Lès 9

* 23 - 29 di mei

Piká, Evangelio, i Lei

Sabat

23 di mei

Lesa pa e Estudio di e Siman Akí:

Huesnan 14; Marko 9:42-48; Rom. 3:20; Mat. 5:17-18; Rom. 3:28; Mat. 7:24-29.

Versíkulo di Memoria:

“Nunka lo mi lubidá Bo preseptonan, pasobra pa medio di nan Bo a dunami bida. Mi ta di Bo, salbami; pasobra mi a buska Bo preseptonan” (Salmo 119:93,94, NKJV).

Sin duda, piká ta e opstákulo di mas grandi pa un relashon estrecho ku Dios. No solamente piká ta separá nos for di Dios awor (Isa. 59:2), sino tambe e ta gaña, hasi doló, konsumí, i finalmente destruí nos. Nos bataya kontra piká i e ami ta e bataya di mas grandi ku nos lo yega di enfrentá, ku implikashonnan tremendo, asta eterno.

Algun hende ta rechasá piká komo djis un parti regular di bida. Despues di tur kos, ta naturalesa humano pa disfrutá di plaser. Pero nos ta konsiderá piká leve pasobra sosiedat a bira asina kómodo kuné? Nos por bira rònt di e tópiko di piká, ku miedu ku nos lo ofendé un hende si nos yam’é na su nòmber, pero na final, mas nos skohe pa biba kómodamente kuné, mas leu nos lo slep bai for di un relashon saludabel ku Dios.

Sí, tur hende a peka, i nos pensamentunan, motibunan, akshonnan i palabranan ta heridá otronan, nos mes i Dios. Finalmente, piká ta destruí nos relashon ku Dios, pero Dios a revelá Su mes na nos pa medio di e konosementu di Su lei, ku ta tira lus riba e piká den nos bida.

E siman akí, laga nos eksplorá e motibu ku Dios a duna nos Su lei i, ora un hende violá e lei di Dios i konsekuentemente hasi piká, kiko òf ken por yuda restourá nan relashon ku Dios.

Djadumingu

24 di mei

Distraishon- i Tentashonnan

Lesa tokante e tentashonnan di Samson den Huesnan 14 i Huesnan 16:1,4,16,17. Aunke yamá pa Dios pa un propósito spesífiko, Samson a sirbi Dios miéntras el a sede na tentashon. Kiko e resultado di su bida ta siña nos?

E gran konflikto ta real, i nos tur ta envolví den dje. E bataya kósmiko ku a kuminsá den shelu awor ta desaroyando den kada un di nos mes bida tambe.

Satanas sa ku e tin ku saka tur loke e tin den e tempu ku nos ta bibando aden, djis promé ku Hesus bini, pa stroba nos di tin un relashon estrecho ku Dios. Kisas bo a ser distraí ku algu ku no nesesariamente por ta robes riba su mes, pero ta tuma asina tantu tempu i energia ku ta sobra masha tiki pa Dios. Kisas ta trabou, medionan sosial, hasi kompra, deporte òf kuminda. Ora nos tira un bon bista riba nos mes, nos lo mira ku sobrekonsumo i un desbalansa di kualke di e kosnan akí por pèrmití poko tempu pa Dios i otronan. E enemigu konosé kada un di nos debilidatnan i e tipo di kosnan ku ta distraí nos di pasa tempu ku Dios. Nos mester kòrda buska Dios promé (Mat. 6:33), promé ku nos kore drenta nos dia i tur loke por bini den nos direkshon.

Hesus ta komprondé nos kondishon, pero E ta reprendé nos apatia (Rev. 3:14-22). Aunke E ta Dios, E tabata tambe ser humano ku tabata sinti kansá, meskos ku nos (Juan 4:6). E tabata konosé e preshonnan di bida, meskos ku nos, pero hopi biaha E tabata haña alivio dor di bai su so pa hasi orashon na Su Tata (Lukas 5:16, Lukas 6:12, Marko 1:35, Mat. 14:23). E tabata sa ku tempu ku Su Tata tabata e mihó kos ku E por a hasi pa rekobrá forsa pa bringa tentashonnan. E ta e manera mihó i mas sigur pa nos tambe.

Samson a kai pasobra el a kere ku e tabata fuerte. E tabata dependé riba su mes forsa pa vense tentashonnan. Tur dia, kada un di nos ta enfrentá batayanan ku piká segun ku e enemigu di almanan ta purba debilitá i destruí nos relashon ku Dios. E konosé nos debilidatnan i ta abusá di nan pa asina stroba nos relashon ku Dios i pa trese kulpa i un sentido di indignidat riba nos, di kua tur tin tendensia di alehá nos for di Dios. Diabel ta traha pa kambia nos pensamentu, nos intenshonnan, i nos akshonnan pa asina haña un baluarte den algun parti di nos bida. Pero kòrda: Nos fe lo yuda nos para, i fe ta bini dor di tende e Palabra di Dios.

Djaluna

25 di mei

Fortalesanan den mi Relashon ku Dios

Tin hopi mensahe den Beibel ku ta papia tokante nos relashon ku Dios i e bareranan ku ta stroba nos di krese den Kristu. Konsiderá e palabranan akí di Pablo i Hesus:

“P’esei, laga esun ku ta kere ku e ta pará, tene kuidou pa e no kai” (1 Kor. 10:12, NKJV). Meskos ku Samson, outo-konfiansa lo hibabo na ruina.

“No zona tròmpèt bo dilanti manera e hipókritanan ta hasi ..., pa nan por haña gloria di hende” (Mat. 6:2, NKJV). Stòp di bisa tur hende kon bon bo ta! Sea humilde, meskos ku Hesus tabata humilde.

“Ma Ami ta bisa boso ku ken ku wak un muhé ku deseo p’e, ya kaba a kometé adulterio kuné den su kurason. Si bo wowo drechi ta ponebo peka, sak’é i tir’é for di bo” (Mat. 5:28-29, NKJV). Hasi tur kos pa kita e deseo for di bo kurason, pasobra esaki ta un barera pa bo relashon ku Dios.

“No husga, pa bo no ser husgá. Pasobra ku e huisio ku boso husga, boso lo ser husgá” (Mat. 7:1-2, NKJV). Stòp di ta asina krítiko i husga otronan. Dios ta e hues, pues lag’E ta asina (1 Kor. 4:5).

“Ma Mi ta bisa boso, stima boso enemigunan, bendishoná esnan ku ta maldishoná boso, hasi bon na esnan ku ta odia boso, i hasi orashon pa esnan ku ta usa boso ku mal intenshon i ta persiguí boso” (Mat. 5:44, NKJV). Stòp di odia bo enemigunan. Ora bo ta sinti negativamente pa ku esnan ku ta tratabo malu, mesora e ta pone un barera den bo relashon ku Dios. En kambio, kuminsá hasi orashon pa bo enemigunan i mira kon esaki ta kambia no solamente bo kaminata ku Dios sino tambe bo relashon ku otronan.

“Ma Ami ta bisa boso ku ken ku ta rabiá ku su ruman sin motibu lo ta den peliger di huisio” (Mat. 5:22, NKJV). Kisas bo a bin ta hustifiká dikon bo ta grita esnan serka di bo. Kon bo rabia ta impaktá bo relashon ku Dios, pa no menshoná esnan ku bo ta rabiá kuné? Esakinan ta djis algun área ku ta pone nos trompeká.

Hesus a spièrta tokante kiko nos mester hasi ora nos mannan, pianan i wowonan ta pone nos kometé piká. Di kiko Hesus tabata spièrta nos? Lesa Marko 9:42-48.

Djamars

26 di mei

E Lei

Kon lo bo a definí i deskribí piká na un no-kristian? Kon Beibel ta deskribí piká? Lesa Romanonan 3:20, i 1 Juan 3:4.

Piká ta un transgreshon di e lei di Dios (1 Juan 3:4), i piká tambe ta envolví den nos naturalesa (Salmo 51:5, Jer. 17:9). Pues, ta e lei ta trese na lus kiko piká ta realmente. E lei ta manera bisti un brel pa nos por mira klaramente kiko tin realmente rònt di nos òf usa un spil pa mira kon nos ta realmente. E ta trese klaridat i konvikshon na nos bida i nos karakternan, miéntras ku na mes momentu e ta bisa nos tokante e karakter di Dios i kiko ta importante p’E.

E Dies Mandamentunan (Eks. 20:3-17) a ser skirbí pa Dios su mes dede. Hesus a ripití nan importansia: “I lo bo stima SEÑOR bo Dios ku henter bo kurason, ku henter bo alma, ku henter bo mente i ku henter bo forsa. Esaki ta e promé mandamentu. I e di dos, meskos kuné, ta esaki: Stima bo próhimo manera bo mes. No tin otro mandamentu mas grandi ku esakinan” (Marko 12:30-31, NKJV). El a añadí: “Riba e dos mandamentunan akí henter e Lei i e Profetanan ta dependé” (Mat. 22:40, NKJV).

E palabranan di Dios na e israelitanan na Seru Sinai i na nos awe (Hebr. 1:1,2) ta bisa nos ku e lei ta tokante relashonnan. Dios a duna e lei komo un salbaguardia pa protehá nos relashon kunE i ku otronan. Sinembargo, Satanas a distorshoná e bunitesa di e lei di Dios pa asina algun hende mir’é komo un karga. Legalismo mas bien ku amor i libertat hopi bes ta mará na lei, aunke Beibel ta bisa nos: “Pasobra esaki ta e amor di Dios, ku nos ta warda Su mandamentunan, i Su mandamentunan no ta pisá” (1 Juan 5:3, NKJV).

Riba un eskala di 1 pa 5, kon presioso e Palabra bibu (i e lei, komo parti di dje) ta pa mi?
Ora mi ta warda e lei di Dios, e ta restringími òf ta fortalesémi? Kon mi por komprondé e lei mihó si mi ta kere ku e ta restringími?
Kiko lo por pasa si Dios su lei di amor p’E i otronan ser tresé den sènter di mi bida, mi famia i mi iglesia? Kiko lo por kambia den mi bida i mi relashonnan?

Djárason

27 di mei

Lei i Evangelio

Hesus Mes a splika di forma masha poderoso i breve kiko Su relashon ku lei tabata.

Den Mateo 5:17-18, kiko Hesus a bisa tokante e lei?

Di un forma similar na kon e fronteranan di mayornan pa nan yu ta revelá kiko nan ta balorá, e lei di Dios ta bisa nos tokante Su karakter i kiko ta importante p’E. Dios a duna nos Su lei pa protehá nos relashon kunE i un ku otro, sabiendo ku Su lei lo a guia kada aspekto di nos bida segun ku nos ta krese den djE. Despues di tur kos, ken no a yega di sufri e konsekuensianan teribel di loke piká, un violashon di lei, a kousa na kada un di nos?

Amor pa Hesus ta den e sènter mes di e lei. Hesus a bisa: “Si boso ta stimaMi, boso lo obedesé Mi mandamentunan” (Juan 14:15, NET). Ora nos ta stima Hesus genuinamente, opviamente nos lo ta obligá pa warda Su lei. Ora nos mira Su lei di forma kla, nos lo sinti nos obligá pa stima Hesus mas. I, mas importante ainda, mantené un vishon di e Krus i e morto ekspiatorio di Kristu einan pa nos semper dilanti di nos bista, ta e mihó manera pa fomentá nos amor pa Dios.

Ta p’esei e evangelio ta bai man den man ku e lei. Es desir, maske kuantu nos ta kere den e lei i den e importansia di ward’é, nos mester kòrda semper ku, den términonan di nos posishon hurídiko dilanti di Dios, lei ta kondená so. Lei nunka ta pordoná, nunka ta hustifiká, i nunka ta ekspiá. Al kontrario, e ta señalá dikon nos mester ser pordoná, dikon nos mester ser hustifiká, i dikon nos tin mester di ekspiashon. Ta p’esei, huntu ku e lei, asta fundamental pa nos komprondementu di e lei, tin e evangelio, e morto di Kristu na nos fabor, ku ta hasi pa nos loke e lei nunka por hasi: hustifiká nos dilanti di Dios.

Lesa e siguiente versíkulonan: Romanonan 3:28, Romanonan 4:13-16, Galationan 2:16, Galationan 3:13, Filipensenan 3:9. Kiko e versíkulonan akí ta siña nos ku por yuda nos, komo kreyentenan, pa warda lei sin bira legalista?

Djaweps

28 di mei

Sa i Hasi

Den e Sermon riba Seru, Hesus ta papia hopi tokante relashon, kunE i un ku otro. E ta bisa algu masha konmovedor na final di Su mensahe: “No ta tur hende ku bisaMi: Señor, Señor, lo drenta e reino di shelu, sino esun ku hasi e boluntat di Mi Tata den shelu” (Mat. 7:21, NKJV).

Hesus ta splika ku algun lo yama riba djE i sa klaramente tokante djE sin konos'E realmente. Naturalmente, buska konosementu ta importante, i Beibel ta bisa nos ku e pueblo di Dios por a ser destruí pa motibu di falta di konosementu di Dios i pasobra nan a rechasá nan konosementu di djE (Hos. 4:1,6,10). Nunka nos mester minimisá e importansia di bèrdat bíbliko atemporal. Pero si tal konosementu no ta kambia nos i ta profundisá nos kompromiso i nos kaminata ku Dios, e no ta sirbi pa nada. “I esaki ta bida eterno, ku nan por konoséBo, e úniko Dios berdadero, i Hesu-Kristu kende Bo a manda” (Juan 17:3, NKJV). Hesus a deklará ku e prerekisito pa drenta shelu ta di hasi e boluntat di Dios i finalmente konosé Dios, pasobra nos no por hasi Su boluntat sin konos’E. Esaki ta e faktor definitivo i un ekspektativa masha rasonabel. Si bo yunan ta bisa ku nan ta stimabo i generalmente ta hasi loke bo pidi, nan akshon ta revelá e profundidat di nan amor i rèspèt pa bo. Di mes manera, ora nos ta stima Dios, nos lo ke hasi Su boluntat, pasobra nos sa ku no tin nada mihó pa nos hasi! Nos kontesta na djE, i, finalmente, nos obediensia na djE komo un desborde di nos amor, ta mustra e naturalesa berdadero di nos relashon kunE.

Hesus ta konkluí e Sermon riba Seru lagando Su oyentenan ku un reto final konmovedor. Kiko e tabata? Lesa Mateo 7:24-29.

Ora nos realmente tende e mensahenan di Hesus, nos no por yuda di ser desafiá i kambiá. Pero, promé ku tur kos, nos oreanan mester ta habrí i nos kurasonnan reseptivo, pa asina e plan pa biba den un relashon estrecho ku Dios por ser grabá riba nos mes alma, ku kada rosea ku nos hala. Nos bida por ser konstruí riba e Baranka i e plan perfekto di Dios pa nos.

E plan akí di un relashon estrecho no ta un sekreto. E ta revelá den e páginanan di e Palabra inspirá di Dios, i E ta ofresé esaki na kada persona. Ta e eskoho personal di kada un pa asept’é pa medio di fe, pa reklamá e hustisia perfekto di Kristu, i despues pa biba e hustisia ei.

Djabièrnè

29 di mei

Pa mas Estudio

No mester sorprendé nos ku e tópiko di e lei por ta unu asina trosé i mal komprondé, mirando ku Satanas su reto final kontra Dios tabata tokante Su lei.

Algun hende den tempu di Hesus a pensa ku El a bin pa eliminá lei, pero esei no por tabata mas leu for di e bèrdat. Hesus a tira lus riba e lei i e karakter bunita di Dios i a bin pa kumpli kuné (Mat. 5:17-18) pa mustra nos kon Dios ta.
“Solamente komo ku un reverensia pa e Palabra Santu di Dios tabata ser tesorá den kurason di e hendenan, nan por a spera di kumpli ku e propósito divino. Tabata konsiderashon pa e lei di Dios ku a duna Israel fortalesa durante e reinado di David i e promé añanan di gobernashon di Salomon; tabata pa medio di fe den e palabra bibu ku reformashon a ser hasí den e dianan di Elias i di Josias. I tabata na e mesun Skrituranan di bèrdat akí, e herensia di mas riku di Israel, ku Jeremias a apelá den su esfuersonan pa ku reforma.”--Ellen G. White, Prophets and Kings, p. 465, 466.

Preguntanan pa Diskushon:

Kon kultura popular ta mira piká? Kon nos iglesia mester respondé?

Ki ora bo a mira personalmente kon piká ta destruí relashonnan ku Dios i ku otronan?

Obediensia na e lei di Dios tabata fásil òf difísil den bo bida? Ki faktornan a kontribuí na esaki?

Kon nos komo atventistanan di e di shete dia, kende nos nòmber mes ta mustra kon na serio nos ta tuma e lei, por evitá e trampa di legalismo, di dependé riba nos wardamentu di lei pa salba nos? (Hasi un eksperimento di pensamentu: riba e dia di huisio, riba kiko bo ta bai dependé ora tur bo pikánan ta ser tresé dilanti di un Dios santu i perfekto den huisio? Bo wardamentu di lei? Of e hustisia perfekto di Hesus na bo lugá?)

Kon konosementu (òf e falta di konosementu) por impaktá un hende su relashon ku Dios? (Lesa Prov. 24:3,13,14.)