta realisá kon orguyoso i mizerabel nos ta realmente. Si Su mes disipelnan, ku a biba i a siña di djE, tabata lucha ku orguyo, nos no por gaña nos mes ku nos ta nada diferente. Finalmente, nos por krese den nos relashon ku Hesus solamente ora nos ta humilde.