E Ròl di Beibel

E outoridat i funshon di Beibel ta ser deklará klaramente denter di su páginanan. Lesa i kopia 2 Timoteo 3:15-17. Tuma nota di loke e versíkulonan akí ta bisabo tokante e funshon di Beibel.

Ora ta trata di estudio di Beibel personal, nos mester ta kuidadoso pa no ferwagt ku Beibel ta sirbi nos propósitonan òf perspektivanan, ku no ta semper meskos ku esnan di Dios. Por ehèmpel, nos no mester usa e método di “sera mi wowonan i mustra riba un teksto”, pasobra esaki no ta e manera kon Dios ke komuniká ku nos atraves di Su Palabra. Dios no ta un marioneta na un hilu, wardando pa sirbi nos nesesidatnan i boluntat. Su kamindanan i pensamentunan ta asina mas haltu ku esun di nos (Isa. 55:9), i p’esei nunka nos mester purba kontrolá Su palabranan na nos. Tampoko nos mester selektá i skohe solamente e partinan di Beibel ku ta sinti kómodo pa nos. En kambio, nos mester mira Beibel komo un pakete kompletu mas bien ku lesa e pasashinan fásil i konosí i laga afó esnan ku ta konfrontá òf desafiá. Si di bèrdat nos ke pa Dios papia den nos bida, nos mester tuma Beibel komo un totalidat i usa métodonan sano ora nos ta envolví den estudio di Beibel kuidadoso, konfiando ku Dios lo revelá loke nos mester tende, ora nos mester tende esaki.

Tambe, Hesus Mes ta bisa nos: “Lo bo stima SEÑOR bo Dios ku henter bo kurason, ku henter bo alma i ku henter bo mente” (Mat. 22:37, NKJV). Es desir, Dios no ke pa nos ignorá nos mente; mas bien, E ke informá nos mente ku Su alkanse amplio di konosementu i komprondementu, ku ta ser revelá, parsialmente, pa medio di Su Palabra. Nos por lesa hopi narativo bíbliko den kua Dios tabatin diskushonnan ku hende manera Enoch, Abraham, Moises i Job, ademas di hopi kòmbersashon ku Hesus tabatin ku hende. Dios no ta ignorá rason humano sino ta invitá nos pa someté esaki na Su Palabra i sabiduria ora nos ta “traha riba” nos salbashon.

Rason humano, sinembargo, ta humano ainda, kapas di eror i engaño. Nunka e ta infalibel. Ta posibel pa rason humano pusha Dios un banda pa purba resolvé kosnan riba nos mes, loke ta pone nos mes igual na, òf riba, Dios ora ta trata di pensa. Hende por aserká Skritura ku un spiritu arogante i krítiko, pensando ku nan a yega di tende tur kos kaba i ku no tin nada nobo. Ta ora nos ta sinti nos importante, sigur, outosufisiente, i sin nesesidat di nada, nos ta neglishá nos relashon ku Dios i ta dependé riba nos propio konosementu limitá i rasonamentu defektuoso.

Un tendensia bou di algun teólogo liberal den dékada 60 di siglo pasá tabata pa saka Dios for di e tereno di teologia. Na 2017, un artíkulo di portada di e revista Time a presentá e titular “Bèrdat ta Morto?” E ta interesante pasobra e tendensia akí ta ilustrá e posishon di nos sosiedat awendia. E idea mes di “bèrdat” ta dekayendo te na tal grado ku niun hende sa mas kiko ta bèrdat. Segun kultura popular, no tin un midí, niun fundeshi ku ta keda konstante i ku por dependé riba dje pa soportá e prueba di tempu. Kontrali na esaki, Hesus a bisa: “Ami ta e … bèrdat” (Juan 14:6). Su Palabra ta testifiká tokante djE komo bèrdat den puresa kompletu.

Lesa e siguiente tres versíkulonan pokopoko, i despues lesa nan un di dos biaha. Kiko bo ta nota tokante e mensahenan akí?

Beibel ta deklará ku e bèrdat básiko, Hesus Mes, no ta kambia (Hebr. 13:8). Na mes momento, segun ku nos ta lesa e Palabra di Dios, nos komprondementu di Dios i Su bèrdat por krese. “Tin minanan di bèrdat ku e buskadó serio ainda mester deskubrí.”—Ellen G. White, Testimonies for the Church, tomo 5, p. 704. Papiando di “bèrdat,” Ellen G. White semper a referí na bèrdat komo duná dor di Dios pa medio di Su Palabra. Nos por buska lus adishonal den Beibel pasobra Beibel nunka ta kontradesí bèrdatnan di pasado, sino, en kambio, ta konstruí riba nan.

Lesa 1 Tesalonisensenan 2:13; Salmo 33:4-5; i Efesionan 1:13. Kiko ta e mensahe einan?

Na final, Beibel, i Beibel so, mester ta e fuente fundamental di loke nos ta komprondé komo bèrdat. Mester proba i tèst tur otro fuente pa medio di e Palabra di Dios. Asta mester tèst loke nos ta konsiderá “rason” pa medio di e Palabra di Dios.

Kiko lo por a kambia den bo hogar si bo a akudí na Beibel ora bo tabata konfrontá un desishon grandi, problema di relashon òf reto? Kiko lo por a kambia na bo lugá di trabou òf iglesia si e palabranan di Beibel berdaderamente a bira e brel atraves di kua hende a mira mundu i a skohe pa biba di akuerdo kuné?

E outornan di Beibel tabata sa kon balioso e palabranan di Beibel tabata. Ningun otro buki por papia na bo bida manera e palabranan akí por. E palabranan por ta riba e página den bo Beibel, pero kon bo por mantené nan den bo kurason?

Kiko ta e konseho di David den Salmo 119:11, i kon lo bo por siguié? (Lesa tambe Hebr. 4:12.)

Un di e deklarashonnan ku Beibel ta hasi tokante su mes por ser hañá den Hebreonan 4:12. Un spada di dos filo ta poderoso i skèrpi, pero Beibel por hasi loke hèrmèntnan humano no por hasi pa e alma humano. Beibel ta deskribí su mes komo ta bibu. Kisas bo a puntra bo mes kon esaki por ta, mirando ku el a ser skirbí míles di aña pasá, pero Hesus a bisa: “E palabranan ku Mi ta papia ku boso ta spiritu, i nan ta bida” (Juan 6:63, NKJV). Si bo kurason ta kibrá òf bo bida ta kai den otro, Dios por papia Su palabranan den bo mundu i kambia kosnan rònt di bo. Tèstamènt Bieu ta deskribí e palabranan di Dios tambe komo masha aktivo i nada stanká òf pasivo (lesa Isa. 55:11). Ora David a reflekshoná riba e impakto di e palabranan di Dios riba su bida, el a skirbi: “Esaki ta mi konsuelo den mi aflikshon, pasobra Bo palabra a dunami bida” (Salmo 119:50, NKJV).

Kisas bo a yega di eksperensiá hamber severo na sierto momento den bo bida, òf kisas bo a yuna òf a bai riba un dieta. Kuminda no ta smak bon despues ku bo tabatin hamber? Den un sentido spiritual, Beibel ta kuminda pa nos alma.

Si bo alma ta bashí i ku hamber, habri e Palabra bibu. Lesa Jeremias 15:16, 1 Pedro 2:2 i Mateo 4:4 .

E palabranan di Dios ta smak bon na e mente i kurason, i ora nos lesa nan, nan lo yena nos i sostené nos, manera primintí.

E mensahenan den e palabra di Dios, Beibel, a bini di Dios Mes. Dios a manda nan spesífikamente pa nos i pa tur otro persona ku a busk’E. Ora nos lesa nan ku un kurason habrí i ku orashon, e palabranan ei lo no bai pèrdí.

Nos abilidat pa risibí instrukshon for di e Palabra di Dios (Job 22:22) ta dependé pa gran parti di kon e estado di nos kurason ta ora nos yega na Beibel. Kon 1 Korintionan 2:14 ta splika esaki?

Tin disernimentu spiritual ta nifiká tin persepshon i komprondementu spiritual. Tin sentido, antó, ku un persona ku mente habrí spiritualmente lo tin konklushonnan masha diferente ora e ta lesa Beibel, ku un persona ku mente será spiritualmente. Un hende ku ta kere ku Beibel ta kos di bobo lo no buska bèrdat den su páginanan.

Pues, tantu nos aktitut pa ku Beibel komo e manera ku nos ta aserká su lesamentu ta masha importante ora ta trata di krese den un relashon ku Dios. Kon Pablo ta splika esaki den 1 Tesalonisensenan 2:13?

E Palabra di Dios ta obra den nos ora nos ta kere. Ora bo habri bo Beibel i kere ku Dios tin algu di bisabo pa medio di e palabranan riba e páginanan, enbèrdat E lo papia ku bo i obra den bo bida. Pero asina tantu ta dependé di bo fe i bo ekspektativanan. E bon notisia ta ku si bo fe ta chikitu, Dios por yud’é krese (Marko 9:24), asta si e ta chikitu manera un simia di mòster (Lukas 17:6).

Un di e gran propósitonan di Beibel ta pa papia bèrdat den nos bida tokante e kondishon di nos relashon ku Dios i kon pa fortales’é. Si bo kurason ta habrí pa Spiritu Santu, si bo aserka e Palabra ku humildat, semper lo bo sali kambiá, aunke no semper lo bo rekonosé esaki mesora dia pa dia, pasobra un kambio i kresementu asina hopi bes ta kresiente. Pero si nos ta tene duru na nos apatia i piká i no ta dispuesto pa kambia, lesamentu di Beibel por sirbi nos di tiki. Spiritu Santu ta impulsá nos pa hala mas serka di Hesu-Kristu. Nos ke yega mas serka? Si ta asina, nos ta bira “sabí pa salbashon” (2 Tim. 3:15), i nos lo mira kosnan ku nunka nos a ni imaginá.