Tratando ku Maestronan Falsu

Ayera nos a mira ku Pablo i su kompañeronan di trabou a ehersé nan ministerio komo un guera spiritual, i a hasi esaki usando e armanan di Dios. Awe nos lo mira ku maestronan falsu ta aktua segun kriterionan humano. Nan ta gaba inapropiadamente. Na su turno, Pablo ta gaba solamente den Señor. Manera el a skirbi: “Ma ‘esun ku ta gaba, lag’é gaba den SEÑOR’ ” (2 Kor. 10:17, NKJV).

Lesa 2 Korintionan 10:13-17. Kon un atmósfera di kompetensia por perhudiká e predikashon di e evangelio?

Pablo su uso di lenguahe ku ta gaba su mes a intrigá intérpretenan atraves di siglonan. Sinembargo, gabamentu di mes tabata un práktika komun den e mundu antiguo i tabata ser kontrolá dor di konvenshonnan sosial pa evitá di ofendé e oudiensia. Pablo tabata konosé e konvenshonnan ei, i el a sigui nan. Ademas, Pablo ta mustra bon kla ku su manera di gaba ta distinguí su mes for di esun di e maestronan falsu. E ta gaba den Señor (2 Kor. 10:17). Esaki ta un sita for di Tèstamènt Bieu: "Laga esun ku ta gaba gaba den esaki, ku e ta komprondé i konosémi, ku Ami ta e SEÑOR ku ta praktiká amor firme, huisio i hustisia riba tera" (Jer. 9:24, ESV). Dor di sita e pasashi akí for di Jeremias, Pablo ta mustra ku ta Kristu ta den enfoke, e amor, huisio i hustisia di Kristu.

Ku otro palabra, Pablo su gabamentu ta enfoká riba e logronan di Dios den Kristu. Pues, su gabamentu ta bíbliko i, pues, inofensivo. Di otro banda, su oponentenan a drenta den un atmósfera di kompetitividat dor di kompará nan mes ku otro. Esaki ta bobedat! (2 Kor. 10:12).

Den 2 Korintionan 10:14-16, Pablo ta insinuá ku prediká e evangelio ta e enfoke prinsipal di su ministerio, tantu na Korinto komo den regionnan mas ayá di Korinto. Pablo su amor pa Hesus a hib’é na papia konstantemente tokante e bon nobo di salbashon, hañá den e morto i resurekshon di Kristu.

Kontrali na e maestronan falsu na Korinto ku a elogiá nan mes, Pablo a ser elogiá i aprobá pa Dios (2 Kor. 10:12,18). El a ser "yamá pa ta un apòstel di Hesu-Kristu pa medio di e boluntat di Dios" (1 Kor. 1:1, NKJV). E tabata fiel na e yamada akí te na fin di su bida (2 Tim. 4:7).

Tèstamènt Nobo ta kontené vários spièrtamentu kontra maestronan falsu den komunidatnan kristian. Hesus Mes a spièrta e disipelnan tokante e mesun kos akí (Mat. 7:15-20). E apòstelnan tambe a yama atenshon na dje (Gal. 1:6-9, 1 Tim. 6:3-5, 2 Pe. 2:1-3).

Lesa 2 Korintionan 11:1-15. Kon Pablo ta deskribí e retonan ku e ta enfrentando ku e maestronan falsu akí?

Pablo ta desenmaskará e trabou di maestronan falsu. Na mes momento, e ta indiká ku su ministerio ta sentrá riba Kristu. E ta kompará e iglesia na Korinto ku un brùit i ta identifiká su mes komo su tata, ku e responsabilidat pa present’é na Kristu (2 Kor. 11:2). E ta hasi esei pasobra e ta stima e iglesia (2 Kor. 11:11). Asina, e tabata asta dispuesto pa no ta un karga finansiero p’e, aunke e tabatin e derecho di ser sostené dor di dje (2 Kor. 11:7-12).

Di otro banda, e “apòstelnan di mas eminente” (irónikamente, esaki probablemente ta referí na e maestronan falsu) ta ser kompará ku e kolebra ku a gaña Eva (2 Kor. 11:3). Meskos ku Satanas den Hòfi di Eden, e maestronan falsu na Korinto ta ser karakterisá pa engaño i korupshon (2 Kor. 11:3,4, NKJV). Pablo su preokupashon prinsipal tabata ku nan por a hiba e korintionan na dual bai for di nan deboshon sinsero i lealtat na Kristu.

E intrusonan a prediká un mensahe diferente ku Pablo a prediká, un Hesus diferente i un evangelio diferente (2 Kor. 11:4). Esaki ta mustra ku no ta tur hende ku ta prediká Hesus ta un instrumento enkargá pa Dios. Den e sentido ei, Hesus Mes a bisa: “No ta tur hende ku bisaMi: ‘Señor, Señor,’ lo drenta e reino di shelu, ma esun ku hasi e boluntat di Mi Tata den shelu" (Mat. 7:21, NKJV). Den Galationan 1:6-9, Pablo ta bisa ku ken ku prediká un evangelio diferente ta trese un maldishon riba su mes, ma algun hende na Korinto a tolerá e tipo di eror akí.

Pablo ta eksponé e apòstelnan falsu dor di bisa ku nan ta “obreronan engañoso, ku ta transformá nan mes den apòstelnan di Kristu” (2 Kor. 11:13, NKJV). Nan ta disfrasá nan mes komo apòstel di Kristu, meskos ku “Satanas ta disfrasá su mes komo un angel di lus” i “su sirbidónan [di Satanas] tambe ta disfrasá nan mes komo sirbidónan di hustisia" (2 Kor. 11:14-15, ESV). Ki un situashon trágiko: sirbidónan di Kristu profeso trahando komo agentenan di Satanas. Pablo ta konkluí su pensamentu dor di bisa ku nan "fin lo ta di akuerdo ku nan obranan" (2 Kor. 11:15, NKJV).

Despues di a eksponé e maestronan falsu komo agentenan di Satanas (2 Kor. 11:1-15), awor Pablo ta “hunga” nan wega dor di gaba un tiki manera un bobo lo por hasi (2 Kor. 11:16-21) pa asina e korintionan por a mira kon sin sentido tabata pa duna oido na e palabranan di e maestronan falsu. Si e korintionan tabata tene nan den estima haltu, Pablo tabata meresé konsiderashon mas haltu. Su sufrimentunan pa e evangelio ta demostrá ku e tabata un sirbidó fiel di Kristu (2 Kor. 11:22-23).

Lesa 2 Korintionan 11:22-28. Ki punto Pablo ta trese dilanti aki?

Miéntras ku e kredensialnan hudiu di Pablo ta idéntiko na esnan di e maestronan falsu (2 Kor. 11:22), su sirbishi na Kristu ta surpasá esnan di nan (2 Kor. 11:23). “Nan ta ministernan di Kristu?” e ta puntra. E kontesta ta “Mi ta mas.” Su trabounan tabata mas abundante; su enkarselashonnan, mas frekuente; su gòlpinan, mas severo.

Pero esaki no ta tur. Su lista di sufrimentu ta inkluí tambe sinku momento di trintinuebe golpi (2 Kor. 11:24), sota ku bara, piedramentu, noufragio, peliger den awanan hundu (2 Kor. 11:25), peliger riba biahenan, peliger di riunan, peliger di bandidunan, peliger di paisanonan, peliger di paganonan, peliger den statnan yen di hende, peliger den pais desolá, peliger riba laman, peliger di kreyentenan falsu (2 Kor. 11:26), trabounan pisá, trabounan kansante, nochinan sin soño, hamber, set, skarsedat di kuminda, friu i desnudes (2 Kor. 11:27). Komo si fuera esei no tabata sufisiente, ainda e mester a dil ku angustia mental pa motibu di su ansiedat profundo pa e iglesianan (2 Kor. 11:28).

Solamente un berdadero sirbidó di Kristu lo tabata dispuesto pa sufri asin’akí pa e evangelio. Si Pablo mester a gaba realmente tokante su sufrimentunan, e tabatin hopi kos di bisa. Sinembargo, e siguiente sekshon di e karta ta mustra ku e motibu pa su gabamentu no tabata basá riba loke el a hasi pa Kristu sino riba loke Kristu a hasi p’e. Pablo tabata sa ku e poder di Dios ta ser desplegá mas visibelmente den debilidat humano (2 Kor. 12:9,10). Dor di dun’é un sumpiña den karni (2 Kor. 12:7), Dios a protegé Pablo di gaba tokante su logronan. Esaki a ten’é humilde, konsiente di su debilidat, dependiente di poder divino, i den e kondishon di risibí mas di e grasia i mizerikòrdia di Dios.

Den 2 Korintionan 12:14-13:10, Pablo ta informá e iglesia tokante su di tres bishita (2 Kor. 12:14, 2 Kor. 13:1). El a demostrá ku e no ta inferior na ningun di e apòstelnan falsu i awor e tin konfiansa di bin Korinto un biaha mas i purba di restorá miembronan ku no a arepentí. De echo, esaki tabata un di e propósitonan prinsipal di e bishita akí. Tur loke Pablo a hasi i papia tabata destiná pa edifikashon di e iglesia (2 Kor. 12:19).

Lesa 2 Korintionan 12:20,21. Kua pikánan tabata pone e kondishon spiritual di e iglesia di Korinto na peliger?

E lista di pikánan den 2 Korintionan 12:20,21 ta similar na otronan ku ta haña otro kaminda den e kartanan di Pablo (Rom. 1:29-31, Gal. 5:19-21). E promé dos puntonan ta aparesé den 1 Korintionan 3:3, kaminda Pablo ta referí na yalursheit i pleitu entre e miembronan na Korinto. Pablo tin miedu ku kosnan lo no ta muchu diferente pa momento di su di tres bishita. E ta bisa: “Mi tin miedu ku kisas ora mi bini lo mi no haña boso manera mi ta deseá.” Al kontrario, e ta bisa: “Boso lo hañami no manera boso ta deseá” (2 Kor. 12:20, ESV). Esaki ta nifiká ku en bes di trata ku nan “pa medio di e mansedumbre i suavedat di Kristu” (2 Kor. 10:1, ESV), e lo ta awor “kla pa kastigá tur desobedensia” (2 Kor. 10:6, ESV).

Su preokupashon prinsipal ta ku e miembronan ei ku tabata enbolbí ku “impuresa, inmoralidat seksual i sensualidat” kisas no a arepentí (2 Kor. 12:21, ESV). I ta pikánan manera esakinan ta kousa divishon den iglesia.

Siguientemente, Pablo ta enfoká riba e ròl di disiplina di iglesia pa restourá esnan den piká (2 Kor. 13:1-4). Debilidat no ta un èksküs pa un manera di biba pekaminoso. Tin poder disponibel pa esnan ku ke biba un bida viktorioso (2 Kor. 13:4). E echo ku algun hende na Korinto a praktiká piká seksual ta evidensia ku e poder di Dios no tabata un realidat den nan bida. Pablo tabata ke pa nan arepentí i eksperensiá e poder ku ta hiba na obediensia. Disipliná nan tabata e último kos ku e ker a hasi. E ta bisa: “Nos ta resa na Dios pa boso no hasi malu ..., sino pa boso hasi loke ta korekto. ... Boso restourashon ta loke nos ta resa p’e” (2 Kor. 13:7-9, ESV). Ki un orashon bunita! E ta pidi nan pa saminá nan mes pa wak si nan ta den e fe.