Lès 6

* 2 - 8 di mei

Guereronan di Orashon

Sabat

2 di mei

Lesa pa e Estudio di e Siman Akí:

Dan. 2:20-23; Dan. 6:10-11; Echonan 20:36; Gen. 5:22-24; Eks. 33:15-23; Eks. 32:31-32

Versíkulo di Memoria:

“Mi ta stima SEÑOR, pasobra El a tende mi bos i mi súplikanan. Pasobra El a inkliná Su orea na mi, p’esei lo mi sklama na djE tanten ku mi ta biba” (Salmo 116:1,2, NKJV).

Imaginá bo si kasi nunka bo tabata papia ku bo mihó amigu òf bo kasá. Masha pronto e relashon lo a kibra, i lo tabatin un problema. Di mes manera, orashon ta un parti esensial di tin un relashon estrecho ku Dios. E ta un kustumber deboshonal krusial, unu ku kada un di nos tin mester i por fortalesé. Si nos no hasi orashon hopi biaha i kontinuamente, tardi o trempan nos lo dual bai for di Señor.

Den Beibel nos ta siña tokante bida di diferente individuo ku a hasi orashon na diferente manera. Nos por hala atras i kapta un bista riba kon nan komunion ku Dios a impaktá nan relashon kunE, kon i kiko lo nos por hasi orashon p’e tambe, i kon nan orashonnan a kambia bida di otronan. Ta bèrdat: nos bida di orashon ta impaktá no solamente nos mes sino otronan tambe.

Meskos ku estudio di Beibel, e tópiko di orashon akí ta tantu grandi komo importante i muchu mas amplio ku loke nos por kubri den djis dos siman. E siman akí nos lo siña algun lès di algun di esnan den Beibel ku a hasi orashon i a mustra nos kon sentral orashon ta pa nos tin un relashon fuerte ku Dios. Laga nos siña for di nan ehèmpelnan.

Djadumingu

3 di mei

Fiel Daniel

Daniel ta un di e gran héroenan di Beibel. Nos konosé e promé storia tambe (lesa Daniel 1): “Daniel a proponé den su kurason ku e lo no a kontaminá su mes ku e porshon di e delisianan di rei” (Dan. 1:8, NKJV). Tambe, pa Daniel i su tres amigunan, “Dios a duna nan konosementu i abilidat den tur literatura i sabiduria, i Daniel tabatin komprondementu den tur vishon- i soñonan” (Dan. 1:17, NKJV). Beibel ta deskribí Daniel komo sabí (Dan. 1:20; 2:14,21,23,48) pasobra e Spiritu di Dios tabata den dje (Dan. 4:9,18; 5:14; 6:3), i e tabata masha stimá pa Shelu (Dan. 9:23; 10:11). Esakinan ta algun deskripshon di un hòmber ku tabatin un konekshon fuerte i duradero ku Dios.

Den Daniel 2, ora Rei Nabukodonosor a emití un dekreto di morto na tur sabio na Babilonia, Daniel a buska mizerikòrdia di Dios tokante e sekreto di su soño (Dan. 2:18). Ora Dios a revelá e soño di e rei na Daniel, el a hasi orashon inmediatamente.

Lesa Daniel 2:20-23. Dikon Daniel a hasi orashon, i kiko nos por siña for di e orashon akí?

Segun ku e añanan tabata pasa i reinan tabata surgi i kai, Daniel a keda un konsehero pa e reinan i a ser deskribí komo distinguí “pasobra un spiritu ekselente tabata den dje, i e rei a pensa di pon’é riba henter e reino” (Dan. 6:3, NKJV). “E tabata fiel; i ningun eror òf fayo a ser hañá den djE” (Dan. 6:4, NKJV). Apesar di yalursheit feros i planiamentu malbado (Dan. 6:5-9) di su kompañeronan, Daniel a permanesé semper konstante i sin miedu den su bida di orashon.

Lesa Daniel 6:10-11. Kiko e versíkulonan akí ta bisa nos tokante Daniel?

Ora Daniel a enfrentá difikultat, el a hasi orashon. Aunke e menasa tabata kontra su bida, e tabata konsistente i persistente den orashon (tres biaha tur dia, manera tabata su kustumber), i predesibel (na su bentana habrí tres biaha pa dia segun ku e tabata hasi orashon den direkshon di Jerusalèm). Su orashon tabata un akto físiko (el a hinka rudia) i a enfoká riba gradisimentu i súplika.

Djaluna

4 d i mei

E Postura di Orashon

Ora algu bai robes den nos bida, mayoria di nos ta yama un amigu íntimo pa papia tokante esei. Ora nos tin bon notisia, nos ta buska un hende pa kompartí kuné. Nos por hasi mesun kos ku Dios. “Orashon ta habrimentu di kurason na Dios manera na un amigu.”--Ellen G. White, Steps to Christ, p. 93.

Orashon no solamente ta tene nos konektá na Dios sino ta bisa diabel di ken nos ta. Ora nos hinka rudia pa hasi orashon mainta, e ta meskos ku un deklarashon físiko na e podernan di skuridat ku nos ta skohe Dios e dia akí. No solamente esei, sino Dios ta manda angelnan na nos banda ora nos ta hasi orashon, i nos ta ser fortifiká i kubrí for di e enemigu di skuridat (Salmo 91).

E akto físiko di hinka rudia den sumishon ta mustra un postura humilde. E ta di algun manera diferente for di sinta den un stul òf drumí riba un kama miéntras nos ta hasi orashon, aunke nos por hasi orashon den e posishonnan akí tambe. Sinembargo, ora nos hinka rudia dilanti di Dios nos ta mustra ku nos ta kla pa sirbi Dios ku henter nos kurason, ya ku nos kurpa i nos palabranan ta deklará ku E ta soberano i ku nos ta simplemente Su yunan kreá.

Lesa e siguiente pasashinan di Beibel i konsiderá bida di e personanan akí ku a hinka rudia ora nan a hasi orashon: Dan. 6:10, Lukas 22:41, Echonan 7:60, Echonan 9:40, Echonan 20:36.

Para den orashon tabata un práktika komun den tempu bíbliko (2 Kron. 20:5-6,13; 1 Sam. 1:26; Job 30:20; Luk. 18:11,13). Beibel ta kompartí tambe ehèmpelnan di hende ku tabata sinta ora nan tabata hasi orashon (2 Sam. 7:18). Otronan tabata inkliná dilanti di Dios, ku nan kara riba tera, aunke e postura akí tabata ménos komunmente asosiá ku orashon, sino mas bien sumishon dilanti di un superior (1 Reinan 1:47, Marko 14:35).

Kiko ta bo postura usual ora bo ta hasi orashon? Beibel no ta rekerí pa nos hasi orashon den ningun postura partikular, pero posturanan ta importante, ya ku nan ta reflehá nos reverensia, nos sintimentunan interno, i nos deseo pa someté na Dios. Algun hende no por hinka rudia, pues, finalmente, ta e kondishon di kurason ta loke ta importá mas. Si bo por hinka rudia pero normalmente no ta hasié, dikon no purba hinka rudia e siguiente biaha ku bo hasi orashon i mira kon e ta afektá bo tempu ku Dios?

Djamars

5 di mei

Enok a kana i a papia

Lesa Génesis 5:22-24. Kiko, eksaktamente, nos sa tokante Enok?

Beibel no ta kompartí muchu tokante bida di Enok, pero e ta bisa nos ku el a kana ku Dios pa 300 aña te ora ku Dios a hib’é shelu. Ki bunita ta ku e deboshon konsistente di un persona na Dios ta loke ta definí su bida!

Un kos ku nos sa ta ku Enok mester tabata "konstantemente den orashon” (Rom. 12:12, NKJV), perseverando i kresiendo mas serka di Dios den fe pa medio di su eksperensianan diario. Tera tabata birando mas i mas malu den e tempu den kua e tabata biba, i Enok a keda okupá sirbiendo Dios, pero e no por a hasi esaki bon sin permanesé den djE. “Meimei di un bida di trabou aktivo, Enok a mantené su komunion ku Dios firmemente. Mas grandi i mas urgente su labornan tabata, mas konstante i serio su orashonnan tabata … Despues di a keda pa un tempu meimei di e hendenan, trahando pa benefisiá nan pa medio di instrukshon i ehèmpel, e lo a retirá, pa pasa un temporada den soledat, ku hamber i set pa e konosementu divino ei ku Dios so por impartí. Teniendo komunion asina ku Dios, Enok a bin mas i mas ta reflehá e imágen divino ... Asta e impio a kontemplá ku temor e impreshon di shelu riba su kara.”—Ellen G. White, Patriarchs and Prophets, p. 86,87.

Dios no ta pidi nos pa biba manera ermitaño òf monhe, asina separá for di mundu ku nos no ta di ningun uso terenal. Meskos ku Enok, nos por ta produktivo i konsiente di e nesesidatnan rònt di nos, pero ta solamente dor di kana i papia ku Dios, atraves di un relashon stabil i duradero, ku E por reflehá Su karakter maravioso atraves di nos.

Nos por hasi orashon kualke ora i na kualke kaminda. No tin ningun kaminda riba tera ku Dios no ta mira òf tende nos (Salmo 139:7-12); semper E ta tende e gritunan di nos kurason, sin importá unda nos ta (lesa Lam. 3:55-57). Sinembargo, tin algu di bisa na fabor di hasi orashon na bos haltu en bes di djis den nos mente. Ora nos ta hasi orashon den silensio, nos lo por bira distraí òf ni sikiera kaba nos liña di pensamentu òf nos frase, i e por ta mas difísil pa nos pensamentunan keda enfoká. Pero ora nos ta hasi orashon na bos haltu, sea den un bos ketuketu òf den nos tono di kustumber, e ta un rekordatorio pa nos mes ku Dios ta real, ku E ta skuchando, i ku nos tin algu spesífiko pa papia di dje kunE.

Djárason

6 di mei

Moises, Lider Piadoso

Aunke Enok klaramente tabatin un relashon masha estrecho ku Dios, nos tin mas bista riba Moises su relashon ku Dios i por asta lesa numeroso relato di Moises su kòmbersashonnan kunE. Segun ku nos ta biaha ku Moises atraves di e subida- i bahadanan di e bida di e lider humilde akí, nos ta mira bes tras bes ku esun parti di mas importante di su bida i e sekreto pa su éksito komo un lider piadoso tabata su komunikashon konstante i relashon permanente ku Dios.

Lesa Eksodo 33:15-23. Kua ta e kontenido i e forma di e kòmbersashon entre Moises i Señor?

Imaginá kon lo tabata pa papia ku Dios i tende Su bos asina kla. Ta sorprendente ku e israelitanan no a buska e tipo di komunion akí ku Dios nan mes en bes di roga Moises pa papia ku nan di parti di Dios (Eks. 20:18-21). Sinembargo, Dios a prepará Moises pa esaki, kuminsando ku nan interakshon na e mata ku tabata kima, riba e mesun seru akí. Aunke nos ta lesa di otro orashonnan personal di Moises, nos ta mira ku e ta kasi kontinuamente den presensia di Dios, pidiendo guia i intersediendo pa e hendenan ku e ta liderando.

Na dos okashon, Moises ta intersedé pa miembronan di famia. Ki situashonnan tabata rondoná su interseshon, i kiko lo a pasa si e no a intervení?

Aaron: Eksodo 32:1-14, 31-34, Deut. 9:20
Miriam: Num. 12:13

Loke ta partikularmente asombroso tokante e interakshon ku Miriam ta ku Moises tabata esun ku a risibí su mal trato i yalursheit. Fásilmente e por a hala atras i laga Dios apliká e kastigu ku Miriam i Aaron tabata meresé. En kambio, e tabata lihé pa pordoná i intersedé pa sanashon di su ruman muhé. Ki un refleho poderoso di e grasia pordonadó di Dios pa pekadornan ta ser mirá aki den e akshonnan di Moises.

Djaweps

7 di mei

Moises ta Intersedé pa un Nashon

Lesa Eksodo 32:31-32. Kiko esaki ta siña nos tokante Moises i orashon?

Moisés a intersedé bes tras bes ku kurashi pa e pueblo di Dios. Moises a akudí na Dios ora e pueblo tabatin set (Eks. 15:25; Eks. 17:2-6), ora e pueblo tabatin hamber (Num. 11:21-22), i den gran desesperashon (Num. 11:11-15).

Ora e israelitanan a traha e bisé di oro inmediatamente despues ku Dios a sera un pakto ku nan, Moises a kòrda: “Pasobra mi tabatin miedu di e rabia i indignashon ku kua SEÑOR tabata rabiá ku boso, pa destruí boso. Pero SEÑOR a skuchami e biaha ei tambe” (Deut. 9:19, NKV).

Ora e spionnan a bin bèk for di e Tera Primintí, Moises a kòrda: “Asina mi a inkliná dilanti di SEÑOR; kuarenta dia i kuarenta nochi mi a sigui inkliná, pasobra SEÑOR a bisa ku E lo a destruí boso” (Deut. 9:25, NKJV).

Ora Levi a ser separá for di e otro tribunan pa sirbi den e santuario, Moises a kòrda: “Manera e promé biaha, mi a keda riba e seru kuarenta dia i kuarenta nochi; SEÑOR a tende mi e biaha ei tambe, i SEÑOR a skohe pa no destruí boso” (Deut. 10:10, NKJV). Dios a tende e súplika di Moises.

Nos por siña hopi for di bida di Moises ora ta trata di orashon i tene duru na Dios:

Moises tabatin un amor profundo pa Dios, i un bista kla di Su karakter. Dios a deskribí Su mes na Moises den Eksodo 34:6: “SEÑOR, SEÑOR Dios, mizerikòrdioso i yen di grasia, ku pasenshi, i abundante den bondat i bèrdat” (NKJV).
Moises tabata tantu balente komo fiel segun ku e tabata tene duru na Dios atraves di e subida i bahadanan di e biahe agotadó pa e Tera Primintí. Aunke e tabata luchando manera nos tur ta hasi, Moises a konfia den e poder, presensia i direkshon di Dios den su mes bida (Eks. 33:13).
Moises a kòrda Dios riba Su pakto (Eks. 32:13), a reklamá e promesanan di Dios na nòmber di Su pueblo (Deut. 7:8), i a kòrda e liderazgo di Dios den pasado (Deut. 8:2).
Moises a aseptá e kontesta di Dios riba su orashonnan, sea ku e tabata un sí òf un nò. Ta den un relashon estrecho ku Dios no ta nifiká outomátikamente ku semper nos lo haña loke nos ke (Deut. 3:23-29), pero nos mester hasi orashon ku persistensia, di tur manera (Lukas 18:1-8).

Djabièrnè

8 di mei

Pa mas Estudio

Finalmente, nos mester hasi orashon pasobra nos ta stima Dios asina tantu, i simplemente nos no por yuda di ta kompartí tur kos den nos bida kunE: nos gosonan i e “viktorianan” di bida, nos karganan i preokupashonnan, nos petishonnan i nesesidatnan diario. “Nos por keda asina serka di Dios ku den kada prueba inesperá nos pensamentunan lo bira na djE di forma mes natural ku e flor ta bira na solo. Mantené bo deseonan, bo gosonan, bo tristesanan, bo preokupashonnan i bo temornan dilanti di Dios. Bo no por karg’E; bo no por kans’E. Esun ku ta konta e kabeinan di bo kabes no ta indiferente na e deseonan di Su yunan … Su kurason di amor ta ser toká pa nos tristesanan i asta pa nos ekspreshonnan di nan. Hiba na djE tur loke ta karga e mente. Nada ta muchu grandi pa E karga, pasobra E ta sostené mundunan, E ta goberná riba tur e asuntunan di universo. Nada ku di kualke manera ta konserní nos pas ta muchu chikitu pa E nota. No tin un kapítulo den nos eksperensia muchu skur pa E por lesa; no tin konfushon muchu difísil pa E resolvé. Ningun kalamidat por kai riba esun di mas chikitu di Su yunan, ningun ansiedat molestiá e alma, ningun goso alegrá, ningun orashon sinsero skapa for di e lepnan, di kua nos Tata selestial no ta opservá, òf den kua E no tin interes inmediato … E relashonnan entre Dios i kada alma ta asina distinto i pleno komo si fuera no tabatin un otro alma riba tera pa kompartí Su koutela, no un otro alma pa ken El a duna Su Yu stimá.”—Ellen G. White, Steps to Christ, p. 99, 100.

Preguntanan pa Diskushon:

Lo bo deskribí orashon komo bunita òf un karga? Kiko a kontribuí na bo perspektiva?

Tin asina tantu mensahe perspikas den e sita aki riba. Kua pensamentu ta resoná partikularmente ku bo?

Di e tres personahenan bíbliko ku a studia e siman akí (Daniel, Enok i Moises), ken su bida di orashon bo ta relashoná mas kuné, i dikon?