"Nos ta ser afligí den tur manera, ma no aplastá; perpleho, ma no impulsá pa
desesperashon; persiguí, ma no bandoná; tumbá abou, ma no destruí; kargando den nos
kurpa semper e morto di Hesus, pa asina e bida di Hesus tambe por ser manifestá den nos
kurpa”
(2 Korintionan 4:8-10, ESV).
Siman pasá nos a mira ku Pablo, dor di afirmá su simplesa i sinseridat, a defendé su mes
di e akusashonnan di inkonstansia i falta di amor pa ku e korintionan. Semper el a traha
pa e mihó interes di su yunan spiritual. El a kuminsá un liña di pensamentu den 2
Korintionan 2:12-17 ku ta bai te na 2 Korintionan 7. Miéntras e ta hasi esei, e ta
reflekshoná riba kon un ministerio outéntiko pa Kristu ta. Nos por saka asina tantu lès
for di e pensamentunan di Pablo den e sentido ei.
E siman akí nos lo wak den 2 Korintionan 3-7, kaminda Pablo ta papia di su ministerio di
gana alma pa Kristu. Ellen G. White ta bisa: “E kombershon di pekadornan i nan
santifikashon atraves di e bèrdat ta e prueba di mas fuerte ku un minister por tin ku
Dios a yam’é na e ministerio. E evidensia di su apostolado ta skirbí riba kurason di
esnan kombertí, i ta ser testiguá pa medio di nan bida renobá. Kristu ta ser formá
paden, e speransa di gloria. Un minister ta ser fortalesé grandemente dor di e seyonan
akí di su ministerio."--The Acts of the Apostles, p. 328.
Djadumingu
30 di ougùstùs
Frutanan di un Ministerio Outéntiko
Lesa 2 Korintionan 3:1-9. Den ki sentido nos por
ta un karta di Kristu?
Kartanan di rekomendashon tabata komun den e mundu grekoromano. Sinembargo, Pablo no tabata
hiba kartanan asina. E poder transformativo di e Spiritu den bida di e korintionan tabata
prueba di su ministerio outéntiko. Tòg, Pablo tabata sigur ku no tabata pa medio di su
inteligensia òf esfuersonan ku e iglesia na Korinto a bini na eksistensia (2 Kor.
3:4-6). E no tabata envolví den promoshon propio (2 Kor. 3:5, 1 Kor. 2:2).
Pablo ta papia tokante su ministerio dor di diskutí brevemente e dos paktonan: esun bieu
representá pa Moises i esun nobo representá pa Pablo i su koleganan. Un lektor purá por
pensa ku e pakto bieu no a duna ningun speransa di salbashon, ma esaki no ta bèrdat.
Salbashon tabata disponibel tantu den e Aliansa Bieu komo den e Nobo. E Aliansa Bieu tabata
e evangelio premirá. “I e Skritura, mirando di antemano ku Dios lo a hustifiká e paganonan
pa medio di fe, a prediká e evangelio na Abraham di antemano, bisando: ‘Den bo, tur e
nashonnan lo ser bendishoná’ ” (Gal. 3:8, NKJV).
Den 2 Korintionan 3:1-4:6 nos por mira ku e Aliansa Bieu ta ser usá pa simbolisá e
eksperensia legalista di esnan ku tabata dependé di nan mes obranan di obediensia komo e
medio pa agradá Dios. E Aliansa Nobo, sinembargo, ta representá e eksperensia di esnan ku ta
dependé kompletamente riba e grasia di Dios pa hasi tur loke Dios a primintí di hasi pa nan
i den nan.
Pablo ta papiando tokante dos diferente kontesta, di kreyentenan i no kreyentenan, na e
evangelio. E no ta papiando tokante evangelionan diferente, un den Tèstamènt Bieu i un
diferente den esun Nobo, pasobra tin solamente un evangelio, ofresé dor di Dios, "kende a
salba nos i a yama nos ku un yamada santu, no di akuerdo ku nos obranan, sino di akuerdo ku
Su propio propósito i grasia ku a ser duná na nos den Kristu Hesus promé ku tempu a
kuminsá" (2 Tim. 1:9, NKJV).
“Esaki no ta nenga ku 2 Korintionan 2:14-4:6 ta kontené algun elemento históriko.”--Skip
MacCarty, In Granite or Ingrained?: What the Old and New Covenants Reveal about the
Gospel, the Law, and the Sabbath (Berrien Springs, MI: Andrews University Press,
2007), p. 120. Pero Pablo ta usando e historia ei pa splika ku algun meimei di nan “ta ser
salbá” i algun “ta peresé” (2 Kor. 2:15, NKJV). Pa motibu di e reakshon, esun di
inkredulidat i falta di fe pa ku e ministerio di Moises, su ministerio por ser mirá komo un
ministerio di kondenashon i morto. Pasobra e iglesia na Korinto a kere, e ministerio di
Pablo meimei di nan a resultá di ta un ministerio di hustisia, un ministerio di e Spiritu ku
ta duna bida.
Djaluna
31 di ougùstùs
Sufrimentu i Gloria
Lesa 2 Korintionan 4:7-18. Traha un lista di e
sufrimentunan di Pablo. Kon el a soportá su sufrimentunan?
John Huss, e gran reformadó di e Bohemia antiguo, a yega di bisa tokante Hesus: “E ta Doño
di mundu, i nos ta mortalnan despresiabel, sinembargo El a sufri! Dikon, antó, nos no mester
sufri tambe, partikularmente ora sufrimentu ta pa nos un purifikashon?”--Ellen G. White,
The Great Controversy, p. 105.
Apòstel Pablo a manifestá siglonan anterior e mesun boluntat pa sufri pa Kristu. E tabata sa
ku e no tabata nada mas ku un wea frágil trahá di klei (2 Kor. 4:7). Konstantemente
e tabata sinti su mes primí, perpleho, persiguí i tumbá abou, i tòg e no tabata aplastá, den
desesperashon, bandoná òf destruí (2 Kor. 4:8-9). E tabata dispuesto pa hiba “den e
kurpa e morto di Hesus, pa asina e bida di Hesus” ser manifestá den dje (2 Kor. 4:10-11,
ESV).
Ku “morto di Hesus,” probablemente Pablo tabata ke men e sufrimentunan ku el a menshoná den
e versíkulonan anterior. Na su turno, den un sentido inmediato, e frase “bida di Hesus”
probablemente ta referí na e liberashonnan for di morto òf e poder spiritual pa e bida
presente. Pero, finalmente, esaki ta un referensia na e resurekshon (2 Kor. 4:12).
Interesantemente, e frase “morto i bida” ta aparesé tres biaha den 2 Korintionan 4:10-12.
Esaki ta un rekordatorio ku, den e era presente, bida ta mesklá ku morto. Sinembargo, den e
futuro gloria, nos lo eksperensiá bida den ousensia di morto (Rev. 20:14, Rev.
21:4).
Mas importante ainda, 2 Korintionan 4:7-18 ta mustra ku e evangelio ta ser prediká atraves
di sernan humano frágil pa asina e gloria bai na Dios so (2 Kor. 4:15). Ta
frekuente ku mishoneronan ta sufri den transkurso di nan trabou di mishonero. Sinembargo,
nos aflikshon aki ta lihé i momentáneo ora e ser kompará ku e peso eterno ei di gloria ku ta
spera nos (2 Kor. 4:17). E kreyente ta biba pa medio di fe, no pa medio di bista
(2 Kor. 4:18, 2 Kor. 5:7).
E speransa akí den bida futuro a kapturá e mente di Pablo asina tantu ku e ta sigui papia di
dje den fluho di e pasashi (2 Kor. 5:1-10). E ta referí na su kurpa mortal pa medio
di e metáfora di un kas terenal. Kontrario na esaki, e "edifisio di Dios" ta un metáfora pa
e kurpa resusitá (2 Kor. 5:1), e gran speransa pa kreyentenan di tur siglo.
Djamars
1 di sèptèmber
Ministerio di Rekonsiliashon enfoká riba Kristu
Lesa 2 Korintionan 5:11-15. Kon e pasashi akí ta
demostrá ku e ministerio di Pablo ta sentrá riba Kristu?
Pablo tabata sa ku e tabata suponé di a duna kuenta di su ministerio na Kristu (2 Kor.
5:10). E tabata konosé “e temor di SEÑOR” i a buska pa konvensé hende tokante e
evangelio di Kristu (2 Kor. 5:11, ESV). E temor akí ta reverensia i temor pa ku
Kristu i, p’esei, e ta kombiná ku e amor di Pablo pa Kristu i konfiansa den e amor di Kristu
p’e. Den Tèstamènt Bieu, teme Señor ta nifiká kana den Su kamindanan, stim’E, i sirbiE ku
henter bo kurason i alma (Deut. 10:12).
E ministerio di Pablo no ta enfoká riba su mes sino enfoká riba Kristu. E no a elogiá su
mes. E motibu di su gabamentu ta Kristu (2 Kor. 12:9). El a bisa: “Ma leu for di mi
pa nunka gaba eksepto di e krus di nos Señor Hesu-Kristu” (Gal. 6:14, ESV). Pues, e
oportunidat di e korintionan pa gaba di dje (2 Kor. 5:12) ta nifiká ta orguyoso di
su ministerio enfoká riba Kristu, kontrali na e ministerio enfoká riba mes di su
oponentenan.
Lesa 2 Korintionan 5:16-21, Kolosensenan 1:19-23 i
Efesionan 2:13-16. Kiko Pablo tabata ke men ku “ministerio di rekonsiliashon”?
Kristu ta e minister di rekonsiliashon pa ekselensia. Komo tal, El “a duna nos e
ministerio di rekonsiliashon” (2 Kor. 5:18, NKJV). E idea di rekonsiliashon ta
aparesé bes tras bes den henter 2 Korintionan 5:16-21. Esaki ta un konsepto esensial pa
Pablo, i asina e mester ta pa nos tambe.
Dios a rekonsiliá humanidat ku Su mes pa medio di e morto ekspiatorio di Su Yu. Esnan ku a
ser rekonsiliá ku Dios ta un kreashon nobo (2 Kor. 5:17). Awor, nan ta suponé di
pasa e “mensahe di rekonsiliashon” akí dilanti dor di proklamá e evangelio di Kristu (2
Kor. 5:19, ESV). Den e sentido akí, “nos ta embahadornan pa Kristu, komo si fuera
Dios tabata roga dor di nos” (2 Kor. 5:20, NKJV).
Djárason
2 di sèptèmber
Yamada na Santidat
Den 2 Korintionan 6:3-10, Pablo ta keda enkurashá e korintionan pa rekonsiliá ku Dios. E ta
presentá un lista largu di difikultat i triunfo pa mustra kiko ta nifiká pa ta un siguidó di
Kristu i un minister di Dios. Den kòrtiku, e ta menshoná situashonnan difísil (2 Kor.
6:4-5), birtutnan di karakter (2 Kor. 6:6), ekipo pa ministerio (2
Kor. 6:7), i insiguridatnan di ministerio (2 Kor. 6:8-10). Despues di a
instruí e miembronan na Korinto pa rekonsiliá ku Dios, Pablo ta hasi un apelashon pa nan
biba un bida santu, i pa hasi esaki dor di separá nan mes for di e influensia dañino di
inkrédulonan i for di kosnan impuru (2 Kor. 6:14-17).
Lesa 2 Korintionan 6:11-7:1. Di akuerdo ku e
pasashi akí, kon un bida santu ta?
Pablo ta enfatisá den e pasashi akí e importansia di kariño i amor denter di e iglesia
(1 Kor. 6:11-13). E evidensia ku hende a rekonsiliá ku Dios ta ku nan ta buska
rekonsiliashon un ku otro. En bèrdat, nan ta bira, komo si fuera, agentenan di
rekonsiliashon horizontal.
Siguientemente, e yamada na santidat ta ser duná pa medio di seis apelashon, esta:
“No sea di yugo desigual ku inkrédulonan” (2 Kor. 6:14,
NKJV);
"Sali for di meimei di nan" (2 Kor. 6:17, NKJV);
"Sea separá" (2 Kor. 6:17, NKJV);
"No mishi ku loke ta impuru" (2 Kor. 6:17, NKJV);
“Laga nos purifiká nos mes di tur impuresa di kurpa i spiritu” (2 Kor.
7:1, ESV);
Hasi santidat perfekto den e temor di Dios" (2 Kor. 7:1, RSV; énfasis
suministrá).
E eksortashonnan akí ta mustra ku un Dios santu ta rekerí un bida santu i separashon for di
idolatria.
Di otro banda, e pasashi ta trese tambe shete promesa ku ta destaká e ròl di e iglesia
kristian komo un tèmpel santu:
“Lo Mi biba den nan”;
[Lo Mi] kana meimei di nan";
“Ami lo ta nan Dios”;
"Nan lo ta Mi pueblo";
"Lo Mi risibíbo";
"Lo Mi ta un Tata pa boso";
"Boso lo ta Mi yunan hòmber i yunan muhé" (2 Kor. 6:16,17,18, NKJV).
Nota ku e kuater promesanan den 2 Korintionan 6:16 ta e base pa e tres imperativonan den 2
Korintionan 6:17 (ripará e palabra “p’esei” na kuminsamentu di 2 Korintionan 6:17).
Esaki ta demostrá ku santidat no ta resultado di un hende su esfuersonan sino e obra di
Spiritu Santu den e kurason. Aunke santidat ta resultá di Dios, kreyentenan mester hasi nan
parti i rechasá idolatria i tur práktika impuru.
Djaweps
3 di sèptèmber
Konsuelo i Goso
Lesa 2 Korintionan 7. Kiko ta Pablo su
sintimentunan ora el a tende ku e korintionan a arepentí?
Kuantu amor ta flui for di e palabranan "Bo ta den nos kurason" (2 Kor. 7:3, NKJV; lesa
tambe 2 Kor. 6:11). Den su deseo profundo pa haña su amor korespondé, Pablo ta bisa
tambe: “Traha lugá den boso kurason pa nos” (2 Kor. 7:2, ESV). Miéntras ku e frase
“den boso kurason” no ta den e teksto griego, mayoria vershon ingles ta suministr’é, loke ta
korekto pasobra e konteksto ta sosten’é.
En bèrdat, e korintionan a habri nan kurason pa Pablo i su kompañeronan di trabou. Esaki ta
e motibu pakiko versíkulo 4 ta un ráfaga di goso. E palabranan di Pablo ta ekspresá kon
positivo su sintimentunan ta na e momentu akí: “Grandi ta mi kurashi pa papia ku boso,
grandi ta mi gabamentu na boso fabor. Mi ta yená ku konsuelo. Mi ta sumamente gososo den tur
nos tribulashon" (2 Kor. 7:4, NKJV). Pablo ta yená ku konsuelo i goso. Kuantu
konsuelo i goso nos iglesianan por trese na kurason di nan ministernan dor di komprometé nan
mes fielmente na Kristu.
Den 2 Korintionan 7:5-16 Pablo ta splika mas aleu e motibu di su konsuelo i goso. E dos
konseptonan akí ta dominá e pasashi. E verbo parakaleō (“konsolá”) òf e sustantivo
paraklēsis (“konsuelo”) ta aparesé huntu un total di shete biaha den 2 Korintionan
7. E sekshon akí di e karta ta terminá meskos ku el a kuminsá, esta, ku hopi konsuelo den
Dios (2 Kor. 1:3-7). Pablo su konsuelo den 2 Korintionan 7 ta bini di e alivio ku
el a eksperensiá pasobra e karta severo a produsí e efekto ku e tabata intenshoná p’e.
Aunke e alivio akí ta resultado di e informe positivo di Tito, finalmente, Dios ta e agente
di e konsuelo ku Pablo a eksperensiá (2 Kor. 7:6). Dios enbèrdat ta e “Dios di tur
konsuelo, kende ta konsolá nos den tur nos tribulashon” (2 Kor. 1:3-4, NKJV).
Interesantemente, miéntras Pablo ta “yená ku konsuelo,” e ta “sumamente gososo” (2 Kor.
7:4,7,13). Aunke su karta doloroso a kousa hopi tristesa, esei tabata un tristesa
di akuerdo ku e boluntat di Dios ku arepentimentu intenshoná (2 Kor. 7:9-11, NASB).
E korintionan “a bira tristu na un manera piadoso” (2 Kor. 7:11, NKJV), un tristesa
ku ta produsí “arepentimentu ku ta hiba na salbashon” (2 Kor. 7:10, NKJV). Kiko mas
por trese mas goso den kurason di un minister outéntiko di Dios?
Djabièrnè
4 di sèptèmber
Pa mas Estudio
Lesa Ellen G. White, "The Message Heeded," p. 323-334, den The Acts of the
Apostles.
Siman pasá nos a lesa e pasashi sitá aki riba den The Acts of the Apostles. Ta bale
la pena pa bolbe les’é. E biaha akí, reflekshoná un tiki mas riba e partinan ku ta referí na
e karta severo di Pablo, su sintimentunan ora el a skirbié, i su goso ora el a risibí e bon
notisia tokante e repentimentu sinsero di e destinatarionan. Despues, reflehá riba loke
esaki ta bisa nos tokante e outentisidat di Pablo su ministerio i ki lèsnan nos por apliká
na nos trabou pa Kristu.
“Nos mester revelá na universo, na e mundu kaí i na e mundunan no kaí, ku tin pordon ku
Dios, ku pa medio di e amor di Dios nos por ser rekonsiliá ku Dios. Hende ta arepentí, ta
bira arepentí den kurason, ta kere den Kristu komo su sakrifisio ekspiatorio, i ta realisá
ku Dios ta rekonsiliá kuné.”--Ellen G. White, Special Testimonies On Education, p.
223.
“Komo iglesia, nos a risibí gran lus. E lus akí Señor a konfia na nos pa benefisio i
bendishon di mundu. Na nos a ser duná e ministerio di rekonsiliashon. Ku poder for di ariba
nos mester roga hende pa ser rekonsiliá ku Dios.”--Ellen G. White, Karta 32, 1903.
Unabes rekonsiliá ku Dios, hende mester buska santidat. Komentando riba 2 Korintionan 7:1,
Ellen G. White ta insinuá kiko Pablo tabata ke men ku “perfekshoná santidat den e temor di
Dios” (2 Kor. 7:1, NKJV). E ta bisa ku Pablo a buska pa yuda e konversonan nobo “pa
bira kristiannan outosufisiente, kresiente, fuerte den fe, ardiente den zelo, i di henter
kurason den nan konsagrashon na Dios i na e obra di avansá Su reino.”--Ellen G. White,
The Acts of the Apostles, p. 201.
Preguntanan pa Diskushon:
Pablo ta referí na nos komo “pòchinan di klei” ku ta kontené e tesoro di e evangelio
(2 Kor. 4:7, ESV). Kon e echo ku e kondishon humano ta débil, frágil, i
yená ku limitashonnan por mehorá mas bien ku mina e proklamashon di e evangelio?
Kiko ta nifiká pa ta un "kreashon nobo" (2 Kor. 5:17, NKJV)? Kon esaki ta
afektá nos bida diario? Kon Kristu a hasibo un kriatura nobo?
Den 2 Korintionan 6:4,5 Pablo ta proveé un lista largu di difikultatnan pa motibu di
e evangelio. Kon el a reakshoná riba su sufrimentunan (lesa 2 Kor. 6:6,7)?
Kon esaki ta yudabo reakshoná riba esnan di bo?
Pablo ta kontrastá tristesa divino ku tristesa mundano (2 Kor. 7:10). Den
ki forma tristesa por ta relashoná ku arepentimentu? Kon lo bo deskribí tristesa
divino den kontraste ku tristesa mundano?
