Te den Eternidat

Nos a ser trahá pa ta serka di Dios (Gen. 2:7). For di tempu ku El a krea humanidat, Dios a duna tur kos pa restourá nos relashon kibrá kunE (Juan 3:16). El a pone eternidat den nos kurason, sinembargo mente humano no por kapta kiko Dios a hasi for di prinsipio te fin (Ekl. 3:11). Nos ta parti di e gran konflikto ku ta ras rònt di nos, asta den nos, i tòg, muchu bes nos no ta para ketu sufisiente largu pa konsiderá e kosto grandi di loke a ser duná pa asina nos por ser restourá na e relashon ku Dios ke pa nos tin kunE. Demasiado biaha nos ta haña nos mes envolví den nos batayanan i pruebanan terenal, lubidando ku “nos siudadania ta den shelu, for di unda nos ta warda ansiosamente riba e Salbador, Señor Hesu-Kristu, kende lo transformá nos kurpa humilde pa e por ser konformá na Su kurpa glorioso” (Fil. 3:20-21 NV).

Segun ku mundu ta yega kada bes mas serka di e fin, nos sa ku un nubia pretu chikitu lo aparesé un dia den shelu parti ost. Segun ku e ta yega mas i mas serka, nos lo mira ku riba e nubia ei ta sinta “Un manera e Yu di Hende, ku tin un korona di oro riba Su kabes, i den Su man un zeis skèrpi” (Rev. 14:14, NKJV). Hesus lo ta kompañá pa míles i míles di angel (Mat. 25:31), i tur wowo lo mir’E (Rev. 1:7). Segun ku E ta baha, nos lo tende Su gritu, un zonido di tròmpèt di Dios, i e grafnan di esnan ku a pega soño den Kristu lo habri ora nan lanta promé (1 Tes. 4:16). Nan lo konosé e bos di Esun ku ta yama nan (Juan 5:28).

Kiko lo pasa despues? Lesa 1 Tesalonisensenan 4:17. Finalmente, loke Pablo ta skirbi tokante dje den Filipensenan 2:10-11 lo resoná atraves di henter universo.

Ki un pensamentu apsolutamente inkreibel i magnífiko! Un dia nos lo mira Hesus, realmente, berdaderamente mir’E. Nos lo tende Su bos, i nos lo konfesá ku E ta Señor. Esun ku nos a lesa tokante di djE, a hasi orashon na djE, a papia di djE ku otronan; Esun ku nos kurason a anhelá p’E... nos lo realmente mir’E kara kara. Nos por ta apsolutamente sigur di esaki, pasobra Dios ta fiel, i Su promesanan ta bèrdat (Rev. 22:6).

Den e momentu ei, ora e tròmpètnan zona i tur wowo humano mira Hesus, nos lo sa ku tabata bale la pena warda. Kada orashon perseverante, kada momentu ku nos a priorisá tempu kunE, kada biaha ku nos a papia ku kurashi p’E, kada prueba, lo kulminá den mira Su kara (Rev. 22:4).

Miéntras e tabata eksiliá riba e isla di Patmos, disipel Juan a haña un vishon di kon lo ta ora nos reuní ku Dios pa eternidat.

Lesa Revelashon 21:9-11. Ki analogia a ser duná, i dikon bo ta kere ku el a ser usá?

E brùit ta bunita, i riba su dia di kasamentu, tur hende ke mir’é. Un dia di kasamentu ta un punto di kambio di un bida nobo huntu pa e brùit i brùidehòm, i esaki lo ta bèrdat tambe pa nos relashon ku Dios na Su regreso.

Hesus a bin ta prepará un lugá pa nos (Juan 14:1-3), un lugá bunita ku ta muchu asombroso pa deskribí. De echo, “lenguahe humano ta inadekuá pa deskribí e rekompensa di e hustunan. E lo ta konosí solamente pa esnan ku ta kontempl’é. Ningun mente finito por komprondé e gloria di e Paraiso di Dios.”--Ellen G. White, The Great Controversy, p. 675.

Aunke nos no por komprondé realmente kon e shelu nobo i e tera nobo lo ta, Dios ta mustra Juan un vishon di e lugá akí pa asina nos wak padilanti na e “kasamentu” ku lo tuma lugá pronto. En bèrdat, nos ta ser invitá pa “pone boso mente riba kosnan di ariba, no riba kosnan riba tera” (Kol. 3:2, NKJV).

Dios ta preparando kuidadosamente pa e evento akí, i E no ke pa e “boda” akí kue nos di sorpresa (lesa Mat. 22:1-14, Mat. 25:1-13).

E universo ta e kongregashon ku lo mira e evento akí tuma lugá, i nos ta algun di e figuranan sentral den e storia akí. Nos lo uni ku e “brùit,” e stat akí ku Hesus lo hiba nos na dje na Su segundo binida. Ta interesante pa bisa, e pueblo di Dios (e santunan) tambe ta ser yamá e brùit (lesa Rev. 19:7, NASB), kisas pasobra nan ta den “e stat santu, Jerusalèm Nobo, bahando for di shelu for di Dios, prepará manera un brùit dòrná pa su esposo” (Rev. 21:2, NKJV).

E deskripshon bunita akí di e Stat Santu ta mustra ku tin un konekshon íntimo entre e pueblo di Dios i e stat, pasobra tur dos ta ser yamá “e brùit.” Beibel ta revelá un deskripshon detayá di “e Stat Santu, e Jerusalèm Nobo, ku ta e kapital i representante di e reino, [i] ta ser yamá ‘e brùit, e esposa di e Lamchi.’ ”--Ellen G. White, The Great Controversy, p. 426.

Bo a yega di ser puntrá kiko bo ta anhelá mas di eternidat? Si bo puntra un mucha, nan lo por bisa: “Kore riba un tiger,” “Slep bai abou riba garganta di un zjiraf,” òf “Bula bai diferente planeta.” Si bo mester a puntra un teenager, nan lo por bisa: “No tin mester di hasi ningun hùiwèrk mas” òf “Eksplorá shelu huntu ku mi amigunan sin keda heridá.” I si bo mester a puntra un grupo di adulto, nan lo por bisa: “Ta na un lugá kaminda no tin mas doló, sufrimentu òf morto” òf “Ta reuní ku sernan kerí.” Tur e kontestanan aki ta bon i bèrdat, i tin asina tantu kos pa anhelá den e shelu nobo i e tera nobo. Eternidat ta kima denter di nos kurason, i, instintivamente, nos sa ku mester tin algu mas den bida ku e aki i awor.

Ki otro bendishonnan nos lo por anhelá den eternidat? Lesa Isaias 25:8, Revelashon 7:17 i Revelashon 21:4.

Siguramente e bendishon di mas grandi di shelu lo ta pa finalmente mira Hesus i pa gradisiE, en persona, pa loke El a hasi pa nos riba e tera kaí akí. Nos lo ke desbordá nos adorashon i kulto na djE pa salba nos, pa medio di Su mes sufrimentu riba krus, for di morto eterno. “Digno ta e Lamchi, ku a ser matá, di risibí poder i rikesa i sabiduria, i forsa i honor i gloria i bendishon!” (Rev. 5:12, NKJV).

Juan Boutista a introdusí Hesus komo e “Lamchi di Dios” (Juan 1:36). Dos di e disipelnan di Juan a tende e deklarashon akí i a sigui Hesus (Juan 1:37), i Revelashon 14:4 ta bisa nos ku nos mester hasi e mesun kos. “Esakinan ta esnan ku ta sigui e Lamchi unda ku E bai” (Rev. 14:4, NKJV). Sinembargo, si nos ke siguiE den shelu, nos mester siguiE promé aki riba tera.

Hesus, e Lamchi, ta tambe nos Wardador, i E ta guia nos kamindanan manera niun otro por. Esaki ta asina trankilisante pa nos segun ku nos ta lucha atraves di e tempu difísil ku nos ta haña nos mes aden, pero Hesus nunka lo stòp di guia nos, asta den shelu. Revelashon 7:17 ta bisa: “Pasobra e Lamchi ku ta meimei di e trono lo pastoriá nan i hiba nan na fuentenan di awa bibu” (NKJV). Komo Su pueblo, Su karnénan, nos lo sigui Hesus den shelu, i pa semper ke ta den Su presensia. Un karakterístika determinante di e pueblo di Dios ta ku “Su nòmber lo ta riba nan frenta” (Rev. 22:4, NKJV). Es desir, nos lo ta pensando semper riba djE.

Skucha e kantika di gospel di SDA “Sigui e Lamchi” na https://vimeo.com/1067821589 i hasi e palabranan bo orashon personal awe.

E invitashon ta ser ofresé na nos atrobe, awe: “Bin.”

Lesa e siguiente pasashinan i tuma nota di Su invitashon pa bo bin serka djE: Mat. 11:28-30, Isa. 55:1-3, Juan 6:44.

Spiritu Santu ke halabo serka Hesus awe. Hesus ta invitábo pa bini serka djE, pa keda den djE awe, i tur dia, te ora E bin. Ora bo respondé i bin serka djE, ora bo kurason ta suave i bo mente sometí, lo bo sinti pas pasobra bo sa ku, asta si bo muri, E lo lantabo riba e último dia di e tera akí, sin importá kon indigno bo por sinti. Hesus a bisa: “Esun ku bin serka Mi lo Mi no tir’afó di ningun manera” (Juan 6:37, NKJV).

Nos mester sinti e urgensia pa traha huntu ku Spiritu Santu pa yama otronan pa drenta den un relashon salbador ku Hesus. “I e Spiritu i e brùit ta bisa: ‘Bin!’ I laga esun ku tende bisa: ‘Bin!’ I laga esun ku tin set bin. Esun ku ke, lag’é tuma e awa di bida grátis” (Rev. 22:17, NKJV).

E invitashon ta grátis, ofresé komo un regalo di grasia. Ora nos asept’E den nos bida i stim’E ku henter nos kurason, mente, alma i forsa (Deut. 6:5), nos bida aki i den futuro lo ta kambiá pa semper.

Meskos ku Hesus ta invitá nos pa bini serka djE, e último palabranan den Beibel ta primintí esaki: “Siguramente Mi ta bin pronto.’ Amèn. Asina mes, bin, Señor Hesus” (énfasis añadí, Rev. 22:20, NKJV).

Kon lihé? For di nos perspektiva, asina ku nos sera nos wowonan den morto, e siguiente kos ku nos sa lo ta e regreso di Kristu. Konsiderando kon lihé nos bida ta pasa bai, ta asina lihé Hesus ta bin bèk pa nos. Kisas nos promé pensamentu na e resurekshon lo ta “E e, Señor, Bo binida tabata pronto tòg!”

Berdaderamente, awor nos ta mira djis vago, manera den un spil. Pero e ora ei nos lo mir’E kara kara. No kansa di warda. Tene e deseo akí bibu, semper bo dilanti, den fe i den konfiansa den e amor i bondat di Dios. Señor Hesus, por fabor, bin!

Hasi orashon awor akí mes pa fe perseverá, pa fe permitíbo someté totalmente i kompletamente na Esun kende a muri pa bo i ta biniendo bèk pronto pa bo tambe.