Lès 6

* 1 - 7 di ougùstùs

Donnan Spiritual

Sabat

1 di ougùstùs

Lesa pa e Estudio di e Siman Akí:

1 Korintionan 12; Efe. 4:11-13; 1 Korintionan 13; 1 Pe. 4:8-11; 1 Kor. 14:27; Amos 3:7.

Versíkulo di Memoria:

"Sigui amor, i anhelá e donnan spiritual sinseramente, spesialmente pa bo por profetisá” (1 Korintionan 14:1, ESV).

Meskos ku un kurpa humano, e iglesia ta un pero tin hopi miembro, kada un ku diferente ròl, funshon i donnan. Praktiká ku amor, e donnan spiritual akí ta promové un sentido di unidat ku ta reflehá e karakter di e Dios triuno.

E siman akí nos lo eksaminá 1 Korintionan 12-14 i su siñansa riba donnan spiritual. E sekshon akí ta parti di un unidat un poko mas grandi, kaminda Pablo ta trata e komportashon kristian sperá den ambiente religioso (1 Korintionan 11-14). Pablo su preokupashon prinsipal tin di haber ku e problema di reunionnan desordená. Su kontesta riba e problema akí ta ku e iglesia ta un kurpa ku su partinan tin diferente funshon ku ta kontribuí na “edifikashon di e kurpa di Kristu” (Efe. 4:12, NKJV). Den kòrtiku, Dios a duna e iglesia donnan spiritual pa asina promové unidat atraves di diversidat.

Siguramente, Pablo tin den mente ainda e problema di fakshonalismo ku ta ser atendé den e promé kuater kapítulonan di 1 Korintionan, kaminda e kontesta riba e falta di akuerdo entre miembronan di iglesia ta unidat den Kristu. Awor, e ta desaroyá e idea ei dor di presentá su komprondementu di e ròl di donnan spiritual. Di akuerdo ku Pablo, union den Kristu i e Spiritu ta e úniko medio pa evitá skisma.

Djadumingu

2 di ougùstùs

Variedat di Donnan

Pablo ta introdusí un tópiko nobo den 1 Korintionan 12:1, ku e fórmula “awor tokante.” Eruditonan ta diskutí si e ta papiando tokante “donnan spiritual” òf “hende spiritual” pasobra e frase griego tōn pneumatikōn ta pèrmití tur dos interpretashon. “Donan spiritual” ta preferibel den lus di 1 Korintionan 12:4, kaminda Pablo ta referí klaramente na donnan spiritual. Den 1 Korintionan 12:2,3, Pablo ta señalá ku e promé don di e Spiritu ta e konfeshon ku kurashi ku Hesus ta Señor. Den tempu di Tèstamènt Nobo, bisa ku Hesus ta Señor ta nifiká bisa ku Caesar no ta (Echonan 17:7; tambe Juan 19:12,15). Esaki tabata ser mirá komo instigashon kontra e poder imperial i, p’esei, tabata kastigabel ku morto.

Hesus i Pablo a enfatisá ku fe den Dios, asta den bista di persekushon i menasa di morto, ta un don di e Spiritu. En realidat, fe ta e don di mas básiko. No ta sorprendente ku fe ta di promé riba e lista den 1 Korintionan 13:13. Ku fe ta un don spiritual ta evidente dor di e deklarashon di Pablo den 1 Korintionan 12:9. Sinembargo, tin hopi otro don. E echo ku Spiritu Santu ta distribuí e diferente tiponan di don “na kada un individualmente manera E ke” (1 Kor. 12:11, NKJV) ta proba ku nan tur ta nesesario.

Lesa 1 Korintionan 12:1-6. Kiko ta e énfasis di e pasashi akí?

E ripitishon di “variedatnan” ta enfatisá e multiplisidat di donnan. Loke Pablo ta menshoná komo “donnan spiritual” den 1 Korintionan 12:1 ta ser desaroyá den versíkulonan 4-6, atraves di tres diferente ángulo: “donnan” (charisma), “servisionan” òf “ministerionan” (diakonia), i “aktividatnan” (energēma). Aunke e palabranan akí ta nifiká kosnan diferente, ta importante pa no hasi un distinshon fini entre nan pa motibu di e paralelismo di e pasashi. Mester tuma nota tambe ku e donnan spiritual ta destiná pa promové unidat basá riba e karakter triuno di Dios (lesa tambe Efe. 4:8-11). Miéntras ku e Spiritu ta otorgá donnan na kreyentenan, ta Dios ta empoderá nan pa sirbi Kristu den e komunidat di kreyentenan (1 Kor. 12:5,6). Kada kreyente ta ser duná donnan individualmente (1 Kor. 12:11), ma nan tur ta pa benefisiá e komunidat di kreyentenan komo un totalidat.

Djaluna

3 di ougùstùs

Unidat Atraves di Diversidat

E lenguahe di unidat introdusí den 1 Korintionan 12:4-6 ("e mesun Spiritu," "e mesun Señor," i "e mesun Dios") ta ser desaroyá den restu di 1 Korintionan 12. Esaki ta ser hasí evidente dor di Pablo su uso di frasenan manera "un i e mesun Spiritu" (1 Kor. 12:11, NKJV), "e kurpa ta un" (1 Kor. 12:12), "un kurpa” (1 Kor. 12:12-13,20), “un Spiritu” (1 Kor. 12:13 [dos biaha]), i “e mesun pèrkurashon pa otro” (1 Kor. 12:25, NKJV).

Huntu ku e konsepto di unidat, Pablo ta destaká e diversidat di miembronan den e kurpa di Kristu pa medio di ekspreshonnan manera “hopi miembro” (1 Kor. 12:12,20), “nos tur a ser batisá” (1 Kor. 12:13, NKJV), “no un miembro sino hopi” (1 Kor. 12:14, NKJV), “henter kurpa” (1 Kor. 12:17). “kada un di nan” (1 Kor. 12:18, NKJV), “miembronan di e kurpa” (1 Kor. 12:22-23), i “tur e miembronan” (1 Kor. 12:26). E énfasis akí riba tantu unidat komo diversidat ta indiká ku donnan spiritual tin komo meta pa promové unidat atraves di diversidat.

E unidat akí meimei di diversidat mester reflehá e karakter di Dios. E Tata ta ún persona, e Yu ta otro persona, i Spiritu Santu un otro. Nan tres ta mantené nan individualidatnan miéntras nan ta traha huntu pa edifiká e iglesia i empoder’é pa mishon (1 Kor. 12:4-6, Efe. 4:11-13).

Lesa 1 Korintionan 12:12-31. Dikon e analogia di un kurpa ku su hopi partinan ta apropiá pa representá e iglesia i su miembronan?

Ún pensamentu sentral den 1 Korintionan 12 ta ku aunke e miembronan di e kurpa individualmente ta asina diferente for di otro (1 Kor. 12:15-20), nan tur ta dependiente di otro (1 Kor. 12:21-26). E pianan ta dependé di e wowonan pa mira unda nan mester kana; na nan turno, e wowonan no por mishi ku nada, solamente e mannan por. Tambe, e idea ku algun miembro ta mas débil (1 Kor. 12:22) òf ménos honorabel (1 Kor. 12:23) ku otronan ta solamente un impreshon, pasobra tur ta nesesario (1 Kor. 12:22).

Desafortunadamente, tabatin un tendensia bou di e korintionan pa balorá algun don pa negligensia di otronan. Pa rektifiká e eror akí, Pablo a yama nan atenshon na amor, ku ta “un kaminda mas ekselente” (1 Kor. 12:31, NKJV). Ku otro palabra, no importá kiko e don ta, si praktik’é sabiamente i ku amor, e ta agradabel pa Dios.

Djamars

4 di ougùstùs

"Un Kaminda Mas Ekselente"

“Amor no ta un don entre hopi. E ta e medio atraves di kua tur e donnan ta alkansá nan propósito final.”--Carl P. Cosaert, “1 Corinthians,” Andrews Bible Commentary: New Testament (Berrien Springs, MI: Andrews University Press, 2022), p. 1643.

Lesa 1 Korintionan 13:1-7, i 1 Pedro 4:8-11. Kiko ta e ròl di amor pa loke ta trata donnan spiritual?

1 Korintionan 13 ta siña ku solamente atraves di amor e donnan spiritual por ser usá apropiadamente. Pablo ta kuminsá 1 Korintionan 13 dor di aludí na donnan menshoná den 1 Korintionan 12, solamente pa enfatisá nan falta di balor si nan no ta ser impulsá pa amor. Pues, konosementu (1 Kor. 12:8) i fe (1 Kor. 12:9), asta un fe “pa kita serunan for di nan lugá” (1 Kor. 13:2, ESV), no ta nada sin amor (1 Kor. 13:2). Sin amor, e abilidat pa papia den lenga (1 Kor. 12:10,28,30) ta ser redusí meramente na “un gòng resonante òf un simbal ku ta zona” (1 Kor. 13:1, NIV). Di mes manera, asta e don importante di profesia ta nada sin amor (1 Kor. 13:2).

Den 1 Korintionan 13:4-7, Pablo ta enfoká riba kiko amor ta i kiko e no ta; mas partikularmente, kiko amor ta hasi i kiko e no ta hasi. E verbonan ku el a skohe pa karakterisá amor ta indiká ku amor no ta asina tantu algu ku nos ta sinti sino ku e ta algu ku nos ta praktiká. Pues, Pablo ta menshoná ku amor

ta mustra pasenshi;
ta mustra bondat;
ta regosihá den e bèrdat;
ta soportá tur kos;
ta kere tur kos;
ta spera tur kos; i
ta soportá tur kos.

Al kontrario, amor

no ta envidiá;
no ta gaba;
no ta hincha ku arogansia;
no ta komportá su mes grosero;
no ta buska su mes [derechonan];
no ta bira iritá fásilmente;
no ta tene registro di erornan;
no ta deleitá den maldat.

E total akí di 15 verbo ta proveé guia sólido pa komportashon apropiá den e práktika di donnan. Notablemente, e diskushon akí riba e berdadero naturalesa di amor ta situá hustamente entre 1 Korintionan 12 i 14, kaminda Pablo ta trata e konflikto tokante donnan spiritual. En bèrdat, amor ta e klave pa e uso sabí di donnan spiritual. Amor ta ser poné tambe banda di fe i speransa, “pero esun di mas grandi di esakinan ta amor” (1 Kor. 13:13, NKJV).

Djárason

5 di ougùstùs

E Don di Lenga

Ke tal di e don di lenga? Den liña ku e manifestashon di e don otro kaminda den Beibel (Marko 16:17, Echonan 2:1-13, Echonan 10:44-48, Echonan 19:6), e don di lenga den 1 Korintionan ta mas probablemente e abilidat otorgá dor di e Spiritu pa papia den idiomanan strañero.

Pablo ta menshoná e don di lenga den e lista di donnan den 1 Korintionan 12:8-10 (lesa tambe 1 Kor. 12:28, 30; 1 Kor. 13:1,8). Sinembargo, e ta referí na dje repetidamente den 1 Korintionan 14. En bèrdat, e palabra griego glōssa (“lenga”) ta aparesé mas ku binti biaha den 1 Korintionan 12-14, ku diessinku menshon den 1 Korintionan 14 so. Ademas di esakinan, e palabra griego heteroglōssos (“un otro lenga”) tambe ta aparesé, den 1 Korintionan 14:21. E kantidat haltu akí di referensia na e don di lenga ta sugerí ku e asuntu akí ta di preokupashon partikular pa Pablo. E mal uso i abusu di e don akí dor di e iglesia na Korinto a kousa desòrdu i konfushon den adorashon públiko (1 Kor. 14:23,27,33,40).

Lesa 1 Corintionan 14:5,13,26,27, i 1 Corintionan 12:10 i 30. Ki instrukshon partikular Pablo a duna relashoná ku e don di lenga?

E motibu ku e don di papia den lenga mester bai man den man ku esun di interpretá nan ta ku lenga mester ta komprendibel (1 Kor. 14:9); di otro manera, no tin benefisio den usa e don (1 Kor. 14:6). Esaki ta splika dikon Pablo a pone asina tantu énfasis riba interpretashon i komprondementu. Opviamente, e no ta kritikando e don di lenga mes, sino, manera nos lo mira mañan, e prominensia eksesivo ku e korintionan a atribuí na dje, ku a hiba na e negligensia di e don di profesia.

Na e punto akí, ta importante pa nota ku aunke Pablo tabata deseá ku tur e korintionan por a papia idiomanan straño (1 Kor. 14:5), e no a spera ku esei lo a sosodé (1 Kor. 12:10). Pues, e pensamentu ku “tur hende mester papia den lenga promé ku reklamá boutismo den Spiritu Santu ta un pervershon di e siñansa di Pablo den 1 Korintionan 12 i 14.”--Raoul Dederen, Handbook of Seventh-day Adventist Theology, edishon elektróniko, tomo 12 di e Serie di Referensia di Komentario (Hagerstown, MD: Review and Herald Publishing Association, 2001), p. 620.

Djaweps

6 di ougùstùs

E Don di Profesia

E don di profesia ta okupá un lugá prominente den Pablo su diskushon riba donnan spiritual. Interesantemente, e don di profesia ta ser menshoná normalmente promé ku e don di lenga (1 Kor. 12:10,28; 1 Kor. 13:8). Ora e don di lenga ta ser menshoná promé, esaki ta solamente pa enfatisá su falta relativo di importansia kompará ku e don di profesia (1 Kor. 14:4-5,6,22).

Lesa Efesionan 4:11-13, i 1 Korintionan 14:3,4. Kiko e pasashinan akí ta bisa tokante e propósito di donnan spiritual en general i e don di profesia en partikular?

E don di profesia ta destiná pa proveé edifikashon, eksortashon, i konsuelo (1 Kor. 14:3; kompará ku Echonan 15:32). Esaki ta sugerí ku profesia no ta asina tantu tokante pronostiká futuro sino tokante kon biba den presente. E verbo griego prophēteuō por nifiká sea “bisa algu di antemano” òf “bisa algu na nòmber di un otro hende.” Por ehèmpel, e promé sentido ta ser mirá den Echonan 2:29-31 (kompará ku Amos 3:7), kaminda e idea ku David ta un profeta ta ser spliká komo “mira padilanti.” E di dos sentido ta ser mirá den Echonan 15:32, kaminda Hudas i Silas ta ser identifiká komo profeta. Nan “profesia,” sinembargo, a konsistí den enkurashá i fortalesé “e rumannan ku hopi palabra” (ESV).

For di Efesionan 4:11-13 nos ta siña ku e donnan spiritual no a stòp den e era apostóliko. Nan mester keda te na fin (Echonan 2:39). Sinembargo, si un hende ta pretendé di ta un profeta, e mester ser evaluá basá riba e Skrituranan. Papiando ampliamente, kuater regla mester ser satisfasé.

e profesianan inkondishonal semper ta bira realidat (Deut. 18:22; Jer. 28:8-9).
e mensahe ta di akuerdo ku esun di profetanan anterior (Deut. 13:1-3, Isa. 8:20).
e bida diario ta demostrá un kompromiso ku Kristu (1 Juan 4:1-3).
Hesus a bisa ku profetanan falsu lo ser konosí pa nan frutanan (Mat. 7:15-20).

Esaki ta bèrdat tambe pa loke ta trata profetanan berdadero.

E buki di Revelashon ta indiká ku e don di profesia ta un karakterístika distintivo di e iglesia remanente (Rev. 12:17, Rev. 19:10). Komo Atventistanan di e di Shete Dia, nos ta kere ku e don di profesia a ser otorgá na Ellen G. White i ta ser reflehá den su eskritonan.

Djabièrnè

7 di ougùstùs

Pa mas Estudio

Lesa Roswell F. Cottrell, "Spiritual Gifts," p. 5-16, den Ellen G. White, Spiritual Gifts, tomo 1.

"Laga hende sali pa traha, konfiando den Señor, i E lo bai ku nan, konvensiendo i kombertiendo almanan. Un obrero por ta un bon oradó, un otro un bon eskritor, un otro por tin e don di orashon sinsero i ferviente, un otro e don di kanto. Un otro por tin poder spesial pa splika e palabra di Dios ku klaridat. I kada don lo bira un poder pa Dios pasobra E ta koperá ku e obrero. Na un Dios ta duna palabra di sabiduria, na un otro konosementu, na un otro fe. Pero tur mester traha bou di e mesun kabes. E diversidat di donnan ta hiba na un diversidat di operashonnan, ‘ma ta e mesun Dios ku ta obra tur kos den tur hende’ (1 Kor. 12:6).

“No laga niun hende despresiá e supuesto donnan menor. Laga tur hende bai traha. No laga niun hende dobla su mannan den inkredulidat pasobra e ta kere ku e no por hasi ningun obra poderoso. Stòp di wak riba bo mes. Wak na bo Lider. Den mansedumbre, sinseridat i amor, hasi loke bo por.”--Ellen G. White, den The Advent Review and Sabbath Herald, 12 di aprel 1906.

"Nos kada un mester di e yudansa ku nos por risibí di otro mentenan. Dios lo obra den otro mentenan ku esun di nos. E vários donnan duná na diferente hende ta pa meskla pa 'perfekshon di e santunan, pa e obra di e ministerio, pa edifikashon di e kurpa di Kristu' (Efe. 4:12). ...

“Semper lo tin opstákulonan nos dilanti, pero nos mester sigui nos Lider, i enfrentá nos difikultatnan unidamente, man den man.”--Ellen G. White, The Upward Look, p. 141.

Preguntanan pa Diskushon:

Pensa un tiki mas riba e don di profesia. Dikon profesia ta mas importante ku lenga si nan no ta ser interpretá? Si ta nesesario, lesa 1 Korintionan 14 atrobe pa asina rekapitulá e argumentunan di Pablo.

Den klas, papia tokante e bida i ministerio di Ellen G. White i dikon nos, komo un iglesia, ta kere ku enbèrdat el a manifestá e don di profesia. Ki gran bendishonnan ta bini pa e iglesia for di e don akí? Kiko tambe ta e retonan pa sa kon usa e don akí mihó?

Pensa riba tres pa sinku hende ku ta stimabo genuinamente. Kon bo sa ku nan amor pa bo ta berdadero? Kiko esaki ta bisabo tokante dikon Pablo a papia asina tantu tokante amor den su diskushon riba donnan spiritual?

Maske kon importante amor ta, dikon esei no mester ta e úniko kriterio pa husga si un hende ta papia bèrdat òf nò i ta digno di ser skuchá?