Kontratempunan

Imaginá e multitut di hende na kosta di Galilea. Nan tabata warda riba e regreso di Hesus for di mainta trempan, i segun ku E ta baha for di e boto, nan ta primi yega serka rònt di djE, i ta siguiE bai den e pueblo di Capernaum. Diripiente Jairo, gobernante di e snoa, ta aparesé i ta roga Hesus pa bin pa kura su yu muhé.

Un di e hendenan den e multitut ta un muhé ku tabata malu pa hopi aña. El a gasta tur su sèn na dòkternan, pero e “no tabata mihó, ma mas bien a bira pió” (Marko 5:26, NKJV). El a tende di e gran Hòmber di Galilea akí i, ku speransa den su kurason, ta rekohé e tiki forsa ku e tabatin pa sali kas e mainta ei pa uni ku e multitut. E preshon di e hendenan ta kasi sofokante segun ku e ta yega mas serka di Hesus. I e ora ei, den e pushamentu i rankamentu, e ta mir’E. E ta kurashá su mes: “Si mi por djis mishi ku Su pañanan, lo mi bira bon” (Marko 5:28, NKJV).

Lesa Marko 5:21-34. Kiko a pasa, i kiko nos por siña?

E insidente akí ta mustra Hesus su kuido i kompashon pa esnan malu i solitario, i esnan ku normalmente ta pèrdí den e multitut. Hopi e dia ei tabata primi yega serka banda di Hesus segun ku nan tabata laga nan mes ser hibá huntu ku e multitut, pero ta un so a ekstendé su man intenshonalmente pa mishi ku Hesus pa risibí e bendishon ku e tabatin mester asina desesperadamente. Sinembargo, no tabata su toke ku a kur’é; tabata su fe ku a pon’é bira bon (Marko 5:34). “E Salbador por a distinguí e toke di fe for di e kontakto kasual di e multitut negligente.”--Ellen G. White, The Desire of Ages, p. 344. Hesus su bistí no tabatin poder spesial; mas bien, tabata e fe di e muhé i su eskoho pa ekstendé su man pa mishi kunE ku a kur’é.

E muhé frágil ei, den su sufrimentu i angustia, por a keda den kama na kas riba e mainta ei, ma en kambio, el a buska Hesus deliberadamente i ku speransa di sanashon. Mir’E na un distansia no tabata sufisiente; el a hala serka di djE.

Hesus ta yama nos pa hasi e mesun kos awe. E ta bisa, “Bin serka Mi, boso tur ku ta kansá i kargá, i lo Mi duna boso sosiegu. Tuma mi yugo riba boso. LagaMi siña boso, pasobra Mi ta humilde i suave di kurason, i boso lo haña sosiegu pa boso alma” (Mat. 11:28,29, NLT).

Ora nos pensa riba kontratempunan den Beibel, kisas Job ta e persona ku ta bin na mente promé. No solamente el a pèrdè tur su rikesa (Job 1:14-17), sino tambe el a pèrdè su yunan (Job 1:18-19) i su salú (Job 2:7). Despues su kasá a purba konvens’é pa maldishoná Dios i muri (Job 2:9).

Despues di algun tempu, tres amigu a bin sinta serka Job. Nan tabata asina sorprendí pa su apariensia ku nan a sinta serka dje, sin papia un palabra, pa shete dia (Job 2:13). Finalmente, ora nan a papia, nan a purba ofresé motibunan humano pakiko un desgrasia asina a bin riba Job, pero dor di hasi esei, sin ku nan tabata ke, nan a oumentá su sufrimentu. Tres amigu a kulp’é, bisando ku e mester tin algun piká skondí den su bida pa arepentí di dje (Job 8, 11, 15), asta bisando: “Siguramente asina e lugánan di biba di e malbado ta, i esaki ta e lugá di esun ku no konosé Dios” (Job 18:21, NKJV).

Kon Job a reakshoná? Lesa Job 19:23-27 i Job 23:8-12.

Sin importá e susesonan trágiko ku tabata rondon’é, i e echo ku e no tabata komprondé nan, Job a keda fiel. El a tene duru. E no a kulpa Dios ni maldishon’E. En kambio, ora el a ser tentá pa kulpa Dios, el a deklará: “Sunú mi a sali for di barika di mi mama, i sunú lo mi regresá einan. SEÑOR a duna, i SEÑOR a kita; bendishoná sea e nòmber di SEÑOR” (Job 1:21, NKJV).

Nos tambe ta biba meimei di e mesun bataya akí. Satanas ta afligí nos ku doló, sufrimentu, pèrdida i difikultat komo parti di su plan pa distorshoná nos imágen di un Dios amoroso. Na momentu asina, nos por respondé na dos manera: kulpa i rechasá Dios òf pega na djE ku tur nos forsa. Aunke e bataya ta ras rònt di nos, nos mester kòrda ku, den lus di eternidat, nos problemanan momentáneo ta solamente pruebanan temporal (2 Kor. 4:16-18). Tin asina tantu mas ta sosodé ku loke nos ta mira aki i awor, i un di e desafionan grandi pa un kreyente ta di konfia Dios asta den e momentunan di mas skur. Dios a, na hopi manera, revelá na nos e realidat di Su amor. Nos mester pega na e bèrdat krusial akí, esun di e amor di Dios, asta ora nos lo no por sintié na e momentu ei.

Tabata algun siman intenso pa e dos disipelnan segun ku nan tabata repasá den nan mente algun di e susesonan i kòmbersashonnan ku nan a eksperensiá. E entrada triunfal na Jerusalèm i e limpiesa di e tèmpel. E Pasku den e kamber ariba. E orashonnan di Hesus den Getsémani. E traishon horibel di Hudas. E huisio, e burla, e batimentu. E kurpa heridá di Hesus kologá na un krus i Su último palabranan promé ku El a hala Su último rosea segun ku shelu di atardi tabata bira pretu. E sker duru di e kortina di tèmpel. E grafnan habrí di e hustunan. Suavemente kitando e kurpa di Hesus for di e krus i pon’E den e graf promé ku Sabat. I despues e konfushon, desánimo i preguntanan den mente di e disipelnan. Kon nan a kiboká nan mes asina?

E siguidónan di Hesus tabata desapuntá, desanimá i konfundí. Esaki tabata e kontratempu di mas grandi di nan bida. Loke nan no a mira tabata ku esaki tabata meramente un momentu den e storia di mas grandi di tur tempu. Segun ku dos di nan tabata kana riba e kaminda pa Emaus, Hesus a aparesé i a kana huntu ku nan.

Lesa e kòmbersashon den Lukas 24:13-27 i pensa riba e dos diferente perspektivanan: e dos siguidónan, i Hesus.

Unabes ku nan wowonan a habri, e dos siguidónan a kore bai Jerusalèm pa kompartí tokante e kosnan ku a pasa riba kaminda (Lukas 24:33-35). Ora Hesus a bin i a para meimei di nan, nan tabata morto spantá. Nota Su preguntanan na nan: “Pakiko boso ta preokupá? I dikon duda ta lanta den boso kurason?” (Lukas 24:38, NKJV).

Esaki tambe ta Hesus su mensahe pa nos awe. Demasiado biaha nos ta lubidá ku Hesus ta kana banda di nos den nos vayenan. Hopi bes nos no ta rekonos'E. Hopi bes nos ta lubidá ku tin hopi mas den e storia. Demasiado biaha nos ta sinti nos mes molestiá i ta pèrmití duda surgi den nos kurason, lubidando ku Hesus ta tene nos bida siguramente den Su mannan. I muchu biaha nos ta kere ku nos sa mihó ku Hesus tokante kiko realmente ta pasando den nos bida (Lukas 24:18).

Bo a yega di deseá ku bo por a mira Hesus ora bo ta sintibo desanimá? Imaginá bo mes den e soño akí.

“Mi tabata parse di ta sinta den apsoluto desesperashon, ku mi kara den mi mannan, reflehando asin’akí: Si Hesus tabata riba tera, lo mi a bai serka djE, tira mi mes na Su pia, i kont’E tur mi sufrimentunan. E lo no a bira bai for di mi, E lo tabatin mizerikòrdia di mi, i lo mi a stim’E i sirbiE semper. Nèt e ora ei e porta a habri, i un persona di bunita forma i kara a drenta. El a wak mi ku duele i a bisa: ‘Bo ke mira Hesus? E ta aki i bo por mir’E si bo ta deseá di hasi esei. Kohe tur loke bo tin i siguimi.’

“Mi a tende esaki ku un alegria indeskriptibel, i ku plaser mi a rekohé tur mi poseshonnan chikitu, kada chocheria tesorá, i a sigui mi guia. El a hiba mi na un trapi pará i aparentemente frágil. Ora mi a kuminsá subi e trenan, el a atvertí mi pa mantené mi bista fihá ariba, pa mi no haña biramentu di kabes i kai. Hopi otro, ku tabata subi e subida steil, a kai promé ku nan a yega na e tòp.

“Finalmente nos a yega na e último tre i a para dilanti di e porta. Aki mi guia a dirigími pa laga tur e kosnan ku mi a trese ku mi. Kontentu mi a pone nan abou; despues el a habri e porta i a mandami drenta. Den un momentu mi a para dilanti di Hesus. No tabatin eror ku e kara bunita ei. Un ekspreshon asina radiante di benevolensia i mahestat no por a pertenesé na ningun otro. Segun Su mirada tabata sosegá riba mi, mi tabata sa mesora ku E tabata konosí ku tur sirkunstansia di mi bida i tur mi pensamentunan i sintimentunan interno.

“Mi a purba protehá mi mes di Su mirada, sintiendo inkapas di soportá Su wowonan investigador, pero El a hala serka ku un sonrisa, i, poniendo Su man riba mi kabes, a bisa: ‘No tene miedu.’ E zonido di Su bos dushi a emoshoná mi kurason ku un felisidat ku nunka el a eksperensiá promé. Mi tabata muchu kontentu pa pronunsiá un palabra, pero, vensí pa felisidat inekspresabel, a tira mi mes na Su pianan. Miéntras mi tabata drumí indefenso einan, esenanan di bunitesa i gloria a pasa mi dilanti, i mi tabata parse di a yega na e siguridat i pas di shelu. Finalmente mi forsa a bolbe, i mi a lanta. E wowonan amoroso di Hesus tabata riba mi ainda, i Su sonrisa a yena mi alma ku alegria. Su presensia a yenami ku santu reverensia i un amor inekspresabel …

“E soño akí a dunami speransa ... [i] fe ... I e bunitesa i simplisidat di konfia den Dios a kuminsá penetrá riba mi alma turdí.”--Ellen G. White, Early Writings, p. 79-81.

Meimei di e kontratempunan di bida, nos mester enfoká riba Hesus i loke E ta revelá tokante e amor di Dios pa nos.