Lès 10

* 30 di mei – 5 di yüni

Arepentimentu i Pordon

Sabat

30 di mei

Lesa pa e Estudio di e Siman Akí:

Isa. 61:10; Oseas 6; Echonan 3:18-19; Eks. 34:1-10; Rom. 6:23; Mat. 22:1-14.

Versíkulo di Memoria:

“Si nos konfesá nos pikánan, E ta fiel i hustu pa pordoná nos nos pikánan i pa limpia nos di tur inhustisia” (1 Juan 1:9, NKJV).

E Tera Primintí a parse asina leu pa e israelitanan, ku a kampa bou di e pilá di nubia riba e sabana. Moises a subi den e skuridat diki, ku a tapa e tòp di e seru hopi dia pasá. Siguramente nan lider a muri kaba, nan a rasoná, si no ta di hamber antó kisas di e kandela konsumidor na su tòp. E multitut miksto (e israelitanan huntu ku esnan ku a bandoná Egipto huntu ku nan riba e Eksodo) meimei di nan a sinti nan mes intrankil i impasiente, kla pa sigui pa e tera ku ta flui lechi i miel. Aunke e mesun hendenan akí, djis algun dia promé, a sera un pakto solèm ku Dios pa obedes’E, nan tabata ke un imágen ku nan por a mira. I asina, nan a reuní rònt di e tènt di Aaron i a demandá pa e krea un ídolo pa nan. Ku miedu pa su mes seguridat, Aaron a bai di akuerdo. Den Eksodo 32-34, nos ta lesa kon e storia tristu akí ta desaroyá.

E relato akí ta djis un storia for di Skritura ku ta siña nos tokante arepentimentu i pordon, e tema di e estudio di lès di e siman akí. Tene e tema di e versíkulo di memoria di e siman akí den bo mente segun ku bo ta pasa dor di e estudio di kada dia. Sí, nos ta peka, pero danki na e morto di Hesus riba krus i e plan di salbashon, pordon t’ei pa e pekadó sinsero ku ta konfesá i arepentí.

Djadumingu

31 di mei

E Hansha di Bida

Tabata un siman hopi drùk. Aunke e tabata sa ku tabatin hopi kos pa hasi promé ku Sabat, loke ta urgente tabata parse di konsumí loke ta importante, i promé ku e tabata sa, solo a baha. E famia a kompartí un sena spesial di djabièrnè anochi i adorashon huntu.

Pero ora mainta di Sabat a yega i el a lanta trempan, e no por a yuda di nota e baño shushi, ku el a limpia. Despues el a mira ku su yu hòmber chikitu a muha kama, pues el a tira su lakennan den e wasmashin huntu ku otro pañanan. Miéntras e tabata prepará desayuno pa su famia, el a realisá ku no tabatin postre pa almuerso, pues rápidamente el a horna poko pan di bakoba. El a mira ku su kasá tabatin mester di un kamisa striká pa misa, pues el a hasi esei tambe, despues el a dobla algun paña i tira shushi afó.

I e ora ei el a bin bei. Ta Sabat, un dia ku mi ta stima mas ku kualke otro! Tòg at’ami aki, hasiendo tur e tareanan akí i permitiendo e kosnan akí distraími for di loke Sabat ta trata di dje: hala serka Dios.

Pa djis un momentu, su mente a kuminsá hustifiká su akshonnan: esakinan tabata tur kos ku mester a hasi. Nan tabata realmente? El a realisá ku e tabata aktuando manera Marta, “distraí ku hopi sirbimentu” (Lukas 10:40, NKJV), pero e palabranan di Hesus a resoná den su mente: “Bo ta preokupá i molestiá pa hopi kos. Pero un kos ta nesesario, i Maria a skohe e parti bon ei, ku lo no ser kitá for di dje” (Lukas 10:41-42, NKJV). E parti bon ei. Sinta na pia di Hesus pa motibu di un amor profundo p’E, no solamente riba Sabat, sino tur dia. E no a skohe esei e mainta akí.

E tabata stima Dios, sinembargo tabata fásil pa lubidá ku El a dun’é e Sabat komo un regalo den tempu pa hasi nan relashon mas fuerte. Lágrimanan silensioso a kai for di su wowonan miéntras e tabata para einan den kushina.

E propósito di e ehèmpel akí no ta pa enfoká riba kiko nos mester òf no mester hasi riba Sabat; mas bien e ta un rekordatorio di dikon ta importante pa nos tuma nota di e kosnan ku ta debilitá òf kibra nos relashon ku Dios. Ora nos kurason ta sinti e doló di piká i separashon i nos ta sklama na djE, Hesus ta masha serka (Salmo 53:2). Den Su mannan manchá ku sanger, E ta tene un mantel blanku. E ta mira nos lágrimanan di arepentimentu i ta kita nos pañanan shushi. E ora ei E ta lora Su mantel puru di hustisia tur rònt di nos. Su puresa ta kubri nos piká konfesá, kompletamente i perfektamente. Nos por laba nos mantel den Su sanger (Rev. 7:14).

Djaluna

1 di yüni

Inspirashonnan di Spiritu Santu

Segun ku e (hòmber) tabata pensa riba e distansia entre e i su kasá, e tabata sa ku e tabata robes. E tabata insensitivo i duru i a bisa algun kos ku el a lamentá. Tòg su siguiente pensamentu tabata: E no a meres’é, ni sikiera un tiki?

E proseso di pensamentu akí ta konosí pa bo? Ta fásil pa kambia di un sentido di remordimentu pa un hustifikashon di nos pensamentunan i akshonnan. No semper ta fásil pa bisa “Sòri …” ora nos a hasi robes, sinembargo esaki ta asina esensial pa rekonstruí òf fortalesé kualke relashon.

Mesun kos ta konta pa nos i Dios. Hopi bes Spiritu Santu ta inspirá nos mente pa pensa riba e pikánan ku nos ta kometé. Nos kurason ta ser konmoví pa motibu di e inspirashonnan akí, pero por ta fásil pa pusha e bos trankil i chikitu ei bai, segun ku nos ta hustifiká dikon nos a aktua di un sierto manera. Un di e ròlnan di Spiritu Santu ta pa “konvensé mundu di piká” (Juan 16:8, NKJV). Ki un regalo inkreibel di Dios (Lukas 11:13), pasobra kon nos mester di konvikshonnan asina pa drecha e distansia ku por slùip drenta nos kaminata kunE!

Lesa Oseas 6. Kiko spesífikamente bo ta nota aki tokante kon Dios ta deskribí Su mes den Su apelashon pa arepentimentu?

Konsiderá e ròl di Spiritu Santu den e proseso di ènter nos bèk riba e Mata di wendrùif (Juan 15:4). “Hopi bes nos ta lamentá pasobra nos mal echonan ta trese konsekuenshanan desagradabel pa nos mes; pero esaki no ta arepentimentu. Tristesa real pa piká ta resultado di e obra di Spiritu Santu. E Spiritu ta revelá e ingratitut di e kurason ku a ofendé i hasi e Salbador tristu, i ta trese nos den kontrishon na pia di e krus. Atraves di kada piká Hesus ta ser heridá di nobo; … nos tin duele pa e pikánan ku a trese angustia riba djE. Un lamento asina lo hiba na renunsiá piká.”--Ellen G. White, The Desire of Ages, p. 300.

E bèrdat ta, nos no por krese den nos relashon ku Dios ora piká skohé i karisiá ta para entre nos i E. Nos tur a falta e gloria di Dios, pero nos por, i mester, arepentí di nos pikánan ora Spiritu Santu trese nan den nos mente (Efe. 4:30).

Djamars

2 di yüni

Arepentimentu Real

E mundu sekular ta bombardiá nos ku mensahenan di independensia, indulgensia i promoshon propio, lo kontrario di e prinsipionan di e reino di Dios. Ta interesante pa bisa ku e promé palabranan registrá den Beibel dor di Juan Boutista i Hesus tabata similar. Juan a bisa: “Arepentí, pasobra e reino di shelu ta serka!” (Mat. 3:1-2, NKJV). Hesus a bisa: “E tempu a kumpli, i e reino di Dios ta serka. Arepentí i kere den e evangelio” (Marko 1:14-15, NKJV; lesa tambe Lukas 24:46-47). Tantu Hesus komo Juan a yama esnan, ku tabata skucha, na arepentimentu pasobra e reino di shelu tabata serka. Por ta ku e mesun mensahe akí ta mes relevante pa nos awe?

Lesa Echonan 3:18-19. Dikon arepentimentu ta asina importante den e proseso di kresementu spiritual? Kiko ta un tempu di “refreskamentu”?

E kariño i bondat di Dios ta hiba nos na arepentimentu (Rom. 2:4). Arepentimentu ta envolví dos paso:

doló sinsero i tristesa pa nos pikánan; i
e desishon honesto pa bandoná piká.

Den Beibel, arepentimentu kasi semper ta konektá ku pordon. Nos ta arepentí genuinamente; Dios ta pordoná. Asina simpel e ta (1 Juan 1:9, Rev. 3:19). “Señor no ta tarda pa kumpli ku Su promesa, manera algun ta konsiderá tardansa, ma E tin pasenshi pa ku nos, E no ke pa niun hende peresé, ma pa tur yega na arepentimentu” (2 Pe. 3:9, NKJV). Segun ku nos ta prepará nos alma personalmente pa e Segundo Binida, Dios ta dunando nos tempu pa drecha kosnan kunE.

Hesus a sufri, a muri, i a resusitá pa ora nos arepentí, Su grasia por obra un milager den nos bida. Kontrali na mundu, ku ta bisa nos ku nos ta bon manera nos ta, Dios ta pidi pa nos akudí na djE den arepentimentu i fe (Echonan 20:21), poniendo nos mes kompletamente den Su mannan pa E por snui i forma nos karakternan di un manera bunita na Su semehansa, pa testifiká di djE (Juan 15:2,8). E ora ei nos ta krese i produsí fruta di akuerdo ku arepentimentu (Mat. 3:8). “Ningun arepentimentu ta genuino ku no ta obra reforma. E hustisia di Kristu no ta un mantel pa tapa piká no konfesá i no bandoná; e ta un prinsipio di bida ku ta transformá e karakter i ta kontrolá e kondukta.”--Ellen G. White, The Desire of Ages, p. 555, 556.

Djárason

3 di yüni

Sufisiente Grasia

Ora nos sinti e peso di nos piká i pèrmití Spiritu Santu hiba nos na pia di e krus, nos mester pidi pordon di Dios, sabiendo ku “SEÑOR ta mizerikòrdioso i yen di grasia, slow pa rabia, i ta abundá den mizerikòrdia” (Salmo 103:8, NKJV). E mesun versíkulo akí a ser papiá dor di Dios Mes (Eks. 34:6) despues ku Su nashon skohí a hasiE tristu.

Lesa Eksodo 34:1-10. Ki bèrdat krusial ta ser hañá aki?

E echo ku Señor ta mizerikòrdioso i yen di grasia, slow pa rabia, i ta abundante den mizerikòrdia ta tambe e motibu mes ku Hesus a muri na krus, pa asina nos relashon ku Dios por ser drechá atrobe.

Ta ora nos ta dispuesto pa rekonosé i konfesá nos piká; ora nos bisa: O, Señor, at’ami aki atrobe ... “Sea mizerikòrdioso ku mi, un pekador!” (Lukas 18:13, NKJV), ku Hesus, kende ya a bin ta obrando den nos i pa nos ku Spiritu Santu promé ku nos sikiera invok’E, ta mira e peso i ta kit’é for di nos. Nos karganan ta ser hisá na Kalvario, i Hesus siguramente ta masha serka ora nos bini serka djE i, asta promé, ta buska nos komo e Bon Wardadó i ta para na porta i ta bati (Rev. 3:20). Laga nos no keda leu for di e Krus, mirando Dios for di distansia. Laga nos kore bai serka Hesus i interkambiá nos pikánan i karganan pa Su hustisia (Zak. 3:4).

Lesa e siguiente versíkulonan pokopoko. Skirbi ku bo mes palabranan kiko nan ta bisabo tokante e grasia di Dios pa ku bo: “Pasobra e pago di piká ta morto, ma e don di Dios ta bida eterno den Kristu Hesus nos Señor” (Rom. 6:23, NKJV). “Ma kaminda piká a abundá, grasia a abundá muchu mas, pa asina, meskos ku piká a reina den morto, asina tambe grasia lo por reina atraves di hustisia pa bida eterno pa medio di Hesu-Kristu nos Señor” (Rom. 5:20-21, NKJV). “Ma Dios ta demostrá Su mes amor pa ku nos, den e echo ku, tempu ku nos tabata pekador ainda, Kristu a muri pa nos” (Rom. 5:8, NKJV).

Djaweps

4 di yüni

E Mantel di Mas Karu

Paña bunita muchu biaha ta definí esnan riku atraves di normanan mundano. Tin hende ta bisa: “Mi ta bisti asin’akí pa ekspresá ken mi ta.” Pero den shelu, tur kos ku no ta nos relashonnan lo disparsé (Mat. 6:19-21, NKJV). Nos identidat personal mester ta envolví den Hesus i Su mantel di hustisia perfekto.

Lesa e parabel den Mateo 22:1-14 ku Hesus a konta pa splika esaki. Ki mensahenan bo por haña den e parabel akí?

Hesus a yama e hòmber sin paña di kasamentu “amigu,” i apesar di su falta di kontesta, nan mester tabatin un relashon. E hòmber mester tabata sa di e mantel pero a skohe pa no bistié. Hesus su karakter ta perfekto i sin mancha, i E ta ofresé esaki na nos “pa e ta bistí na lino fini, limpi i blanku” (Rev. 19:8), “sin mancha, ni ploi, ni nada paresido” (Efe. 5:27).

E lino blanku “ta e hustisia di Kristu, Su mes karakter sin mancha, ku pa medio di fe ta ser impartí na tur ku risibiE komo nan Salbador personal.”--Ellen G. White, Christ’s Object Lessons, p. 310.

Adam i Eva tabatin un mantel blanku di lus suave bistí promé ku nan a peka; despues ku nan a peka, nan a realisá ku nan tabata sunú (Gen. 3:7) i a traha paña di blachi di figo. E ora ei Dios a remplasá nan blachinan di figu ku un bistí di kueru di bestia. Tabatin un sakrifisio ku a produsí nan bistí. Di un manera similar, nos ta aseptá e sakrifisio di Hesus dor di aseptá Su mantel di hustisia. “Sunú i bergonsá, nan a purba supli e lugá di e bistínan selestial dor di kose blachinan di figo huntu pa tapa … Nada hende por diseñá pa supli e lugá di su mantel di inosensia pèrdí. Ningun bistí di blachi di figu, niun bistí di siudadano mundano, por ser bistí dor di esnan ku ta sinta ku Kristu i angelnan na e sena di kasamentu di e Lamchi. Solamente e paña ku Kristu Mes a proveé por hasi nos digno pa aparesé den presensia di Dios. E paña akí, e mantel di Su mes hustisia, Kristu lo pone riba kada alma arepentí i kreyente.”--Ellen G. White, Christ’s Object Lessons, p. 311.

Djabièrnè

5 di yüni

Pa mas Estudio

Hopi bes Beibel ta usa metáforanan di agrikultura pa deskribí nos kondishon spiritual. Oseas 10:12 ta un ehèmpel ku ta ilustrá loke nos a trata e siman akí:
“Sembra pa boso mes hustisia;
Kosecha den mizerikòrdia;
Prepará bo tereno bashí,
Pasobra ta tempu pa buska SEÑOR;
Te ora E bin i yobe hustisia riba boso” (NKJV).

Nos ta sembra, kosechá, prepará e tera duru, i buska Dios pa yega serka di nos. E tera di nos kurason mester ta prepará i kla pa e áwaseru (Spiritu Santu) kai. Dios por duna nos e deseo pa prepará e tera, pero, finalmente, un relashon ku Dios ta un asosiashon (lesa Fil. 2:12-13 ). Nos tin ku bira nos kabes den Su direkshon, aserk’E, i pega na djE. E ora ei E ta obra den nos pa hasi sobrá.

Un gran ehèmpel di kiko pega na Dios ta nifiká por ser hañá den e versíkulonan akí: “Boso wowonan a mira kiko SEÑOR a hasi pa motibu di Baal-peor: pasobra tur e hòmbernan ku a sigui Baal-peor, SEÑOR bo Dios a destruí nan for di meimei di boso. Ma boso ku a pega na SEÑOR boso Dios ta na bida, kada un di boso, awe” (Deut 4-4).

Preguntanan pa Diskushon:

“No hiba nos den tentashon, ma libra nos di maldat” (Mat. 6:13). Hesus spesífikamente a siña Su disipelnan pa hasi orashon di e manera akí, pero nos ta tene e liña di pensamentu akí den nos orashonnan diario? Kon regularmente bo ta hasi orashon pa protekshon kontra tentashon i piká?

Kon lo bo a splika e regalo presioso di e mantel di hustisia di Kristu na un no-kristian òf un kreyente nobo?

Kon e mantel di hustisia di Kristu ta konektá na e mensahe di e santuario, ku ta trata tokante Dios kende ta pordoná i limpia e pekador arepentí? Kon bon bo ta komprondé e bunitesa i rikesa di e mensahe akí?