Lès 7

* 9 - 15 di mei

Orashon Práktiko

Sabat

9 di mei

Lesa pa e Estudio di e Siman Akí:

1 Reinan 19:1-18; Mat. 6:5-8; Lukas 11:2-4; Mat. 6:5-15; Dan. 9:4-19; Rom. 8:26-27.

Versíkulo di Memoria:

“Konfia den djE tur ora, boso pueblo; drama boso kurason su dilanti; Dios ta un refugio pa nos” (Salmo 62:8, NKJV).

Kon bo bida di orashon ta? Kon frekuente bo ta hasi orashon? Kon ferviente? Ku ki ekspektativa? Bo ta hasi orashon diariamente òf solamente den emergensia? Bo orashonnan semper ta pidi pa algu, òf bo ta alabá Dios den bo orashonnan tambe?

Tambe, bo ta haña bo mes ta ofresé un orashon mainta promé ku bo kome i kisas na mitar di kaminda durante bo dia okupá? Kisas bo tabata parti di un grupo di orashon regular òf asta a eksperensiá kon ta pa hasi orashon di dia i anochi. Bo a eksperensiá e poder i presensia di Dios pa medio di orashon ku ta kambia tur kos den bo bida?

Orashon ta e konekshon konstante entre nos (e ramanan) i Hesus (e Mata di wendrùif). “Si nos ke krese i floresé, nos mester saka djus i nutrishon kontinuamente for di e Mata di wendrùif Bibu; pasobra separá for di e Mata di wendrùif nos no tin forsa.”--Ellen G. White, Early Writings, p. 73. Esaki ta e bendishon di orashon permanente. Dios ta tende nos, i semper E ta kontestá na Su tempu i na Su manera perfekto, aunke no semper na e manera ku nos lo ta spera.

E siman akí, laga nos studia otro individuonan ku ta hasi orashon den Beibel i konsiderá maneranan práktiko pa fortalesé orashon den nos bida diario.

Djadumingu

10 di mei

Elias: Hasiendo Orashon den Krísis

Elias fiel a biba den tempu malu, ku Rei Ahab hasiendo mas “pa provoká SEÑOR Dios di Israel na rabia ku tur e reinan di Israel ku tabata promé kuné” (1 Reinan 16:33, NKJV). Sin duda e momentunan di mas dramátiko den bida di Elias a bini ku e konfrontashon na Seru Karmelo (lesa 1 Reinan 18). Na e klímaks di e storia inkreibel akí, Ahab i su reino a mira ku nan propio wowo e bèrdat ku Dios ta kontestá orashon. Esaki tabata un momentu inolvidabel den historia di Israel i ta p’esei, e kambio repentino di susesonan den e storia akí ta kohe nos di sorpresa.

Lesa 1 Reinan 19:1-18, i tuma nota spesífikamente di e orashonnan di Elias i e interakshon di Dios kuné. Kiko ta e rais di e desánimo di Elias aki? Kon e kontesta di Dios ta diferente for di loke a sosodé na Seru Karmelo?

Durante transkurso di un dia, aunke Dios ta kontestá kada un di e orashonnan di Elias, e profeta su estado emoshonal, mental i físiko ta kambia pronto. Aunke Elias a eksperensiá un gran viktoria ku Dios e dia ei, el a, den un momentu di kansansio, pèrmití e miedu di morto vense su fe den Dios. Loke ta asina impreshonante tokante e storia akí ta ku, aunke Elias a entregá na desesperashon i desánimo, Dios a bini serka dje den ternura i kuido, i a proveé kuminda i awa atrobe (1 Reinan 19:5-6), asina tantu ku el a dura 40 dia i 40 nochi (1 Reinan 19:8). I ora Dios a revelá Su mes finalmente, e tabata na un manera masha diferente ku El a hasié promé.

Tin biaha den nos bida, Dios ta kontestá na maneranan masha direkto, poderoso i innegabel. Esaki ta fortalesé nos fe, i nos ta sinti e serkania di Dios den nos bida.

Otro momentunan nos ta basilá i entregá na tentashon, pensando ku ta muchu difísil pa sigui Dios ku fe infleksibel. Nos ta buska kontestanan di Dios na maneranan ku nos ta spera ku E ta respondé, i no ta realisá ku Su pensamentunan i kamindanan ta muchu mas haltu i mas sabí ku di nos mes (Isa. 55:8-9). Meskos ku tin hopi kos tokante e kreashon di Dios ku nos no ta komprondé, nos no mester ta sorprendí ku tin hopi kos tokante e kamindanan di Dios ku nos no ta komprondé tampoko.

Djaluna

11 di mei

Ora Orashonnan Ta Parse Ser Sin Kontestá

Kisas bo a hasi orashon tokante algu pa hopi tempu, kisas asta añanan, i ta sinti komo si fuera Dios no a tende bo orashonnan. Beibel ta bisa nos pa “pidi, i lo ser duná na boso” (Mat. 7:7), “si nos pidi algu di akuerdo ku Su boluntat” (1 Juan 5:14, NKJV). Kiko ta bo komprondementu di e promesanan akí?

Hannah ta un ehèmpel di un muhé deboto ku a hasi orashon pa algu masha spesífiko (1 Sam. 1:10-17). Na promé instante tabata parse ku Dios no a kontestá su orashonnan, pero el a persistí, i Dios a kontestá, den Su tempu perfekto i di akuerdo ku Su boluntat. Tin biaha e wardamentu ta profundisá nos kaminata ku Dios, segun ku nos ta siña konfi’E mas.

Salmo 62:8 ta bisa: “Konfia den djE tur ora, boso pueblo; drama boso kurason su dilanti, Dios ta un refugio pa nos” (NKJV). Konfia. Nos ta konfia ku E sa realmente kiko ta mihó, asta ora nos no ta mira un kontesta inmediato riba nos orashonnan? Nos ta konfia ku finalmente E lo kontestá na Su tempu i manera perfekto?

Tin biaha nos orashonnan no por ser kontestá mes rápidamente ku nos ke òf na e manera ku nos ta spera ku nan lo ser kontestá. Ki konseho Beibel ta duna nos tokante esaki?

Buska e boluntat di Dios, no di bo mes (Mat. 6:10; 1 Juan 5:14-15).
Konsiderá bo motibunan (Prov. 16:2, Santiago 4:3).
Pensa riba si bo tin un piká karisiá (Salmo 66:18, 1 Pe. 3:12, Prov. 15:29).
Permanesé den Dios i den Su Palabra (Juan 15:7).
Tin fe ora bo ta hasi orashon (Hebr. 11:6, Santiago 1:6, Marko 11:24, Mat. 21:22).
Konsiderá e estado di bo kurason (humilde òf orguyoso) (Santiago 4:6, 1 Pe. 5:6).
Perseverá (1 Tes. 5:17-18).
Pordoná otronan (Marko 11:25-26).
Finalmente, Dios ta mira e panorama grandi i sa kiko ta mihó pa nos (Rom. 8:28, Efe. 3:20, Jer. 29:11-13). Tin biaha Su kontesta ta simplemente manera e tabata pa Pablo: “Mi grasia ta sufisiente pa bo” (2 Kor. 12:9, NKJV).

Un echo klave ku ta determiná nos kontesta riba loke ta parse orashonnan sin kontesta ta nos imágen di Dios. Si nos mira Dios komo leu i desinteresá, nos relashon kunE ta debilitá. Den tempunan asina, skrudiñá Beibel pa evidensia di Su amor i kuido pa bo, i hasi orashon pa bo imágen distorshoná di djE bira mas kla.

Djamars

12 di mei

Hesus Ta Siña Nos Kon Hasi Orashon

Den tempu di Hesus, orashonnan ku tabata largu i kuidadosamente trahá manera un presentashon, usando palabranan kompliká i hopi bes siñá for di kabes, tabata altamente apresiá. Hesus no tabatin nada bon di bisa tokante e tipo di orashonnan akí (lesa Mat. 6:5-8). El a revelá nan di ta loke nan tabata: shownan ostentativo di “piedat.”

E disipelnan a mira Hesus hasi orashon, i nan tabata sa ku orashon tabata un parti vital di Su bida (lesa Lukas 5:16, Lukas 6:12, Lukas 9:18, Lukas 22:41, Lukas 24:30, Marko 1:35, Marko 6:46). Segun ku nan tabata wak Hesus, nan a mira un kontraste for di e lidernan religioso i a realisá ku tabatin asina tantu mas den orashon ku nan a yega di konsiderá. Asina, e disipelnan a bin serka Hesus, pidiendo: “Señor, siña nos hasi orashon” (Lukas 11:1).

Hesus a duna ehèmpel na Su disipelnan (i na nos) ku nos por hasi orashon simplemente den lenguahe di tur dia. El a mustra nos ku nos orashonnan mester ta sinsero i di nos kurason.

Lesa Lukas 11:2-4 i Mateo 6:5-15 i tuma nota di e siguiente aspektonan di e orashon ku Hesus a siña:

Nos Tata den shelu: Rekonosé bo relashon personal ku e Tata di tur.
Bo nòmber sea santifiká: Rekonosé e santidat di Dios ta pone nos bini den reverensia i rèspèt.
Bo reino bini: Anhelando pa Dios Su regreso i un habitashon di Spiritu Santu te ora E bin.
Bo boluntat sea hasí riba tera meskos ku den shelu: Someté i hasi orashon pa e boluntat di Dios ser hasí den nos bida, konfiando ku E sa mihó, en bes di djis hasi orashon pa loke nos ke.
Duna nos awe nos pan di kada dia: Pidi loke nos mester pa biba, tantu físikamente (kuminda i awa) komo spiritualmente (Hesus i Su Palabra bibu).
Pordoná nos ofensanan meskos ku nos ta pordoná esnan ku ta ofendé nos: Arepentí, buska pordon, i kòrda pordoná esnan ku a hasi nos doló mes libremente ku Dios ta pordoná nos.
No hiba nos den tentashon, ma libra nos di maldat: Pidi protekshon i refugio for di e maldat den e mundu akí (Salmo 91).
Pasobra di Bo ta e reino, e poder i e gloria pa semper. Amèn: Rekonosé ku tur loke nos ta, tur loke nos tin, i tur loke nos ta hasi ta pertenesé na Dios. E so meresé nos gloria i alabansa (1 Kron. 29:11).

Djárason

13 di mei

Alabansa, Konfeshon, Petishonnan, Gradisimentu

Di e mes manera ku Hesus a siña nos kon hasi orashon den Mateo 6:5-15, nos por sigui e modelo simpel akí ora nos ta bini serka Dios den privá, huntu ku nos famianan, òf komo iglesia, kòrdando ku orashon ta papia ku Dios komo un amigu. Demasiado biaha nos orashonnan ta yen di petishon ora Hesus a siña nos hasi orashon pa asina tantu mas!

Lesa e orashon di Daniel den Daniel 9:4-19 i buska diferente partinan di su orashon.

Konsiderá kon lo bo por inkluí e siguiente komponentenan den bo orashonnan:

Alabansa: Alabansa ta adorashon ekspresá pa ken Dios ta i kon E ta. Lesa Salmo 100, e bunita kantika di alabansa na Dios. Konsiderá e hopi nòmbernan di Dios i Su karakter magnífiko. Alab’E pa ta bo Redentor, Salbador, Konsoladó, Sanadó, Bon Wardadó, Alfa i Omega, i Baranka, pa menshoná djis algun.

Konfeshon i Pordon: Ora nos haña nos mes ta papia ku i ta permanesé den Dios, nos no por yuda di laga bai loke ku por ta stroba nos òf ta separá nos for di djE. Mas serka nos ta di djE, mas nos ta mira nos indignidat i mizeria. Esaki ta pone nos rog’E pa kita nos pikánan i forma nos karakter na Su semehansa. Si nos ta ferwagt ku Dios ta pordoná nos, nos mester ta kla pa pordoná otronan tambe. “Konfesá boso pikánan un na otro, i hasi orashon pa otro, pa boso por ser kurá. E orashon efektivo i ferviente di un hende hustu tin hopi efekto” (Santiago 5:16, NKJV).

Petishonnan: Ki retonan bo ta enfrentando, kisas ku bo famia, amigunan, salú, finansa, trabou, òf estudio? Unda, spesífikamente, bo mester di Dios su man guiadó pa guia? Ken tin mester di bo sosten, i kon bo por dun’é mihó? Hasi orashon spesífikamente tokante e áreanan i hendenan akí, pidiendo pa e boluntat di Dios ser hasí.

Gradisimentu: Lesa Filipensenan 4:6 i pensa riba e bendishonnan den bo bida. Kosnan signifikante por bin na bo mente, pero ke tal di e kosnan chikitu ku hopi bes nos ta tuma pa normal? Nos ta e resipientenan konstante di e mizerikòrdianan di Dios; sinembargo, kon tiki gratitut nos ta ekspresá, kon tiki nos ta alab’E pa loke El a hasi pa nos.

Djaweps

14 di mei

Otro Preguntanan Tokante Orashon

Dikon hasi orashon ora Dios sa kaba? Dikon nos mester hasi orashon siendo ku Dios sa tur kos? Ellen G. White ta splik’é asin’akí: “No ku e ta nesesario pa hasi Dios konosí kiko nos ta, sino pa nos por risibiE. Orashon no ta baha Dios serka nos, sino ta hiba nos ariba serka djE.”-- Steps to Christ, p. 93. En bèrdat, Dios konosé nos deseonan i nos nesesidatnan, i E ta lesa kada intenshon di nos kurason. Tòg, hasi orashon ta bon pa nos. E ta invitá nos pa para ketu meimei di e hansha den nos bida, pa tuma pousa i rekonosé ku Dios ta soberano riba tur kos, i pa pone nos mes na Su pia. Kamindanan tambe por ser habrí pa Dios aktua ora nos invit’E pa hasi esei. Spiritu Santu ta intersedé pa nos ora nos no sa kon hasi orashon manera nos mester hasi (Rom. 8:26-27).

Dikon hasi orashon ora tur kos ta bon? Sufisiensia propio i orguyo (wak Lès 3) por ta un di e bareranan di mas grandi pa un bida di orashon fuerte. Si solamente nos lo a realisá kuantu nos tin mester di Dios, nos lo a bin serka djE muchu mas! Si angelnan perfekto ta ador’E, dikon nos, komo hendenan pekaminoso, ta kere ku nos tin ménos nesesidat? Kiko Mateo 5:6 i Isaias 44:3 ta bisa tokante e bèrdat akí?

Kiko ta e ròl di fe den orashon? Lesa Hebreonan 11:6 i meditá riba e palabranan akí: “Orashon i fe ta estrechamente relashoná, i nan mester ser studiá huntu: Den e orashon di fe tin un siensia divino, e ta un siensia ku tur hende, ku ke hasi su bida laboral un éksito, mester komprondé. Kristu ta bisa: ‘Tur kos ku boso ta deseá, ora boso hasi orashon, kere ku boso a risibí nan, i boso lo haña nan.’ Marko 11:24. E ta bisa kla ku nos pidimentu mester ta di akuerdo ku e boluntat di Dios; nos mester pidi pa e kosnan ku El a primintí, i loke ku nos risibí mester ser usá pa hasi Su boluntat. E kondishonnan kumplí, e promesa ta inekibokabel; ... Nos no mester buska ningun evidensia eksterno di e bendishon.”--Ellen G. White, Education, p. 257, 258.

Ku ken mi mester hasi orashon? Nos mester hasi orashon mas ku tur kos den privá (djis Dios i abo), ya ku orashon i estudio di Beibel ta e sanger di bida di bo relashon ku Dios. Pone tempu un banda pa skrudiñá bo kurason segun ku bo ta papia i skucha Dios (Mat. 6:6). Tambe nos mester hasi orashon huntu ku nos famianan òf den gruponan chikí (Echonan 12:12), pasobra kaminda dos òf tres ta reuní, Dios tei (Mat. 18:20). Finalmente, nos mester hasi orashon ku nos komunidatnan di iglesia (Santiago 5:13-16). Tur tres tipo di orashon ta importante.

Kon mi mester skucha? Orashon ta mas ku djis papia ku Dios; nos mester pèrmitiE tambe “snui” nos i papia den nos bida. E manera di mas kla i di mas sigur pa hasi esaki ta pa lesa Beibel i kombiná orashon i estudio di Beibel den bo tempu deboshonal. Tene kuidou ku hasi bo mente bashí òf skucha bo mes pensamentunan mas bien ku skrudiñá Beibel.

Djabièrnè

15 di mei

Pa mas Estudio

“Si nos tabata pensa i papia mas di Hesus, i ménos di nos mes, nos lo mester tabatin muchu mas di Su presensia.”--Ellen G. White, Steps to Christ, p. 102.

“Si nos purba resolvé nos dudanan i miedunan, òf purba resolvé tur loke nos no por mira klaramente, promé ku nos tin fe, perplehidatnan lo solamente oumentá i profundisá. Pero si nos bini serka Dios, sintiendo indefenso i dependiente, manera nos ta realmente, i den fe humilde i konfiabel hasi nos deseonan konosí na Esun kende su konosementu ta infinito, kende ta mira tur kos den kreashon, i kende ta goberná tur kos pa medio di Su boluntat i palabra, E por i lo atendé nos gritu, i lo laga lus bria den nos kurason.”-- Steps to Christ, p. 96, 97.

“E alma por subi mas serka di shelu riba e alanan di alabansa. Dios ta ser adorá ku kantika i músika den e atrionan selestial, i segun ku nos ta ekspresá nos gratitut nos ta aserkando na e adorashon di e ehérsitonan selestial ... Laga nos, ku goso reverente, bini dilanti di nos Kreador, ku ‘gradisimentu, i e bos di melodia.’ Isaias 51:3.”--Steps to Christ, p. 104.

Preguntanan pa Diskushon:

Kua konsepto den e sitanan aki riba ta inspirábo mas? Kua konsepto ta retabo mas?

Ki otro lèsnan nos por siña for di e bida di orashon di otronan den Beibel? (Lesa Esdras 10:1; 2 Reinan 13:4; Juan 4:2-3; Hab. 3:1; 2 Reinan 19:14-19; Jer. 32:16-25, Neh. 1:4-11, 1 Reinan 8:22-54, pa menshoná djis algun di nan.)

Kiko ta e ròl di yunamentu huntu ku orashon?

Tin algu nobo ku bo ke kambia òf implementá den bo bida di orashon komo resultado di e lès di e siman akí? Dikon no hasi e kambionan?