Skirbi karta ta un aktividat hopi bieu ku no a bira antikuá. Nos a kambia solamente e manera ku karta ta ser skirbí. Sí, medio sosial a reemplasá papel. Sinembargo, den nan esensia, e-mail i otro forma di karta elektróniko ta kumpli básikamente e mesun funshon: nan ta konektá hende dor di interkambiá informashon, sintimentu i pensamentu.
Pakiko hende ta skirbi karta? Un posibel kontesta ta ku nan tin algu di bisa. Asina tabata ku apòstel Pablo. Aunke e tabatin asina hopi kos di bisa, no semper Pablo tabatin e oportunidat pa papia kara kara ku esnan ku e ker a papia kuné.
Asina ta ku el a skirbi karta en kambio, manera na e Korintionan, ku ta kontené algun di e bèrdatnan di mas profundo di Skritura. Entre nan tin: “Mi a disidí di no sa nada entre boso, eksepto di Hesu-Kristu i E krusifiká” (1 Kor. 2:2, ESV), i “Pasobra boso konosé e grasia di nos Señor Hesu-Kristu, ku aunke E tabata riku, tòg pa boso motibu El a bira pober, pa asina boso, pa medio di Su pobresa, por bira riku” (2 Kor. 8:9, ESV). I ke tal di e himno impreshonante pa stima den 1 Korintionan 13?
Na otro banda, kualke hende ku lesa e kartanan di Pablo na e Korintionan inevitablemente lo sinti konfundí, no solamente pa motibu di algun problema serio den e iglesia, manera inmoralidat seksual, sino tambe pa motibu di e pelea chikí i divishonnan sin sentido entre e miembronan. Si bo ta pensa ku bo iglesia tin problema desafiante, prepará bo mes pa mira e avalancha di problemanan ku Pablo mester a atendé na Korinto. Kisas e problemanan di bo iglesia lokal no ta tan signifikante manera bo ta imaginá. Probablemente lo bo mira ku kosnan na Korinto tabata hopi mas pió.
Pa perturbadó ku e problemanan na Korinto tabata, e kartanan na e Korintionan ta yama nos atenshon, no pa motibu di e problemanan, sino pa motibu di e manera remarkabel ku Pablo ta enfrentá nan. Dor di eksortá e miembronan di iglesia pa evaluá nan mes, nan komportashon, i e kultura rònt di nan den lus di e evangelio di Hesu-Kristu, e ta exaltá e mensahe di e Krus. Pa usa palabranan di Pablo mes otro kaminda, kualke norma mas abou ku e mensahe di e evangelio mester ser mirá komo “anatema” (Gal. 1:8–9, ASV).
Den tempu di Pablo, Korinto tabata famoso pa su rikesa i komèrsio fuerte, tur esaki danki na su haf, arkitektura, konstrukshon di barku, i produkshon di serámika. E siudat tabata un sentro finansiero importante. No opstante, e tabata konosí tambe pa su inmoralidat seksual, kakofonia religioso, i santuarionan dediká na vários diosnan. En bèrdat, bida diario na Korinto tabata marká pa idolatria flagrante. E trasfondo históriko-kultural akí ta yuda nos komprondé e preokupashonnan prinsipal di Pablo tokante e kristiannan den e siudat ei i, konsekuentemente, su eksortashonnan na nan.
E trimèster akí, nos lo analisá e kartanan di Pablo na e Korintionan. Den e dos bukinan remarkabel akí di Tèstamènt Nobo, e apòstel ta presentá e mensahe di e evangelio komo e esensia di bida i testimonio kristian, e lèns dor di kua tur otro kos mester ser huzgá. Sin importá e desafionan ku kada un di nos individualmente òf e iglesia en general ta enfrentá den nos biahe pa shelu, e kontesta pa e problemanan di mas kompliká den nos trabou pa Kristu ta meskos ku pa e Korintionan: “Hesu-Kristu i E krusifiká” (1 Kor. 2:2, NKJV).
Hesus ta bin pronto. Esaki ta un tempu pa mas unidat den Kristu, pa un apertura na Spiritu Santu manera nunka promé, pa uso diligente di e donnan spiritual, i pa un eksperensia mas profundo ku nos Señor resusitá. Ta tempu pa un ministerio kristian genuino, envolvimentu den mayordomia i mishon, guera spiritual kontra siñansanan falsu, i kresementu den grasia, amor i kompañerismo. Esaki ta un tempu pa keda firme i ta fiel na e mensahe di e Krus, i e kartanan di Pablo na e Korintionan ta siña nos pa hasi hustamente esei.