Lès 8

* 16 - 22 di mei

Tin Fe

Sabat

16 di mei

Lesa pa e Estudio di e Siman Akí:

Marko 8:11-12; Mat. 15:21-28; Lukas 7:1-10; Efe. 2:8; Hebreonan 11; Rev. 14:12.

Versíkulo di Memoria:

“Fe ta mustra e realidat di loke nos ta spera; e ta e evidensia di kosnan ku nos no por mira” (Hebreonan 11:1, NLT).

Un hende a yega di bisa: “Fe ta manera WiFi. E ta invisibel, pero e tin poder pa konektábo na loke bo mester.” No tin duda: sin fe, lo no tabatin relashon ku Dios.

Kon bo fe ta awe? Bo fe den Dios a yega di tambaliá? Kisas bo a yega di eksperensiá algu ku a retabo te na e punto kaminda bo no tabata sa kon sigui padilanti ku bo relashon ku Dios. Of bo fe ta manera un rosa ku ta krese for di un taki bèrdè den un brote chikitu ku finalmente ta habri bira un flor oudas i kolorido i ta yena e kamber ku e ta aden ku un holó inolvidabel? Pasobra berdaderamente, “fe ta mustra e realidat di loke nos ta spera, e ta e evidensia di kosnan ku nos no por mira” (Hebr. 11:1, NLT). E no ta algu ku nos por generá dor di nos mes, pasobra “Dios a duna kada un un midí di fe” (Rom. 12:3, NKJV). Fe ta un don di Dios (Efe. 2:8-9), i asta e ora ei, nos fe den Dios ta posibel solamente pa motibu di loke Dios ta hasiendo kaba den i pa nos.

E siman akí, laga nos eksplorá e tópiko di fe: kiko hasi ku duda i inkredulidat; kon, di akuerdo ku Hesus, fe fuerte ta parse; i kiko ta nifiká tin “e fe di Hesus.”

Djadumingu

17 di mei

Djis Dunami un Señal!

Kisas bo a yega di tende ser bisá: “Si mi por a djis mira Laman Kòrá habri, òf mana riba suela, òf Hesus kura un hòmber siegu, lo mi a kere.” Of kisas bo mes a yega di tin e mesun tipo di pensamentunan ei.

Di otro banda, dikon lo mester ta mas fásil pa nos tin fe awor, ku e tabata pa esnan den tempu bíbliko antiguo? E israelitanan no tabatin un Beibel kompletu, ni nan no tabatin un historia asina largu pa wak bèk riba dje, manera nos tin. Moises a reforsá e importansia di wak bèk pa asina por kòrda e guiansa i bondat di Dios (lesa Deut. 4:7-10; Deut. 8:2-3). Kontrali na e israelitanan, nos tin 6.000 aña di historia di Beibel pa saka for di dje (lesa Juan 20:30-31 ).

Tur generashon ke un señal, i esun di nos no ta diferente. Pero señalnan ta tur rònt di nos. Si bo lesa Mateo 24, lo bo mira kuantu kos a kumpli i ta kumpli te awor.

Hende asta den tempu di Hesus tabata ke un señal ku Hesus tabata realmente Yu di Dios, aunke nan a risibí hopi señal. Kon Hesus a reakshoná? (Lesa Marko 8:11-12.)

Nos ta argumentá ku Hesus i ta tèst E meskos ku e fariseonan a hasi? Nos ta pon’E “[suspirá] profundamente den Su Spiritu” (Marko 8:12, NKJV) pa motibu di nos falta di fe, ora ku El a duna nos kaba tur loke nos mester pa kere? “E señalnan akí no tabata loke e hudiunan tabatin mester. Niun simpel evidensia eksterno por a benefisiá nan. Loke nan tabatin mester no tabata iluminashon intelektual, sino renobashon spiritual.”--Ellen G. White, The Desire of Ages, p. 406. Lo por ta ku nos tambe tin mester di renobashon spiritual, un kaminata genuino, real, momentu pa momentu ku Dios? Kisas en realidat nos no tin mester di un señal, pasobra nos tin hopi konosementu na nos alkanse, spesialmente for di nos mes Beibel.

Pues, en bes di pone Hesus “[suspirá] profundamente” pa motibu di nos falta di fe, mare nos por kòrda e palabranan ku Hesus a bisa Tomas: “Bendishoná ta esnan ku no a mira i tòg a kere!” (Juan 20:29; lesa tambe Hebr. 11:1). Dios no ta pidi nos pa nos tin fe siegu, El a duna nos asina tantu motibu kaba pa kere. I tòg, asta ku tur e motibunan akí, semper tin espasio pa duda. E klave ta pa enfoká riba loke ta afirmá fe, no riba loke ta trese duda.

Djaluna

18 di mei

Hesus Ta Mira Nos Fe

Kompará kon Hesus ta deskribí e fe di Su disipelnan den Marko 4:40 ku e fe di e muhé den Mateo 15:21-28.

Djis pasobra nos ta siguiendo Hesus no ta nifiká outomátikamente ku nos fe ta fuerte. De echo, algun hende a pretendé di ta kere, pero Hesus a diserní loke tabata realmente den nan kurason (Juan 2:23-25).

Lesa Lukas 7:1-10. Kiko nos ta siña tokante fe for di e relato akí?

Den Marko 9 nos ta lesa tokante e hòmber ku a bini serka Hesus pa asina Hesus por a saka e demoño for di su yu, pero ku por a solamente reuní sufisiente fe pa bisa: “Señor, mi ta kere; yuda mi inkredulidat!” (Marko 9:24, NKJV).

Den kada un di e interakshonnan akí, Hesus a nota e fe di hende, òf falta di esaki, i a realisá milagernan komo resultado di e fe ei òf pa fortalesé esaki.

Aunke Spiritu Santu ta impulsá nos pa kere, e enemigu di alma ke pa nos duda òf deskartá e envolvimentu di Dios den nos bida. “E inkredulidat ku ta ser karisiá den e alma tin un poder echisante. E simianan di duda ku nan a bin ta sembra lo produsí nan kosecha pero nan mester sigui koba kada rais di inkredulidat. Ora saka e matanan venenoso akí for di tera, nan ta stòp di krese pa falta di nutrishon den palabra i akshon. E alma mester tin e matanan presioso di fe i amor hinká den e tera di e kurason i entroná einan.”--Ellen G. White, Faith and Works, p. 17.

Ora nos tin duda tokante Dios, Su karakter, òf Su Palabra, kiko nos ta hasi ku nan? Dios no ta ignorá òf pasa rason humano por alto, pasobra El a krea nos den Su imágen i ta invitá nos pa dialogá kunE, manera El a hasi ku Abraham, Moises i Job. Dios ta invitá nos pa siña traha denter di Su patronchinan di rason grandi i infinito, asta si na sierto momento nos mester someté na loke nos no ta komprondé kompletamente.

Djamars

19 di mei

Fe No Ta un Sintimentu

Hesus a bisa ku si bo tin fe mes chikitu manera un simia di mòster, lo bo move serunan (Mat. 17:20). Si bo a yega di mira un simia di mòster, bo sa kon chikitu e ta. Tòg, teniendo fe asina chikitu por efektuá un kambio asina grandi. Fe mester ta, pues, masha importante i tambe mester ta sufisiente poderoso i fuerte pa hasi algu sobrehumano. Sinembargo, meskos ku un simia di mòster por krese bira un palu grandi (Mat. 13:31-32), nos fe mester krese i no keda státiko.

En bèrdat, nos tin mester di un midí di fe pa por tin un relashon ku Dios na promé lugá (lesa Rom. 12:3 ).

Kiko Efesionan 2:8 ta bisa nos tokante e ròl di fe den ser salbá? Dikon un hende no por bisa, ku rason: “Mi no tin fe pasobra Dios no a duna mi niun”?

Nos mester komprondé, na promé lugá, ku fe no ta un kos material; e ta un kontesta humano impulsá pa Spiritu Santu. Dios ta e inisiadó mizerikòrdioso, kende, pa medio di Spiritu Santu, ta hala nos serka djE Mes ora nos permitiE hasi esei (Jer. 31:3). Nos ta ser salbá pa grasia, pa medio di fe, ku ta un kontesta riba e grasia di Dios duná na nos atraves di e morto di Hesus. Nos ta salbá pasobra nos ta kere den Dios komo resultado di Su grasia. Esaki ta sinta den sènter di tin un relashon kunE.

Siguientemente, nos mester kòrda ku fe no ta un sintimentu. “Hopi hende no ta ehersé e fe ei ku ta nan privilegio i deber pa ehersé, i hopi bes ta warda riba e sintimentu ei ku fe so por trese. Sintimentu no ta fe ... Ta keda na nos pa ehersé fe, pero sintimentu alegre i e bendishon ta keda na Dios pa duna.”--Ellen G. White, Early Writings, p. 72.

Algun hende lo por sinti komo si fuera nan no tin fe pasobra nan no ta sinti nan mes serka di Dios òf no ta loke nan mester ta komo kristian. Pero fe ta tokante kere i konfia Dios, no solamente den bon tempu sino den skuridat òf den un tormenta, òf asta ora bo no por komprondé kompletamente kiko ta pasando den bo bida.

Sintimentu nunka mester dominá nos eksperensia religioso òf nos relashon ku Dios. Ta hustamente ora nos ta kere ku nos ta leu for di Dios ku nos mester ehersé nos fe i yama riba djE (manera e tata a hasi den Marko 9:24).

Djárason

20 di mei

Ehèmpelnan di Fe

Pasa algun tempu awe studiando Hebreonan 11, e gran kapítulo di fe. Les’é na bos haltu promé, sin stòp. Despues les’é un di dos biaha, i skirbi bo pensamentunan riba e siguiente preguntanan:

Lesa versíkulo 1 di nobo. Kiko bo ta spera awe, ku bo no por mira ainda? (Pensa riba nesesidatnan inmediato i soñonan eterno.)
Ki ròl fe ta hunga den bo testimonio personal i den bo kombershon?
Lesa versíkulo 3 atrobe, tokante Dios i Kreashon. Dikon, na hopi manera, e eksistensia di e Dios Kreador mester ta e kos di mas fásil pa aseptá pa fe?
Lesa versíkulo 6 i skirbi e mensahe di e versíkulo akí ku bo mes palabranan.
Versíkulonan 7-40 ta desempaketá bida di vários personahe bíbliko. Dikon fe ta e faktor sentral ku ta definí e fortalesa di e relashon di e hendenan akí ku Dios?

Konosé Dios i tin un relashon bibu i fuerte kunE ta rekerí fe. Kon bo por fortalesé bo fe òf animá un hende ku su fe ta tambaliá? At’akí djis algun idea:

Un fe chikitu (manera un simia di mòster) ta poderoso i ta tur loke bo tin mester pa kultivá un relashon ku Dios (Mat. 17:20). Tanten ku bo ta dispuesto pa traha huntu kunE, Dios lo yuda bo fe krese.

Fe ta bini dor di tende Dios papia ku nos den Su Palabra, Beibel (Rom. 10:17). Komprometé na estudio di Beibel i orashon diariamente.

Pidi Dios pa oumentá bo fe (Lukas 17:5). Meskos ku e tata ku a bin serka Hesus ku un yu poseí i ku “a grita i a bisa ku lágrima: ‘Señor, mi ta kere; yuda mi inkredulidat!’ ” (Marko 9:24, NKJV), nos por rekonosé nos inkredulidat i pidi Dios pa oumentá nos fe.

Fe i duda por eksistí huntu (Marko 9:24). No kana bai for di Dios simplemente pasobra bo tin pregunta. De echo, ta importante pa traha riba bo salbashon ku temor i temblamentu (Fil. 2:12-16) i pa “ta doño” di bo fe mas bien ku fia esaki for di un otro, manera sinku di e bírgennan a purba hasi (Mat. 25:8).

Respondé na Spiritu Santu i pidi pa mas di djE den bo bida.

Ehersé bo fe. Kòrda ku fe no ta un sintimentu, sino un desishon pa kere. Kòrda ku asta den skuridat, ora bo no por mir’E, Dios tei (2 Kor. 5:7).

Djaweps

21 di mei

E Fe di Hesus

Segun ku e mundu akí ta yega na su fin, parti di e mensahe di e tres angelnan ta deskribí e pueblo di Dios ku ta warda e mandamentunan di Dios i tin e fe di Hesus.

Lesa Revelashon 14:12. Kiko “e fe di Hesus” ta nifiká?

Si bo studia kon atventistanan di e di shete dia a komprondé hustifikashon pa medio di fe, lo bo mira ku den dékada 80 di siglo 19, un komprondementu di e fe di Hesus i e mensahe di e tres angelnan tabata ser enfatisá grandemente den iglesia. Te na e momentu ei, e iglesia a pone hopi énfasis riba e lei, i e tabatin mester di mas énfasis di e evangelio. Ellen G. White a resumié bon: “E mandamentunan di Dios a ser proklamá, pero e fe di Hesu-Kristu no a ser proklamá dor di atventistanan di e di shete dia komo di igual importansia, e lei i e evangelio ta bai man den man.”-- Selected Messages, buki 3, p. 172.

Aunke Hebreonan 11 ta menshoná hòmber- i muhénan piadoso ku tabatin fe fuerte, niun hende tabatin un fe ku ta komparabel ku e fe di Hesus.

Lesa Mateo 26:36-42. Kiko esaki ta bisa nos tokante e fe di Hesus na e momentu krusial akí?

Ora nos tin e fe di Hesus, esaki ta nifiká no solamente ku, dor di obediensia na djE i na Su Palabra nos lo imitá e fe ku E tabatin den Dios, sino tambe ku nos lo tin un eksperensia diario aktivo i bibu ku Hesus. E ta nifiká konosé i aktua riba e echo ku sin hasi Hesus e sentro di nos bida diario, nos no por tin un relashon salbador ku Dios.

Tin e fe di Hesus ta nifiká: tin Hesus permanesiendo den nos, i pues Su fe den nos kurason, pasobra Hesus ta e berdadero fundeshi di nos fe. Tin biaha nos fe lo por ta suak i débil. Pero Hesus ta digno (Rev. 5:9), i nos por tin Su fe, tantu reflehá den nos mes eksperensia komo siendo akreditá na nos, pa medio di Su don di grasia na tur ku ta kere.

Djabièrnè

22 di mei

Pa mas Estudio

Nos ta ser hustifiká (pordoná i rekonsiliá ku Dios) pa medio di fe (Rom. 5:1). E ora ei nos ta ser santifiká tambe (duná poder pa ta meskos ku Hesus) pa medio di fe (Echonan 26:18). Ora nos invitá Hesus den nos bida, nos ta bira tambe yunan di Dios pa medio di fe (Juan 1:12). Nos ta biba pa medio di fe den e Yu di Dios (Gal. 2:20). “Aparentemente nada ta mas indefenso, sinembargo realmente mas invensibel, ku e alma ku ta sinti su insignifikansia i ta dependé totalmente riba e méritonan di e Salbador. Pa medio di orashon, pa medio di estudio di Su palabra, pa medio di fe den Su presensia permanente, e debilidat di sernan humano por biba den kontakto ku e Kristu bibu, i E lo tene nan ku un man ku nunka lo laga bai.”--Ellen G. White, The Ministry of Healing, p. 182. “Nan fe mester ser fortalesé dor di orashon ferviente i yunamentu, i humiliashon di kurason. Nan mester ser hasí bashí di e ami, i ser yená ku e Spiritu i poder di Dios. Súplika sinsero i perseverante na Dios den fe, fe ku ta hiba na dependensia kompleto riba Dios, i konsagrashon sin reserva na Su obra so por benefisiá pa trese hende na yudansa di Spiritu Santu den e bataya kontra prinsipadonan i podernan, e gobernantenan di skuridat di e mundu akí, i spiritunan malbado den lugánan haltu.—Ellen G. White, The Desire of Ages, p. 431.

Preguntanan pa Diskushon:

Kua sinku puntonan prinsipal ta destaká den e sita mesora aki riba ora ta trata di kolaborá ku Spiritu Santu kontra e enemigu?

Ki papel fe ta hunga den e bataya akí?

Kon bo ta mira esaki awor akí den bo mes bida?

Lesa Hebreonan 10:23. Dikon ta importante pa tene duru na nos konfeshon di fe?

Kon frekuente bo ta konsiderá e bèrdat akí ku, ora bo ta sintibo indefenso, e ta un oportunidat pa bo dependé mas kompletamente riba Hesus?